मति 27
27
येसुजि पिलातस लघिना लिगेलसि
(मरकुस १५:१; लुका २३:१-२; युहन्ना १८:२८-३२)
1जब बिहान भेलइ, मुख्य पुजेरियाह हसे मन्सावानिक यगुवासभ येसुजिके मारेके तहिँया हुनेक विरोधमा सल्लाह करे लगलइ, 2हसे हुनुका येसुजिके बान्हके रोमि बडकि हकिमवा पिलातस लघिना लिगाके सपदेलइ।
यहुदाक मृत्यु
(प्रेरित १:१८-१९)
3येसुजिके मृत्यु दन्ड देवेके बात सुनलेपर हुनेके पकडा देलहरवा यहुदाक पछताप लगलइ। उहेसे उअ तिस गो चाँनिक पइसवा लेके मुख्य पुजेरियाह हसे यहुदि यगुवानिक लघिना जाके, 4यसके कहलिय, “मुइ निरदोस मन्सेके धोखा देके पाप करले बडहिँ।” बाकि हुनुका कहलइ, “हमार कथि मतलब? उअ त तोर समस्या हखइ।” 5इअ बतवा सुनके यहुदा उअ पइसावा मन्दिरवा भितरा फाँक देलिय हसे वहवाँसे निकडके जाके झुन्डके मरलिय।
6बाकि मुख्य पुजेरियाह उअ चनियाक पइसावा उठाके कहलइ, “इअ पइसावा मन्दिरवाक कोसमा राखेके ठिक हइने हखइ, केहकेकि इअ पइसावा मन्से मारेके तहिँया दियाइल रहलइ।” 7उहेसे हुनुका सल्लाह करके उअ पइसावासे परदेसियानिक लास गाडेके तहिँया कुम्हारक जागा किनलइ। 8उहेसे उअ जगहवाके “रकतक जागा” कहके याजुलइ कहसइ।#प्रेरित १:१८-१९
9तब यरमिया अगमवक्तावाक कहलि बतवा पुरा भेलइ। उअ यसके कहले रहलिय, “हुनुका चाँनिक तिस गो पइसा लेलइ, जुन पइसावा इस्राएलक मन्सावाह हुनेक तहिँया तोकल मोल रहलइ, 10हसे परमप्रभु मोरके कहलि नहिँया हुनुका उअ पइसावा कुम्हारक जागा किनेके तहिँया देलइ।”#जकरिया ११:१२-१३
पिलातसक यागा येसुजि
(मरकुस १५:२-५; लुका २३:३-५; युहन्ना १८:३३-३८)
11तखनहिँ येसुजि रोमि बडकि हकिमवा पिलातसक यागा ठडियलसि हसे उअ येसुजिके पुछलिय, “कथि तुइ यहुदियानिक राजा हखहि?” येसुजि जवाफ देते कहलसि, “यपनहुँ त वसने कहइ बडहुँ।” 12जब मुख्य पुजेरियाह हसे यगुवासभ येसुजिके दोस लगोलइ, हुने किहो जवाफ हइने देलसि। 13तब पिलातस हुनेके कहलिय, “कतेक बहुत दोस हुनुका तोर विरोधमा लगोइकि कथि तुइ हइने सुनइ बडहिँ?” 14बाकि येसुजि फेरि जवाफ हइने देलसि। इअ देखके बडकि हकिमवा छक परलिय।
15उहे निस्तार-पबनियाक जुनवामा मन्सावानिक माङ यनुसार झ्यालखनवाक एक जन कइदि मन्सेके छाडेके पिलातसक चलन रहलइ। 16तखनहिँ बारब्बा नाउँ भेल एक जन डेरटावनेक मन्से झ्यालखनवामा रहलिय। 17उहेसे जब मन्सावाह जामा भेलइ, पिलातस हुनुकाके पुछलिय, “लो कहह, मुइ ककरेके छाडदेउ? बारब्बाके कि ख्रिस्ट कहल येसुके?” 18केहकेकि यहुदि यगुवासभ येसुजिके डाहेसे सपदेले हखइ कहके वकर थाह रहलइ।
19जब पिलातस न्याय आसनमा बेठल रहलिय, तब वकर जनियावा यसके कहके एगुडा समाद पठोलिय, “उअ धरमि मन्सावाके किहो झिन करहुँ, केहकेकि याजु राति सपनामा वकर कारनसे मुइ बहुत दुःख पउले बडहिँ।”
20बाकि मुख्य पुजेरिया हसे यगुवासभ हमार तहिँया बारब्बाके छाड देहुँ हसे येसुके मृत्यु दन्ड देहुँ कहके कहे लगोलइ। 21उहेसे बडकि हकिमवा हुनुकाके फेरि पुछलिय, “इअ दु जनमधे मुइ ककरेके तोहार तहिँया छाडदेउ?” हुनुका कहलइ, “बारब्बाके छाड देहुँ।”
22तब पिलातस हुनुकाके कहलिय, “ख्रिस्ट कहल येसुके मुइ कथि करु त?” हुनुका जम्मे जन कहलइ, “वकरेके क्रुसवामा टाङ देहुँ!” 23तखनहिँ पिलातस हुनुकाके पुछलिय, “केहके, इअ कथि अपराध करले बडिय?” बाकि हुनुका झन याको चिल्लाके कहलइ, “वकरेके क्रुसवामा टाङ देहुँ!”
24जब पिलातस वकरसे किहो नाहिँ हतइ कहके देखलिय, तब उअ हुलदाङा हतइ कहके सोचके जम्मे मन्सावानिक यागा पनिया लेके हसे यापन हथवा धोउते कहलिय, “इअ मन्सावाके मारलि दोस मोर वपरा हइने बरु तोहार वपरा लगतइ।”#व्यवस्था २१:६-९ 25तब वहवाँ भेलि जम्मे मन्सावाह यसके कहते जवाफ देलइ, “वकर रकतवाक दोस हमार हसे हमार सन्तानसभ वपरा लगइ।”
26तब पिलातस हुनुकर तहिँया बारब्बाके छाड देलिय हसे येसुजिके कोडा लगाके क्रुसवामा टाङेके तहिँया सिपहियवानिके सपदेलिय।
सिपहियावाह येसुजिके गिल्ला करलइ
(मरकुस १५:१६-२०; युहन्ना १९:२-३)
27वकरपाछा बडकि हकिमवाक सिपहियावाह येसुजिके दरबरवा भितरा लिगलइ हसे याको जम्मे पलटनवाक सिपहियावाह वहवाँ जामा भेलइ। 28वकरपाछा हुनुका येसुजिक लुगवा फोके हुनेके राजाक नहिँया लाल लुगा पेहरादेलइ। 29हुनुका काँटक मकुट बिनके येसुजिक मुडियामा धरदेलइ हसे हुनेक दहिनि हथवामा लरकट पकडादेलइ। वकरपाछा हुनेक यागा ठेहुँनाके गिल्ला करते यसके कहलइ, “यहुदियानिक रजवाक जय हखइ!” 30तब सिपहियावाह हुनेक वपरा थुकलइ हसे लरकटवामाहे हुनेक मुडियामा पिटलइ। 31हुनुका येसुजिके यसके गिल्ला करसकलेपर ललकि लुगवा निकडाके हुनेक यपने लुगवा पेहरादेलइ। वकरपाछा हुनुका येसुजिके क्रुसवामा टाङे लिगलइ।
येसुजि क्रुसमा टङाइल
(मरकुस १५:२१-३२; लुका २३:२६-४३; युहन्ना १९:१७-२७)
32जब हुनुका पइडवामा जइते रहलइ, कुरेनि सहरवाक सिमोन नाउँक एक जन मन्सेके भेटलइ। हुनुका येसुजिक क्रुसवा वकरेके जबरजस्ति बोके लगोलइ। 33जब हुनुका गलगथा कहल ठउरियामा यलइ, जाकर यरथ “खोपडिक ठउरि” हखइ। 34तब सिपहियावाह हुनेके तिता बिरो मिझरावल अंङगुरक यामित रस पियके देलइ। येसुजि उअ चिखलसि, बाकि हुने हइने पियलसि।#भजन ६९:२१
35वकरपाछा हुनुका येसुजिके क्रुसवामा काँटि ठोकके टाङ देलइ हसे हुनेक लुगवा बाँटेके तहिँया हुनुका चिठा घललइ।#भजन २२:१८ 36हुनुका वहवाँ बइठके हुनेके वगरे लगलइ, 37हसे हुनेक मुडवा वपरा “इअ येसु यहुदियानिक राजा हखिय” कहके दोस लगावल सुचना-पाटि टाङ देलइ। 38तखनहिँ हुनुका दु जन अपरधियानिके फेनि, एक जनके हुनेक दहिनिकलहरवा हसे दोसरि जनके हुनेक लबडिकलहरवा क्रुसवामा टाङ देलइ।
39उअ पइडवामाहे बुललहरा जम्मे जन यापन मुडिया डिङोते हुनेके गिल्ला करते,#भजन २२:७; १०९:२५ 40यसके कहलइ “मन्दिरवा भसकाके तिन दिनमा बनावे सकलाहर मन्से तुइ हखहि त, यपनहिँके बचोहि! यगर तुइ परमेस्वरक पुतर हखहि जउँ, क्रुसवासे नाभके यवहि।”#मति २६:६१; युहन्ना २:१९
41वसने करके मुख्य पुजेरिया, व्यवस्थाक-गुरुसभ हसे मन्सावानिक यगुवासभ फेनि येसुजिके गिल्ला करते यसके कहलइ, 42“इअ त दोसरे जनके बचोलिय, बाकि यपनहिँके बचावे हइने सकलिय। इअ इस्राएलिसभक राजा हखिय त? यगर हखिय जउँ यखनि क्रुसवासे नाभके तर यइय हसे हमरा यकरेके विस्वास करबहुँ। 43इअ परमेस्वरमा भरोसा रखसिय। उहेसे परमेस्वर यकरेके बचोसि, यगर बचावे चाहबसि जउँ, केहकेकि इअ ‘मुइ त परमेस्वरक पुतर हखहि’ कहके कहते बुलिय।”#भजन २२:८
44वसने करके येसुजिसाङे क्रुसवामा झुन्डियोलि दु जन अपरधियाह फेनि हुनेके गिल्ला करलइ।
येसुजिक मृत्यु
(मरकुस १५:३३-४१; लुका २३:४४-४९; युहन्ना १९:२८-३०)
45तब दिनक बारह बजेसे तिन बजेलइ जम्मे देसवामा यन्हार भेलइ। 46हसे तिन बजेवरि येसुजि जबड माहे चिल्लाके कहलसि, “इलोइ-इलोइ लामा सबखथनिक?” यकर यरथ, “हे मोर परमेस्वर, हे मोर परमेस्वर, यपनहुँ मोरके केहके त्यागलहुँ? हखइ।”#भजन २२:१ 47इअ बतवा सुनके वहवाँ ठडियलरामधे कतेक जन यसके कहलइ, “इअ मन्सावा त एलियाके बलोइ बडिय।”
48तब वइघरहिँ हुनुकरमधेसे एक जन दगुरते जाके एगुडा नमहर लाठिक टुप्पयामा लुगवा घेउटके यामित रसमा डुबोलिय। वकरपाछा वकरेके लरकटवाक टुप्पयामा यटकाके येसुजिके पियके देलइ।#भजन ६९:२१ 49बाकि याको जन कहलइ, “लो हेरु त, एलिया याके यकरेके बचोबिय कि नाहिँ!” 50तब येसुजि फेरि एकपल्टा जबड माहे चिल्लाके यापन प्रान त्यागलसि।
51तखनहिँ मन्दिरवा भितरा टङइलि परदावा वपरासे तरलइ फाटके दु चिघा भेलइ।#२७:५१ इअ परदावा पवितर हसे महापवितर ठउरिमा हखना परदा रहलिय। परमेस्वर मन्सावानिके देखावेके तहिँया इअ परदावा फारलसि हसे यखनि प्रधान पुजेरि मतरा हइने जम्मे मन्सावाह हुनेक लजिके जाए सकतइ। प्रस्थान २६:३१-३३ धरतिया डिङलइ, सिलवाह फुटलइ,#प्रस्थान २६:३१-३३ 52चिन्डियाह खोलेलइ हसे परमेस्वरक जनसभक देहिया जियलइ। 53हुनुका यापन-यापन चिन्डियासे निकडलइ हसे येसुजिक पुनरुत्थान भेलेपर हुनुका पवितर सहरवा भितरा पेसके बहुत जन लघिना देखा परलइ।
54जब कप्तनवा हसे वकरसाङे येसुजिके वगरलहरा सिपहियावाह भुइचलवा हसे वहवाँ भेलि घटनवा देखलइ, तब हुनुका खाँ डेराके यसके कहलइ, “सदियो, इअ त परमेस्वरक पुतर रहलिय!”
55तखनहिँ बहुत जन जनियानि मन्से तनाउसे हेरइ रहलइ। हुनुका येसुजिके मदत करते याइल रहलइ हसे गालिलसे येसुजिक पाछा-पाछा याइल रहलइ। 56हुनुकरमधे मरियम मग्दलिनि, याकुब हसे योसेफक दाओ मरियम हसे जब्दियाक दु गो बेटवानिक दाओ रहलिय।#लुका ८:२-३
येसुजिक दफन
(मरकुस १५:४२-४७; लुका २३:५०-५६; युहन्ना १९:३८-४२)
57जब साँझ भेलइ, अरिमाथिया सहरवाक योसेफ नाउँ भेल एक जन धनि मन्से यलिय। उअ फेनि येसुजिक चेला रहलिय। 58उअ पिलातस लघिना जाके येसुजिक मरलि देहिया मङलिय हसे पिलातस वकर मरलि देहिया वकरेके देवेके हुकुम देलिय। 59उहेसे योसेफ येसुजिक देहिया लेके साफा मलमलक लुगामा घेउटलिय। 60वकरपाछा यापन तहिँया सिलवामा खोपके बनावल वकर लउठि चिन्डियामा धरदेलिय। वकरपाछा योसेफ चिन्डियाक दुवरियामा एगुडा जबड पत्थरा धरदेलिय हसे उअ वहवाँसे गेलिय। 61तखनहिँ मरियम मग्दलिनि हसे दोसरि मरियम चिन्डियाक यागा बइठल रहलइ।
सिपहियावाह येसुजिक चिन्डिया वगरलइ
62दोसरि दिन, विसरामक दिनवामा मुख्य पुजेरियाह हसे फरिसियाह पिलातसक लघिना जाके, 63यसके कहलइ, “गुरुजि, हमरा सम्झइ बडहुँ, जिउते रहइकि, उअ ठगहरवा ‘मुइ तिन दिन पाछा फेरि जिइ उठबहिँ’ कहके कहले रहलिय।#मति १६:२१; १७:२३; २०:१९; मरकुस ८:३१; ९:३१; लुका ९:२२; १८:३१-३३ 64उहेसे तिन दिनलइ उअ चिन्डियाके डउलसे वगरे लगोबहुँ, नत वकर चेलवाह याके वकर देहिया चोराके लिगतइ हसे ‘उअ त मरलिसे जिउते भेल बडिय’ कहके मन्सावानिके कहतइ। तब पाछाक धोखा पहिलासे फेनि झन खराब हतइ।”#२७:६४ पहिलो झुठ चाहिँ येसुजिक चेलवाह हुनेके मसिह कहके कहलि बतवा हुनुका सोचले रहलइ। 65पिलातस हुनुकाके कहलिय, “सिपहियवानिके लेले जाह हसे चिन्डियाके सकभर डउलसे वगरे कहिह।” 66उहेसे हुनुका जाके सुरछाक तहिँया चिन्डियाक मुहवाक पत्थरवामा छाप लगोलइ हसे सिपहियवानिके वगरे लगोलइ।
Currently Selected:
मति 27: CTHR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
