मरकुस 11

यरुसलेममा येसुजिके राजाक यादर

(मति २१:१-११; लुका १९:२८-४०; युहन्‍ना १२:१२-१९)

1जब येसुजि हसे हुनेक चेलवाह यरुसलेम सहरवाक लजिके पुगइकि जइतुन पहडावाक लजिके भेलि बेथफागे हसे बेथानिया गउँवाक लजिके यापुगलइ, तब येसुजि यापन दु जन चेलवानिके यसके कहके पठोलसि, 2“तोहार यगाहेक गउँवामा जाह हसे जाकर वपरा कुनहुँ फेनि कबहुँ हइने चढल एगुडा गदहाक बाचा बान्‍हल देखबह। वकरेके फोके मोर लघिना यनिह। 3यगर कुनहुँ तोहराके इअ गदहावाक बचवाके केहके फवइ बडह कहके पुछतइ जउँ, तोहरा ‘इअ प्रभुजिक तहिँया चाहिँ बडइ हसे हुने यकरेके हलहालि फिरादेबसि’ कहके कहिह।” 4तब चेलवाह गेलइ हसे बाहरा गलियावामा एगुडा गदहाक बाचाके घरवाक दुवरियाक यागा बान्‍हल पउलइ। जब हुनुका वकरेके फवइ रहलइ, 5वहवाँ लजिके ठडियइलि कतेक जन मन्‍सावाह हुनुकाके पुछलइ, “तोहरा इअ गदहावाक बचवाके केहके फवइ बडह?” 6तखनहिँ, चेलवाह येसुजि जथि कहेके तहिँया कहले रहलसि, उअ हुनुकाके कहदेलइ। तब उअ मन्‍सावाह गदहावाक बचवाके लिगे देलइ। 7वकरपाछा चेलवाह उअ गदहवाक बचवाके येसुजिक लघिना यनलइ हसे वकर वपरा यापन होडलि लुगवाह बिछादेलइ। तब येसुजि वकर वपरा बेठलसि। 8यसने भिडवामा भेलि बहुत जन मन्‍सेसभ यापन-यापन होडलि लुगवाह हसे याको मन्‍सावाह खेतवासे झाङपात काटके पइडावामा बिछादेलइ। 9येसुजिक यागा-यागा हसे पाछा-पाछा यइलि जम्‍मे मन्‍सावाह चिलइते यसके कहे लगलइ,

“होसन्‍ना!#११:९ होसन्‍ना: यकर यरथ परमेस्‍वरक जय हखइ! हखइ।

परमेस्‍वरक नाउँमा यलहरवा धन्य हखिय!#भजन ११८:२५-२६

10हमार पुरखावा दाउदक यावेवाला राज धन्यक हखइ!

सबसे वपरा स्‍वरगमा रहलाहर परमेस्‍वरक होसन्‍ना!”

11वकरपाछा येसुजि यरुसलेममा याके मन्‍दिरवा भितरा गेलसि। हुने वहवाँक जम्‍मे चिजुवा हेरलसि, बाकि देरि भेलेसे हुने यापन बारह जन चेलवानिके लेके बेथानिया गउँवामा गेलसि।

फर हइने भेल कोइलारक गाछ

(मति २१:१८-१९)

12दोसरि दिन हुनुका बेथानिया गउँवासे फिरइखुनि येसुजिक भुख लगलइ, 13हसे इचिका वताहुँ हुने एगुडा झेङटार कोइलारक गाछ देखलसि। जब गछवामा फर बडइ कि हइने कहके हेरे गेलसि, तब वकरमा पाता मतरे पउलसि, केहकेकि तखनहिँ कोइलरवाक फरेके जुन हइने भेल रहलइ। 14उहेसे येसुजि उअ गछवाके कहलसि, “याबेसे कुनहुँ फेनि तोरसे फर झिन खाइ” हसे इअ बतवा हुनेक चेलवाह सुनलइ।

येसुजि मन्‍दिरवा भितरासे व्‍यपरियावानिके निकडा देलसि

(मति २१:१२-१७; लुका १९:४५-४८; युहन्‍ना २:१३-२२)

15वकरपाछा, हुनुका फेरि यरुसलेममा यलइ हसे येसुजि मन्‍दिरवा भितराक यङनवामा पेसके किनबेच करलहरानिके बाहरा निकडा देलसि। हुने पइसवा सटलहारानिक टेबुलावा हसे कबतुरवा बेचलाहरानिक बेस्‍नावा घोप्‍टा देलसि, 16हसे हुने ककरहुँके फेनि मन्‍दिरवासे किहो चिजु लिगे हइने देलसि। 17वकरपाछा हुने मन्‍सावानिके सिछा देते यसके कहलसि, “परमेस्‍वरक वचनमा जसने लिखाइल बडइ, ‘मोर घरवा जम्‍मे जातिक तहिँया परथाना करना घर हखे परतइ, बाकि तोहरा त डकुवानिक यडडा बनादेलह’।”#यसइया ५६:७; यरमिया ७:११ 18जब इअ बतवा मुख्‍य पुजेरियाह हसे व्‍यवस्‍थाक-गुरुसभ सुनलइ, तब हुनुका येसुजिके मारे खोजलइ। बाकि हुनुका येसुजिसाङे डेरेलइ, केहकेकि हुनेक सिछा सुनके जम्‍मे मन्‍सावाह यचम्‍म मनइ। 19जब साँझ परलइ तब येसुजि यापन चेलवानिसाङे यरुसलेम सहरवासे निकडके बाहरा गेलसि।

कोइलारक गाछसे सिछा

(मति २१:२०-२२)

20दोसरि दिन बिहना, जब हुनुका उअ पइडावामाहे जाइ रहलइ, तब चेलवाह उअ कोइलरवाक गछवाके जरियासे सुखाइल देखलइ। 21तखनहिँ पतरुस येसुजिक कहलि बतवा सम्‍झलिय हसे हुनेके कहलिय, “गुरुजि, हेरहुँ, यपनहुँक सराप देलि गछवा त सुखाइल बडिय।” 22तब येसुजि चेलवानिके कहलसि, “परमेस्‍वरमा विस्‍वास करिह। 23मुइ सदियो तोहराके कहबहिँ, यगर कुनहुँ एक जन मन्‍से यापन मनवामा इचिको फेनि सक नाहिँ करके, विस्‍वाससे, इअ पहडावाके ‘यहवाँसे हटके समुनदरवामा खस’ कहके कहबिय जउँ, वकर कहलि बतवा पुरा हतइ।#मति १७:२०; १ कोरिन्‍थि १३:२ 24उहेसे मुइ तोहराके कहबहिँ, यगर तोहरा परथाना करके जथि मङबह हसे ‘मुइ उअ पासकलहि’, कहके विस्‍वास करबह जउँ, तोहार उअ मङलि चिजुवा पउबह। 25जब तोहरा परथाना करे जेबह हसे ककरो विरोधमा तोहार किहो बात बडइ जउँ, वकरेके छमा दिह। तोहरा यसके करबह जउँ, स्‍वरगमा रहलाहर तोहार परमेस्‍वर पिता फेनि तोहार पाप छमा करबसि। 26[बाकि छमा नाहिँ करबह जउँ, स्‍वरगमा रहलाहर तोहार परमेस्‍वर पिता फेनि तोहार पाप छमा नाहिँ करबसि।”]#मति ६:१४-१५ #११:२६ इअ पदवा पहिलाक ग्रिकमा हइने रहलइ, बाकि पाछेसे जोडलेसे कतेक लउठा संस्‍करनमा कोस्‍ठमा राखल बडइ।

येसुजिक अधिकारक बारेमा यहुदि यगुवासभक प्रस्‍न

(मति २१:२३-२७; लुका २०:१-८)

27वकरपाछा हुनुका फेरि यरुसलेममा यलइ। जब येसुजि मन्‍दिरवामा बुलइ रहलसि, तखनहिँ मुख्‍य पुजेरियाह, व्‍यवस्‍थाक-गुरुसभ हसे याको यगुवाह हुनेक लघिना याके, 28यसके पुछलइ, “यपनहुँ, कुन अधिकारसे इअ कमवाह करसहुँ? इअ अधिकार यपनहुँके कुने देलइ?” 29तब येसुजि हुनुकाके कहलसि, “मुइ फेनि तोहराके एगुडा बात पुछबहिँ, पहिला वकर जवाफ देह हसे मुइ कुन अधिकारसे इअ कमवा करसहिँ, उअ तोहराके कहबहिँ। 30मोरके कहह! बप्‍तिस्‍मा देलाहर युहन्‍ना बप्‍तिस्‍मा देवेके अधिकार परमेस्‍वरसे कि मन्‍सेसे पउले रहलिय?” 31तब इअ बतवा सुनके हुनुका एक-दोसरि जनसाङे यसके कहे लगलइ, “यगर हमरा युहन्‍नाक बप्‍तिस्‍मा स्‍वरगसे कहबहुँ जउँ ‘तोहरा केहके युहन्‍नाके हइने विस्‍वास करलह त?’ कहके हमराके पुछबसि, 32हसे युहन्‍नाक बप्‍तिस्‍मा मन्‍सेसे हखइ कहके कहुँ जउँ, हुनुका मन्‍सावानिसे डेरेलइ, केहकेकि जम्‍मे मन्‍सावाह युहन्‍ना एक जन अगमवक्‍ता हखिय कहके विस्‍वास करइ।” 33तब हुनुका येसुजिके कहलइ, “हमार हइने थाह बडइ।” तखनहिँ येसुजि हुनुकाके कहलसि, “मुइ फेनि तोहराके नाहिँ कहबहिँ, इअ जम्‍मे कमवाह मुइ कुन अधिकारसे करइ बडहिँ।”

Currently Selected:

मरकुस 11: CTHR

Highlight

Copy