युहन्ना 17
17
येसुजिक परथाना
1इअ बतवा कहसकलेपर, येसुजि स्वरगवरि हेरके कहलसि, “हे पिता, समय यापुगल बडइ। यपनहुँक पुतरक महिमा परकट करहुँ, ताकि मुइ पुतर फेनि यपनहुँक महिमा परकट करबहिँ। 2केहकेकि यपनहुँ मोरके जम्मे मन्सावानि वपरा अधिकार देले बडहुँ, ताकि यपनहुँ मोरके देलि जम्मे जनके मुइ अनन्त जिवन देवे सकहि। 3अनन्त जिवन इहे हखइ कि, यपनहुँ एक मतरे सत्य परमेस्वरके चिनेके हसे यपनहुँक पठोलि येसु ख्रिस्टके फेनि चिनेके हखइ। 4जुन कमवा यपनहुँ मोरके जिमा देलहुँ, उअ कमवा पुरा करके धरतियामा मुइ यपनहुँके यादर देले बडहिँ। 5हे पिता, याबे यापनसाङे राखके मोरके उहे महिमा देहुँ, जुन महिमा संसारक सिरिस्टि हखलिसे यागा यपनहुँसाङे रहइकि मोर रहलइ।
यापन चेलवानिक तहिँया येसुजिक परथाना
6 “जुन मन्सावानिके यपनहुँ मोरके संसारसे देलहुँ, हुनुकाके मुइ यपनहुँके चिनोले बडहिँ। हुनुका यपनहुँक रहलइ हसे यपनहुँ मोरके देलहुँ तके हुनुका यपनहुँक वचन पालन करले बडइ। 7याबे हुनुकर थाह बडइ कि, यपनहुँ मोरके देलि जम्मे बतवाह यपनहुँसे याइल हखइ। 8केहकेकि यपनहुँक देलि सिछा मुइ हुनुकाके देले बडहिँ हसे हुनुका उअ स्विकार करलइ। मुइ यपनहुँसे याइल हखहि कहके हुनुका सदियो जनले बडइ हसे यपनहुँ मोरके पठोले हखहुँ कहके हुनुका विस्वास फेनि करले बडइ। 9मुइ हुनुकर तहिँया परथाना करइ बडहिँ। मुइ संसारक तहिँया परथाना हइने करइ बडहिँ, बाकि हुनुकर तहिँया करइ बडहिँ, जकरेके यपनहुँ मोरके देले बडहुँ, केहकेकि हुनुका त यपनहुँक हखइ। 10मोरसाङे भेलि जम्मे यपनहुँक हखइ हसे यपनहुँसाङे भेलि जम्मे मोर हखइ। हुनुकरसे मोर यादर भेल बडइ।
11 “हे पवितर पिता, यापन नाउँक सक्तिसे हिनिकर सुरछा करहुँ, जुन नाउँ यपनहुँ मोरके देलहुँ, ताकि जसने यपनहुँ हसे मुइ एक हखहुँ, वसने हिनिका फेनि एक हखइ। 12हिनिकरसाङे इअ संसारमा रहइकि यपनहुँ मोरके देलि यपनहुँक नाउँक सक्तिसे हिनिकर हेरचाह करलहिँ। मुइ हिनिकर सुरछा करलहिँ हसे हिनिकरमधे नास हखलाहर मन्सावाक बाहेक याको कुनहुँ फेनि नास हइने भेलइ। बाकि धरमसास्तरवामा लिखाइल वचन पुरा हखेके तहिँया इअ भेलइ।#भजन ४१:९; युहन्ना १३:१८
13 “बाकि याबे मुइ यपनहुँक लघिना यवइ बडहिँ। हिनिका मोर आनन्दसे भरपुर हखइ कहके मुइ इअ बतवा संसारमा रहते कहइ बडहिँ। 14मुइ हुनुकाके यपनहुँक वचन देलहिँ हसे संसार हुनुकाके घिना करलिय, केहकेकि हुनुका इअ संसारक हइने हखइ, जसने मुइ संसारक हइने हखहि। 15यपनहुँ हुनुकाके इअ संसारसे लिगहुँ कहके मुइ परथाना हइने करइ बडहिँ, बाकि हुनुकाके दुस्टसे बचोहुँ कहके मुइ बिन्ति करइ बडहिँ। 16जसने मुइ इअ संसारक हइने हखहि, वसने हुनुका फेनि इअ संसारक हइने हखइ। 17यपनहुँ हुनुकाके सत्यसे पवितर बनोहुँ। यपनहुँक वचन सत्य हखइ। 18यपनहुँ जसने मोरके संसारमा पठोले बडहुँ, वसने मुइ फेनि हुनुकाके संसारमा पठोले बडहिँ। 19हुनुका फेनि सदियो यपनहुँमा समरपित हखइ कहके हुनुकर खातिर मुइ यपनहिँके यपनहुँमा समरपित करसहिँ।
जम्मे विस्वासिसभक तहिँया येसुजिक परथाना
20 “मुइ इअ चेलवानिक तहिँया मतरे हइने, बाकि हिनिका मोर बारेमा देलि गवाहिसे मोरमा विस्वास करलहरानिक तहिँया फेनि परथाना करइ बडहिँ। 21हुनुका जम्मे जन एक हखइ कहके मुइ परथाना करइ बडहिँ। हे पिता, यपनहुँ मोरमा हसे मुइ यपनहुँमा भेल नहिँया हुनुका फेनि हमारमा हखइ, ताकि यपनहुँ मोरके पठोले हखहुँ कहके संसार विस्वास करिय। 22यपनहुँ मोरके जुन महिमा देले बडहुँ, उहे महिमा मुइ हुनुकाके देले बडहिँ, ताकि हमरा एक भेल नहिँया हुनुका फेनि एक हखइ। 23यकर यरथ मुइ हुनुकरमा बडहिँ हसे यपनहुँ मोरमा बडहुँ। यसने हुनुका पुरा रुपमा एक हखे सकइ। उहेसे यपनहुँ मोरके पठोले हखहुँ हसे यपनहुँ मोरके प्रेम करलि नहिँया हुनुकाके फेनि प्रेम करसहुँ कहके संसार जाने सकइ।
24 “हे पिता, मुइ इछा करबहिँ कि, यपनहुँ जकरेके मोरके देले बडहुँ हुनुका मोरसाङे रहइ जहवाँ मुइ बडहिँ हसे मोर महिमा देखइ, जुन महिमा यपनहुँ मोरके संसारक सिरिस्टि हखलिक यगाहेसे मोरके प्रेम करलेसे देलहुँ।
25 “हे धारमिक पिता, संसारक मन्सावाह यपनहुँके हइने चिनसइ, बाकि मुइ यपनहुँके चिनसहिँ हसे यपनहुँ मोरके पठोले हखहुँ कहके मोर चेलवाह जनसइ। 26मुइ यपनहुँके हिनिकाके चिनोले बडहिँ हसे यपनहुँके चिनोते रहबहिँ, ताकि यपनहुँ जुन प्रेमसे मोरके प्रेम करलहुँ, उअ प्रेम हुनुकरमा रहइ हसे मुइ हुनुकरमा रहबहिँ।”
Currently Selected:
युहन्ना 17: CTHR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
