मरकुस 5

दुस्‍ट-आत्‍मा लागल मन्‍से डउल भेल

(मति ८:२८-३४; लुका ८:२६-३९)

1वकरपाछा, येसुजि यापन चेलवानिसाङे गालिल तलवाक वाहिकरवा गेरासेनस परदेसमा पुगलसि। 2जब येसुजि डोङवासे नभलसि, तखनहिँ चिन्‍डियासे एक जन दुस्‍ट-आत्‍मा लागल मन्‍से येसुजिके भेटे यलिय। 3उअ मन्‍सावा चिन्‍डियामा रहिय हसे कुनहुँ फेनि वकरेके सिकरियासे बान्‍हके धरे हइने सकइ। 4केहकेकि बहुत पारि उअ मन्‍सावाक हथवा-टङवामा सिकरिया हसे बेडियासे बान्‍हके रखले फेनि उअ सिकरियाके टुरिय तके बेडियाके खाडा-खाडा बनाके भगिय। कुनहुँ फेनि वकरेके यापन वसमा धरे हइने सकइ रहलइ। 5उअ सबदिन चिन्‍डिया हसे पहडावामा चिलइते बुलिय हसे यपनहिँके तधार पत्‍थरासे घाउ बनोइय।

6जब येसुजिके उअ तनाउसे देखलिय, तब दगुरते याके हुनेके ढोग लगलिय, 7जबड माहे चिल्‍लाके यसके कहलिय, “हे येसु, महान परमेस्‍वरक पुतर, यपनहुँ मोरके कथि करे खोजइ बडहुँ? परमेस्‍वरक नाउँमा किरिया खाके मुइ बिन्‍ति करइ बडहिँ मोरके दुःख झिन देहुँ।” 8केहकेकि येसुजि दुस्‍ट-आत्‍माके उअ मन्‍सावासे निकडके जइबे करहि कहके कहले रहलसि।

9वकरपाछा येसुजि वकरेके पुछलसि, “तोर नाउँ कथि हखइ?” उअ कहलिय, “मोर नाउँ फउज हखइ, केहकेकि हमरा बहुत जन बडहुँ।” 10तब उअ दुस्‍ट-आत्‍मासभ येसुजिसाङे काने-कान बिन्‍ति करते कहलइ, “हमराके इअ छेतरसे झिन खेदहुँ।”

11तखनहिँ उहे पहडावाक तरियामा एक बगाल सुवर चरहइ रहलइ। 12उअ दुस्‍ट-आत्‍मावाह येसुजिके बिन्‍ति करके कहलइ, “हमराके सुवरवानिक लघिना जाए देहुँ हसे हमरा हुनुकर भितरा पेसबहुँ।” 13तब येसुजि हुनुकाके सुवरवानिक भितरा पेसेके अनुमति देलसि हसे दुस्‍ट-आत्‍मासभ उअ मन्‍सावासे निकडके सुवरवानिक भितरा पेसलइ। उअ बगलवामा लगभग दु हजार गो सुवर रहलइ। हुनुका पहडावाक तरियासे तलवामा खसके डुबके मरलइ।

14इअ घटनावा देखके सुवरवा चरहोलहरा वहवाँसे भागके गेलइ हसे उअ बतवा सहरवा हसे यासपासक गउँवामा कहदेलइ। तब कथि भेलइ कहके हेरेके तहिँया बहुत जन मन्‍से वहवाँ यलइ। 15जब मन्‍सावाह येसुजि लघिना यलइ हसे दुस्‍ट-आत्‍मा लगलि मन्‍सावाके डउल मन भके लुगा पेहरके येसुजिक पाउ लघिना डउलसे बइठल देखलइ। इअ देखके हुनुका डेरेलइ। 16जतेक जन उअ मन्‍सावा हसे सुवरवानिके कथि भेल रहलइ कहके देखले रहलइ। हुनुका उअ बतवा दोसरि जनके फेनि सुनादेलइ। 17तखनहिँ मन्‍सावाह येसुजिके हमार छेतरसे बाहरा जइबे करहुँ कहके बिन्‍ति करलइ।

18जब येसुजि डोङवामा चढइ रहलसि, तब दुस्‍ट-आत्‍मा लगलि मन्‍सावा “मोरके फेनि यपनहुँसाङे लिगहुँ” कहके येसुजिके बिन्‍ति करलिय। 19बाकि येसुजि इन्‍कार करलसि हसे वकरेके यसके कहलसि, “तुइ यापन घर फिरके जाहि तके परमेस्‍वर तोर तहिँया जथि करले बडसि, उअ जम्‍मे बतवा सुनोसि।” 20तब उअ मन्‍सावा जाके येसुजि वकर तहिँया करलि जम्‍मे घटनावाक बारेमा डेकापोलिसभर#५:२० डेकापोलिस: ग्रिक भासामा डेकापोलिस कहले दस गो सहर हखइ। सुनादेलिय। उअ बतवा सुनके जम्‍मे जन छक परलइ।

याइरसक बेटि जिउतल हसे मनियाइल जनियानि डउल भेल

(मति ९:१८-२६; लुका ८:४०-५६)

21जब येसुजि डोङवामा चढके फेरि तलवाक याहिपार फिरके यलसि, तब बहुत मन्‍सेसभ याके हुनेक चारिवरि जामा भेलइ। हुने तलवाक तिरवामा रहलसि। 22तखनहिँ याइरस नाउँक एक जन सभाघरवाक सासक वहवाँ यलिय हसे येसुजिक यागा ठेहुँनाके बिन्‍ति करते यसके कहलिय, 23“मोर झिनकि बेटिया मनियाके मरइ बडिय। यपनहुँ याके वकर वपरा हथवा राखदेहुँ, उअ डउल भके बचतिय।” 24तब येसुजि वकर सङ-सङहि गेलसि हसे मन्‍सेक जबड भिड हुनेके चारिवरसे धकिला-मकिलि करते हुनेक पाछा लगलइ। 25उहे भिडवामा बारह बरससे रकत बहना रोग लागल एक जन जनियानि रहलिय। 26उअ जनियावा बइधवानिसे उपचार करइखुनि बहुत दुःख पाके यापन जम्‍मे सम्‍पतिया वरोले फेनि उअ डउल हइने भेलिय, बरु वकर दासा झन याको खराब भेल रहलइ। 27उअ येसुजिक बारेमा सुनले रहलिय, उहेसे उअ भिडवामा पेसके येसुजिक पाछासे याके हुनेक लुगवाक कोनहरवा छुलिय। 28उअ यसके सोचलिय, “मुइ हुनेक लुगवा मतरे छुअले फेनि डउल हखबहिँ।” 29तब वइघरहिँ वकर रकतावा बहेके बन्‍द भेलइ हसे यापन देहियासे रोगवा डउल भेल उअ थाह पउलिय।

30तखनहिँ येसुजि यापनसे सक्‍ति निकडके गेल कहके वइघरहिँ थाह पउलसि। उहेसे हुने छराहिदर मन्‍सावानिवरि घुमके पुछलसि, “कुने मोर लुगवा छुलिय?”

31तब हुनेक चेलवाह कहलइ, “गुरुजि, मन्‍सावानिक भिडवा त यपनहुँके धकलइ बडइ, ताफेनि यपनहुँ कस्‍के कुने मोरके छुलइ कहके कहइ बडहुँ?”

32बाकि येसुजि यपनहिँके कुने छुलइ कहके यतेवते हेरे लगलसि। 33तखनहिँ उअ जनिनियाक जथि भेल रहलइ उअ थाह भेलेसे, डरेसे दुलदुलइते याके येसुजिक पाउ परलिय हसे हुनेके छुतेकि कस्‍के डउल भेलहिँ कहके जम्‍मे बतवा कहदेलिय। 34बाकि येसुजि वकरेके कहलसि, “अरि बेटिया, तोर विस्‍वास तोरके डउल बनोले बडिय, याबे सान्‍तिसे जाहि।”

35जब येसुजि फदकते रहलसि, तखनहिँ याइरसक घरवासे मन्‍सेसभ याके वकरेके कहलइ, “यपनहुँक बेटिया त मर सकलिय, याबे गुरुजिके दुःख झिन देहुँ।”

36बाकि येसुजि हुनुकर बतवा ध्‍यान हइने देके याइरसके कहलसि, “झिन डेराहि! विस्‍वास मतरे करहि।”

37तब येसुजि पतरुस, याकुब हसे वकर भयवा युहन्‍ना बाहेक याको ककरहुँके फेनि यापनसाङे हइने जाए देलसि। 38जब हुनुका सभाघरवाक सासक याइरसक घरवामा पुगलइ, तब येसुजि मन्‍सावानिके हाला करते छतिया पिटते कनहनरोहन करइ देखलसि। 39हुने घरवा भितरा पेसलसि हसे वहवाँ भेलि मन्‍सावानिके यसके कहलसि, “तोहरा केहके हाला हसे कनहनरोहन करइबडह? इअ छउडिया त मरल हइने बडिय, बाकि सुतल मतरे बडिय।” 40तब इअ बतवा सुनके हुनुका येसुजिके ठाठा करलइ। बाकि हुने जम्‍मे मन्‍सावानिके बाहरा निकडा देलसि। वकरपाछा येसुजि छउडियाक दाओ-बाबा हसे यापन तिन जन चेलवानिके लेके छउडिया भेलि कोठवामा गेलसि। 41हुने छउडियाक हथवा पकडके कहलसि, “तालिता कुमि” यकर यरथ हखइ, “अरि बोबि, उठहि!” 42तब उअ बारह बरसक छउडिया भकदरे उठके यतेवते बुले लगलिय। इअ देखके हुनुका जम्‍मे जन छक परलइ। 43तब येसुजि हुनुकाके इअ बतवा ककरहुँके झिन कहिह कहके काडा आग्‍या देलसि हसे उअ छउडियाके किहो खइना चिजु दिह कहके कहलसि।

Currently Selected:

मरकुस 5: CTHR

Highlight

Copy