मरकुस 6
6
येसुजिके नासरतक मन्सावाह विस्वास हइने करलइ
(मति १३:५३-५८; लुका ४:१६-३०)
1वकरपाछा येसुजि उअ ठउरियासे निकडके यापन हुरकलि सहरवा नासरतमा फिरलसि हसे हुनेक चेलवाह फेनि हुनेसाङे गेलइ। 2जब विसराम दिन यलइ, तब येसुजि सभाघरवामा सिछा देवे लगलसि। हुनेक सिछा सुनके जम्मे मन्सावा छक परते यसके कहलइ, “इअ जम्मे बुद्धि हसे यसनुक यचम्मक काम करेके सक्ति इअ मन्सावा कहवाँसे पउलिय? 3इअ काठक काम करलाहर मरियमक बेटा हइने हखिय त? कथि इअ याकुब, योसेफ, यहुदा हसे सिमोनक दादा हइने हखिय त? कथि यकर बहिनियाह फेनि हमारसाङे हइने बडइ त!” यसके कहते मन्सावाह हुनेके विस्वास हइने करलइ।
4तब येसुजि हुनुकाके कहलसि, “एक जन अगमवक्ता वकर गाउँ-घरमा, यापन नातपात हसे परिवरवा बाहेक याको जम्मे ठउरियामा यादर पउसिय।”#युहन्ना ४:४४ 5वहवाँक मन्सावाह विस्वास हइने करलेसे, हुने कुनहुँ-कुनहुँ मनियइलि मन्सावानिक वपरा मतरे यापन हथवा धरके डउल बनोलसि हसे याको यचम्क काम करे हइने सकलसि। 6येसुजि हुनुकर अविस्वास देखके छक परलसि।
येसुजि बारह जन चेलवानिके पठोलसि
(मति १०:५-१५; लुका ९:१-६)
वकरपाछा हुने गाउँ-गाउँमा जाके मन्सावानिके सिछा देलसि। 7तखनहिँ येसुजि बारह जन चेलवानिके यापन लघिना बलाके दु-दु जन करके पठोलसि हसे दुस्ट-आत्मासभक वपरा अधिकार फेनि देलसि। 8येसुजि हुनुकाके यसके कहलसि, “याबे तोहरा जाइखुनि यापनसाङे किहो चिजु फेनि झिन लिह। तोहरा रोटि, झोला, पइसा झिन बोकिह, बाकि लाठि मतरे बोकिह। 9चप्पल त लगोइह बाकि फेरहा लुगा झिन बोकिह।”#लुका १०:४-११ 10वकरपाछा येसुजि हुनुकाके कहलसि, “यगर तोहरा एगुडा घरमा पेसबह, उअ गउँवासे बिदा नाहिँ हखइलइ उहे घरवामा रहिह। 11यगर कुनहुँ ठउरियाक मन्सावाह तोहराके स्वागत नाहिँ करतइ हसे तोहार बतवा सुनेके नाहिँ मनतइ जउँ, तोहरा उअ ठउरिया छाडके जाइखुनि हुनुकर विरोधमा साछिक तहिँया यापन टङवाक धुरिया#६:११ टङवाक धुरिया: जब यहुदि मन्सावाह अयहुदि मन्सावानिक सहरवासे यापन घर फिरइ। तखनहिँ हुनुका असुद्ध बडइ हसे परमेस्वर खिसियाइल बडसि कहके साछिक तहिँया यहुदि मन्सावाह यापन टङवाक चिटकलि धुरिया झहराके उअ सहरवाके छाडदेइ। झारदिह।”#लुका १०:४-११; प्रेरित १३:५१
12तब चेलवाह मन्सावानिक लघिना जाके, “यापन-यापन पाप मानके छाडे परतइ” कहके परचार करे लगलइ। 13हुनुका मन्सावानिसे दुस्ट-आत्मासभ निकडोलइ हसे मनियइलि मन्सावानिके तेल#६:१३ मनियइलि मन्सावानिके तेल लगावेके: मनियइलि मन्सावानिके तेल लगावेके कहले परमेस्वरक आसिस हसे छुवाइक संकेत करसइ। लगाके अभिसेक#६:१३ अभिसेक: पुरान करारक जुनवामा मन्सावानिक मुडवामा तेल लगाके बिसेस कामक तहिँया छानल हसइ वकरहिँके अभिसेक करइ। करलइ हसे डउल बनोलइ।#याकुब ५:१४
बप्तिस्मा देलाहर युहन्नाक मृत्यु
(मति १४:१-१२; लुका ९:७-९)
14येसुजिक नाउँ चारिवरि फइललेसे, हेरोद रजवा फेनि हुनेक बारेमा सुनलिय। कतेक जन मन्से यसके कहइ रहलइ, “बप्तिस्मा देलाहर युहन्ना मरलिसे फेरि जियल बडिय, उहेसे वकरसे यसनुक यचम्मक काम हखइ बडइ।”
15बाकि कतेक जन, “इअ एलिया हखिय कहइ” हसे याको जन, “इअ त पुरनि अगमवक्तावानिक नहिँया एक जन अगमवक्ता हखिय” कहके कहइ।#मति १६:१४; मरकुस ८:२८; लुका ९:१९
16बाकि हेरोद इअ बतवा सुनके यसके कहलिय, “जुन युहन्नाक घेन्टिया मुइ काटे लगोलहिँ, उअ फेरि जिउतल बडिय।”
17वकर किहो समय यागा हेरोद युहन्नाके पकडके झ्यालखनवामा थुने लगोले रहलिय, केहकेकि उअ यापन भयवा फिलिपक जनियावा हेरोदियासके बियाह करले रहलिय, 18हेरोदके घर-घराहे, “यापन भयवाक जनियावाके नियम यनुसार यसके लेके राखेके ठिक हइने हखइ कहके कहइ रहिह।”#लुका ३:१९-२०; मति ४:१२ 19उहेसे हेरोदियास खिसियाके वकरेके मारे खोजिय, बाकि मारे हइने सकिय। 20केहकेकि युहन्ना एगुडा धरमि हसे पवितर मन्से बडिय कहके हेरोदक थाह भेलेसे, युहन्नाके बचावे खोजिय। युहन्नाक बात सुनके हेरोदक मनवामा छटपट लगले फेनि उअ युहन्नाक बतवा खुसिसे सुनिय।
21बाकि याखिरमा हेरोदियासक बदला लेवेके मउका यलइ। हेरोद यापन जनम दिनवामा जबड भोज देलिय। उअ भोजवामा हेरोद बडके-हकिमसभ, सिपाहिक कप्तानसभके हसे गालिलक मुख्य-मुख्य मन्सावानिके बलोले रहलिय। 22जब उअ भोजवामा हेरोदियासक बेटिया भितरा याके नाचके हेरोद हसे वकर पहुनावानिके खुसि पारलिय, तखनहिँ हेरोद उअ छउडियाके पुछलिय, “तुइ मोरसे जथि मङबहि मुइ तोरके उहे देबहिँ।” 23हेरोद रजवा फेरि किरिया खइते कहलिय, “तुइ जथि मङबहि मुइ उहे देबहि, यगर तुइ मङबहिँ जउँ मोर याधा राज फेनि तोरके देबहिँ।”#एस्तर ५:३,६
24तब उअ छउडिया यापन दाओ लघिना जाके पुछलिय, “दाओ, मुइ कथि माङेके त?”
वकर दाओ कहलिय, “बप्तिस्मा देलाहर युहन्नाक मुडिया मङहि।”
25तब उअ छउडिया हलहालि हेरोद रजवाक लघिना जाके, “तुइ यखनहिँ मोरके बप्तिस्मा देलाहर युहन्नाक मुडिया छिपवामा दे कहके कहलिय।”
26इअ बतवा सुनके रजवा खाँ चिन्तामा परलिय। बाकि यापन खइलि किरिया हसे पहुनावानिक कारनसे, छउडियाक माङ करलि चिजुवा इन्कार करे हइने सकलिय। 27उहेसे रजवा “युहन्नाक घेन्टिया काटके यनह” कहके यापन एगुडा सिपाहिके हुकुम देलिय। तब उअ सिपहियावा झ्यालखनवामा जाके युहन्नाक घेन्टिया कटलिय, 28हसे वकर मुडिया छिपवामा राखके छउडियाके देलिय। छउडिया उअ मुडिया लिगाके यापन दाओके देलिय। 29जब युहन्नाक चेलवाह इअ बतवा सुनलइ, तब वहवाँ याके वकर लसवा लिगलइ हसे चिन्डियामा गाडदेलइ।
येसुजि पाँच हजार मन्सेसभके खियोलसि
(मति १४:१३-२१; लुका ९:१०-१७; युहन्ना ६:१-१४)
30बारह जन प्रेरितसभ फिरके येसुजि लघिना याके हुनुका यापन करलि कमवा हसे मन्सावानिके सिखोलि जम्मे बतवा हुनेके सुनादेलइ। 31तब येसुजि हुनुकाके कहलसि, “याबे हमरा सुनसान ठउरियामा जाके किहो समय बिसाउँ,” केहकेकि वहवाँ बहुत मन्सेसभ यवइ-जाइ रहलइ। येसुजि हसे प्रेरितवानिके खाएके फेनि फुरसद हइने रहलइ।
32उहेसे हुनुका डोङवामा चढके एगुडा सुनसान ठउरिमा गेलइ। 33बाकि जतेक जन हुनुकाके जाइकि देखलइ हुनुका येसुजि हसे प्रेरितवानिके चिनलइ। उहेसे हुनुका जम्मे सहरवासे दगुरते जाके हुनुकरसे यागा वहवाँ पुगलइ। 34जब येसुजि डोङवासे नाभके एगुडा जबड मन्सेक भिड देखलसि, हुनेक सोग लगलइ, केहकेकि हुनुका भेडहार बिनाक भेडा नहिँया रहलइ। तब येसुजि हुनुकाके बहुत बात सिखावे लगलसि।#गन्ति २७:१७; १ राजा २२:१७; २ इतिहास १८:१६; इजकिएल ३४:५; मति ९:३६
35जब बेरियावा डुबे जाइ रहलिय, तखनहिँ येसुजिक चेलवाह हुनेक लघिना याके यसके कहलइ, “इअ सुनसान ठउरि हखइ हसे साँझ फेनि परे लगलइ। 36यपनहुँ इअ मन्सावानिके पठादेहुँ, ताकि हुनुका यासपासक गउँवामा जाके यापन तहिँया किहो चिजु किनके खाइ।”
37बाकि येसुजि हुनुकाके कहलसि, “तोहराहिँ हिनिकाके खियोइह।”
तब चेलवाह हुनेके यसके कहलइ, “गुरुजि कथि हमरा जाके दु सय चाँनिक सिक्काक#६:३७ चाँनिक सिक्का: ग्रिक भासामा “चाँनिक सिक्काके” “दिनार” कहके लिखाइल बडइ। तखनहिँ जुनवामा एक जन मन्सेक एक दिनक बनिहारि एक दिनार रहलइ। मोलक रोटि किनके मन्सावानिके खाएके देउँ त?”#२ राजा ४:४२-४४
38येसुजि चेलवानिके पुछलसि, “तोहारसाङे कतेक गो रोटि बडइ? जाके हेरह।”
तब हुनुका पाता लगाके हुनेके कहलइ, “पाँच गो रोटि हसे दु गो माछरि बडइ।”
39वकरपाछा येसुजि मन्सावानिके दाफा-दाफा बनाके हरियरि जमरवामा बइठावेके तहिँया चेलवानिके आग्या देलसि। 40उहेसे हुनुका सय-सय हसे पचाँस-पचाँस जनक दाफा बनाके बेठलइ। 41तब येसुजि पाँच गो रोटि हसे दु गो माछरि लेलसि तके स्वरगवरि हेरके परमेस्वरके धन्यवाद देलसि। वकरपाछा हुने रोटिया खाडा बनाके चेलवानिके बाँटे लगोलसि। वसनेकरते उअ दु गो मछरिया फेनि जम्मे जनके बाँट देलसि। 42तब हुनुका जम्मे जन यघाइलइ खेलइ, 43हसे उबरलि रोटिया तके मछरियाक खडवा बटियोइखुनि बारह ढकिया भेलइ। 44वहवाँ खेलहर मधे मरदाना मन्से पाँच हजार जन रहलइ।
येसुजि पनिया वपरा बुललसि
(मति १४:२२-३६; युहन्ना ६:१५-२९)
45वकरपाछा येसुजि वइघरहिँ यापन चेलवानिके डोङवामा चढाके यापनसे यागा तलवाक वाहिपार बेथसेदा गउँवामा पठोलसि हसे हुने मन्सावानिके बिदा देलसि। 46हुनुकरसे बिदा भके येसुजि परथाना करेके तहिँया पहडावामा गेलसि।
47साँझ हखइखुनि डोङवा तलवाक बिचा रहलिय हसे तखनहिँ येसुजि यसकरे तरियामा रहलसि। 48तखनहिँ धुधुइ-बयरवा डोङवाक उल्टा बहलेसे चेलवानिके डोङवा खियावेके गारह हखइकि देखलसि। तब येसुजि बिहना तिन बजेवरि तलवा वपरा बुल्ते चेलवानिक लघिना यलसि। जब येसुजि हुनुकर भेलि डोङवा कटके जाइरहलसि, 49तब चेलवाह हुनेके पनिया वपरा बुलइकि देखके “भुत यलिय!” कहके चिल्लाए लगलइ। 50हुनुका जम्मे जन येसुजिके देखके डेराइ रहलइ।
बाकि येसुजि तखनहिँ चेलवानिके कहलसि, “झिन डेराह, मुइ हखहि! साहस करह!” 51वकरपाछा हुने डोङवामा चढलसि हसे धुधुइ-बयरवा फेनि रोकेलइ। इअ देखके चेलवाह खाँ यचम्म मनलइ। 52हुनुका येसुजि पाँच हजार जनके रोटिया खियोलि बतवा यखनिलइ बुझले हइने रहलइ, केहकेकि हुनुकर हृदय कठोर भेल रहलइ। 53येसुजि यापन चेलवानिसाङे तलवा पार करके गनेसरेत कहल ठउरिमा पुगलसि हसे डोङवाके तिरवामा लिगलइ। 54जब हुनुका डोङवासे नभलइ, तब मन्सावाह हुनेके वइघरहिँ चिनबेकरलइ 55हसे चारिवर गउँवाहमा दगुरते जाके मनियइलि मन्सावानिके बिछोनवामा राखके येसुजि जहवाँ रहलसि वहवाँहिँ यनलइ। 56येसुजि गाउँ, सहर हसे बस्तियाहमा जहवाँ-जहवाँ गेलसि, मन्सावाह मनियइलि मन्सावानिके बजरवाहमा यानके राख देलइ। येसुजिक लुगवाक कोनहरवा छुए पाउ कहके मनियइलि मन्सावाह हुनेके बिन्ति करइ। जतेक जन हुनेक लुगवाक कोनहरवा छुवइ, हुनुका जम्मे जन डउल हखबे करइ।
Currently Selected:
मरकुस 6: CTHR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
