मति 19
19
छोडपतरक बारेमा येसुजिक सिछा
(मरकुस १०:१-१२)
1येसुजि इअ जम्मे बतवा कहसकलेपर गालिलसे यरदन लदियाक वाहिकरवा यहुदिया छेतरवरि गेलसि। 2वहवाँ बहुत मन्सेसभ हुनेक पाछा लगलइ हसे येसुजि वहवाँ भेलि मनियइलि मन्सावानिके डउल बनोलसि।
3तब कतेक जन फरिसिसभ येसुजिक लघिना यलइ हसे जाँचेके तहिँया हुनेके यसके कहके पुछलइ, “कथि एगुडा मन्से जथि फेनि कारन देखाके यापन जनियावाके छोडपतर देवेके ठिक हखइ?” 4बाकि येसुजि जवाफ देते कहलसि, “कथि तोहरा धरमसास्तरवामा हइने पढल बडह? सुरुमा परमेस्वर मन्सेके मरदाना हसे जनियानि करके बनोलसि।#उत्पति १:२७; ५:२ 5‘उहेसे मरदाना मन्से यापन दाओ-बाबाके छाडके यापन जनियावासाङे मिलके रहसइ हसे हुनुका दुन्हु जन एगुडे देहि हतइ।’#उत्पति २:२४ 6याबे हुनुका त दु जन हइने, बाकि एगुडे देहि हखइ। उहेसे परमेस्वर जकरेके एकसाङे जोडले बडसि, मन्सावा हुनुकाके झिन छुटोइय।”
7तखनहिँ फरिसियाह हुनेके पुछलइ, “केहके मोसा छोडपतरक कागत लिखके यापन जनियावाके छाडेके अनुमति देलिय?”#व्यवस्था २४:१-४; मति ५:३१ 8तब येसुजि जवाफ देते कहलसि, “तोहार मनवा हइलठ भेलेसे, यापन जनियावाके त्यागेके अनुमति मोसा देले हखिय, बाकि सुरुमा यसने हइने रहलइ। 9मुइ तोहराके कहबहिँ, धुचुडक कारन बाहेक, जुने यापन जनियावाके छाडके दोसरे जनियानिके बियाह करबिय, उअ धुचुड करबिय।”#मति ५:३२; १ कोरिन्थि ७:१०-११
10तब येसुजिक चेलवाह हुनेके कहलइ, “यगर जनि हसे मरदक सम्बन्ध यसने हखइ जउँ त, बियाह हइने करेके यसल हखइ।” 11बाकि येसुजि हुनुकाके कहलसि, “जम्मे मन्सावाह इअ बतवा गरहन करे नाहिँ सकतइ, बाकि परमेस्वर कुनहुँ मन्सावानिके मतरे इअ बतवा गरहन करे सकलाहर बनोले बडसि। 12केहकेकि कुनहुँ त जनमतिसे नपुंसक हसइ हसे कतेक जनके दोसरि मन्सावाह नपुंसक बनादेसइ। कतेक जन स्वरगक राजक तहिँया यपनहिँके नपुंसक बनोले बडइ। जुने इअ गरहन करे सकतइ, उअ गरहन करिय।”
येसुजि छोकनियानिके यासिरवाद देलसि
(मरकुस १०:१३-१६; लुका १८:१५-१७)
13एक दिन येसुजि यापन हथवा राखके परथाना करदिय कहके मन्सावाह यापन-यापन छोकनियानिके हुनेक लघिना यनलइ। बाकि चेलवाह उअ मन्सावानिके डटलइ। 14बाकि येसुजि चेलवानिके कहलसि, “इअ छोकनियानिके मोर लघिना यावे दिह, हुनुकाके झिन रोकिह, केहकेकि स्वरगक राज यसने बाचाक नहिँया मन्सेसभक तहिँया हखइ।”
15येसुजि उअ छोकनियानि वपरा यापन हथवा राखके यासिरवाद देलसि हसे वहवाँसे गेलसि।
धनि ढोठनिया मन्से
(मरकुस १०:१७-३१; लुका १८:१८-३०)
16एकपल्टा एक जन मन्से येसुजि लघिना याके यसके कहलिय, “गुरुजि, परमेस्वरसाङे सबदिन रहना जिवन पावेके तहिँया मुइ कथि यसल काम करे परतइ?”
17येसुजि वकरेके कहलसि, “तुइ केहके मोरके यसल कामक बारेमा पुछइ बडहिँ? यसल त एक जन मतरे बडसि। यगर तुइ परमेस्वरसाङे सबदिन रहना जिवन पावेके इछा करसहि जउँ, हुनेक आग्यासभ पालन करसि।”
18तब उअ मन्सावा पुछलिय, “कुन आग्यासभ?” येसुजि कहलसि, “तुइ मन्से झिन मारसि, धुचुड झिन करसि, चोरि झिन करसि, झुठा साछि झिन देसि,#प्रस्थान २०:१३-१६; व्यवस्था ५:१७-२० 19तुइ यापन दाओ-बाबाके यादर करसि हसे यापन पोरसियावाके यपनहिँके नहिँया प्रेम करसि।”#प्रस्थान २०:१२; व्यवस्था ५:१६; लेवि १९:१८
20उअ ढोठनियावा मन्सावा कहलिय, “इअ जम्मे मुइ मनते यवइ बडहिँ। याबे मोरमा कथि कमि बडइ?”
21येसुजि वकरेके कहलसि, “यगर तुइ सिद्ध हखे चाबहि जउँ, जाहि हसे यापनसाङे भेलि जम्मे चिजुवा बेचके गरिबवानिके बाँट देहि हसे तुइ स्वरगमा धन पउबहि। वकरपाछा याके मोर पाछा लगहि।”
22बाकि जब उअ ढोठनियावा मन्सावा इअ बतवा सुनलिय, उअ दुःखित भके वहवाँसे गेलिय, केहकेकि वकरसाङे बहुत धन-सम्पति रहलइ।
23वकरपाछा येसुजि यापन चेलवानिके कहलसि, “मुइ तोहराके सदियो कहबहिँ, धनि मन्सेके स्वरगक राज भितरा पेसेके गहनि गारह बडइ। 24मुइ फेरि तोहराके कहबहिँ, धनि मन्सेके परमेस्वरक राज भितरा पेसलिसे त बरु सुइवाक भोङवामा उटवाके छिरेके उसार हसइ।” 25इअ बतवा सुनके चेलवाह छक परते यसके कहलइ, “वसके भेले कुने मुक्ति पावे सकतइ त?” 26येसुजि हुनुकाके हेरके कहलसि, “मन्सेक तहिँया इअ सम्भव हइने बडइ, बाकि परमेस्वरक तहिँया जम्मे सम्भव बडइ।”
27तब पतरुस जवाफ देते कहलिय, “हेरहुँ, हमरा त जम्मे चिजुवा छाडके यपनहुँक पाछा लागल बडहुँ। हमरा कथि पउबहुँ त?” 28येसुजि यापन चेलवानिके कहलसि, “सदियो, मुइ तोहराके कहबहिँ, जब मुइ मन्सेक पुतर लउठा राजमा मोर महिमाक सिंहासनमा बेठबहिँ, तखनहिँ तोहरा जुने मोर पाछा लागल बडह, तोहरा फेनि बारह गो सिंहासनमा बइठके इस्राएलक बारह कुलमा राज करबह।#मति २५:३१; लुका २२:३० 29जुने मोर नाउँक खातिर यापन घर कि ददेर-भाइ कि दिदेर-बहिन कि दाओ-बाबा, बेटवा-बेटियानिके कि जागा-जमिन छडले बडिय, उअ सय गुना बढि पउबिय हसे परमेस्वरसाङे सबदिन रहना जिवन फेनि पउबिय। 30बाकि यखनि पहिला भेलहरवामधे बहुत जन पाछा हतइ हसे यखनि पाछा हखलहरा बहुत जन पहिला हतइ।”#मति २०:१६; लुका १३:३०
Currently Selected:
मति 19: CTHR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
