मति 26

येसुजिके मारे खोजइ

(मरकुस १४:१-२; लुका २२:१-२; युहन्‍ना ११:४५-५३)

1इअ जम्‍मे बतवा कहसकलेपर येसुजि यापन चेलवानिके कहलसि, 2“तोहार थाह बडइ कि, दु दिन पाछा निस्‍तार-पाबनि यवइ बडइ हसे मुइ मन्‍सेक पुतर क्रुसमा मरेके तहिँया सपेबहिँ।”#प्रस्‍थान १२:१-२७

3तब मुख्‍य पुजेरियाह हसे मन्‍सावानिक यगुवासभ प्रधान पुजेरिया कइयाफाक दरबरवामा जामा भेलइ, 4हसे येसुजिके कस्‍के चुपे-चुपे पकडके मारे सकबहुँ कहके हुनुका योजना बनोलइ। 5बाकि हुनुका कहलइ, “पबनियाक जुनवामा इअ कमवा करेके ठिक हइने बडइ, नत मन्‍सावाह हुलदाङा करे सकतइ।”

बेथानियामा येसुजिके अभिसेक करले

(मरकुस १४:३-९; युहन्‍ना १२:१-८)

6जखनि येसुजि बेथानिया गउँवामा सिमोनक घरवामा रहलसि, जाकर पहिला बडकि दुःखवा रोग लागल रहलइ, 7तखनहिँ एक जन जनियानि सिङगमरमरक सिसियामा बहुत महङ जटामसिक बसान तेल लेके येसुजिक लघिना यलिय। हुने जेउना करे जाइकि जुनवामा उअ बसानि तेलवा हुनेक मुडियामा खन्‍यादेलिय।#लुका ७:३७-३८ 8इअ देखके चेलवाह खिसियलइ हसे यसके कहलइ, “यतुरा महङ बसान तेलके वसहिँ केहके बरबाद करलिय? 9केहकेकि इअ जटामसियाक तेलवा बहुत मोलमा बेचके उअ पइसावा गरिबवानिके देवे सकेतिय।”

10बाकि येसुजि इअ बतवा सुनके हुनुकाके कहलसि, “तोहरा केहके इअ जनिनियाके दुःख देइ बडह? इअ त मोर तहिँया यसल काम करले बडिय। 11केहकेकि गरिब मन्‍सावाह त तोहारसाङे सबदिन रहतइ, बाकि मुइ त सबदिन तोहारसाङे नाहिँ रहबहिँ।#व्‍यवस्‍था १५:११ 12उअ जनिनिया बसानि तेलवा मोर देहियामा खन्‍याके मोरके गाडेके तहिँया तयार पारले बडिय। 13मुइ तोहराके सदियो कहबहिँ, धरतियामा जहवाँ-जहवाँ सुसमाचार परचार करेतइ, वहवाँ फेनि यकर सम्‍झानामा वकर करलि कमवाक बारेमा परचार करेतइ।”

यहुदा येसुजिके पकडावे खोजइ

(मरकुस १४:१०-११; लुका २२:३-६)

14वकरपाछा बारह जन चेलवामधे यहुदा इस्‍कोरियोत मुख्‍य पुजेरियानि लघिना जाके 15कहलिय, “यगर मुइ हुनेके पकडा देबहिँ जउँ, मोरके कतेक पइसा देबह?” हुनुका वकरेके तिस गो चाँनिक सिक्‍का देलइ।#जकरिया ११:१२ 16तखनहिँसे उअ येसुजिके पकडावेके मउका खोजे लगलिय।

वराट भोज

(मरकुस १४:१२-२६; लुका २२:७-२३; युहन्‍ना १३:२१-३०; १ कोरिन्‍थि ११:२३-२५)

17याबे अखमिरि रोटि खाएके पबनिक पहिला दिन चेलवाह येसुजि लघिना याके कहलइ, “हमरा यपनहुँक तहिँया निस्‍तार-पाबनिक भोज कहवाँ तयार करेके त?” 18येसुजि हुनुकाके कहलसि, “तोहरा सहरवामा एक जन मन्‍सेक लघिना जाह हसे वकरेके कहिह, ‘गुरुजि कहले बडसि, मोर जुन लजिके याइल बडइ हसे मुइ यापन चेलवानिसाङे तोर घरवामा निस्‍तार-पाबनिक भोज खेबहिँ’।” 19तब चेलवाह येसुजिक कहलि नहिँया करलइ हसे हुनुका निस्‍तार-पाबनिक भोज वहवाँ तयार करलइ।

20जब साँझ भेलइ येसुजि बारह जन चेलवानिसाङे खाए बेठलसि। 21जब हुनुका खाइ रहलइ, येसुजि हुनुकाके कहलसि, “मुइ तोहराके सदियो कहइ बडहिँ कि, तोहार मधेसे एक जन मोरके धोखा देबिय।” 22तब हुनुका खाँ दुःखित भके पलहा-पलहि करके येसुजिके पुछे लगलइ, “प्रभु, कथि उअ मुइ हखहि?” 23तब येसुजि हुनुकाके कहलसि, “जुने मोरसाङे रोटिया छिपवामा डुबोइ बडिय, उहे मोरके धोखा देबिय।#भजन ४१:९ 24धरमसास्‍तरवामा लिखइलि नहिँया मुइ मन्‍सेक पुतरक मरहिँ परतइ, बाकि उअ मन्‍सावाके धिकार जुने मोरके धोखा देबिय। बरु उअ मन्‍सावा नाहिँ जरमल रहतिय त वकर तहिँया यसल हतिय।” 25जुने येसुजिके धोखा देबिय उहे यहुदा पुछलिय, “गुरुजि, कथि उअ मुइ हखहि?” तखनहिँ येसुजि वकरेके कहलसि, “तुइ त यपनहिँ कहलहिँ।”

26जब हुनुका भोज खाइरहलइ, येसुजि रोटिया लेलसि हसे परमेस्‍वरके धन्यवाद देलसि। वकरपाछा येसुजि रोटिया खाडा-खाडा बनाके चेलवानिके देते कहलसि, “इअ लेके खाह, इअ मोर देहि हखइ।”

27वकरपाछा येसुजि कचोरवा लेके परमेस्‍वरके धन्‍यवाद देलसि हसे चेलवानिके यसके कहते देलसि, “इअ तोहरा जम्‍मे जन पियह, 28केहकेकि इअ परमेस्‍वर हसे मन्‍सावानिक बिचाक वाचाक रकत हखइ, जुन बहुत जनक पाप छमाक तहिँया बहेतइ।#प्रस्‍थान २४:८; यरमिया ३१:३१-३४ 29बाकि मुइ तोहराके कहइ बडहिँ, मोर पिताक राजमा तोहारसाङे लउठा करके नाहिँ पियइलइ, मुइ यखनिसे अंङगुरक रस फेरि नाहिँ पियबहिँ।”

30तब हुनुका एगुडा भजन गाके वहवाँसे जइतुन पहडावामा गेलइ।

पतरुसक इन्‍कार

(मरकुस १४:२७-३१; लुका २२:३१-३४; युहन्‍ना १३:३६-३८)

31हुनुका जइतुन पहडावामा जाइखुनि येसुजि हुनुकाके कहलसि, “याजु राति तोहरा जम्‍मे जन मोरके छाडके जेबह, केहकेकि यसके लिखाइल बडइ,

‘मुइ भेडहरवाके मारबहिँ

हसे भेडवाह छाहरछिता हतइ।’ # जकरिया १३:७

32 “बाकि मुइ मरलिसे फेरि जिउते भेलेपर तोहारसे यागा गालिलमा जेबहिँ।” # मति २८:१६ 33यतुरेमा पतरुस येसुजिके कहलिय, “जम्‍मे जन छाडके गेले फेनि मुइ कबहुँ फेनि यपनहुँके नाहिँ छडबहिँ।” 34तब येसुजि पतरुसके कहलसि, “मुइ तोरके सदियो कहबहिँ, याजु राति चिङनावा बसलिसे यागा तुइ मोरके हइने चिनसहिँ कहके तिन पारि इन्‍कार करबहि।” 35बाकि पतरुस हुनेके कहलिय, “यगर यपनहुँसाङे मरे परतइ फेनि मुइ यपनहुँके इन्‍कार नाहिँ करबहिँ।” याको जम्‍मे चेलवाह फेनि वसने कहलइ।

गेतसमनिमा येसुजि

(मरकुस १४:३२-४२; लुका २२:३९-४६)

36वकरपाछा येसुजि यापन चेलवानिसाङे गेतसमनि कहल ठउरियामा गेलसि हसे यापन चेलवानिके कहलसि, “तोहरा यहवाँ रहिह, मुइ इचिका वताहुँ जाके परथाना करबहिँ।” 37हुने यापनसाङे पतरुस हसे जब्‍दियाक दु जन बेटवानिके लिगलसि हसे तखनहिँ हुने सोकित हसे व्‍याकुल हखे लगलसि। 38तब येसुजि हुनुकाके कहलसि, “मोर प्रान दुःखित भके मरे जोकर भेल बडइ, तोहरा मोरसाङे यहवाँ जगले रहिह।”

39हुने इचिका यगाहे जाके घोप्‍टे परके यसके परथाना करे लगलसि, “हे मोर पिता, हखे सकतइ जउँ इअ कस्‍टक कचोरवा मोरसे होटा देहुँ, बाकि मोर इछासे हइने, यपनहुँक इछा पुरा हखइ।”

40वकरपाछा येसुजि उअ तिन जन चेलवानिक लघिना फिरके यलसि हसे हुनुकाके सुतल देखके पतरुसके कहलसि, “कथि तोहरा मोरसाङे एक घन्‍टा फेनि जगले रहे हइने सकलह? 41तोहरा परिछामा नाहिँ परेके तहिँया जगले रहके परथाना करिह, केहकेकि आत्‍मा त तयार बडइ, बाकि देहिया कमजोर बडइ।”

42हुने फेरि जाके दोसरि पारि यसके कहके परथाना करलसि, “हे मोर पिता, यगर इअ कस्‍टक कचोरवा पियहि परतइ जउँ, यपनहुँक इछा पुरा हखइ।” 43जब येसुजि फेरि हुनेक तिन जन चेलवाह भेलि ठउरियामा फिरके यलसि, हुनुकाके निनाइल देखलसि, केहकेकि हुनुका निनेसे यखिया खोले हइने सकलइ।

44येसुजि हुनुकाके छाडके फेरि गेलसि हसे तिसरि पारि वसने परथाना करलसि। 45वकरपाछा हुने चेलवानि लघिना याके हुनुकाके कहलसि, “तोहरा यखनिलइ निनाके आराम करइबडह? हेरह! जुन लजिके यासकल बडइ। याबे मुइ मन्‍सेक पुतरके धोखा देके पापि मन्‍सावानिक हथवामा सपदेतइ। 46उठह, याबे हमरा जाउँ, हेरह! मोरके धोखा देलहरवा यहवाँ यवइ बडिय।”

येसुजिक पकडाउ

(मरकुस १४:४३-५०; लुका २२:४७-५३; युहन्‍ना १८:३-१२)

47जब येसुजि फदकते रहलसि, तब हुनेक बारह जन चेलवाहमधे यहुदा कहल चेलवा यलिय। वकरसाङे मुख्‍य पुजेरियाह हसे समाजक मन्‍सावानिक यगुवासभक पठावल एगुडा जबड भिड तरवार हसे डाङ लेले यलइ। 48याबे येसुजिके धोखा देलहरवा हुनुकाके यसके कहके एगुडा इसारा देले रहलिय, “जुन मन्‍सावाके मुइ चुमबहि, उहे येसु हखिय, वकरहिँके पकडिह।” 49यहुदा वइघरहिँ येसुजिक लघिना याके, “हे रब्‍बि!” कहते हुनेके चुमलिय। 50तब येसुजि वकरेके कहलसि, “अजि सङहाति, जथि करे याइल बडहुँ, उअ करबे करहुँ।” तब हुनुका यागा याके येसुजिके पकडलइ।

51इअ देखके येसुजिसाङे रहलहरामधे एक जन यापन तरवरवा निकडोलिय हसे प्रधान पुजेरियाक एगुडा बहरियाक कनवा चट्टे काटदेलिय। 52तब येसुजि वकरेके कहलसि, “तोर तरवरवा दबवामा धरहि, केहकेकि तरवार चलोलहराह जम्‍मे जन तरवरवासे नास हतइ। 53तोहरा कथि सोचले बडह? यगर मुइ मोर पितासाङे मङबहिँ जउँ, कथि मोर पिता वइघरहिँ बारह पल्‍टनसे बहुत स्‍वरगदुत नाहिँ पठादेबसि त? 54बाकि मुइ मङबहिँ जउँ, धरमसास्‍तरवामा लिखइलि बतवा कस्‍के पुरा हखे सकतइ?”

55तखनहिँ येसुजि भिडवाक मन्‍सावानिके कहलसि, “कथि तोहरा मोरके विद्रोहि सोचके डाङ हसे तरवार लेके पकडे याइल बडह? मुइ मन्‍दिरवामा सिखोइखुनि सबदिन तोहारसाङे रहहिँ, तखनहिँ तोहरा मोरके हइने पकडलह।#लुका १९:४७; २१:३७ 56बाकि मोर बारेमा अगमवक्‍तावानिक लिखलि बतवा पुरा हखइ कहके इअ जम्‍मे घटलइ।”

तब जम्‍मे चेलवाह हुनेके छाडके भगलइ।

यहुदि महासभाक यागा येसुजि

(मरकुस १४:५३-६५; लुका २२:५४-५५,६३-७१; युहन्‍ना १८:१३-१४,१९-२४)

57वकरपाछा येसुजिके पकडलहरा प्रधान पुजेरिया कइयाफाक घरवामा लिगलइ, जहवाँ व्‍यवस्‍थाक-गुरु हसे समाजक बडके यगुवासभ जामा भेल रहलइ। 58तखनहिँ पतरुस तनाउसे येसुजिके पछियोते प्रधान पुजेरियाक घरवाक यङनवालइ पुगलिय हसे याबे कथि हतइ कहके हेरेके तहिँया भितरा जाके सिपहियवानिसाङे बेठलिय। 59याबे मुख्‍य पुजेरियाह हसे यहुदि महासभाक याको जम्‍मे सदस्‍यसभ येसुजिके कस्‍के मारे सकेतइ कहके झुठा साछि खोजे लगलइ। 60वहवाँ बहुत जन याके येसुजिक विरोधमा झुठा साछि देलइ, बाकि हुनुका किहो परमान हइने पउलइ। याखिरमा दु जन मन्‍से यागा यलइ 61हसे कहलइ, “इअ मन्‍सावा त ‘मुइ परमेस्‍वरक मन्‍दिरवाके भसकाके तिन दिनमा फेरि बनावे सकबहि कहके कहलिय’।”#युहन्‍ना २:१९

62तब प्रधान पुजेरिया उठके कहलिय, “इअ मन्‍सावाह तोर विरोधमा देलि इअ गवाहिक बारेमा कथि तुइ किहो जवाफ नाहिँ देबहि?” 63बाकि येसुजि चुप रहलसि। तब प्रधान पुजेरिया हुनेके कहलिय, “मुइ तोरके जिउते परमेस्‍वरक यागा हमराके कहहिँ कहके आग्‍या करइ बडहिँ, कह त, कथि तुइ परमेस्‍वरक पुतर ख्रिस्‍ट हखहि?” 64येसुजि वकरेके कहलसि, “उअ त यपनहिँ कहइ बडहुँ। ताफेनि मुइ यपनहुँसभके कहबहिँ, याबेसे यपनहुँसभ मुइ मन्‍सेक पुतरके सरवसक्‍तिमानक दहिनिकलहरवा बइठल हसे स्‍वरगसे बदरियामा यवइ देखबह।”#दानिएल ७:१३

65तब प्रधान पुजेरिया यापन लुगवा फारके कहलिय, “इअ त परमेस्‍वरक निना हखइ। याबे हमराके याको कथि गवाहि चाहिँ लगलइ त? तोहरा जम्‍मे जन यकरेके परमेस्‍वरक निना करइ सुनबेकरलह। 66कहह ता, तोहार कथि विचार बडइ?” तब हुनुका “यकरेके मृत्‍यु दन्‍ड देवे परतइ” कहके कहलइ!#लेवि २४:१६ 67वकरपाछा हुनुका येसुजिक मुहवामा थुकदेलइ हसे मुकियोलइ। कतेक जन हुनेके थपरोते#यसइया ५०:६ 68यसके कहलइ, “अरे ख्रिस्‍ट, लो, तोरके कुने पिटलइ? अगमवाडि कहहि ता!”

पतरुस येसुजिके इन्‍कार करलिय

(मरकुस १४:६६-७२; लुका २२:५६-६२; युहन्‍ना १८:१५-१८,२५-२७)

69तखनहिँ पतरुस बाहरा यङनावामा बइठल रहलिय। तब एगुडि बहरिनिया वकर लघिना याके कहलिय, “तुइ फेनि त गालिलक येसुसाङे रहलहि।” 70बाकि हुनुकर जम्‍मे जनक यागा उअ इन्‍कार करते कहलिय, “तुइ कथि कहइ बडहिँ, मोर थाह हइने बडइ।” 71जब पतरुस वहवाँसे केउरियावरि गेलिय, तब दोसरि बहरिनिया वकरेके देखके वहवाँ भेलि मन्‍सावानिके कहलिय, “इअ मन्‍सावा फेनि नासरतक येसुजिसाङे त रहलिय।”

72पतरुस फेरि किरिया खाके इन्‍कार करलिय हसे कहलिय, “मुइ इअ मन्‍सावाके हइने चिनसहिँ!”

73यघरिक रहके वहवाँ ठडियलि मन्‍सावाह वकरेके कहलइ, “सदियो, तुइ फेनि हुनुकरेमधेक एक जन हखहि, केहकेकि तोर फदकावासे इअ चिनार बडइ।” 74तब पतरुस किरिया खइते कहलिय, “यगर मुइ झुठा फदकइ बडहिँ जउँ, परमेस्‍वर मोरके दन्‍ड दिय, मुइ उअ मन्‍सावाके हइने चिनले बडहिँ।” तखनहिँ चिङनावा बसलिय।

75तखनहिँ पतरुस येसुजिक उअ कहलि बतवा सम्‍झलिय, “चिङनावा बसलिसे यागा तुइ मोरके ‘हइने चिनसहिँ’ कहके तिन पारि इन्‍कार करबहिँ।” तब उअ बाहरा जाके डोढा-डोढाके काने लगलिय।

Currently Selected:

मति 26: CTHR

Highlight

Copy