मति 3
3
बप्तिस्मा देलाहर युहन्नाक सन्देस
(मरकुस १:१-८; लुका ३:१-१८; युहन्ना १:१९-२८)
1किहो बरस पाछा बप्तिस्मा देलाहर युहन्ना यहुदियाक उराठ-ठउरियामा याके यसके परचार करे लगलिय, 2“तोहरा यापन-यापन मनवा पापसे फिरोह, केहकेकि स्वरगक राज लजिके यासकल बडइ।”#मति ४:१७; मरकुस १:१५ 3यसइया अगमवक्तावा फेनि इहे युहन्नाक बारेमा यसके कहले बडिय,
“उराठ-ठउरियामा कुनहुँ एक जन जबड स्वर निकडाके यसके कहइ बडिय,
‘परमप्रभुक तहिँया पइडा तयार पारह,
हुनेक पइडावाह सोझ बनोह’।”#यसइया ४०:३
4युहन्ना उटक रउक लुगा पेहरिय, ठेकनवामा छालाक फाड बन्हिय। उअ सलह#३:४ सलह: सलह फरिङा नहिँया किरा हखइ, जुन बालिनालिके नास करसइ। हसे बन-मधुक रस खइय।#२ राजा १:८ 5तखनहिँ यरुसलेम सहरवासे, जम्मे यहुदिया हसे यरदन लदिया छेतरक चारिवरसे मन्सावाह वकर लघिना यावे लगलइ, 6हसे यापन-यापन पाप स्विकार करते हुनुका युहन्नासे यरदन लदियामा बप्तिस्मा लेलइ।
7बाकि जब युहन्ना फरिसि हसे सदुकि दफवाक बहुत मन्सेसभके बप्तिस्मा लेवे यवइकि देखके हुनुकाके कहलिय, “अरे सपवाक बचवाह, कुने तोहराके यावे लगइकि परमेस्वरक दन्डसे बचेके चेतवनि देलिय?#मति १२:३४; २३:३३ 8तोहरा पापसे यापन-यापन मनवा फिरोले बडह जउँ, उहे यनुसार चलह। 9‘हमरा अब्राहमक सन्तान हखहुँ’ कहतेमा बचे सकबहुँ कहके झिन सोचिह। मुइ तोहराके कहइ बडहिँ, परमेस्वर इअ पत्थरवानिसे फेनि अब्राहमक तहिँया सन्तान जरमावे सकबसि।#युहन्ना ८:३३ 10गछवानिक जरियामा टङिया परिसकल बडइ। उहेसे डउल फर हइने फराह जम्मे गछवा काटके यगियामा फकेतइ।#मति ७:१९; लुका ३:९
11“मुइ त तोहराके यापन-यापन पपवा मानके मनवा फिरोलेसे पनियामा बप्तिस्मा देइ बडहिँ, बाकि मोरसे पाछा यलहरवा तोहराके पवितर-आत्मा हसे यागिसे बप्तिस्मा देबसि। हुने मोरसे खाँ महान बडसि, मुइ त हुनेक चप्पलवा बोकेके फेनि लाइक हइने बडहिँ। 12ओसउना सुपा हुनेक हथवामा बडइ। हुने यापन खरिहनवा साफा करबसि हसे यापन यनवा ओसाके धनसरवामा धरबसि, बाकि भुसवा कबहुँ फेनि हइने बुतइना यगियामा जरादेबसि।”
येसुजिक बप्तिस्मा
(मरकुस १:९-११; लुका ३:२१-२२; युहन्ना १:३२-३४)
13वकरपाछा येसुजि युहन्नासे बप्तिस्मा लेवेके तहिँया गालिल छेतरसे यरदन लदियामा यलसि। 14बाकि युहन्ना हुनेके यसके कहके रोके खोजलिय, “मुइ यपनहुँसे बप्तिस्मा लेवे परतइ हसे कथि यपनहुँ मोर लघिना याइल बडहुँ?” 15बाकि येसुजि वकरेके कहलसि, “यखनि यसने हखे देउ, केहकेकि परमेस्वरक जम्मे इछा पुरा करेके तहिँया हमरा यखनि यसने करे परतइ।” इअ बतवामा राजि हखके युहन्ना येसुजिके बप्तिस्मा देलिय।
16येसुजि बप्तिस्मा लेसकले पर, हुने वइघरहिँ पनियासे वपरा यलसि, तखनहिँ स्वरग खोलेलइ हसे हुने परमेस्वरक आत्माके घुटुरि नहिँया यापनमा परइ देखलसि। 17तब स्वरगसे एगुडा यसनुक स्वर यलइ, “इअ मोर सोगावल पुतर हखिय, यकरसे मुइ खाँ खुसि बडहिँ।”#उत्पति २२:२; भजन २:७; यसइया ४२:१; मति १२:१८; १७:५
Currently Selected:
मति 3: CTHR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
