युहन्ना 11
11
लाजरसक मृत्यु
1लाजरस नाउँक एक जन मन्से मनियाइल रहलिय। उअ बेथानिया गाउँक रहलिय, जहवाँ मरियम हसे वकर दिदि मारथा रहइ।#लुका १०:३८-३९ 2इहे मरियम एकपल्टा येसुजिक पाउमा बसान तेल लगाके यापन केसवासे पुछलिय, वकरे भयवा लाजरस मनियाइल रहलिय।#युहन्ना १२:३; लुका ७:३८; मरकुस १४:३ 3उहेसे उअ दु जन दिदेरियाह येसुजि लघिना यसके कहके समाद पठोलइ, “प्रभुजि, जकरेके यपनहुँ माया करसहुँ, उअ मनियाइल बडिय।”
4इअ सुनके येसुजि कहलसि, “इअ मनिया मृत्युमा नाहिँ पुगोबिय, बाकि इअ परमेस्वरक महिमाक तहिँया हखइ, ताकि यकरसे परमेस्वरक पुतरक महिमा परकट हखइ।”#युहन्ना ९:३ 5येसुजि मारथा हसे वकर बहिनिया मरियम तके लाजरसके माया करिय। 6ताफेनि लाजरस मनियाइल बडिय कहके सुनलेपर, हुने जहवाँ रहलसि, वहवाँ याको दु दिन रहलसि।
7वकरपाछा येसुजि यापन चेलवानिके कहलसि, “याबे हमरा फेरि यहुदिया छेतरमा फिरके जाउँ।”
8बाकि चेलवाह हुनेके कहलइ, “गुरुजि, किहो दिन यागा वहवाँ यहुदि मन्सावाह यपनहुँके पत्थरासे ढोकहारके मारे खोजइ रहलइ हसे कथि यपनहुँ फेरि वहवाँहिँ जेबहुँ?”#युहन्ना ८:५९; १०:३१
9येसुजि जवाफ देते कहलसि, “दिनमा बारह घन्टा इजोर हइने रहसइ त? जुने दिना इजोरमा बुलसिय वकर ढुस नाहिँ लगतइ, केहकेकि उअ इअ संसारक ज्योति देखसिय।#युहन्ना ९:४; १२:३५; लुका १३:३३ 10बाकि राति बुललहराक ढुस लगसइ, केहकेकि वकरसाङे इजोर हइने रहसइ।”
11वकरपाछा येसुजि हुनुकाके कहलसि, “हमार सङहतियावा लाजरस सुतल बडिय, वकरेके उठावेके तहिँया मुइ वहवाँ जाइ बडहिँ।”#मरकुस ५:३९; प्रेरित ७:६०
12येसुजिक चेलवाह हुनेके कहलइ, “प्रभुजि, यगर उअ सुतल बडिय जउँ, उअ डउल हखबिय।” 13येसुजि वकर मृत्युक बारेमा कहले रहलसि, बाकि चेलवाह इअ सोचलइ कि, हुने लाजरसक निनइलिक बारेमा कहले हखसि।
14उहेसे येसुजि हुनुकाके स्पस्टसे कहदेलसि, “लाजरस मरसकल बडिय। 15तोहार खातिर मुइ वहवाँ हइने भेल डउल भेलइ, केहकेकि तोहार विस्वास बढेके मउका पउतइ। याबे यउह, हमरा वकर लघिना जाउँ।”
16तब थोमा जाकर उपनाउ जउराहा#११:१६ ग्रिकमा यसके लिखल बडइ “थोमा जाकर उपनाउ ‘दिदुमस’ हखइ।” “दिदुमसक” यरथ जउराहा हखइ। रहलइ, उअ यापन चेलवा सङहतियवानिके कहलिय, “लो, हमरा फेनि जाउँ, ताकि हमरा हुनेसाङे मरे सकुँ।”#मति १०:३; युहन्ना २०:२४-२८
येसुजि मरियम हसे मारथाके सान्त्वना देलसि
17जब येसुजि यलसि, तब लाजरसके चिन्डियामा राखल चार दिन भेल बडइ कहके हुने थाह पउलसि। 18बेथानिया गउँवा यरुसलेमसे लगभग तिन किलोमिटर तनाउ रहलइ। 19बहुत जन यहुदिसभ मारथा हसे मरियम लघिना हुनुकर भयवाक बिसयमा सान्त्वना देवेके तहिँया याइल रहलइ। 20येसुजि यवइ बडसि कहइकि सुनके मारथा हुनेके भेटे गेलिय, बाकि मरियम घरवामा रहलिय।
21मारथा येसुजिके भेटके कहलिय, “प्रभुजि, यपनहुँ यहवाँ रहतहुँ त मोर भयवा नाहिँ मरतिय। 22बाकि मोर थाह बडइ कि, यखनि फेनि यपनहुँ परमेस्वरसे जथि मङबहुँ, हुने यपनहुँके देबसि।”
23येसुजि मारथाके कहलसि, “तोर भयवा फेरि जियबिय।”
24तब मारथा हुनेके कहलिय, “मोर थाह बडइ कि, याखिर दिनवामा पुनरुत्थान हखइकि उअ फेरि जिइ उठबिय।”
25येसुजि वकरेके कहलसि, “पुनरुत्थान हसे जिवन मुइ हखहि। जुने मोरमा विस्वास करबिय, उअ मरले फेनि जियबिय। 26जुने जिउते बडिय हसे मोरमा विस्वास करसिय, उअ कबहुँ नाहिँ मरबिय। कथि तुइ इअ बतवा विस्वास करबहिँ?”#युहन्ना ६:४७; ८:५१
27तब मारथा हुनेके कहलिय, “हँ प्रभु, यपनहुँ संसारमा यलहर परमेस्वरक पुतर, मुक्ति देलाहर ख्रिस्ट हखहुँ कहके मुइ विस्वास करसहिँ।”#मति १६:१६
28यतुरा कहके मारथा गेलिय हसे मरियमके एकवरि बलाके कहलिय, “गुरुजि यहवाँ बडसि, हुने तोरके बलोइ बडसि।” 29इअ बतवा सुनतेकि, मरियम हलहालि उठलिय हसे येसुजि लघिना गेलिय। 30उअ जुनवालइ येसुजि गउँवामा हइने याइल रहलसि, बाकि हुने उअ ठउरियामा रहलसि जहवाँ मारथा हुनेके भेटले रहलिय। 31मरियमके सान्त्वना देते वकरसाङे घरवामा रहलि यहुदि मन्सावाह वकरेके हलहालि उठके बाहरा जाइकि देखके, उअ यापन भयवाक चिन्डियामा काने जाइबडिय सोचके, हुनुका वकरपाछा लगलइ।
32जब मरियम येसुजि भेलि ठउरियामा यलिय हसे हुनेके देखलिय, तब उअ यसके कहते हुनेक पाउ परलिय, “प्रभुजि, यपनहुँ यहवाँ रहतहुँ त मोर भयवा नाहिँ मरतिय।”#युहन्ना ११:२२
33जब येसुजि मरियम हसे वकरसाङे यइलि मन्सावानिके कनइकि देखलसि, तब हुने आत्मामा खाँ दुःखित हसे व्याकुल भेलसि। 34येसुजि हुनुकाके पुछलसि, “तोहरा वकरेके कहवाँ रखले बडह?”
हुनुका हुनेके कहलइ, “प्रभुजि, याके हेरहुँ।”
35येसुजि कनलसि।#लुका १९:४१ 36उहेसे यहुदि मन्सावाह कहलइ, “हेरह, हुने लाजरसके कतुरा माया करलसि।”
37बाकि हुनुकरमधे कतेक जन कहलइ, “कथि जुने यन्हराके देखाह बनोलिय, इअ लाजरसके मरलिसे बचावे नाहिँ सकतिय त?”
येसुजि लाजरसके जिउतोलसि
38तब येसुजि फेरि खाँ दुःखित भके चिन्डियाक लजिके गेलसि। उअ चिन्डिया एगुडा सोन्हर रहलिय। वकर मुहवा एगुडा जबड पत्थरासे झापल रहलइ। 39येसुजि हुनुकाके कहलसि, “पत्थरवा होटादेह।” बाकि मरलि मन्सावाक दिदेरिया मारथा कहलिय, “प्रभुजि, यखनिलइ त उअ बसाइ हखबिय, केहकेकि उअ मरल चार दिन भेसकलइ।”
40येसुजि वकरेके कहलसि, “कथि मुइ तोरके हइने कहले रहलहि, ‘यगर तुइ विस्वास करबहिँ जउँ परमेस्वरक महिमा देखबहि’?”
41तब हुनुका चिन्डियाक पत्थरवा होटोलइ हसे येसुजि वपरावरि हेरके कहलसि, “हे पिता, मुइ यपनहुँके धन्यवाद देबहिँ, केहकेकि यपनहुँ मोर बिन्ति सुनलहुँ। 42मोर थाह बडइ कि, यपनहुँ मोर बिन्ति सबदिन सुनसहुँ। बाकि यहवाँ ठडियलि भिडवाक मन्सावानिक तहिँया मुइ इअ कहले हखहि, ताकि यपनहुँ मोरके पठोले हखहुँ कहके हुनुका विस्वास करइ।”
43यतुरा कह सकलेपर येसुजि जबड माहे चिल्लाके कहलसि, “अरे लाजरस, बाहरा निकडके यवहि।” 44तब मरलि मन्सावा वकर हथवा-टङवामा पटिया बन्हइले हसे मोहडवामा लुगवा घेउटइले बाहरा निकडके यलिय। येसुजि हुनुकाके कहलसि, “वकरमा घेउटलि लुगवा फोदेह हसे वकरेके जाए देह।”
येसुजिके मारेके योजना
45येसुजिक करलि इअ कमवा देखके मरियमके भेटे यइलि यहुदि मन्सावानिमधे बहुत जन हुनेमा विस्वास करलइ। 46बाकि हुनुकरमधे कतेक जन फरिसियानि लघिना जाके येसुजिक करलि कमवाक बारेमा कहदेलइ।
47तखनहिँ मुख्य पुजेरियाह हसे फरिसियाह यहुदि महासभाक सदस्यसभके बलाके कहलइ, “याबे हमरा कथि करेके? केहकेकि इअ मन्सावा त बहुत यचम्मक चिन्हासभ देखोइ बडिय। 48यगर इअ मन्सावाके यसने छाड देबहुँ जउँ जम्मे मन्सावाह यकरेमा विस्वास करतइ हसे रोमि सिपहियावाह याके हमार पवितर ठउरिया हसे हमार जतिया दुन्हुके नास करतइ।”
49बाकि हुनुकरमधे एक जन कइयाफा नाउँक मन्से रहलिय। जुने उअ बरसवाक प्रधान पुजेरि रहलिय, उअ हुनुकाके कहलिय, “तोहरा किहो फेनि हइने जनसह! 50जम्मे जतिया नास हखलिसे त बरु जनताक तहिँया एक जन मन्से मरले डउल हतइ कहके तोहरा हइने बुझसह।”
51इअ बतवा कइयाफा यापनवरिसे हइने कहले रहलिय, बाकि उअ बरसवाक प्रधान पुजेरि भेलेसे यहुदि जातिक तहिँया येसुजि मरबसि कहके वकरसे अगमवाडि भेलइ। 52यहुदि जातिक तहिँया मतरे हइने, बाकि छाहरछिता भेलि परमेस्वरक सन्तानसभके एकसाङे जामा करेके तहिँया फेनि येसुजि मरबसि कहके अगमवाडि भेलइ। 53उहे दिनसे यहुदि यगुवासभ येसुजिके मारेके तहिँया योजना बनोलइ।
54उहेसे येसुजि फेरि यहुदियानिक बिचा खुल्लमखुल्ला हइने बुललसि, बाकि वहवाँसे उराठ-ठउरियाक लजिके एफराइम सहरवामा गेलसि हसे यापन चेलवानिसाङे वहवाँहिँ रहे लगलसि।
55यहुदि मन्सावानिक निस्तार-पाबनि लजिके रहलइ हसे गउँवा-गउँवासे बहुत जन यपनहिँके सुद्ध पारेके तहिँया निस्तार-पाबनि सुरु भेलिसे यागा यरुसलेममा गेलइ। 56हुनुका येसुजि यबसि कहके इसियाइ रहलइ हसे मन्दिरवाक यङनवामा ठडियाके एक-दोसरि जनके यसके कहलइ, “तोहरा कथि सोचह? कथि उअ पाबनि मनावे नाहिँ यबिय त?” 57मुख्य पुजेरियाह हसे फरिसियाह येसुजिके पकडे खोजइ रहलइ। उहेसे हुनुका येसुजि कहवाँ बडसि कहके थाह पउलहरानिके समाद यनिह कहके आग्या देले रहलइ।
Currently Selected:
युहन्ना 11: CTHR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
