मति 17
17
येसुजिक भेस बदलाइलि
(मरकुस ९:२-१३; लुका ९:२८-३६)
1इअ बतवा कहलिक छ दिन पाछा येसुजि पतरुस, याकुब हसे वकर भयवा युहन्नाके याको मन्सावानिसे छुटियाके यापनसाङे एगुडा उँच पहाडमा लेले गेलसि।#२ पतरुस १:१७-१८ 2पहडावा वपरा पुगलेपर चेलवाह हेरते-हेरते येसुजिक भेस बदलेलइ हसे हुनेक मोहडवा बेरिया नहिँया तके लुगवा बिजुलिक चहकार नहिँया गोरहर भेलइ। 3तखनहिँ यरमरका अगमवक्ता मोसा हसे एलिया देखा परके येसुजिसाङे बात करे लगलइ। 4इअ देखके पतरुस येसुजिके कहलिय, “प्रभुजि, हमरा यहवाँ भेल कतुरा डउल भेलइ! यगर यपनहुँ इछा करबहुँ जउँ, मुइ यहवाँ तिन गो छपरि बनोबहिँ, यपनहुँक तहिँया एगुडा, मोसाक तहिँया एगुडा हसे एलियाक तहिँया एगुडा!”
5पतरुस फदकते-फदकते एगुडा चहकार बादर याके हुनुकाके झापदेलिय हसे उअ बदरियासे यसके कहके स्वर निकडलइ, “इअ मोर सोगावल पुतर हखिय, यकरसे मुइ खाँ खुसि बडहिँ। तोहरा यकर बतवा सुनिह।”#उत्पति २२:२; व्यवस्था १८:१५; भजन २:७; यसइया ४२:१; मति ३:१७; १२:१८; मरकुस १:११; लुका ३:२२ 6उअ स्वरवा सुनके चेलवाह डेराके भुयवामा घोप्टे परलइ। 7बाकि येसुजि याके हुनुकाके छुलसि हसे यसके कहलसि, “उठह, झिन डेराह!” 8तखनहिँ हुनुका वपरावरि हेरइकि, येसुजिके मतरे देखलइ।
9जब हुनुका पहडावासे तर नभइ रहलइ, तब येसुजि हुनुकाके यसके आग्या देलसि, “तोहरा जथि देखलह उअ ककरहुँके फेनि झिन कहिह, जखनिलइ मुइ मन्सेक पुतर मरके फेरि नाहिँ जियबहिँ।”
10तब चेलवाह येसुजिके पुछलइ, “एलियाके इअ धरतियामा ख्रिस्टसे पहिला यावे परतइ कहके व्यवस्थाक-गुरुसभ केहके कहसइ?”#मलाकि ४:५ 11तब येसुजि जवाफ देके कहलसि, “हँ, सदियो, जम्मे चिजुवा ठिकठाक करेके तहिँया एलिया पहिलाहिँ यावे परतइ। 12बाकि मुइ तोहराके कहबहिँ, एलिया त यासकल बडिय, बाकि मन्सावाह वकरेके हइने चिनलइ। हुनुकर जथि मन लगलइ वकरेके उहे करलइ। वसने करके मुइ मन्सेक पुतर फेनि हुनुकर हथवामा परके दुःख भोगे परतइ।”#मति ११:१४ 13तब मतरे चेलवाह येसुजि बप्तिस्मा देलाहर युहन्नाक बारेमा कहले हखसि कहके बुझलइ।
येसुजि भुत-आत्मा लागल छउडके डउल बनोलसि
(मरकुस ९:१४-२९; लुका ९:३७-४३)
14येसुजि यापन उअ तिन जन चेलवानिसाङे भिडवा भेलि ठउरियामा फिरके यइलेपर, एक जन मन्से हुनेक पाउ परते कहलिय, 15“हे प्रभुजि, मोर बेटवाके दाया करहुँ, केहकेकि मिरगि रोग लगलेसे उअ खाँ दुःख पवइ बडिय। उअ कहियो यगियामा हसे कहियो पनियामा परसिय। 16मुइ वकरेके यपनहुँक चेलवानिक लघिना यनलहिँ, बाकि हुनुका वकरेके डउल बनावे हइने सकलइ।” 17येसुजि हुनुकाके कहलसि, “अरे अविस्वासि हसे हइलठ मन्सेसभ! मुइ तोहारसाङे कतेक दिन रहबहिँ हसे तोहराके कखनिलइ सहबहिँ? वकरेके यहवाँ यनह।” 18तब येसुजि वकरमा भेलि भुतवाके डटलसि हसे उअ भुतवा छउडवासे निकडलिय तके उअ वइघरहिँ डउल भेलिय।
19वकरपाछा चेलवाह चुपे-चुपे येसुजिके पुछलइ, “हमरा केहके उअ भुतवाके निकडावे हइने सकलहुँ?” 20येसुजि हुनुकाके कहलसि, “तोहारमा कम विस्वास भेलेसे हखइ। मुइ तोहराके सदियो कहबहिँ, यगर तोहारमा राइक एगुडा दाना नहिँया विस्वास हतइ जउँ, इअ पहडावाके ‘यहवाँसे हटके जाहि’ कहके कहबह जउँ, उअ हटके जेबिय हसे तोहरा जथि फेनि करे सकबह।#मति २१:२१; मरकुस ११:२३; १ कोरिन्थि १३:२ 21[बाकि यसनुक भुत त परथाना हसे उपाससे मतरे निकडावे सकेसइ।”]#१७:२१ इअ पदवा पहिलाक ग्रिकमा हइने रहलइ, बाकि पाछेसे जोडलेसे कतेक लउठा संस्करनमा कोस्ठमा राखल बडइ।
येसुजि फेरि यापन मृत्युक बारेमा कहलसि
(मरकुस ९:३०-३२; लुका ९:४३-४५)
22येसुजि यापन चेलवानिसाङे गालिल छेतरमा रहइखुनि, हुनुकाके यसके कहलसि, “मुइ मन्सेक पुतर दुस्ट मन्सावानिक हथवामा सपाए जाइ बडहिँ। 23हुनुका मोरके मारतइ, बाकि मुइ मरलिक तिन दिन पाछा फेरि जिइ उठबहिँ।” इअ बतवा सुनके चेलवाह खाँ दुःखित भेलइ।
मन्दिरक कर
24वकरपाछा, येसुजि हसे हुनेक चेलवाह कफरनहुम सहरवामा यापुगलेपर मन्दिरवाक कर उठोलहराह पतरुस लघिना याके पुछलइ, “तोहार गुरु मन्दिरवाक कर हइने तिरसिय?”#प्रस्थान ३०:१३; ३८:२६ 25तब पतरुस जवाफ देते कहलिय, “हँ, तिरससि।” जब पतरुस घरवामा पेसलिय, तब येसुजि वकरेके पुछलसि, “सिमोन, तोर विचार कथि बडइ? इअ संसारक रजवाह काकरसे कर उठोसइ? यापन बेटवानिसे कि दोसरे जनसे?”
26तब पतरुस जवाफ देते कहलिय, “दोसरे जनसे उठोसइ।” येसुजि वकरेके कहलसि, “वसके कहले, हुनुकर यपने बेटवासभ कर तिरे नाहिँ परतइ। 27बाकि हमरा हुनुकाके दुःख नाहिँ देउँ, उहेसे तुइ जाके तलवामा बनसि लगोसि हसे सबसे यागा बनसियामा बझलि मछरियाक मुहवा खोलसि। तुइ वकर मुहवामा एगुडा चाँनिक सिक्का पउबहि, उअ लिगाके तोर हसे मोर तहिँया कर तिरदेसि।”
Currently Selected:
मति 17: CTHR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
