युहन्‍ना 8

धुचुड करलाहर जनियानि

1बाकि येसुजि जइतुन पहडावामा गेलसि। 2दोसरि दिन बिहनहिँ येसुजि फेरि मन्‍दिरवामा गेलसि। तखनहिँ जम्‍मे मन्‍सावाह हुनेक लघिना यलइ हसे हुने बइठके हुनुकाके सिछा देवे लगलसि। 3तब व्‍यवस्‍थाक-गुरुसभ हसे फरिसियाह धुचुड करइकि पकडाइल एक जन जनियानिके यनलइ हसे वकरेके मन्‍सावानिक बिचा ठडियाए लगोलइ। 4हुनुका येसुजिके कहलइ, “गुरुजि, इअ जनिनिया धुचुड करइकि पकडाइल बडिय। 5व्‍यवस्‍थामा मोसा यसनुक जनियानिके पत्‍थरा हानके मारेके आग्या देले बडिय। यपनहुँ यकर बारेमा कथि कहबहुँ त?”#लेवि २०:१०; व्‍यवस्‍था २२:२२-२४ 6बाकि हुनुका येसुजिके जाँचेके हसे दोस लगावे सकेतइ कहके यसके कहले रहलइ। येसुजि ओन हखलसि हसे यङगुरियासे भुइयमा लिखलसि। 7जब हुनुका हुनेके पुछते रहलइ, तब हुने उठके हुनुकाके कहलसि, “तोहारमधे जुने पाप हइने करले बडह, उअ पहिला इअ जनिनियाके पत्‍थरा हानिय।” 8वकरपाछा येसुजि फेरि ओन्‍हगातके भुइयमा लिखलसि। 9जब हुनुका इअ बतवा सुनलइ, तब बुढसे लेके छोटेलइ एकहक जन करते जम्‍मे जन गेलइ। येसुजि यसकरे रहलसि हसे उअ जनिनिया हुनेक यागा ठडियाइल रहलिय।

10तब येसुजि उअ जनिनियावरि हेरके कहलसि, “अरि बहिनिया, हुनुका कहवाँ बडइ त? कथि कुनहुँ फेनि तोरके दन्‍ड हइने देलइ?” 11उअ जनिनिया कहलिय, “प्रभु, कुनहुँ फेनि मोरके दन्‍ड हइने देलइ।” येसुजि वकरेके कहलसि, “मुइ फेनि तोरके दन्‍ड नाहिँ देबहिँ। याबे जाहि हसे फेरि पाप झिन करसि।”]#८:११ ७:५३-८:११ पदवालइ ग्रिकक कतेक गो हस्‍तलिपियामा हइने लिखाइल बडइ।

येसुजि संसारक ज्‍योति

12तब येसुजि फेरि मन्‍सावानिके कहलसि, “मुइ संसारक ज्‍योति हखहि। जुने मोर पाछा लगबिय, उअ कबहुँ नाहिँ यन्‍हारमा बुलबिय, बाकि उअ जिवनक ज्‍योति पउबिय।”#मति ५:१४; युहन्‍ना ९:५

13इअ सुनके फरिसियाह हुनेके कहलइ, “यपनहुँ त यपने बारेमा कहइ बडहुँ, यपनहुँक गवाहि सत्‍य नाहिँ ठहरतइ।”#युहन्‍ना ५:३१

14येसुजि हुनुकाके जवाफ देते कहलसि, “मुइ यापन बारेमा यपनहिँ गवाहि देबहिँ, ताफेनि मोर गवाहि सत्‍य ठहरतइ। केहकेकि मुइ कहवाँसे यलहिँ हसे कहवाँ जाइ बडहिँ कहके मोर थाह बडइ। बाकि मुइ कहवाँसे यलहिँ हसे कहवाँ जाइ बडहिँ कहके तोहार हइने थाह बडइ। 15तोहरा त मन्‍सेक सोचाइ यनुसार न्‍याय करसह, बाकि मुइ ककरो फेनि न्‍याय हइने करसहिँ। 16यगर मुइ न्‍याय करबहिँ फेनि मोर न्‍याय सत्‍य ठहरतइ, केहकेकि मुइ न्‍याय करेके यसकरे हइने बडहिँ, बाकि मोरके पठोलहरा पिता मोरसाङे बडसि। 17तोहार व्‍यवस्‍थामा फेनि दु जन मन्‍सेक साछि मिल्‍तइ जउँ, उअ बतवा सत्‍य ठहरतइ कहके लिखाइल बडइ। 18मोर बारेमा साछि देलाहर एक जन त मोहिँ हखहि हसे मोरके पठोलहरा पिता फेनि मोर बारेमा साछि देससि।”

19तब हुनुका येसुजिके पुछलइ, “तोर पिता कहवाँ बडिय?” येसुजि जवाफ देते कहलसि, “तोहरा न मोरके नत मोर पिताके चिनसह। यगर तोहरा मोरके चिनले रहतह जउँ, मोर पिताके फेनि चिनतह।” 20इअ बतवा हुने मन्‍दिरवामा सिछा देइखुनि भेटिया चढोनवा बकसवा भेलि ठउरियामा कहले रहलसि। बाकि कुनहुँ फेनि हुनेके हइने पकडलइ, केहकेकि हुनेक समय यखनिलइ हइने याइल रहलइ।

21येसुजि फेरि हुनुकाके कहलसि, “मुइ यहवाँसे जइबे करबहिँ हसे तोहरा मोरके खोजबह। बाकि तोहरा यापन पापमा मरबह। मुइ जहवाँ जाइ बडहिँ, तोहरा वहवाँ यावे नाहिँ सकबह।”

22इअ सुनके यहुदि यगुवासभ एक-दोसरि जनके कहलइ, “कथि इअ आत्‍महत्‍या करे खोजइ बडिय किहा? कथि इअ इहे कारनसे ‘मुइ जहवाँ जेबहिँ, तोहरा यावे नाहिँ सकबह’ कहके कहइ बडिय?”

23तब येसुजि हुनुकाके कहलसि, “तोहरा तरसे यलह, मुइ वपरासे यलहिँ। तोहरा इअ संसारक हखह, बाकि मुइ इअ संसारक हइने हखहि। 24उहेसे मुइ ‘तोहरा यापन पापमा मरबह’ कहले हखहि। यगर मुइ जुने हखहि उहे हखहि कहके मोरके विस्‍वास नाहिँ करबह जउँ तोहरा सदियो यापन पापमा मरबह।”

25हुनुका येसुजिके पुछलइ, “तुइ कुने हखहि त?”

येसुजि जवाफ देते कहलसि, “मुइ तोहराके सुरुहिँसे जथि कहते यलहिँ, मुइ उहे हखहि। 26मुइ तोहार बारेमा कहे परना हसे न्‍याय करे परना बहुत बात बडइ। बाकि मोरके पठोलहरा सत्‍य बडसि हसे मुइ जथि हुनेसे सुनले बडहिँ उहे बतवा संसारके कहबहिँ।”

27येसुजि इअ बतवा पिताक बारेमा कहइ बडसि कहके हुनुका हइने बुझलइ। 28तखनहिँ येसुजि हुनुकाके कहलसि, “जब तोहरा मुइ मन्‍सेक पुतरके वपरा उठोबह, ‘मुइ जुने हखहि उहे हखहि’ कहके तोहरा जनबह। मुइ यापन खुसिसे किहो नाहिँ करबहिँ, बाकि पिताक सिखोलि बतवा फदकसहिँ कहके तोहरा फेनि जनबह। 29जुने मोरके पठोले बडसि, हुने मोरसाङे बडसि। हुने मोरके यसकरे हइने छडले बडसि, केहकेकि मुइ सबदिन हुनेके खुसि पारना काम करसहिँ।” 30येसुजि इअ बतवा कहइखुनि बहुत जन हुनेमा विस्‍वास करलइ।

अब्राहमक सन्‍तान

31येसुजि हुनेमा विस्‍वास करलहरा यहुदि यगुवासभके कहलसि, “यगर तोहरा मोर वचन मनते रहबह जउँ, तोहरा सदियो मोर चेला हखह। 32तब तोहरा सत्‍य कथि हखइ कहके जनबह हसे सत्‍य तोहराके छुटकारा देबिय।”

33हुनुका येसुजिके कहलइ, “हमरा अब्राहमक सन्‍तान हखहुँ हसे कबहुँ फेनि ककरो कमारा हइने भेल बडहुँ। तब हमराके ‘तोहरा छुटकारा पउबह’ कहके तुइ कस्‍के कहबहिँ?”#मति ३:९; लुका ३:८

34येसुजि हुनुकाके जवाफ देलसि, “मुइ तोहराके सदियो कहइ बडहिँ, जुने पाप करसिय, उअ पापक कमारा हखिय। 35कमारा सबदिन घरवामा नाहिँ रहबिय, बाकि बेटवा सबदिन घरवामा रहबिय। 36उहेसे यगर पुतर तोहराके छुटकारा देबिय जउँ, तोहरा सदिसे छुटकारा पउबह। 37तोहरा अब्राहमक सन्‍तान हखह कहके मोर थाह बडइ। ताफेनि तोहरा मोरके मारे खोजसह, केहकेकि मोर वचन रहेके तहिँया तोहारमा ठउरि हइने बडइ। 38मुइ यापन पितासाङे रहइकि देखलि बतवाह फदकसहिँ हसे तोहरा जथि यापन पितासे सुनले बडह, उहे करसह।”

39हुनुका येसुजिके कहलइ, “हमार पिता अब्राहम हखिय।” हुने हुनुकाके कहलसि, “यगर तोहरा अब्राहमक सन्‍तान रहतह त, अब्राहम जथि काम करले तोहरा उहे काम करतह। 40मुइ परमेस्‍वरसे सुनलि सत्‍य बतवा तोहराके कहले बडहिँ, बाकि तोहरा मोरके मारे खोजसह। अब्राहम त यसनुक काम हइने करलिय! 41तोहरा त यपने पिताक नहिँया काम करसह।” हुनुका हुनेके कहलइ, “हमरा धुचुडक सन्‍तान हइने हखहुँ। हमार पिता त एगुडे मतरे बडसि, हुने परमेस्‍वर हखसि।”

दुस्‍टक सन्‍तान

42येसुजि हुनुकाके कहलसि, “यगर तोहार पिता परमेस्‍वर रहतसि त, तोहरा मोरके माया करतह, केहकेकि मुइ परमेस्‍वरसे याइल हखहि हसे यखना मुइ यहवाँ बडहिँ। मुइ यपने इछासे हइने याइल हखहि, बाकि हुने मोरके पठोले हखसि। 43मोर कहलि बतवा तोहरा केहके हइने बुझसह? केहकेकि तोहरा मोर कहलि वचन सुने हइने चाहसह। 44तोहार बाबा सइतनवा हखिह, तोहरा वकरे सन्‍तान हखह। तोहरा वकरे इछा पुरा करे चाहसह। उअ त सुरुसे हत्‍यारा हखिय, सत्‍य बातसे वकर किहो मतलब हइने बडइ, केहकेकि वकरमा किहो सत्‍य बात हइने बडइ। जब उअ झुठा फदकसिय, उअ यपने स्‍वभाव यनुसार फदकसिय, केहकेकि उअ झुठा हखिय हसे जम्‍मे झुठा वकरेसे यसइ। 45बाकि मुइ सत्‍य बात फदकलेसे तोहरा मोरके विस्‍वास हइने करसह। 46तोहारमधे कुने मोरके पापक दोस लगावे सकबह? यगर मुइ सत्‍य फदकसहिँ जउँ, केहके तोहरा मोरके विस्‍वास हइने करसह? 47जुने परमेस्‍वरक हखिय, उअ परमेस्‍वरक बात सुनसिय। तोहरा परमेस्‍वरक हइने हखह, उहेसे तोहरा हुनेक बात हइने सुनसह।”

येसुजि हसे अब्राहम

48इअ बतवा सुनके यहुदि यगुवासभ येसुजिके कहलइ, “तुइ सामरि हखहि हसे तोर भुत लागल बडइ कहके हमार कहलि ठिक हइने हखइ त?”

49येसुजि हुनुकाके कहलसि, “मोर भुत हइने लागल बडइ, मुइ यापन पिताक यादर करसहिँ, बाकि तोहरा मोरके यनादर करसह। 50मुइ यपनहिँ यापन यादर हइने खोजसहिँ, बाकि मोर यादर करलाहर दोसरे जन बडसि हसे हुनेहिँ न्‍याय करससि। 51मुइ तोहराके सदियो कहबहिँ, यगर कुनहुँ मोर कहलि वचन पालन करबिय जउँ उअ कबहुँ नाहिँ मरबिय।”

52तब यहुदि यगुवासभ कहलइ, “याबे हमार सदियो थाह भेलइ कि, तोर भुत लागल बडइ! अब्राहम मरलिय हसे अगमवक्‍तावाह फेनि मरलइ, बाकि तुइ कहसहि ‘यगर कुनहुँ मोर वचन पालन करबिय जउँ, उअ कबहुँ नाहिँ मरबिय।’ 53कथि हमार पुरखा अब्राहमसे फेनि तुइ महान हखहि? उअ मरलिय हसे अगमवक्‍तासभ फेनि मरलइ। तुइ यपनहिँके कुने हखहि कहके सोचसहि?”

54येसुजि हुनुकाके जवाफ देते कहलसि, “यगर मुइ यापन यादर यपनहिँ करबहिँ जउँ, मोर करल यादर काम नाहिँ लगना हतइ। मोरके यादर करलाहर मोर पिता बडसि, जकरेके तोहरा यापन परमेस्‍वर कहके कहसह। 55तोहरा हुनेके हइने चिनले बडह, बाकि मुइ हुनेके चिनले बडहिँ। यगर मुइ हुनेके हइने चिनले बडहिँ कहके कहबहिँ जउँ, मुइ फेनि तोहार नहिँया झुठा ठहरतहिँ। बाकि मुइ हुनेके चिनसहिँ हसे हुनेक वचन पालन करसहिँ। 56तोहार पुरखा अब्राहम मुइ यावेके दिन देखेके तहिँया गहनि इछा करले रहलिय। उअ देखलिय हसे आनन्‍दित भेलिय।”

57यहुदि यगुवासभ हुनेके कहलइ, “तुइ त पचाँस बरस फेनि हइने पुगल बडहि, तब तुइ कस्‍के अब्राहमके देखलहिँ त?”

58तब येसुजि हुनुकाके कहलसि, “मुइ तोहराके सदियो कहइ बडहिँ, अब्राहम जरमलिसे यगाहेसे, मुइ बडहिँ।” 59इअ सुनके हुनुका येसुजिके मारेके तहिँया पत्‍थरा लेलइ, बाकि हुने लोकेलसि हसे मन्‍दिरवासे बाहरा निकडलसि।

Currently Selected:

युहन्‍ना 8: CTHR

Highlight

Copy