सेगुम्पाक 3
3
लाङ्सुरुम्बा याॽमि नुयाना
1इलेन पात्तुरुस नुङ् युहान्ना लेनगा सुम मोक्तुनिङ् लोप्पि पार्थाना चोक्माना बेलाबे पार्थाना चोक्से निङ्वाफुमापाङ्बे ख्याचि॥ 2निङ्वाफुमापाङ्गा “उचुन्ना” बाङ्ना वालाम्बुङ्बे एको लाङ्सुरुम्बा याॽमि वाया, उङ् वायानिङ् नाहाङ्तो लाम्मा मेयाखुबा साया॥ याॽमिचिङा उङ् निङ्वाफुमापाङ्बे पार्थाना चोक्से ताखुबाचिनुङ् नाङ्चानि भोङ् साधाइ न्नाबे न्दाओ॥ 3उङा पात्तुरुस नुङ् युहान्ना निङ्वाफुमापाङ्बे खेॽमास्याचिहा निसुचि न्हाङा उङ्चिनुङ् चा याङ् नाक्तुचि॥ 4ङ्खाॽनिङ्गो उङ्चिङा उचुन सोयाचु न्हाङा पात्तुरुसङा खाॽला लु, “नाखे कान्चिङ् सोया!” 5न्ना लाङ्सुरुम्बा याॽमिङा चा इहाले पिमेहायेम भोङ् खाॽला सोचि॥
6पात्तुरुसङा खाॽला लु, “कानुङ् साम्मेङ् युप्पा इहाचा मान, ङ्खाॽनिङ्गो कानुङ् इहा वान्ने ङ्खामाङ् न्दा पिमेॽनेन्हा॥ न्दा नासारातपेॽना खिरिस्ट येसुगा उनिङ्बे (पोगाघोङ्)#३:६ इखिङ् बाइबोल सोरोतपे “पोगाघोङ्” बाङ्ना न्दोङ्मेन्ना॥ लामा॥” 7न्हाङा पात्तुरुसङा न्ना याॽमिगा छुप्ताङ् उमुकपे लाबुहोङ् पोगु॥ ङ्खिङ्बेलामाङ् न्ना याॽमिगा उलाङ् नुङ् उलाङ्हुप्चि उचुन न्लेक्सा॥ 8न्हाङ् उङ् मुथिङ्गिरिक पोगाहोङ् चेङ् येबा न्हाङा लाम्साङ्, बुरुक-बुरुक पुक्साङ् निङ्वाफुमागा उनिङ् थेन्साङ् उङ्चिनुङ् निङ्वाफुमापाङ्बे उयाख्या॥ 9न्नाबेॽहा घाक याॽमिचिङा उङ् लामाना नुङ् निङ्वाफुमागा पार्साम्सा चोगुना न्निसु, 10न्हाङा ना गो निङ्वाफुमापाङ्गा उचुन्ना वालाम्बुङ् बाङ्नाबे साधाइ नाङ्चाखुबा ओमभोङ् चिनान्दोक्तु, न्हाङ् उका हिङ्लुङ्बे लेक्साहा चेॽया न्निसुहोङ् आच्चाम्मा ङ्ङेता॥
पात्तुरुसङा निङ्वाफुमापाङ्बे नुसाला खेम्मेतुचिहा
11न्ना लाङ्सुरुम्बा याॽमि पात्तुरुस नुङ् युहान्नागा हेक्साङ्-हेक्साङ् लामाख्याना न्निसुहोङ् प्याक याॽमिचि आच्चाम्मा एसाङ् सोलोमानगा दालान बाङ्ना ठोङ्बे न्लुक्ताराया॥ 12ङ्खा याॽमिचि निसुचिहोङ् पात्तुरुसङा खाॽला लुचि, “ओ इजिरेलि याॽमिचि, खा चेॽयाबे इजाङ् न्निङ्दा आच्चाम्मा एसाङ् कान्चिङ् सोन्नेम्मेकाहा? ना याॽमि आन्चिङ्गा साक्ति नुङ् भाक्तिङा लाम्मा याखुबा चोगाङ्चुङ्ना मितिॽवाघायि? 13ङ्खाॽला मेन्ना, एङ्गा पुर्खा आब्राहाम, इसाहाक, नुङ् याकुबका निङ्वाफुमाङा उका सेवाक येसु आदार चोगु॥ न्ना येसु न्निङ्दा च्हेन लाप्मेतुम्चिम्गा, न्हाङा माडा-खाङ्खाङ्बा पिलातासङा लेन्हाङ्मागा चोगुनिङ् चा न्निङ्दा ङ्गाक्सिगान॥#पारास्थान ३:१५ 14न्निङ्दा पाबित्तारा नुङ् धार्मोति याॽमिगा साटोबे याॽमि सिखुबा कानिङ् लेताब्या लुम्गा॥#मात्ति २७:१५-२३; मार्कुस १५:६-१४; लुका २३:१३-२३; युहान्ना १९:१२-१५ 15खाॽला न्निङ्दा हिङ्लुङ् पिखुबा च्हेन सिसुम्गा, ङ्खाॽनिङ्गो निङ्वाफुमाङा उङ् स्यानाभाङ् हिङ्मेतु, खा चेॽयागा साचि कानिङ् वेतिङ्हा॥ 16न्हाङा न्ना येसुगा उनिङ्गा साक्तिभाङ्माङ् ना याॽमिङा बोल तोक्तुक्सु॥ न्निङ्दा निसुम्गाना, चिनातोक्तुम्गाना ना याॽमिङा येसुबे बिस्वास चोगुहोङ्माङ् न्निङ्दा घाकङा उचुन नुयाना निमासिइवाघा॥
17“हाकु आफुआनुन्छा आनाआनुन्छाचि, का था वान्ने न्निङ्गा तायेन्राङ्बाचिङा येसु इसा ओमभोङ् चिनान्जोगुनिन्होङ् न्सिसु॥ 18ङ्खाॽनिङ्गो निङ्वाफुमाङा पाक्सुना खिरिस्टङा तुखि आङ्मा पोराचोङ्मेहाभोङ् प्याक ओन्दाङ् घाक निङ्वाफुमाभाङ् चेक्खुबाचिगा याभाङ् उङा चेक्तुक्साहा चेॽया ङ्खाॽला पुरा चोगुहा ओम॥ 19न्हाङामाङ् हाकु न्निङ्दा पास्चाताप चोगिघोङ् निङ्वाफुमा पोटि लासानि, न्हाङ् उङा न्निङ्गा पाप छेमा चोक्तिबिइवाघा॥ न्हाङा न्निङ्दा निङ्वाफुमाभाङ् आत्माबे हाङ्हाङ् नुङ् साक्ति तोक्त्वाम्गाना॥ 20उङा ओन्दाङ्माङ् न्निङ्गा लागि सेगुना मुक्ति पिखुबा हाङ् खिरिस्ट फेरि पाक्सुबिइवाघा, उङ् येसुमाङ् ओम॥ 21ङ्खाॽनिङ्गो निङ्वाफुमाभाङ् चेक्खुबाचिङा प्याक ओन्दाङ् नाहाङ्तो ङ्गायाहा लोॽवा, निङ्वाफुमाङा घाक चेॽया ओछोङा चोक्माना बेला मेन्दाले सोम्मा येसु वालोकपे वामापोराचोङ्मेहा॥ 22मोसाङा चा खाॽला कायामासा, ‘निङ्वाफुमाङा न्निङ्गा जातिभाङ् न्निङ्गा लागि का लोॽवाना निङ्वाफुमाभाङ् चेक्खुबा पाक्सिबिइवागा, उका चेॽया न्निङ्दा खेप्सानुम॥#ब्यावास्था १८:१५,१८ 23इसाङा उका चेॽया ङ्खेप्स्वानिन, ङ्खाचि निङ्वाफुमागा याॽमिचिभाङ् म्फोङ्मे न्हाङ् नास न्लेङ्मेहा॥’#ब्यावास्था १८:१९
24“सामुएल नुङ् नाहाङ्तो हेक्साङ्हा घाक निङ्वाफुमाभाङ् चेक्खुबाचिङा चा हेन्सेन लेङ्मासिम्मेहा चेॽयागा उतुम्बेॽमाङ् न्जेक्तुक्सुहा॥ 25निङ्वाफुमाङा उङ्भाङ् चेक्खुबाचिभाङ् पिइघा बाचा न्निङ्गा लागिमाङ् ओम, न्हाङा निङ्वाफुमाङा न्निङ्गा पुर्खाचिनुङ् थुन्दुना बाचा न्निङ्गा लागि चा ओम॥ एङ्गा पुर्खा आब्राहाम निङ्वाफुमाङा खाॽला लुक्सा ‘ङ्गा सान्तानचिभाङ् माङ् ताम्दाङ्फुमाबे घाक जातिगा याॽमिचि आसिक पिवाङ्चिङ्हा॥’#उथुक २२:१८ 26न्हाङामाङ् निङ्वाफुमाङा न्निङ्दा इसिॽहा कामभाङ् लामाहोङ् ङ्खा आसिक पिॽमागा लागि उका सेवाक येसु ओन्दाङ् न्निङ्दाबे पाक्सुना ओम॥”
Currently Selected:
सेगुम्पाक 3: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
