युहन्ना 12
12
बेथानिया गउँवामा येसुजि
(मति २६:६-१३; मरकुस १४:३-९)
1निस्तार-पाबनि यइलिसे छ दिन यागा येसुजि बेथानिया गउँवामा यलसि। वहवाँ लाजरस रहिय, जकरेके येसुजि मरलिसे जिउतोले रहलसि। 2येसुजि यवइकि खुसिमा जेउना तयार करलइ। मारथा सेवा-टहल करिय हसे लाजरस येसुजिसाङे खाए बेठलाहरनिमधे एक जन रहलिय। 3तखनहिँ मरियम लगभग याधा लिटर बहुत मोल परना बसान तेल यानके येसुजिक पाउमा लगादेलिय हसे यापन केसवासे पोछदेलिय। उअ तेलवाक बसानिसे घरवा भरलइ।#लुका ७:३७-३८; १२:८
4बाकि येसुजिक चेलवाहमधे एक जन यहुदा इस्कोरियोत, जुने पाछेसे हुनेके धोखा देलिय उहे कहलिय, 5“इअ बसानि तेलवा तिन सय चाँनिक पइसामा#१२:५ तखनहिँक जुनवामा तिन सय चाँनिक पइसा लगभग एक बरसक बनिहारि हखइ। बेचके कथि गरिबवानिके देले नाहिँ हतिय त?” 6उअ गरिबवानिके ख्याल राखके हइने, बाकि उअ चोर भेलेसे यसके कहले रहलिय हसे हुनुकर जामा करलि पइसवाक थइलिया उहे रखिय तके वकरसे पइसवा चोरइय।
7तब येसुजि कहलसि, “इअ जनिनियाके किहो झिन कहिह, मोरके गाडेके दिनक तयारिक तहिँया इअ बसानि तेलवा बचाके धरले रहलिय। 8केहकेकि गरिबवाह त तोहारसाङे सबदिन रहतइ, बाकि मुइ त सबदिन नाहिँ रहबहिँ।”#व्यवस्था १५:११
9तखनहिँ यहुदि मन्सावानिक एगुडा जबड भिड हुने बेथानियामा बडसि कहके थाह पउलइ। हुनुका वहवाँ येसुजिके मतरे हेरे हइने, बाकि मरलिसे जिउते बनोलि लाजरसके फेनि हेरेके तहिँया यलइ। 10उहेसे मुख्य पुजेरियाह लाजरसके फेनि मारेके योजना बनोलइ, 11केहकेकि लाजरसक कारनसे बहुत जन यहुदि मन्सेसभ हुनुकाके छाडके येसुजिमा विस्वास करइ रहलइ।
यरुसलेममा येसुजिके स्वागत करलइ
(मति २१:१-११; मरकुस ११:१-११; लुका १९:२८-४०)
12दोसरि दिन निस्तार-पबनियामा यइलि मन्सावानिक जबडि भिडवा येसुजि यरुसलेममा यवइ बडसि कहके सुनलइ। 13हुनुका खजुरक डार लेके हुनेके स्वागत करेके तहिँया चिलइते निकडलइ,
“होसन्ना!#१२:१३ हिब्रु भासामा होसन्नाक यरथ परमेस्वरक महिमा हखइ।
प्रभु परमेस्वरक नाउँमा यलहरवा धन्यक बडसि!#भजन ११८:२५-२६
इस्राएलक राजा धन्यक बडसि!”
14गदहाक एगुडा बाचा पउलेपर येसुजि वकर वपरा चढलसि, जसने धरमसास्तरवामा लिखाइल बडइ,
15“सियोन#१२:१५ यरुसलेम सहरवाके सियोन फेनि कहेसइ। सहरवामा रहलहरा, झिन डेराह!
हेरह, तोहार रजवा गदहाक बाचा वपरा
चढके यवइ बडसि!”#जकरिया ९:९
16इअ बतवा हुनेक चेलवाह तखनहिँ हइने बुझलइ। बाकि येसुजि मरलेसे जिउतके स्वरगक महिमामा फिरलेपर इअ बतवा हुनेक बारेमा लिखल रहलइ हसे उअ मन्सावाह इअ जम्मे कमवा हुनेक तहिँया करले हखइ कहके बुझलइ।#मरकुस ९:३२; युहन्ना २:२२
17येसुजि लाजरसके चिन्डियासे बलोलसि हसे वकरेके मरलिसे जिउतोलसि कहके हुनेसाङे रहलहरा भिडवाक मन्सावाह इअ बतवाक बारेमा मन्सावानिके सुनोइ रहलइ। 18हुने यसनुक यचम्मक चिन्हा करले बडसि कहके सुनलेपर भिडवाक मन्सावाह हुनेके भेटे गेलइ। 19उहेसे फरिसियाह एक-दोसरि जनके यसके कहे लगलइ, “हमरा कथि करे सकलहुँ त। हेरह, जम्मे संसार वकरपाछा लागि सकल बडइ!”
यापन मृत्युक बारेमा येसुजिक भविस्यवाडि
20निस्तार-पबनियामा यरुसलेममा आराधना करे गेलहरवामधे कतेक जन ग्रिक जातिक मन्सेसभ रहलइ। 21हुनुका गालिल छेतरक बेथसेदामा रहलाहर फिलिप लघिना याके यसके कहके बिन्ति करलइ, “हजि, हमरा येसुजिके भेटे खोजइ बडहुँ।” 22तब फिलिप जाके अन्द्रियासके कहलिय, अन्द्रियास फिलिपसाङे गेलिय हसे हुनुका येसुजिके कहलइ।
23येसुजि हुनुकाके जवाफ देते कहलसि, “मन्सेक पुतरक महिमा परकट हखेके जुन यासकल बडइ। 24मुइ तोहराके सदियो कहइ बडहिँ, जखनिलइ गोहुँवाक दनवा मटियामा परके नाहिँ मरबिय, उअ यसकरे रहबिय। बाकि यगर उअ मरबिय जउँ, उअ बहुत यन्न उब्जोबिय। 25जुने यापन जिवनके माया करबिय उअ यापन जिवन गुमोबिय। बाकि जुने इअ संसारमा यापन जिवनके तुच्छ सोचबिय उअ परमेस्वरसाङे सबदिन रहना जिवनक तहिँया यापन जिवन सुरछित रखबिय।#मति १०:३९; १६:२५; मरकुस ८:३५; लुका ९:२४; १४:२६; १७:३३ 26यगर कुनहुँ मोर सेवा करे चाहतइ जउँ उअ मोर पाछा लगिय हसे मुइ जहवाँ रहबहिँ, मोर सेवक फेनि वहवाँहिँ रहबिय। यगर कुनहुँ मोर सेवा करतइ जउँ पिता वकरके यादर करबसि।
27 “यखनि मोर प्रान खाँ दुःखित भेल बडइ हसे मुइ कथि कहेके? कथि मुइ इअ कहुँ ‘हे पिता, मोरके इअ यावे लगइकि दुःखवासे बचोहुँ’? हइने, इअ दुःखवा भोगेके तहिँया मुइ इअ संसारमा याइल बडहिँ। #
युहन्ना ११:३३; मति २६:३८; मरकुस १४:३४ 28हे पिता, यपनहुँक नाउँक महिमा परकट करहुँ।”
तब स्वरगसे एगुडा यसनुक स्वर यलइ, “मुइ यापन महिमा परकट करले बडहिँ हसे फेरि परकट करबहिँ।”#मरकुस १:११; ९:७ 29वहवाँ ठडियलि भिडवाक मन्सावाह इअ स्वरवा सुनके कहलइ, “यकसवा गुरगुरभटभट करइ बडिय!” याको जन कहलइ, “एगुडा स्वरगदुत वकरसाङे फदकले हखिय!”
30तब येसुजि हुनुकाके जवाफ देते कहलसि, “इअ स्वर मोर तहिँया हइने, बाकि तोहार तहिँया भेलइ। 31याबे इअ संसारक न्याय हखेके जुन याइल बडइ, इअ संसारक सासक बाहरा फकेबिय। 32बाकि मुइ धरतियासे वपरा उठइकि जम्मे मन्सावानिके यापनवरि तानबहिँ।” 33हुनेक मृत्यु कुन तरिकासे हखे जाइबडइ कहके देखावेके तहिँया हुने यसके कहलसि।
34तब भिडवाक मन्सावाह हुनेके पुछलइ, “मुक्ति देलाहर ख्रिस्ट त सबदिन रहबसि कहके हमरा व्यवस्थासे सुनले बडहुँ। उहेसे ‘मन्सेक पुतर वपरावरि उठहि परतइ’ कहके यपनहुँ कस्के कहे सकबहुँ? इअ मन्सेक पुतर कुने हखिय?”#भजन ११०:४; यसइया ९:७; इजकिएल ३७:२५; दानिएल ७:१४
35तब येसुजि हुनुकाके कहलसि, “एघरिक याको ज्योति तोहारसाङे बडइ। ज्योतिया तोहारसाङे रहतेमा बुलिह, ताकि यन्हारि तोहराके झिन झपिय। जुने यन्हारमा बुलसिय, उअ कहवाँ जाइबडिय कहके वकर हइने थाह रहसइ। 36ज्योतिया तोहारसाङे रहतेमा वकरमा विस्वास करिह हसे तोहरा ज्योतिक सन्तान हखबह।” यतुरा बात कहसकलेपर, येसुजि वहवाँसे गेलसि हसे हुनुकरसे लोकाके रहलसि।
यहुदियानिक अविस्वास
37येसुजि मन्सावानिक यागा यतुरा बहुत यचम्मक चिन्हासभ देखोलसि, ताफेनि हुनुका हुनेमा विस्वास हइने करलइ। 38इअ त यसइया अगमवक्तावाक कहलि इअ बतवा पुरा हखेके तहिँया भेल बडइ,
“हे परमप्रभु, हमार कहलि बतवा कुने विस्वास करलिय?
प्रभुक करलि सक्तिसालि कमवा ककरेके परकट भेलइ?”#यसइया ५३:१
39उहेसे हुनुका विस्वास करे हइने सकलइ, केहकेकि यसइया अगमवक्तावा फेरि यसके कहले बडिय,
40“परमेस्वर हुनुकर यखिया बन्द करदेले बडसि
हसे हुनुकर हृदय कठोर पारदेले बडसि,
ताकि हुनुका यखियासे झिन देखइ
हसे हृदयसे झिन बुझइ,
नत हुनुका फिरतइ
तके मुइ हुनुकाके डउल बनोतहिँ।”#यसइया ६:१०
41यसइया इअ बतवा कहलिय, केहकेकि उअ येसुजिक महिमा देखलिय हसे हुनेक बारेमा फदकलिय।
42ताफेनि बहुत जन यहुदि यगुवासभमधेसे येसुजिमा विस्वास करलइ। बाकि फरिसियानिक डरेसे हुनुका यापन विस्वासक बारेमा ककरहुँके फेनि हइने कहलइ, केहकेकि फरिसियाह यहुदि सभाघरवासे हुनुकाके निकडा देतइ कहके डेराइ। 43केहकेकि हुनुका परमेस्वरक प्रसंसासे मन्सावानिसे पउना प्रसंसा बहुत मन परोइ।
44तब येसुजि जबड माहे चिल्लाके कहलसि, “जुने मोरमा विस्वास करसिय, उअ मोरके मतरे हइने, बाकि मोरके पठोलहरामा फेनि विस्वास करसिय। 45जुने मोरके देखसिय, उअ मोरके पठोलहराके देखसिय। 46मुइ संसारमा ज्योति भके याइल बडहिँ, ताकि मोरमा विस्वास करलहरा कुनहुँ फेनि यन्हारमा झिन रहइ।
47 “यगर कुनहुँ मोर कहलि बतवा सुनतइ हसे उअ पालन नाहिँ करतइ, मुइ वकर न्याय नाहिँ करबहिँ। केहकेकि मुइ संसारके न्याय करे हइने याइल बडहिँ, बाकि संसारके बचावेके तहिँया याइल बडहिँ। 48जुने मोरके हसे मोर बतवा स्विकार नाहिँ करबिय वकरेके न्याय करलाहर एक जन बडिय। मोर फदकलि बतवा अन्तिम दिनवामा वकरेके न्याय करबिय। 49केहकेकि मुइ यापनवरिसे हइने फदकइ बडहिँ, बाकि मुइ कथि कहे परतइ हसे कस्के फदके परतइ कहके मोरके पठोलहरा पिता यपनहिँ मोरके आग्या देले बडसि। 50मोर थाह बडइ कि, पिताक आग्या परमेस्वरसाङे सबदिन रहना जिवन देसइ। उहेसे मुइ जथि कसहिँ, पिताक कहे लगोलि बतवा कसहिँ।”
Currently Selected:
युहन्ना 12: CTHR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
