युहन्ना 7
7
येसुजि हसे हुनेक भयवाह
1वकरपाछा येसुजि गालिल छेतरमा घुमफिर करलसि, बाकि हुने यहुदिया छेतरमा जायके मन हइने करलसि, केहकेकि यहुदियाह हुनेके मारे खोजइ रहलइ। 2तखनहिँ यहुदियानिक छपरा बनाके मनउना पाबनि यवइ रहलइ।#लेवि २३:३४; व्यवस्था १६:१३ 3उहेसे येसुजिक भयवाह हुनेके कहलइ, “इअ ठउरिया छाडके यहुदियामा जाहि, ताकि तोर करलि कमवाह तोर चेलवाह फेनि देखइ।#मति १२:४६; मरकुस ३:२१,३१ 4जुन मन्से नाउँ चलावे चाहसिय, उअ चुपे-चुपे काम हइने करसिय। तुइ इअ काम करबहि जउँ यपनहिँके संसारमा परकट करहि।” 5केहकेकि हुनेक यपने भयवाह फेनि हुनेमा विस्वास हइने करइ।
6येसुजि हुनुकाके कहलसि, “मोर तहिँया ठिक समय यखनिलइ हइने याइल बडइ, बाकि तोहार तहिँया जखनि फेनि ठिक समय बडइ।#मति २६:१८ 7संसारक मन्सावा तोहराके हेला करे नाहिँ सकतइ, बाकि मोरके हेला करसइ, केहकेकि हुनुकर काम दुस्ट बडइ कहके मुइ साछि देसहिँ। 8तोहरा पाबनि मनावे जाह, मुइ इअ पबनियामा नाहिँ जेबहिँ, केहकेकि मोर समय यखनिलइ पुरा हइने भेल बडइ।” 9हुनुकाके इअ बतवा कहके हुने गालिलमा रहलसि।
10येसुजिक भयवाह पबनियामा गेलेपर हुने फेनि गेलसि, बाकि हुने गुप्त रुपमा गेलसि। 11यहुदि यगुवासभ पबनियामा येसुजिके खोजइ रहलइ हसे “उअ कहवाँ बडिय?” कहके पुछइ रहलइ।
12भिडवाक बिचा हुनेक बारेमा मन्सावाह खुस-खुस करके बात करे लगलइ। कुनहुँ कहइ, “उअ यसल बडिय।” याको जन कहइ, “हइने, उअ त मन्सावानिके भरममा पारइ बडिय।” 13बाकि यहुदि यगुवासभक डरेसे हुनेक बारेमा कुनहुँ फेनि खुल्लमखुल्ला फदकेके याट हइने करलइ।
पबनियामा येसुजिक सिछा
14जब पबनिया याधा वरेलइ, तब येसुजि मन्दिरवा भितरा जाके सिछा देवे लगलसि। 15यहुदि यगुवासभ यचम्म मनते यसके कहलइ, “इअ मन्सावा ककरहुँसे हइने सिखके फेनि कस्के यतुरा जनलिय?”
16तब येसुजि हुनुकाके जवाफ देते कहलसि, “मोर देलि सिछा मोर हइने हखइ, बाकि मोरके पठोलहरा परमेस्वरक हखइ। 17यगर कुनहुँ परमेस्वरक इछा यनुसार काम करे खोजतइ जउँ, मोर सिछा परमेस्वरसे याइल हखइ कि मोर यपने सिछा हखइ कहके उअ थाह पउबिय। 18जुने यपनेवरिसे फदकसइ, उअ यपने यादर खोजसिय, बाकि जुने यापन पठोलहराक यादर खोजसिय, उअ सत्य हखिय हसे वकरमा छलकपट हइने रहसइ। 19कथि मोसा तोहराके व्यवस्था हइने देलिय? बाकि तोहरा कुनहुँ फेनि उअ व्यवस्था पालन हइने करसह। तोहरा केहके मोरके मारे खोजसह?”
20भिडवामा भेलि मन्सावाह जवाफ देलइ, “तोर भुत लागल बडइ। कुने तोरके मारे खोजइ बडिय?”#मति ११:१८; मरकुस ३:२२
21येसुजि हुनुकाके जवाफ देते कहलसि, “मुइ एगुडा यचम्मक काम करलहिँ हसे तोहरा जम्मे जन छक परलह। 22मोसा तोहराके खतना करेके आग्या देले हखिय (हखेके त इअ कमवा मोसा सुरु हइने करले हखिय, बाकि पिता-पुरखावानिसे हखइ।) बाकि तोहरा विसरामक दिनवामा फेनि यापन बेटवानिक खतना करसह।#उत्पति १७:१०; लेवि १२:३ 23यगर तोहार बेटवानिक खतना करे परना दिन विसरामक दिनवामा परतइ जउँ, मोसाक देलि व्यवस्था-भङ झिन हखइ कहके तोहरा यापन बेटवानिक खतना करसह जउँ, मुइ विसरामक दिनवामा एगुडा मन्सेके पुरा डउल बनोइकि तोहरा केहके खिस करसह त?#मरकुस ३:५; लुका १३:१२; १४:४ 24मुहवा हेरके न्याय झिन करिह, बाकि ठिकसे न्याय करिह।”
कथि येसुजि मुक्ति देलाहर ख्रिस्ट हखसि?
25तब यरुसलेमक कुनहुँ मन्सावाह कहलइ, “कथि इअ उहे मन्सावा हखिय हइने, जकरेके हुनुका मारे खोजइबडइ? 26हेरह, इअ त खुल्लमखुल्ला फदकइ बडिय, बाकि हुनुका यकरेके कथियो हइने कहसइ! कथि इहे मुक्ति देलाहर ख्रिस्ट हखिय कहके हमार यगुवासभ निरनय करलइ? 27बाकि इअ मन्सावा कहवाँसे याइल हखिय कहके हमार जम्मे जनक थाह बडइ। जब ख्रिस्ट यबसि हुने कहवाँसे याइल हखसि कहके ककरो फेनि थाह नाहिँ हतइ।”
28येसुजि मन्दिरवामा सिखोइखुनि, हुने जबड माहे चिल्लाके यसके कहलसि, “तोहरा मोरके चिनसह हसे मुइ कहवाँसे याइल हखहि, उअ फेनि तोहार थाह बडइ। मुइ यपने इछासे हइने याइल हखहि, बाकि मोरके पठोलहरा सत्य बडसि। तोहरा हुनेके हइने चिनसह, 29बाकि हुनेके मुइ चिनसहिँ, केहकेकि मुइ हुनेवरिसे याइल हखहि हसे हुने मोरके पठोले हखसि।”#मति ११:२७
30उहेसे हुनुका येसुजिके पकडे खोजलइ, बाकि कुनहुँ फेनि हुनेके पकडे हइने सकलइ, केहकेकि हुनेक समय यखना हइने याइल रहलइ।#मरकुस १२:१२ 31बाकि भिडवामा भेलि बहुत मन्सेसभ हुनेमा विस्वास करलइ। हुनुका कहलइ, “जब मुक्ति देलाहर ख्रिस्ट यबसि, कथि हुने इअ मन्सावाक करलि चिन्हासभसे याको बहुत यचम्मक चिन्हासभ करबसि?”
32फरिसियाह भिडवाक मन्सावानिके येसुजिक बारेमा यसनुक बात खुस-खुस फदकइकि सुनलइ। तब मुख्य पुजेरियाह हसे फरिसियाह हुनेके पकडेके तहिँया मन्दिरवाक सिपहियवानिके पठोलइ।
33तब येसुजि कहलसि, “मुइ किहो जुनलइ तोहारसाङे बडहिँ, वकरपाछा मोरके पठोलहराक लघिना जेबहिँ। 34तोहरा मोरके खोजबह, बाकि नाहिँ पउबह हसे मुइ जहवाँ रहबहिँ, तोहरा यावे नाहिँ सकबह।”
35तब यहुदि यगुवासभ एक-दोसरि जनके कहलइ, “इअ कहवाँ जाइबडिय हसे तोहरा मोरके नाहिँ भेटबह कहके कहइ बडिय? कथि इअ ग्रिकसभक बिचा छाहरछिता भेलि यहुदियानि लघिना जाके ग्रिकक मन्सावानिके सिछा देवे जाइबडिय? 36‘तोहरा मोरके खोजबह, बाकि नाहिँ पउबह हसे जहवाँ मुइ रहबहिँ, तोहरा यावे नाहिँ सकबह’ कहके कहलिक यरथ कथि हखइ?”
37याबे पबनियाक याखिर हसे सबसे मुख्य दिनवामा येसुजि ठडियाके जबड माहे चिल्लाके कहलसि, “यगर कुनहुँ पियासल बडह जउँ, उअ मोर लघिना यइय हसे पिइय। 38जुने मोरमा विस्वास करबिय, धरमसास्तरवाक कहलि यनुसार उअ मन्सावाक हृदयसे जिउते पानिक लदि बहइ रहतइ।”#इजकिएल ४७:१; जकरिया १४:८ 39इअ बतवा येसुजि पवितर-आत्माक बारेमा कहले रहलसि, जुन पवितर-आत्मा हुनेमा विस्वास करलहरा पावे जाइ रहलइ। तखनिलइ पवितर-आत्मा हइने दियाइल रहलइ, केहकेकि येसुजि यखनिलइ यापन स्वरगक महिमामा हइने फिरल रहलसि।
40इअ बतवा सुनलहरा कुनहुँ-कुनहुँ मन्सावा कहलइ, “हमार यासा करलि अगमवक्ता सदियो इहे हखिय।”#मति २१:११
41याको जन कहलइ, “इअ त मुक्ति देलाहर ख्रिस्ट हखिय।” बाकि कतेक जन कहलइ, “कथि ख्रिस्ट गालिलसे यबसि त? 42ख्रिस्ट रजवा दाउदक वंससे हसे दाउदक गउँवा बेथलेहेमसे यबसि कहके धरमसास्तरवामा हइने लिखाइल बडइ त?”#२ समुएल ७:१२; मिका ५:२ 43उहेसे मन्सावानिक बिचा हुनेक कारन फुट भेलइ।
44हुनुकरमधे कतेक जन येसुजिके पकडे खोजलइ, बाकि कुनहुँ फेनि हुनेके हइने छुलइ।
यहुदि यगुवासभक अविस्वास
45तब येसुजिके पकडलहरा सिपहियावाह मुख्य पुजेरियाह हसे फरिसियानि लघिना छुछले फिरके यलइ। हुनुका सिपहियवानिके कहलइ, “तोहरा केहके येसुजिके पकडके हइने यनलह?”
46सिपहियावाह जवाफ देलइ, “इअ मन्सावा नहिँया त कुनहुँ मन्से कबहुँ हइने फदकलइ!”#मति ७:२८
47फरिसियाह हुनुकाके कहलइ, “उअ तोहराके फेनि धोखा देलिय किहा? 48कथि धरम-गुरु कि फरिसियानिमधे कुनहुँ वकरमा विस्वास करले बडह? कुनहुँ फेनि विस्वास हइने करले बडइ! 49बाकि इअ भिडवामा भेलि मन्सावाह जुने व्यवस्था हइने जनले बडइ, हुनुका सरापित बडइ।”
50वहवाँ भेलि फरिसियामधे एक जन निकोदेमस, जुने पहिला एकपल्टा राति येसुजि लघिना गेल रहलिय, उअ कहलिय,#युहन्ना ३:१-२ 51“कथि हमार व्यवस्था यनुसार दोस लगोलि मन्सावाक बतवा हइने सुनके हसे उअ कथि करसिय कहके थाह नाहिँ पाके वकरेके न्याय करे बनतइ त?”
52हुनुका वकरेके जवाफ देलइ, “कथि तुइ फेनि गालिलक हखहि? धरमसास्तरवामा खोजके हेरहि हसे तुइ देखबहि कि, गालिलसे कुनहुँ अगमवक्ता हइने यसइ।”
53[तब हरेक जन यापन-यापन घर गेलइ।
Currently Selected:
युहन्ना 7: CTHR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
