मति 18
18
सबसे महान कुने?
(मरकुस ९:३३-३७; लुका ९:४६-४८)
1उअ समयमा चेलवाह येसुजि लघिना याके पुछलइ, “स्वरगक राजमा सबसे महान कुने हखिय?”#लुका २२:२४ 2येसुजि एगुडा बाचाके बलाके हुनुकर बिचा ठडियोलसि, 3हसे यसके कहलसि, “मुइ तोहराके सदियो कहइ बडहिँ, जखनिलइ तोहरा बदलाके इअ झिनिक बचवानि नहिँया नाहिँ हखबह, तोहरा कबहुँ फेनि स्वरगक राजमा पेसे नाहिँ पउबह।#मरकुस १०:१५; लुका १८:१७ 4जुन मन्सावा इअ बचवाक नहिँया नम्र हतइ, उहे स्वरगक राजमा सबसे महान हखबिय, 5हसे जुने मोर नाउँमा यसनुक एगुडा झिनिक बाचाके गरहन करतइ, उअ मोरके गरहन करतइ।
पापमा फसउना चिजुसभ
(मरकुस ९:४२-४८; लुका १७:१-२)
6 “यगर कुनहुँ मोर वपरा विस्वास करलहरा इअ झिनिकसभमधेसे एक जनके पाप करे लगोबिय, वकर घेन्टियामा जबड जाँत झुन्डियाके समुनदरवामा फाँकदेले डउल हतइ। 7इअ संसारके धिकार बडइ! केहकेकि इअ संसारमा त मन्सावानिके पाप करे लगोना चिजुसभ बडइ। पाप करे लगोना परिछा त यसइ, बाकि उअ मन्सावाके धिकार बडइ, जुन मन्सावासे परिछा यसइ!
8 “यगर तोर हथवा कि टङवा तोरके पाप करे लगोबिय, वकरेके काटके फाँकदेसि। दुन्हु हथवा कि दुन्हु टङवा भके कबहुँ हइने बुतइना यगियामा फकइलिसे त बरु एगुडा हाथ कि एगुडा टाङ भके परमेस्वरसाङे सबदिन रहना जिवन पावेके तोर तहिँया यसल हखइ। #
मति ५:३० 9यगर तोर यखिया तोरके पाप करे लगोबिय जउँ, वकरेके निकडाके फाँकदेसि। दुन्हुँ यखिया भके नरकक यगियामा फकइलिसे त बरु एगुडा याखि भके परमेस्वरसाङे सबदिन रहना जिवन पावेके तोर तहिँया यसल हखइ।#मति ५:२९
भुलाइल भेडाक दृस्टान्त
(लुका १५:३-७)
10 “हेरह, तोहरा इअ झिनिकमधेसे एक जनके फेनि हेला झिन करिह। मुइ तोहराके कहबहिँ, हुनुकर देखभाल करलहरा स्वरगदुतवाह स्वरगमा रहलाहर मोर पिताक यागा सबदिन रहसइ। 11[केहकेकि मुइ मन्सेक पुतर त भुलइलि मन्सावानिके बचावेके तहिँया याइल हखहि।]#लुका १९:१० #१८:११ इअ पदवा पहिलाक ग्रिकमा हइने रहलइ, बाकि पाछेसे जोडलेसे कतेक लउठा संस्करनमा कोस्ठमा राखल बडइ।
12 “यगर तोहारमधे कुनहुँ एक जन मन्सेक सय गो भेडा बडइ हसे उअ मधेसे एगुडा भेडा भुलेबिय जउँ, तोहरा कथि करबह त? कथि तोहरा उअ उनान्सय भेडवानिके पहडावामा छाडके, उअ एगुडा भुलइलि भेडवाके पवइलइ नाहिँ खोजबह त? 13मुइ तोहराके सदियो कहइ बडहिँ, जब उअ भुलइलि भेडवाके पउबिय, उअ हइने भुलइलि उनान्सय भेडवानिसे फेनि भुलइलि एगुडा भेडवाक तहिँया खाँ खुसि हखबिय। 14वसने, इअ झिनिकमधेसे एक जन फेनि झिन भुलाइ कहके स्वरगमा रहलाहर मोर पिताक इछा बडइ।
पाप करलाहर विस्वासि भाइ
(लुका १७:३)
15 “यगर एगुडा विस्वासि भाइ तोर विरोधमा पाप करबिय, तुइ यसकरे जाके वकरेके सम्झोसि। उअ तोर कहलि बतवा मनबिय जउँ, तुइ फेरि वकरेके पउलहि। #
लुका १७:३ 16बाकि उअ तोर कहलि बतवा नाहिँ सुनबिय जउँ, तुइ यापनसाङे याको एक जन कि दु जन मन्सेके लेके फेरि वकरेके सम्झोसि, ताकि जम्मे विवाद दु कि तिन जन साछिक गवाहिसे पाका हखइ।#व्यवस्था १९:१५ 17यगर उअ हुनुकर कहलि बतवा नाहिँ मनबिय, तुइ उअ बतवा मन्डलियामा कहसि। यगर मन्डलियाक कहलि बतवा फेनि उअ नाहिँ मनबिय जउँ, वकरेके अयहुदि हसे कर उठोलहर मन्से नहिँया सम्झिह।
18 “मुइ तोहराके सदियो कहबहिँ, जथि तोहरा इअ धरतियामा बन्हबह, उअ स्वरगमा फेनि बन्हेतइ। वसने करके जथि तोहरा इअ धरतियामा फउबह, उअ स्वरगमा फेनि फोयतइ। #
मति १६:१९ 19मुइ तोहराके फेरि कहबहिँ, यगर इअ धरतियामा तोहरा दु जन सहमत भके किहो मङबह जउँ, स्वरगमा रहलाहर मोर पिता तोहराके उअ चिजुवा देबसि। 20केहकेकि जहवाँ दु कि तिन जन मोर नाउँमा जामा हतइ, वहवाँ मुइ हुनुकर बिचा हखबहिँ।”
छमा हइने देलाहर बहरियाक दृस्टान्त
(लुका १७:४)
21तखनहिँ पतरुस येसुजि लघिना याके पुछलिय, “प्रभुजि, यगर कुनहुँ मोर विरोधमा पाप करबिय जउँ, मुइ वकरेके कतेक पारि छमा करेके? कथि सात पारिलइ?”
22तब येसुजि जवाफ देते कहलसि, “मुइ तोरके कहबहिँ, सात पारिलइ मतरे हइने, बाकि सतरि गुना सात पारिलइ।#लुका १७:३-४ 23उहेसे स्वरगक राज एक जन राजासाङे दाजे सकेसइ, जुने यापन बहरियावानिसे हिसाब लेवेके विचार करलिय। 24उअ रजवा हिसाब लेइखुनि, वकरसे दस हजार सोनक पइसा रिन लेलाहर एक जन बहरिया वकर लघिना यनलइ। 25बाकि उअ मन्सावा रिनवा तिरे हइने सकलेसे, रजवा उअ मन्सावाके, वकर जनियावाके, बाल-बचवाके हसे वकरसाङे भेलि जम्मे चिजुवा बेचके रिनवा तिरेके तहिँया बहरियावानिके आग्या देलिय। 26बाकि उअ मन्सावा रजवाक पाउ परते यसके बिन्ति करलिय, ‘मलिकवा, किहो दिनलइ इसियाहुँ, मुइ यपनहुँसे लेलि जम्मे रिनवा तिर देबहिँ।’ 27तब रजवाक दाया लगलइ हसे उअ वकर जम्मे रिनवा माफ करके वकरेके जाए देलिय।
28 “बाकि उअ बहरियावा वहवाँसे निकडके जाइखुनि यापनसाङे काम करलाहर एक जन सङहतियाके भेटलिय, जुने वकरसे एक सय चाँनिक पइसा रिन लेले रहलिय। उअ वकर घेन्टिया पकडके यसके कहलिय, ‘मोरसे लेलि रिनवा तिरबेकरहि।’ 29उहेसे वकर सङहतियावा पाउ परते कहलिय, ‘किहो दिनलइ इसियाहुँ, मुइ यपनहुँसे लेलि जम्मे रिनवा तिर देबहिँ।’ 30बाकि उअ हइने मनलिय हसे रिनवा हइने तिरइलइ वकरेके झ्यालखनवामा थुनदेलिय।
31 “जब हुनुकरसाङे काम करलहरा याको बहरियावाह इअ देखलइ, हुनुका खाँ दुःखित भेलइ हसे जाके जम्मे बतवा रजवाके सुनादेलइ। 32तब रजवा उअ बहरियावाके बलाके कहलिय, ‘अरे दुस्ट बहरिया! तुइ मोरके बिन्ति करलेसे, मुइ तोर जम्मे रिनवा माफ करदेलहिँ। 33कथि मुइ तोरके दाया करलि नहिँया, तुइ फेनि यापनसाङे काम करलहरा सङहतियावाके दाया करे परना हइने रहलइ त?’ 34तब रजवा खिसियाके जम्मे रिनवा हइने तिरइलइ वकरके यातना देवेके तहिँया झ्यालखनवाक सिपहियवानिके सोपदेलिय।”
35तब येसुजि कहलसि, “यगर तोहरा ककरोके हृदयसे छमा नाहिँ देबह जउँ, स्वरगमा रहलाहर मोर पिता फेनि तोहराके छमा नाहिँ देबसि।”
Currently Selected:
मति 18: CTHR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
