मरकुस 10
10
छोडपतरक बारेमा येसुजिक सिछा
(मति १९:१-१२; लुका १६:१८)
1वकरपाछा, येसुजि कफरनहुम सहरवासे यहुदिया छेतरमा याके यरदन लदियाक वाहिकरवा गेलसि। वहवाँ फेरि बहुत मन्सेसभ जामा भेलइ हसे हुने सबदिनक नहिँया हुनुकाके सिछा देवे लगलसि। 2तखनहिँ कतेक जन फरिसियाह याके येसुजिके जाँचेके तहिँया पुछलइ, “कहहुँ त, कथि कुनहुँ मन्से यापन जनियावाके नियम यनुसार छाडेके ठिक हखइ कि हइने?” 3तब येसुजि हुनुकाके पुछलसि, “मोसा तोहराके कथि आग्या देले बडिय?” 4हुनुका जवाफ देके यसके कहलइ, “छोडपतरक कागत लिखके यापन जनियावाके छाडे सकबह कहके मोसा अनुमति देले बडिय।”#व्यवस्था २४:१-४; मति ५:३१ 5बाकि येसुजि हुनुकाके कहलसि, “तोहार मनवा हइलठ भेलेसे उअ तोहराके इअ आग्या लिखदेले बडिय। 6बाकि सिरिस्टिक सुरुमा परमेस्वर मन्सेक जातिके मरदाना हसे जनियानि करके बनोलसि।#उत्पति १:२७; ५:२ 7‘उहेसे मरदाना मन्से यापन दाओ-बाबाके छाडके यापन जनियावासाङे मिलके रहसइ, 8हसे हुनुका दुन्हुँ जन एगुडे देहि हतइ।’ याबे हुनुका त दु जन हइने, बाकि एगुडे देहि हखइ।#उत्पति २:२४ 9उहेसे परमेस्वर जकरेके एकसाङे जोडले बडसि, मन्सावा हुनुकाके झिन छुटोइय।” 10वकरपाछा, जब येसुजि यापन चेलवानिसाङे घरवामा रहलसि, तब हुनुका इअ बतवाक बारेमा फेरि येसुजिके पुछलइ। 11हुने चेलवानिके कहलसि, “यगर जुन मरदाना यापन जनियावाके छाडके दोसर जनिके बियाह करबिय, उअ यापन जनियावाक विरोधमा धुचुड करसिय। 12वसने करके, यगर कुनहुँ जनियानि यापन मरदावाके छाडके दोसर जनसाङे बियाह करबिय, उअ जनियावा फेनि धुचुड करसिय।”#मति ५:३२; १ कोरिन्थि ७:१०-११
येसुजि छोकनियानिके यासिरवाद देलसि
(मति १९:१३-१५; लुका १८:१५-१७)
13एक दिन जब मन्सावाह यापन-यापन छोकनियानिके येसुजि छुके यासिरवाद दिय कहके हुनेक लघिना यनलइ, तब इअ देखके चेलवाह हुनुकाके डटलइ। 14बाकि येसुजि यापन चेलवानिके खिसियाके कहलसि, “इअ छोकनियानिके मोर लघिना यावे दिह, हुनुकाके झिन रोकिह, केहकेकि परमेस्वरक राज हिनिकर तहिँया हखइ। 15मुइ तोहराके सदियो कहबहिँ, जुने परमेस्वरक राजके एगुडा झिनमिन छोकनिसभ नहिँया गरहन नाहिँ करतइ, उअ कबहुँ फेनि परमेस्वरक राज भितरा पेसे नाहिँ सकबिय।”#मति १८:३ 16तब हुने छोकनियानिके यापन कोरवामा लेलसि हसे एकहक जनक मुडवा वपरा यापन हथवा धरके यासिरवाद देलसि।
धनि मन्से
(मति १९:१६-३०; लुका १८:१८-३०)
17येसुजि वहवाँसे जाइखुनि, एक जन मन्से दगुरते याके हुनेक पाउ परके पुछलिय, “हे यसल गुरुजि, परमेस्वरसाङे सबदिन रहना जिवन पावेके तहिँया मुइ कथि करे परतइ?” 18येसुजि वकरेके कहलसि, “तुइ मोरके केहके यसल कहसहि? कुनहुँ फेनि यसल हइने बडइ बाकि परमेस्वर मतरे यसल बडसि। 19तोर परमेस्वरक व्यवस्था त थाह बडइ, मन्से झिन मारसि, धुचुड झिन करसि, झिन चोरोसि, झुठा साछि झिन देसि, झिन ठगसि हसे यापन दाओ-बाबाके यादर करसि।”#प्रस्थान २०:१२-१६; व्यवस्था ५:१६-२० 20उअ मन्सावा जवाफ देते कहलिय, “गुरुजि, इअ जम्मे आग्या त मुइ झिनमिनसे मनते यवइ बडहिँ।” 21तब येसुजि वकरेके हेरलसि हसे माया करके कहलसि, “तुइ एगुडा काम करेके बाँकि बडइ। याबे तुइ जाहि, यापनसाङे भेलि जम्मे चिजुवा बेचके पइसावा गरिबवानिके बाटदेसि हसे तुइ स्वरगमा धन पउबहि। वकरपाछा याके मोर पाछा लगहि।” 22बाकि इअ बतवा सुनके उअ मन्सावाक मोहडवा मलिन भेलइ हसे उअ दुःखित भके गेलिय, केहकेकि वकरसाङे बहुत धन-सम्पति रहलइ।
23तब येसुजि चारिवरि हेरके चेलवानिके कहलसि, “धनि मन्सावानिके त परमेस्वरक राज भितरा पेसेके कस्नुक गारह बडइ।” 24येसुजिक इअ बतवा सुनके चेलवाह यचम्म मनलइ। बाकि येसुजि फेरि हुनुकाके कहलसि, “हेरह छोकनिया, परमेस्वरक राजमा पेसेके कस्नुक गारह बडइ! 25धनि मन्सेके परमेस्वरक राज भितरा पेसलिसे त बरु सुइवाक भोङवामा उटवाक छिरेके उसार हसइ।” 26तब इअ सुनके चेलवाह झन छक परलइ हसे एक-दोसरि जनके यसके कहलइ, “वसके भेले कुने मुक्ति पावे सकतइ त?” 27येसुजि हुनुकाके हेरके कहलसि, “मन्सावानिक तहिँया इअ सम्भव हइने बडइ, बाकि परमेस्वरक तहिँया इअ सम्भव बडइ, केहकेकि परमेस्वरक तहिँया जम्मे सम्भव बडइ।”
28तब पतरुस येसुजिके कहलिय, “हेरहुँ, हमरा यापन जम्मे चिजुवा छाडके यपनहुँक पाछा लागल बडहुँ।” 29येसुजि चेलवानिके कहलसि, “मुइ तोहराके सदियो कहबहिँ, जुन मन्सावा मोर हसे मोर सुसमाचारक खातिर यापन घरबार, ददेर-भाइ, दिदेर-बहिन, यापन दाओ-बाबा, बेटा-बेटि कि, जग्गह-जमिन छडले बडिय, 30उअ इअ जुगवामा सतावट हसे दुःखवासाङे सय गुना बढि घरबार, ददेर-भाइ, दिदेर-बहिन, दाओसभ, बेटा-बेटि, जागा-जमिन पउबिय हसे यावेवाला जुगवामा फेनि परमेस्वरसाङे सबदिन रहना जिवन पउबिय। 31बाकि यखनि पहिला भेलहरवा बहुत जन पाछा हतइ हसे यखनि पाछा हखलहरा पहिला हतइ।”#मति २०:१६; लुका १३:३०
येसुजि यापन मृत्युक बारेमा कहलसि
(मति २०:१७-१९; लुका १८:३१-३४)
32वहवाँसे येसुजि हसे हुनेक चेलवाह यरुसलेमवरि जाइ रहलइ हसे येसुजि चेलवानिक यागा-यागा बुलइ रहलसि। तखनहिँ चेलवाह छक परल रहलइ हसे पाछा-पाछा यइलि मन्सावाह फेनि डेराइल रहलइ। तब येसुजि फेरि यापन बारह जन चेलवानिके एकवरि लिगाके यापन वपरा यावेवाला दुःखवाक बारेमा कहलसि। 33हुने यसके कहलसि, “सुनह, हमरा यरुसलेम सहरवावरि जाइबडहुँ। वहवाँ मन्सेक पुतरके मुख्य पुजेरियानि हसे व्यवस्थाक-गुरुसभक हथवामा सपदेतइ हसे वकरेके मृत्यु दन्ड देके अयहुदि मन्सावानिक हथवामा सपदेतइ। 34हुनुका वकर खिल्लि उडोतइ, वकर वपरा थुकतइ, वकरेके कोडा लगोतइ हसे मारदेतइ। बाकि तिसरि दिनवामा उअ फेरि जिइ उठबिय।”
याकुब हसे युहन्नाक बिन्ति
(मति २०:२०-२८)
35तखनहिँ जब्दियाक दु गो बेटवाह, याकुब हसे युहन्ना येसुजिक लघिना याके यसके कहलइ, “गुरुजि, हमरा यपनहुँसाङे जथि मङबहुँ उअ हमार तहिँया करदेबहुँ कहके हमार इछा बडइ।” 36येसुजि हुनुकाके पुछलसि, “तोहार तहिँया मुइ कथि करदेउ कहके तोहार इछा बडइ?” 37हुनुका येसुजिके कहलइ, “जब यपनहुँ यापन महिमित राजक राजगद्विमा बेठबहुँ, तब हमरा एक जनके यपनहुँक दहिनिकलहरवा हसे एक जनके यपनहुँक लबडिकलहरवा बइठे देहुँ।” 38बाकि येसुजि हुनुकाके कहलसि, “तोहरा कथि मङइ बडह कहके तोहार थाहे हइने बडइ। जुन कस्टक कचोरवासे मुइ पियसहि, कथि तोहरा उअ कचोरवासे पिए सकबह? जुन बप्तिस्मा मुइ लेले बडहिँ, कथि तोहरा उअ बप्तिस्मा लेवे सकबह?”#लुका १२:५० 39तब “हमरा सकबहुँ” कहके हुनुका येसुजिके कहलइ। तब येसुजि हुनुकाके कहलसि, “जुन कचोरवा मुइ पियसहि, उअ तोहरा पियबह हसे जुन बप्तिस्मा मुइ लेले बडहिँ, उअ बप्तिस्मा तोहरा फेनि लेबह। 40बाकि मोर दहिनिकलहरवा हसे लबडिकलहरवा बइठे देवेके अधिकार मोर हइने हखइ। इअ ठउरियाह परमेस्वर जाकर तहिँया तयार पारले बडसि, वकरहिँके देबसि।”
41इअ बतवा सुनके याको दस जन चेलवाह याकुब हसे युहन्नासाङे खिसियलइ। 42उहेसे येसुजि हुनुका जम्मे जनके एगुडा ठउरिमा बलाके कहलसि, “तोहार थाह बडइ कि, जुने अयहुदि मन्सावानिक सासक बडइ हुनुका परजावानिक वपरा मनपरि सासन चलोसइ हसे हुनुकर हकिमवाह हुनुकर वपरा यापन अधिकार चलोसइ। 43बाकि तोहरा वसनुक झिन हखिह। तोहारमधे जुने महान हखे खोजबह उअ तोहार सेवक हखे परतइ।#लुका २२:२५-२६ 44जुने तोहारमधे सबसे पहिला हखे खोजबह उअ जम्मे जनक दास हखे परतइ,#मति २३:११; मरकुस ९:३५ 45केहकेकि मुइ मन्सेक पुतर याको जनसे सेवा पावेके हइने, बरु याको जनक सेवा करे हसे बहुत जनके छुटकारा देवेके तहिँया यपने प्रान देवे याइल हखहि।”
येसुजि यान्हर बारतिमइके देखाह बनोलसि
(मति २०:२९-३४; लुका १८:३५-४३)
46वकरपाछा वइघरहिँ येसुजि चेलवानिसाङे यरिहो सहरवामा यलसि। जब हुने यापन चेलवानि हसे मन्सेक जबड भिडसाङे यरिहोसे बाहरा जाइरहलसि, बारतिमइ नाउँक एक जन यान्हर भिख मङलाहर पइडवाक तिरवामा बइठल रहलिय। उअ तिमइक बेटा रहलिय। 47जब उअ नासरतक येसुजि यवइ बडसि कहके सुनलिय, तब उअ चिलइते कहलिय, “हे दाउदक पुतर येसुजि, मोरके दाया करहुँ!” 48तखनहिँ बहुत जन वकरेके चुप रह कहके डटलइ, बाकि उअ झन जबड माहे चिल्लाके कहलिय, “हे दाउदक पुतर, यपनहुँ मोरके दाया करहुँ!” 49तब येसुजि ठप्पे ठडियाके कहलसि, “वकरेके यते बलोह!” तखनहिँ हुनुका उअ यन्हराके यसके कहके बलोलइ, “तुइ साहस करहि! उठहि! हुने तोरके बलोइ बडसि।” 50तखनहिँ उअ यापन होडलि लुगवा फाँकके भकदरे उठलिय हसे येसुजिक लघिना दगुरते यलिय। 51तब येसुजि वकरेके पुछलसि, “मुइ तोर तहिँया कथि करदेहि कहके तुइ चाहइ बडहिँ?” तब उअ यन्हारा मन्सावा बिन्ति करते यसके कहलिय, “गुरुजि, मुइ फेरि देखे सकुँ!” 52तब येसुजि वकरेके कहलसि, “तुइ यापन पइडा लगहि, तोर विस्वास तोरके डउल बनोले बडिय।” तखनहिँ उअ वइघरहिँ देखे सकलिय हसे येसुजिक पाछा लगलिय।
Currently Selected:
मरकुस 10: CTHR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
