सेगुम्पाक 2
2
पाबित्तारा आत्मा तायाना
1पेन्तिकोस#२:१ फोङ्होक्नाम्गा ७ हाप्ता हेक्साङ्ना होक्नाम॥ बाङ्ना याहुदिचिगा होक्नामगा लेन ताया, न्ना लेन यारुसालेमबे बिस्वासिचि घाक एकठोङ्बे न्छुप्सामासा॥#लेबि २३:१५-२१; ब्यावास्था १६:९-११ 2ङ्खिङ्बेला न्नाबे वालोकपाहाङ् थाप्थुम्बे माडा हिॽवा फेनाना लोॽवा चोगा, न्हाङा न्ना हिॽवा कायाना सेम्लाङा ङ्खाचि ङ्युङाना पाङ् घाक इप्तु॥ 3न्हाङा मिलेप लोॽवाहाचि उङ्चि छोङ्बे ङ्ओता, न्हाङ् ङ्खा मिलेप लोॽहाचि फोकाक-फोकाक न्लेक्साहोङ् न्नाबे ङ्वायाहा घाक छोङ्बे ङ्युङा॥ 4न्हाङा ङ्खाचि घाक पाबित्तारा आत्मागा साक्तिङा इप्तुचि॥ पाबित्तारा आत्मागा साक्तिङा इप्तुचिहोङ् पाबित्तारा आत्माङा चिन्दुचिहा लोॽवा हेकोहा-हेकोहा चेॽयाबे चेक्मा न्दारोक्तु॥
5ङ्खिङ्बेला यारुसालेमबे कायुङ्लेनबेॽहा घाक खाम्युकपाहाङ् याहुदि धार्मागा धार्मोति याॽमिचि न्दायामासा॥ 6ङ्खा हाल्ला ङ्खेप्सुहोङ् याॽमिचि यो-खे, तो-मो घाकपाहाङ् न्दाया, न्हाङ् न्ना ठोङ्बे प्याक याॽमि न्छुप्सा॥ ङ्खाचि घाक आच्चाम्मा ङ्ङेता, इजाङ्बाङ्निङ् उङ्चिङा न्जेक्तुहा चेॽया ङ्खा चेलाचिङा चा न्जेक्मास्याहा ङ्खेप्सुचि॥ 7न्हाङा ङ्खाचि आच्चाम्मा एसाङ् खाॽला ङ्गाया, “मेन्ना! खा घाक चेक्खुबा गालिलि याॽमि मेन्हाचि? 8ङ्खाॽनिङ्गो कानिङ् घाकङा एङ्गा चेॽया न्जेक्तुहा खेम्मासिइवाहामिङ्! खाचिङा इमिन एङ्गा चेॽया चेक्मा ङ्यासुहा? 9कानिङ् गो पार्थि, मादि, एलामि, मेसोपोटामिया, याहुदिया, कापाडोकिया, पोन्टास, एसिया, 10फिर्गिया, पाम्फिलिया, मिस्रा, कुरेनिगा उयुम्बेॽहा लिबियागा लिङ्खामचिभाङ् ताइमि॥ न्हाङ् रोमभाङ् 11ताइहा याहुदि नुङ् याहुदि धार्मा मानाचोक्खुबाचि न्हाङा केरेट् नुङ् आराब खाम्युकपाहाङ् ताइहा याॽमि चा वेॽनेति॥ खाचिङा गो कानिङ् घाक्का चेॽयाभाङ् निङ्वाफुमाङा चोगुहा आच्चाम्माहा कामगा उतुम्बे न्जेक्मासिम्मेहा खेम्मासिइवाहामिङ्॥” 12खाॽला उङ्चि घाक आच्चाम्मा ङ्ङेता, न्हाङ् खा इहा लेक्साहा ओमभोङ् आमा ङ्यासुनिन॥ न्हाङ् उङ्चि-उङ्चि खाॽला छिम्खुसा न्जाया, “खा इ लेक्साहालाए?”
13ङ्खाॽनिङ्गो इखिङ्ङा च्हेन ङ्खाचि खिसि चोक्साङ् खाॽला न्लुचि, “खाचि सिम्लेॽमाङ्गा च्वा ङ्ङुङुक्सुहोङ् सिसुक्सुचिहा॥”
पात्तुरुसका सालेन
14ङ्खाॽनिङ्गो पात्तुरुसङा एए सेगुम्पाकचिनुङ् येबाहोङ् घाकङा ङ्खेप्सुनुङ्गा खाॽला लुचि, “याहुदि काम्निभाकचि नुङ् यारुसालेमबे वाखुबा घाक याॽमिचि, खा इहा लेक्साहा ओमभोङ् न्निङ्दा का लुमेॽनेनिन्हा॥ हाकु का लुन्नेहेङ्नेनिन्हा चेॽयाबे उचुन निङ्वा पिम्घोङ् खेप्सानुम! 15न्निङ्दा मितिघा लोॽवा खा याॽमिचि सिसुक्सुचिहा मेन्ना, इजाङ्बाङ्निङ् लोप को भेनिक्का पा से#२:१५ भेनिक्का नाउ से लेङ्मासिम्मेॽना॥ मोक्मासिम्मेॽना॥ 16ङ्खाॽनिङ्गो योएल निङ्वाफुमाभाङ् चेक्खुबाङा चेक्तुहा खा चेॽया पुरा लेक्साहा ओम,
17‘हेक्साङ्हा लेनचिबे खाॽला लेङ्मेहाभोङ् निङ्वाफुमा कामे,#योएल २:२८-३२
आका आत्मा घाक जातिगा याॽमिचि छोङ्बे पाक्स्वाङ्,
न्निङ्गा च्या बाबु नुङ् मामुचिङा आगाम्बानि न्जोग्वा,
न्निङ्गा वेन्चा च्याबाबुचिङा सेन्चि न्दोक्त्वा
न्हाङ् न्निङ्गा पाहोबाचिङा सेम्माङ् म्माक्त्वा॥
18ङ्खा लेनबे आका सेवा चोक्खुबा बाबु-मामुचि छोङ्बे आका आत्मा पाक्स्वाङ्,
न्हाङा ङ्खाचिङा आगाम्बानि न्जोग्वा॥
19न्हाङा तो ताङ्खेङ्बे का आच्चाम्माहा काम चोग्वाङ्,
न्हाङ् मो ताम्दाङ्फुमाबे चा आच्चाम्माहा चिङ्गो
हेलि, मि, नुङ् मेख्वागा मुस्लो सोॽमेत्वाङ्चिङ्॥
20हाङ्बा निङ्वाफुमागा माहान नुङ् आच्चाम्माना लेन तामाहाक्निङ् ओन्दाङ्,
नामङा ओम ओॽमा लेप्तिॽवाहोङ् कुइम लेङ्मे,
न्हाङा ला च्हेन हेलि लोॽवा फाम लेङ्मे॥
21ङ्खाॽनिङ्गो हाङ्बागा उनिङ् पुकारा चोक्खुबाचि घाकङा च्हेन उद्दार न्दोक्त्वाना॥’#योएल २:२८-३२
22“इजिरेलबेॽहा याॽमिचि, आचेॽया खेप्सानुम! नासारातपेॽना येसुगा हिङ्लुङ्भाङ् निङ्वाफुमाङा न्निङ्लुम्बे प्याक साक्तिसालिहा काम चोगुहोङ् आच्चाम्मा-आच्चाम्माहा चिङ्गो सोॽमेतिगा, ङ्खा गो न्निङ्दा था वान्नेॽमाङ्॥ ङ्खा काम नुङ् चिङ्गोभाङ्माङ् निङ्वाफुमाङा येसु कामाङ् पाक्सुङ्ना ओमभोङ् था तोक्मेमे॥ 23निङ्वाफुमाङा उका योजाना नुङ् ओन्दाङ् उनिङ्वाबे मितुहा लोॽवामाङ् येसु न्निङ्गा मुकपे पिइगा, न्हाङा न्निङ्दा पापिचिगा मुकपे पिम्चिम्घोङ् उङ् कुरुसपे छुन्सिॽमेतुम्चिम्गा॥#मात्ति २७:३५; मार्कुस १५:२४; लुका २३:३३; युहान्ना १९:१८ 24ङ्खाॽनिङ्गो निङ्वाफुमाङा उङ् स्यानाभाङ् हिङ्गिलिक लेङ्मेतुक्सुना॥ इजाङ्बाङ्निङ् उङ् स्यानागा स्याना लेङ्मा साम्भाब म्मायान॥#मात्ति २८:५-६; मार्कुस १६:६; लुका २४:५ 25हाङ् दाउदङा चा येसुगा उतुम्बे खाॽला कायामा,#छेम १६:८-११
‘आका हाङ्बा साधाइ आका आयुम्बे निमासिम्मेङ्,
उङ् आका छुप्ताङ् पोटि वान्ने, न्हाङामाङ् का ङ्गिसिमेॽङान्ना॥
26ङ्खाॽलाहोङ्माङ् का आनिङ्वाभाङ् चोन्दास्यामाङ्, न्हाङा चोन्सिॽमाहा छेम लुतुनेस्वाङ्॥
न्हाङा का सालुङ्बे सिमेङ्होङ् चा फेरि हिङ्मेङ्ना बाङ्ना आसपे वामेङ्,
27इजाङ्बाङ्निङ् न्दा आका आत्मा पातालबे न्नाॽवागान,
न्हाङा ङ्गा पाबित्तारा सेवाकका सालुङ् किङ्खेॽमा म्बिवागान॥
28न्दा का हिङ्लुङ्गा लाम्बु सोॽमेतामाङ्गा॥
का न्दानुङ् वामेङ्निङ् इब्बे-इब्बे चोन्सिमेङ्ना॥’
29“ओ आफुआनुन्छा आनाआनुन्छाचि, एङ्गा पुर्खा दाउदका उतुम्बे का उचुन कामा यामेङ्ना॥ उङ् स्याहोङ् उका लास सियापाङ्बे ङ्युक्सु, न्हाङा न्ना सियापाङ् हाकुचा वान्नेॽना॥ 30ङ्खाॽनिङ्गो दाउद निङ्वाफुमाभाङ् चेक्खुबा एको याॽमि साया, न्हाङा उका सान्तानचिबे एको याॽमि उका हाङ्युक्थामबे युङ्मेॽनाभोङ् निङ्वाफुमाङा पिक्साना बाचा उङा था वाया॥#छेम १३२:११; २ सामुएल ७:१२-१३ 31उङा ओन्दाङ् था वायाहोङ् माङ् खिरिस्ट स्यानाभाङ् हिङ्गिलिक लेक्सानागा उतुम्बे खाॽला कायामासा, ‘उङ् पातालबे चा न्नाॽनामेन, न्हाङा उका सालुङ् चा ङ्गिन्दिमेन्ना॥’
32“न्ना खिरिस्ट येसुमाङ् निङ्वाफुमाङा हिङ्गिलिक लेङ्मेतुक्सुना, न्हाङ् खा चेॽयागा साचि कानिङ् वेतिङ्हा॥ 33निङ्वाफुमा पाङा येसु घाक हाक्निङ् तो चोगुहोङ् उका छुप्ताङ् पोटि युक्सु, न्हाङ् उङा बाचा चोगाना लोॽवा पाबित्तारा आत्मा पि॥ हाङ्बा येसुङा न्ना आत्मामाङ् कानिङ्बे पाक्सुहोङ् खाॽला लेङ्मासिम्मेहा ओम॥ 34-35हाङ् दाउद उङ् आफाइ गो वालोकपे ख्याहोङ् निङ्वाफुमागा छुप्ताङ् उमुक पोटि ङ्युङान, ङ्खोङ्चा उङा खाॽला काया,
निङ्वाफुमाङा आका हाङ्बा खाॽला लु,
‘ङ्गा सात्तुरचि न्लाङ्ङा मेम्बाॽमेले सोम्मा
न्दा आका छुप्ताङ् आमुक पोटि युङा॥’#छेम ११०:१
36“न्हाङामाङ् इजिरेलबेॽहा घाक याॽमिचिङा खा चेॽया आसानुम! न्निङ्दा कुरुसपे छुसिम्गाना येसुमाङ् निङ्वाफुमाङा हाङ्बा नुङ् मुक्ति पिखुबा हाङ् खिरिस्ट चोगुक्सुना॥”
37पात्तुरुसङा लुचिहा खा चेॽया ङ्खेप्सुहोङ् घाक्का उङ्चि निङ्वा छियाछिया लेक्सा॥ न्हाङ् उङ्चिङा पात्तुरुस नुङ् हेकोहा सेगुम्पाकचि न्छिम्दुचि, “हाओ आफुआनुन्छाचि, ङ्खाॽलाभोङ् हाकु कानिङ् इ चोगिङ्?”
38न्हाङा पात्तुरुसङा लुचि, “न्निङ्दा पाप छेमा तोक्मागा लागि पास्चाताप चोगिघोङ् खिरिस्ट येसुगा उनिङ्बे बाप्तिस्मा लियाचोगानुम! न्हाङा पाबित्तारा आत्मागा पिनिक्ला तोक्त्वाम्गाना॥ 39इजाङ्बाङ्निङ् ना पाबित्तारा आत्मागा बाचा न्निङ्दा नुङ् न्निङ्गा सान्तानचि, न्हाङा एङ्गा निङ्वाफुमाङा काचिहा घाक माङ्दु-माङ्दु वाखुबाचिगा लागि चा ओम॥” 40न्हाङा हेकोहाचा प्याक चेॽया योक्मेसाङ् पात्तुरुसङा उङ्चि खाॽलाना चेतावानि पिचि, “खा इसिॽहा याॽमिचिङा तोक्माहा दान्डाभाङ् न्निङ्दा आफाइ हिङानि॥” 41न्हाङा उका चेॽया आखुबा घाकङा बाप्तिस्मा लियान्जोगु॥ न्ना लेन सुम माहोम्बोक हिङ् याॽमिचि बिस्वासि न्लेक्सा॥ 42न्हाङा ङ्खाचि सेगुम्पाकचिङा न्जिन्दुचिहा चेॽया, साङ्गाति, होक्ता#२:४२ खिरिस्ट येसुङा चिन्दुचिहा चेॽया मिॽमागा चेलाचि मानाचोक्मेतुचिहा होक्नाम, न्नाबे च्हेन चालेप्पा चामाना न्हाङा सिम्लेॽमाङ्गा उवा होम्माना नियाम साया॥ नुङ् पार्थानाबे एको निङ्वागा न्लेक्साहोङ् लान्जोगामासा॥
बिस्वासिचिगा साङ्गाति
43सेगुम्पाकचिगा हिङ्लुङ्भाङ् प्याक खाले आच्चाम्माहा काम नुङ् चिङ्गो लेक्साहा न्निसुहोङ् याॽमिचि निङ्वाफुमाभाङ् किसिॽमा न्दारोक्तु॥ 44बिस्वास चोक्खुबाचि साधाइ न्छुप्सामासा॥ न्हाङा उङ्चिगा घाक थोक खा आका, खा ङ्गा बाङ्ना म्मायान, घाकङा सोरोबोरो चालान्जोगु॥#सेगुम्पाक ४:३२-३५ 45ङ्खाचिङा उङ्चिगा याङ्सा युबाक्थिङ्खाक इन्चासाङ् खाचोबे ङ्ङायाहा याॽमिचि याङ् ङ्हाप्सुबिचि॥ 46उङ्चि एको निङ्वागा न्लेक्साहोङ् घाक लेन निङ्वाफुमापाङ्बे न्छुप्सामासा॥ न्हाङा उङ्चि घाक चोन्सिसाङ्, उचुन्ना निङ्वाङा पाङ्-पाङ्बे होक्ता ङ्ङेन्दुहोङ् न्जो॥ 47उङ्चि साधाइ निङ्वाफुमागा पार्साम्सा चोक्साङ्, घाक याॽमिचिभाङ् उचुन्ना निङ्ला तोक्साङ् वामा न्दारोक्तु॥ न्हाङा हाङ्बाङा लेन्लेन उङ्बे बिस्वास चोक्खुबाचि पुसाङ्-पुसाङ् खेतुचि॥
Currently Selected:
सेगुम्पाक 2: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
