युहन्ना 9
9
येसुजि जरमतिक यान्हर मन्सेके डउल बनोलसि
1एक दिन येसुजि बुलके जाइखुनि एक जन जरमतिक यान्हर मन्सेके देखलसि। 2तखनहिँ येसुजिक चेलवाह हुनेके पुछलइ, “गुरुजि, कुने पाप करलेसे इअ मन्सावा जरमतिसे यान्हर भेल हखिय? इअ कि वकर दाओ-बाबा पाप करलेसे इअ यान्हर भके जरमलिय?”
3येसुजि जवाफ देते कहलसि, “नत इअ पाप करलेसे न यकर दाओ-बाबा पाप करलेसे, बाकि परमेस्वरक काम यकरमा परकट हखइ कहके इअ मन्सवा यान्हर भके जरमल हखिय। 4जुने मोरके पठोले बडसि हुनेक काम हमरा दिन हखते करे परतइ, रात भेलेपर कुनहुँ फेनि काम करे नाहिँ सकतइ। 5मुइ संसारमा रहइकलइ, मुइ संसारक ज्योति हखहि।”#मति ५:१४; युहन्ना ८:१२
6यतुरा बात कहके हुने भुयवामा थुकलसि हसे थुकवा मटियामा गिजके वकर यखियामा लगादेलसि। 7येसुजि वकरेके कहलसि, “जाहि, सिलोआम तलवामा जाके धोवहि।” (सिलोआमक यरथ “पठाइल” हखइ।) उअ मन्सावा जाके धोवलिय हसे देखाह भके यलिय।
8वकर पोरसियावाह हसे वकरेके भिख मङइकि देखलहरा कहलइ, “कथि इअ उहे मन्सावा हखिय हइने जुने बइठके भिख मङिय?”
9कुनहुँ कहलइ, “हँ, उहे हखिय।” याको जन कहलइ, “हइने! इअ वकरे नहिँया देखार बडिय, बाकि उअ हइने हखिय।” बाकि उअ यपनहिँ कहलिय, “मुइ उहे हखहि।”
10तब हुनुका वकरेके पुछलइ, “तुइ कस्के देखाह भेलहिँ त?”
11उअ जवाफ देलिय, “येसु कहल एक जन मन्से मटिया गिजके मोर यखियामा लगादेलिय हसे मोरके कहलिय, ‘सिलोआममा जाके धोवहि।’ तब मुइ जाके धोवलहिँ हसे मुइ देखाह भेलहिँ।”
12हुनुका वकरेके कहलइ, “उअ मन्सावा कहवाँ बडिय त?” उअ कहलिय, “मोर हइने थाह बडइ।”
फरिसियाह सोध-खोज करलइ
13जुने पहिला यान्हर रहलिय, हुनुका वकरेके फरिसियानि लघिना यनलइ। 14येसुजि मटिया गिजके वकर यखियामा लगाके देखाह बनादेलि दिन विसरामक दिन रहलइ। 15उहेसे फरिसियाह फेनि वकरेके पुछलइ, “तुइ कस्के देखाह भेलहिँ?” उअ जवाफ देलिय, “हुने मटिया गिजके मोर यखियामा लगादेलसि हसे मुइ धोवलहिँ तके देखाह भेलहिँ।”
16तखनहिँ फरिसियाहमधे कुनहुँ-कुनहुँ कहलइ, “उअ मन्सावा परमेस्वरसे हइने याइल हखिय, केहकेकि उअ विसरामक दिन पालन हइने करसिय।” बाकि याको जन कहलइ, “पापि मन्से यसनुक यचम्मक चिन्हा देखावे सकबिय?” हसे हुनुकर बिचा फुट भेलइ।
17तब हुनुका उअ यन्हरि मन्सावाके फेरि पुछलइ, “उअ तोर यखिया डउल बनादेलिय, याबे वकर बारेमा तुइ कथि कहबहिँ त?” उअ जवाफ देलिय, “हुने अगमवक्ता हखसि।”
18यहुदि यगुवासभ उअ यान्हर रहलिय हसे देखाह भेलिय कहके हइने पतियलइ। उहेसे हुनुका वकर दाओ-बाबाके बलाके 19पुछलइ, “कथि इअ तोहार बेटा हखिय? कथि इअ जरमतिसे यान्हर रहलिय कहके तोहरा कहसह? इअ कस्के यखनि देखाह भेलिय?”
20वकर दाओ-बाबा हुनुकाके कहलइ, “हमार थाह बडइ इअ हमार बेटा हखिय हसे जरमतिसे यान्हर रहलिय। 21बाकि याबे इअ कस्के देखाह भेलिय हसे यकर यखिया कुने डउल बनादेलिय, उअ हमार हइने थाह बडइ। यकर उमेर पुगल बडइ, यपनहुँसभ यकरहिँके पुछहुँ, यापन बारेमा उअ यपनहिँ कहबिय।” 22वकर दाओ-बाबा यहुदियानिक डरेसे इअ बतवा कहलइ, केहकेकि कुनहुँ येसुजिके मुक्ति देलाहर खिस्ट कहके स्विकार करतइ जउँ, वकरेके सभाघरवासे निकडा देवे परतइ कहके यहुदियाह पहिलाहिँ सहमत भेल रहलइ। 23उहेसे वकर दाओ-बाबा “यकर उमेर पुगल बडइ, यपनहुँसभ वकरेके पुछहुँ” कहके कहलइ।
24तब हुनुका उअ यन्हरि मन्सावाके दोसरि पारि बलाके कहलइ, “परमेस्वरक यागा सत्य फदकहि। हमार थाह बडइ कि, उअ मन्सावा पापि हखिय।”
25उअ जवाफ देलिय, “हुने पापि बडसि कि हइने, उअ मोर हइने थाह बडइ। बाकि एगुडा बात मोर थाह बडइ कि मुइ यान्हर रहलहि, याबे देखाह भेल बडहिँ।”
26तब हुनुका फेरि वकरेके पुछलइ, “उअ तोरके कथि करलिय? उअ कस्के तोरके देखाह बनोलिय?”
27उअ हुनुकाके जवाफ देलिय, “मुइ यपनहुँसभके तखनि कहसकलहि, बाकि यपनहुँसभ हइने सुनलहुँ। याबे यपनहुँसभ केहके फेरि सुने खोजइ बडहुँ? कथि यपनहुँसभ फेनि हुनेक चेला हखे खोजइ बडहुँ किहा?”
28हुनुका वकरेके गिल्ला करते यसके कहलइ, “तुइ वकर चेला हखहि, बाकि हमरा त मोसाक चेला हखहुँ। 29परमेस्वर मोसासाङे फदकले रहलसि कहके हमार थाह बडइ, बाकि इअ मन्सावा कहवाँसे याइल हखिय कहके फेनि हमार हइने थाह बडइ।”
30उअ मन्सावा हुनुकाके जवाफ देके कहलिय, “कस्नुक यचम्मक बात! हुने कहवाँसे याइल हखसि कहके यपनहुँसभक हइने थाह बडइ, बाकि हुने मोरके देखाह बनोलसि। 31हमार थाह बडइ कि परमेस्वर पपियानिक बात हइने सुनससि, बाकि परमेस्वरके यादर करलाहर हसे हुनेक इछा यनुसार चलाहरक बतवा सुनससि। 32संसार सुरु भेलिसे यखनिलइ जरमतिक यान्हरके कुनहुँ मन्से देखाह बनोलइ कहके हमरा कबहुँ फेनि हइने सुनले रहलहुँ। 33यगर इअ मन्सावा परमेस्वरसे नाहिँ याइल रहतिय त, उअ किहो फेनि करे नाहिँ सकतिय।”
34हुनुका वकरेके जवाफ देते कहलइ, “तुइ त जरमतिसे पापि बडहिँ! कथि तुइ हमराके सिखावे खोजइ बडहिँ?” तब हुनुका वकरेके सभाघरवासे बाहरा निकडा देलइ।
आत्मिक यान्हर
35जब यहुदि यगुवासभ उअ यन्हरि मन्सावाके सभाघरवासे बाहरा निकडा देलइ कहके येसुजि सुनलसि, तब हुने वकरेके भेटके कहलसि, “कथि तुइ मन्सेक पुतरमा विस्वास करसहिँ?”
36उअ जवाफ देते कहलिय, “हजि, हुने कुने हखसि? मोरके कहदेहुँ हसे मुइ हुनेमा विस्वास करबहिँ।”
37येसुजि वकरेके कहलसि, “तुइ वकरेके देखले बडहिँ, तोरसाङे फदकेलरा उहे हखिय।”
38तब उअ कहलिय, “प्रभुजि, मुइ विस्वास करबहिँ,” हसे उअ हुनेक चरन लगलिय।
39तब येसुजि कहलसि, “मुइ न्याय करेके तहिँया संसारमा यलहिँ कि, जुने हइने देखसइ उअ देखइ हसे जुने मुइ देखसहि कहके कहसइ उअ यान्हर हखइ।”
40इअ बतवा सुनके हुनेक लजिक ठडियलि कतेक जन फरिसियाह हुनेके कहलइ, “कथि हमरा फेनि यान्हर बडहुँ त?”
41येसुजि हुनुकाके कहलसि, “तोहरा यान्हर रहतह त पापक दोसि नाहिँ हतह, बाकि तोहरा ‘हमरा देखसहुँ’ कहके कहसह, उहेसे तोहार दोसवा रहतइ।”
Currently Selected:
युहन्ना 9: CTHR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
