युहन्ना 19
19
येसुजिके क्रुसमा टाँङेके आग्या
(मति २७:१५-३१; मरकुस १५:६-२०; लुका २३:१३-२५)
1वकरपाछा पिलातस येसुजिके लिगलिय हसे कोडा लगावेके हुकुम देलिय। 2तब सिपहियावाह काँटक मकुट बिनके हुनेक मुडियामा लगादेलइ हसे हुनेके जामुक रङक झोलिया पेहरादेलइ। 3वकरपाछा येसुजि लघिना हुसेहुस याके, “यहुदियानिक राजा, नमस्कार!” कहके गिल्ला करलइ हसे हुनेक मोहडवामा थपरोलइ।
4पिलातस फेरि बाहरा निकडके भिडवाक मन्सावानिके कहलिय, “हेरह, मुइ यकरेके तोहार लघिना बाहरा यनइ बडहिँ, ताकि तोहार थाह हखइ कि, मुइ यकरमा किहो दोस हइने पउलहिँ।” 5तब काँटक मकुट हसे जामुक रङक झोलिया पेहरलहिँ येसुजि बाहरा यलसि हसे पिलातस मन्सावानिके कहलिय, “लो हेरह, इअ मन्सावाके!”
6जब मुख्य पुजेरियाह हसे सिपहियावाह येसुजिके देखलइ, हुनुका जबड माहे चिल्लाके यसके कहलइ, “वकरेके क्रुसवामा टाँङहुँ, वकरेके क्रुसवामा टाँङहुँ!”
पिलातस हुनुकाके कहलिय, “तोहरा यपनहिँ यकरेके लिगाके क्रुसवामा टङह, केहकेकि मुइ यकरमा किहो दोस हइने पउलहिँ!”
7तब यहुदि यगुवासभ वकरेके जवाफ देते कहलइ, “हमार एगुडा नियम बडइ हसे उअ नियम यनुसार इअ मरहिँ परतइ, केहकेकि इअ यपनहिँके परमेस्वरक पुतर कहके दाबि करले बडिय।”
8इअ बतवा सुनलेपर पिलातस झन डेरेलिय। 9उअ फेरि दरबरवा भितरा पेसलिय हसे येसुजिके पुछलिय, “तुइ कहवाँक हखहि?” बाकि येसुजि वकरेके किहो जवाफ हइने देलसि। 10पिलातस हुनेके कहलिय, “कथि तुइ मोरसाङे नाहिँ फदकबहि त? कथि तोर हइने थाह बडइ, तोरके छाडेके हसे क्रुसवामा टाँङेके फेनि मोर अधिकार बडइ।”
11तब येसुजि जवाफ देते कहलसि, “यपनहुँके वपरासे अधिकार नाहिँ दियाइल रहतिय त, मोर वपरा यपनहुँक किहो अधिकार नाहिँ रहतिय। उहेसे मोरके यपनहुँक लघिना सपदेलहरा झन जबड पापक दोसि बडिय।”
12इअ सुनके पिलातस येसुजिके छाड देवेके कोसिस करलिय। बाकि यहुदियाह चिलइते यसके कहलइ, “यगर यपनहुँ यकरेके छडबहुँ जउँ, यपनहुँ कइसरक सङहतिया हइने हखहुँ। जुने यपनहिँके राजा हखहि कहके कहसिय उअ कइसरक विरोधि हखसिय।”
13जब पिलातस इअ बतवा सुनलिय, उअ येसुजिके दरबरवासे बाहरा यनलिय हसे न्याय करना ठउरियामा बइठलिय, जकरेके “पत्थराक यङना” कहसइ। (उअ ठउरियाके हिब्रु भासामा गब्बथा कहसइ।) 14उअ दिन निस्तार-पबनियाक तयारिक दिन रहलइ हसे दिनक लगभग बारह बजल रहलइ।
पिलातस यहुदियानिके कहलिय, “हेरह, इहे तोहार राजा हखिय!”
15बाकि हुनुका चिल्लाके यसके कहे लगलइ, “यकरेके लिगह, यकरेके लिगह! क्रुसवामा टाँङदेह!”
पिलातस हुनुकाके पुछलिय, “कथि मुइ तोहार रजवाके क्रुसवामा टाँङ देउ?”
तब मुख्य पुजेरियाह जवाफ देके कहलइ, “कइसर बाहेक हमार याको कुनहुँ राजा हइने बडइ।” 16तब पिलातस हुनेके क्रुसवामा टाँङेके तहिँया हुनुकर हथवामा सपदेलिय। उहेसे सिपहियावाह येसुजिके लेले गेलइ।
येसुजि क्रुसमा
(मति २७:३२-४४; मरकुस १५:२१-३२; लुका २३:२६-४३)
17येसुजि यापन क्रुसवा यपनहिँ बोकके खप्परे कहल ठउरियामा गेलसि, उअ ठउरियाके हिब्रु भासामा गलगथा कहसइ। 18उअ ठउरियामा पुगके हुनुका येसुजिके क्रुसवामा टङलइ हसे हुनेसाङे याको दु जनके फेनि टङलइ, एक जनके हुनेक दहिनिकलहरवा हसे दोसरिके लबडिकलहरवा टङलइ। येसुजि हुनुकर बिचा टङाइल रहलसि।
19पिलातस एगुडा दोस-पतर फेनि लिखलिय हसे क्रुसवामा टाङेके हुकुम देलिय। वकरमा “नासरतक येसु, यहुदियानिक राजा” कहके लिखाइल रहलइ। 20उअ दोस-पतरमा लिखइलि बतवा बहुत जन यहुदिसभ पढलइ, केहकेकि येसुजि क्रुसवामा टङइलि ठउरिया सहरवाक लजिके रहलइ हसे उअ दोस-पतर हिब्रु, ल्याटिन तके ग्रिक भासामा लिखाइल रहलइ। 21तब यहुदियानिक मुख्य पुजेरियाह पिलातसके कहलइ, “‘यहुदियानिक राजा’ कहके झिन लिखदेहुँ, बाकि ‘इअ मुइ यहुदियानिक राजा हखहि कहले रहलिय’ कहके लिखदेहुँ।”
22पिलातस जवाफ देलिय, “भेलइ, मुइ जथि लिखदेलहिँ, उअ लिखदेलहिँ।”
23तब सिपहियावाह येसुजिके क्रुसवामा टाङसकलेपर हुनेक लुगवा लेके जम्मे जनके एकहक गो बखरा परइ कहके चार बखरा लगोलइ। हुनेक बाहराक लुगवा फेनि लेलइ, बाकि उअ लुगवा सिउनि हइने भेल वपरासे तरलइ बिनाइल रहलइ।
24इअ देखके हुनुका एक-दोसरि जनसाङे कहलइ, “यकरेके नाहिँ फारु, बरु इअ काकर बखरामा परतइ कहके चिठा घालु।”
धरमसास्तरवामा लिखइलि बतवा पुरा हखइ कहके इअ भेलइ। धरमसास्तरवामा यसके लिखाइल बडइ,
“हुनुका मोर लुगवा एक-दोसरि जनसाङे बटलइ,
हसे मोर बाहराक लुगवाक तहिँया चिठा घललइ।”#भजन २२:१८
उहेसे सिपहियावाह वसने करलइ।
25येसुजिक क्रुसवाक लजिके हुनेक दाओ, हुनेक दाओक बहिनिया, क्लोपासक जनियावा मरियम हसे मरियम मग्दलिनि ठडियाइल रहलइ। 26जब येसुजि यापन दाओके हसे वकर लजिके हुनेक प्रेम करलि चेलवाके ठडियाइल देखलसि, तब हुने यापन दाओके कहलसि, “अइ दाओ, हेरहि, इअ तोर बेटा हखिय!” 27हसे हुने उअ चेलवाके कहलसि, “हेरहि, इअ तोर दाओ हखिय।” उअ दिनवासे उअ चेलवा येसुजिक दाओके यापन घरवामा लिगलिय।
येसुजिक मृत्यु
(मति २७:४५-५६; मरकुस १५:३३-४१; लुका २३:४४-४९)
28जब येसुजि जम्मे काम याबे वरेलइ कहके जनलसि, हुने धरमसास्तरवामा लिखइलि बतवा पुरा हखइ कहके “मोर पियास लगलइ” कहलसि।#भजन ६९:२१; भजन २२:१५ 29वहवाँ यामित रससे भरल एगुडा भडिया रहलइ। सिपहियावाह वकरमा एगुडा चथरि डुबोलइ हसे हिसपक डरवामा यटकाके हुनेक मुहवामा लगादेलइ। 30येसुजि यमति रसवा चिखके कहलसि, “याबे पुरा भेलइ।” वकरपाछा हुने यापन मुडिया ओन्हगातके यापन प्रान त्याग देलसि।
31उअ दिन विसराम दिनक तयारिक दिन रहलइ हसे दोसरि दिन निस्तार-पाबनि परलेसे विसेस दिन रहलइ। उहेसे विसरामक दिनवामा लसवासभके क्रुसवामा झिन रहइ कहके यहुदि यगुवासभ पिलातसक लघिना गेलइ हसे क्रुसवामा टङेलि मन्सावाह हलहालि मरइ कहके हुनुकर टङवा टुरइ तके लसवा तर नभाके लिगइ कहके माङ करलइ। 32तब सिपहियावाह यलइ हसे येसुजिसाङे क्रुसवामा टङइलि दुन्हु मन्सावानिक टङवा टुरदेलइ। 33बाकि जब हुनुका येसुजि लघिना याके हुनेके मरसकल देखलइ, तब हुनेक टङवा हइने टुरलइ। 34बाकि एक जन सिपहियवा येसुजिक कोखवामा भालासे छिदलिय हसे वइघरहिँ रकत तके पानि निकडलइ। 35जुन मन्सावा यपने यखियासे देखले बडिय, उअ यकर गवाहि देइ बडिय हसे वकर गवाहि सत्य बडइ। वकर थाह बडइ कि उअ सत्य बात फदकइ बडिय हसे तोहरा फेनि विस्वास करह कहके, उअ इअ लिखले बडिय। 36केहकेकि “हुनेक एगुडा हडवा फेनि नाहिँ टुटतइ” कहके धरमसास्तरवामा लिखइलि बतवा पुरा हखइ कहके इअ भेल हखइ,#गन्ति ९:१२; भजन ३४:२० 37हसे धरमसास्तरवामा फेरि दोसरि ठउरियामा यसके लिखाइल बडइ, “जकरेके हुनुका छिदले बडइ, हुनुका हुनेके हेरतइ।”#जकरिया १२:१०; प्रकास १:७
येसुजिक दफन
(मति २७:५७-६१; मरकुस १५:४२-४७; लुका २३:५०-५६)
38अरिमाथिया सहरवासे याइल योसेफ नाउँ भेल एक जन येसुजिक चेला रहलिय। यहुदि यगुवानिक डरेसे उअ याको जन थाह झिन पवइ कहके विस्वास करले रहलिय। याबे उअ येसुजिक लसवा लिगाए पाउ कहके पिलातससाङे मङलिय। पिलातस अनुमति देलिय हसे योसेफ जाके येसुजिक लसवा क्रुसवासे झारके लिगलिय। 39तखनहिँ योसेफसाङे येसुजिके राति भेटे गेलहरवा निकोदेमस फेनि रहलिय। उअ लगभग तेतिस किलो मुरर हसे एलवाक गाछसे बनावल महकाह बसान तेल यनलिय। 40हुनुका यहुदियानिक चलन यनुसार येसुजिक लसवामा बसान तेल लगोलइ हसे वकरमा सुतिक लुगा घेउटके चिन्डियामा धरेके तहिँया तयार करलइ। 41येसुजिके क्रुसवामा टङलि ठउरियामा एगुडा बगिचा रहलइ। उअ बगिचवामा एगुडा लउठा चिन्डि रहलइ, जाकरमा कहियो फेनि लास हइने धराइल रहलइ। 42यहुदियानिक बिसरामक तयारिक दिन भेलेसे हसे उअ चिन्डिया फेनि लजिके भेलेसे, हुनुका येसुजिक लसवा उहे चिन्डियामा धरलइ।
Currently Selected:
युहन्ना 19: CTHR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
