युहन्‍ना 18

येसुजिके पकडलइ

(मति २६:४७-५६; मरकुस १४:४३-५०; लुका २२:४७-५३)

1इअ बतवा कहसकलेपर येसुजि यापन चेलवानिसाङे किद्रोन कहल खोल्‍सियाक वाहिकरवा गेलसि। वहवाँ एगुडा बगिचा रहलइ। येसुजि हसे हुनेक चेलवा वहवाँ पेसलइ। 2उअ ठउरिया हुनेके पकडा देलहरवा यहुदाक फेनि थाह रहलइ, केहकेकि येसुजि यापन चेलवानिसाङे वहवाँ जाइ रहसि। 3तखनहिँ एक दल सिपाहिसभ हसे मुख्‍य पुजेरियानिक तके फरिसियानिक पठावल मन्‍दिरवा वगरलहरानिके लेले यहुदा वहवाँ यलिय। हुनुका डिबरि, उका हसे हथियारसभ बोकले रहलइ।

4यापन वपरा यइना जम्‍मे बतवा येसुजिक थाह रहलइ। उहेसे हुने यागा जाके उअ मन्‍सावानिके पुछलसि, “तोहरा ककरेके खोजइ बडह?”

5हुनुका हुनेके कहलइ, “नासरतक येसुके।”

तब येसुजि कहलसि, “मुइ उहे हखहि।” तखनहिँ हुनेके पकडा देलहरवा यहुदा फेनि हुनुकरेसाङे ठडियाइल रहलिय। 6जब येसुजि हुनुकाके “मुइ उहे हखहि” कहके कहलसि, तब हुनुका जम्‍मे जन पाछा हटलइ हसे भुयवामा गिरलइ।

7येसुजि फेरि हुनुकाके पुछलसि, “तोहरा ककरेके खोजइ बडह?”

हुनुका कहलइ, “नासरतक येसुके।”

8येसुजि हुनुकाके कहलसि, “मुइ तोहराके कहसकले बडहिँ, मुइ उहे हखहि। यगर तोहरा मोरके खोजइ बडह जउँ इअ मन्‍सावानिके जाए देह।” 9“यपनहुँ मोरके जिम्‍मा देलि मन्‍सावानिके मुइ एक जनके फेनि हइने हेरोले बडहिँ” कहलि हुनेक वचन पुरा हखइ कहके इअ भेल हखइ।#युहन्‍ना ६:३९; १७:१२

10तब सिमोन पतरुस यापनसाङे भेलि तरवरवा निकडाके प्रधान पुजेरियाक बहरियावाक दहिनि कनवा चट्टे काटदेलिय। उअ बहरियावाक नाउँ माल्‍खस रहलइ।

11बाकि येसुजि पतरुसके कहलसि, “यापन तरवरवा दबवामा धरहि। कथि मोर पिताक देलि दुःखवाक कचोरवा मुइ नाहिँ पिएके त?”#मति २६:३९; मरकुस १४:३६; लुका २२:४२

हन्‍नासक यागा येसुजि

12वकरपाछा सिपहियावाह, हुनुकर कप्‍तनवा हसे यहुदियानिक मन्‍दिरवा वगरलहरासभ येसुजिके पकडके बन्‍हलइ। 13हुनुका पहिला येसुजिके हन्‍नास लघिना लिगलइ, जुने उअ बरसवाक प्रधान पुजेरिया कइयाफाक ससुर रहलिय। 14इअ उहे कइयाफा हखिय, जुने “जनताक तहिँया एक जन मन्‍से मरले डउल हतइ” कहके यहुदि यगुवासभके सल्‍लाह देले रहलिय।#युहन्‍ना ११:४९-५०

पतरुस येसुजिके इन्‍कार करलिय

(मति २६:६९-७०; मरकुस १४:६६-६८; लुका २२:५५-५७)

15तब सिमोन पतरुस हसे येसुजिक दोसरि एक जन चेलवा हुनेक पाछा लगलइ। उअ दोसरि चेलवा प्रधान पुजेरियाके चिनलेसे येसुजिसाङे प्रधान पुजेरियाक यङनवामा गेलिय। 16बाकि पतरुस बाहरा दुवरियामा ठडियाइल रहलिय। तब उअ दोसरि चेलवा, जुने प्रधान पुजेरियाके चिनले रहलिय, उअ बाहरा याके दुवरियामा ठडियइलि छउडियाके कहके पतरुसके भितरा यनलिय।

17तब दुवरियामा ठडियलि छउडिया पतरुसके कहलिय, “कथि तुइ फेनि इअ मन्‍सावाक चेलवानिमधे एक जन हइने हखहि त?”

उअ कहलिय, “मुइ हइने हखहि।”

18जाड भेलेसे बहरियावाह हसे मन्‍दिरवा वगरलहरासभ ठडियाके यागि तपइ रहलइ। तखनहिँ पतरुस फेनि हुनुकरसाङे ठडियाके यागि तापे लगलिय।

प्रधान पुजेरिया येसुजिके पुछभाख करलिय

(मति २६:५९-६६; मरकुस १४:५५-६४; लुका २२:६६-७१)

19तखनहिँ प्रधान पुजेरिया येसुजिके हुनेक चेलवानि हसे हुनेक सिछाक बारेमा पुछभाख करलिय।

20येसुजि वकरेके जवाफ देते कहलसि, “मुइ त जम्‍मे जन सुनइ कहके खुलमखुल्‍ला फदकलहिँ। मुइ सबदिन यहुदि सभाघरवाहमा हसे मन्‍दिरवामा यापन सिछा देइरहहिँ, जहवाँ जम्‍मे यहुदियाह जामा हखइ। मुइ किहो बात फेनि चुपे-चुपे हइने कहले बडहिँ। 21यपनहुँ मोरके केहके पुछइ बडहुँ? मोर कहलि बतवा सुनलहरानिके पुछहुँ। मोर कहलि बतवा हिनिकर थाह बडइ।”

22येसुजि इअ बतवा कहइकि हुनेक लजिके ठडियलि मन्‍दिरवा वगरहलरासभमधे एक जन हुनेके थपरा लगोते यसके कहलिय, “कथि तुइ प्रधान पुजेरियाके फेनि यसके मुहे-मुह लगबहिँ?”

23येसुजि वकरेके जवाफ देते कहलसि, “मुइ किहो गलत बात फदकले हखबहिँ जउँ, मोर गल्‍ति देखोहि। यगर मुइ ठिक बात फदकले बडहिँ जउँ, मोरके केहके पिटइ बडहि?” 24तब हन्‍नास येसुजिके बन्‍हइलहिँ प्रधान पुजेरिया कइयाफा लघिना पठादेलिय।

पतरुस फेरि येसुजिके इन्‍कार करलिय

(मति २६:७१-७५; मरकुस १४:६९-७२; लुका २२:५८-६२)

25तखनिलइ पतरुस ठडियाके यागि तपइ रहलिय। हुनुका वकरेके कहलइ, “तुइ फेनि उअ मन्‍सावाक चेलवानिमधे एक जन हइने हखहि त?”

उअ इन्‍कार करते कहलिय, “मुइ हइने हखहि।”

26वहवाँ पतरुसक कनवा काटदेलि मन्‍सावाक एक जन नाता परलाहर यागि तपइ रहलिय। उअ फेनि प्रधान पुजेरियाक बहरिया रहलिय। उअ पतरुसके पुछलिय, “कथि मुइ तोरके उअ मन्‍सावासाङे बगिचवामा हइने देखले रहलहि त?” 27तब पतरुस फेरि इन्‍कार करलिय हसे तखनहिँ चिङनावा बसलिय।

पिलातसक यागा येसुजि

(मति २७:१-२,११-३१; मरकुस १५:१-२०; लुका २३:१-५,१३-२५)

28वकरपाछा हुनुका येसुजिके कइयाफाक घरवासे रोमि सासकक दरबरवामा लिगलइ। तखनहिँ बिहान भेल रहलइ। हुनुका असुद्ध भेले निस्‍तार-पाबनि खाए नाहिँ पवेतइ कहके दरबरवा भितरा हइने पेसलइ। 29उहेसे पिलातस हुनुकर लघिना बाहरा निकडके पुछलिय, “इअ मन्‍सावाक विरोधमा तोहरा कथि दोस लगोबह?”

30हुनुका वकरेके कहलइ, “यगर इअ मन्‍सावा अपराधि नाहिँ रहतिय त हमरा यकरेके यपनहुँ लघिना नाहिँ सपतहुँ।”

31उहेसे पिलातस कहलिय, “तोहरा यकरेके लिगह हसे तोहार यपने व्‍यवस्‍था यनुसार यकरेके न्‍याय करिह।”

यहुदियाह पिलातसके कहलइ, “कुनहुँ मन्‍सेके फेनि मृत्‍यु दन्‍ड देवेके अधिकार हमार हइने बडइ।” 32यापन मृत्‍यु कुन तरिकासे हतइ कहके येसुजिक कहलि बतवा पुरा हखेके तहिँया यसनुक भेल हखइ।#युहन्‍ना ३:१४; युहन्‍ना १२:३२

33तब पिलातस फेरि दरबरवा भितरा पेसलिय हसे येसुजिके बलाके कहलिय, “कथि तुइ यहुदियानिक राजा हखहि?”

34येसुजि जवाफ देते कहलसि, “कथि इअ यपनहुँक यपने विचार हखइ कि याको कुनहुँ मोर बारेमा यपनहुँके कहदेलइ?”

35तब पिलातस जवाफ देते कहलिय, “कथि मुइ यहुदि हखहि? तोर यपने जतियाक मन्‍सावाह हसे मुख्‍य पुजेरियाह तोरके मोर हथवामा सपदेलइ। तुइ कथि करले बडहिँ?”

36येसुजि जवाफ देते कहलसि, “मोर राज इअ संसारक हइने हखइ। मोर राज इअ संसारक रहतिय त मोर सेवकसभ मोर तहिँया लडतिय हसे मुइ यहुदियानिक हथवामा नाहिँ परतहिँ। बाकि मोर राज इअ संसारक हइने हखइ।”

37तब पिलातस येसुजिके पुछलिय, “कथि तुइ राजा हखहि त?”

येसुजि जवाफ देते कहलसि, “मुइ राजा हखहि कहके यपनहुँ कहइ बडहुँ। मुइ यकरे तहिँया इअ संसारमा जरमल हखहि हसे सत्‍यक बारेमा गवाहि देवेके तहिँया मुइ इअ संसारमा याइल हखहि। जुने सत्‍यके प्रेम करसिय उअ मोर बात सुनसिय।”

38पिलातस हुनेके पुछलिय, “सत्‍य कथि हखइ?” यतुरा कहके उअ बाहरा निकडके यहुदियानिक लघिना गेलिय हसे कहलिय, “मुइ यकरमा किहो दोस हइने पउसहिँ। 39निस्‍तार-पबनियामा मुइ तोहार तहिँया एक जन कइदिके झ्‍यालखनवासे छाड देवेके तोहार चलन बडइ। कथि मुइ ‘यहुदियानिक रजवाके’ तोहार तहिँया छाडदेउ?”

40बाकि हुनुका चिल्‍लाके यसके कहे लगलइ, “यकरेके हइने! बारब्‍बाके छाड देहुँ!” (बारब्‍बा डाँकु रहलिय।)

Currently Selected:

युहन्‍ना 18: CTHR

Highlight

Copy