युहान्ना 21
21
येसु ला जाना चेलाचिगाबे ओताना
1न्हाङा तिबेरियास तालगा#२१:१ नागा हेकोना उनिङ् गालिलगा सामुन्दारा चा ओम॥ उलाप्पे येसु फेरि चेलाचिगा उयुम्बे खाॽला ओता॥ 2न्नाबे सिमोन पात्तुरुस, दिदुमास#२१:२ नागा तुम्बिला ओम “जोम्ले” बाङ्ना थोमा, गालिलगा काना साहारबेॽना नाथानेल, जाब्दियागा हिप्पाङ् उच्याचि न्हाङ् येसुगा हेकोहा हिप्पाङ् चेलाचि न्छुप्सामासा॥ 3सिमोन पात्तुरुसङा लुचि, “का गो नासा लाप्से खेक्साङ्ना॥”
ङ्खाचिङा न्लु, “कानिङ् चा न्दानुङ् लोक्सिॽवाङ्हा॥” न्हाङ् ङ्खाचि डुङ्गाबे न्थाङाख्या, ङ्खाॽनिङ्गो ङ्खाचिङा सेॽनाम्फोकङा एको नासा चा लाप्मा ङ्यासुनिन॥#लुका ५:५
4भेनिक ओम लेक्सेहेक्सासानिङ् येसु तालगा उलाप्पे येबामासा, ङ्खाॽनिङ्गो चेलाचिङा उङ् येसुमाङ् ओमभोङ् चिनान्दोक्तुनिन॥ 5येसुङा ङ्खाचि लुचि, “हाओ काम्निभाकचि, न्निङ्दानुङ् नासा लाबुम्चिम्घा?”
उङ्चिङा पोलोवा म्बि, “मान्ना॥” 6उङा ङ्खाचि लुचि, “जाल डुङ्गागा छुम्ताङ् पोटि लेप्तानुम, न्हाङ् नासा आमेत्वाम्चिम्घा॥” ङ्खाचिङा येसुङा लुचिना ठोङ्बे जाल न्लेप्तु, न्हाङ् खिङ् प्याक नासा ङ्ङाया, ङ्खाचिङा जाल उम्मायि ङ्यासुनिन॥#लुका ५:६
7खा निसुहोङ् येसुङा उलुङ्मा तुक्तुना चेलाङा पात्तुरुस खाॽला लु, “उङ् गो हाङ्बा ओम!” खा चेॽया खेप्सुहोङ् सोलोक पात्तुरुसङा ओन्दाङ् फुक्साहाक्सुना ओतेक उकाम्बोरबे कितुहोङ् माङ्च्वाबे पुक्ताख्या॥ 8हेकोहा चेलाचि च्हेन डुङ्गाबे ङ्युङाहोङ् जाल उन्साङ् उलाप्पे न्दाया, इजाङ्बाङ्निङ् ङ्खाचि उलाप्पाहाङ् प्याक माङ्दु मेन्ना, ङ्खाॽनिङ्गो ए होम्बोक मिटार हिङ्से माङ्दु ङ्वाया॥
9ङ्खाचि उलाप्पे न्दायानिङ् मिगा भुफ्रोबे नासा नुङ् चालेप्पा न्निसु॥ 10येसुङा ङ्खाचि लुचि, “लोप्लोप लाबुम्चिम्घा मिॽयाङ् नासाचि आप्तानुम्चिम॥” 11न्हाङा सिमोन पात्तुरुस डुङ्गाबे थाङाहोङ् ए होम्बोक फासुम माम्माहा नासाचिङा इप्तुना जाल पाखाबे उन्दाप्तु, ङ्खाॽनिङ्गो ङ्खिङाहा नासा ङ्ङायामासाहोङ्चा न्ना जाल न्नागाख्यान॥
12येसुङा ङ्खाचि लुचि, “आबानिघोङ् चायानुम॥” चेलाचि माध्येबे इसाङा चा “न्दा इसागान?” भोङ् छिम्माना आट् चोक्मा ङ्यासानिन, इजाङ्बाङ्निङ् उङ् हाङ्बा ओम बाङ्ना चेॽया ङ्खाचिङा था वाया॥ 13न्हाङ् येसुङा चालेप्पा कोबुहोङ् ङ्खाचि पिचि, ङ्खाॽलामाङ् नासा चा पिचि॥
14येसु स्यानाभाङ् हिङ्गिलिक लेक्साहोङ् उका चेलाचिगाबे ओताना ना च्हेन सुम्ना खेप साया॥
येसु नुङ् पात्तुरुस
15ङ्खाचिङा न्जोइहोङ् येसुङा सिमोन पात्तुरुस लु, “युहान्नागा उच्या सिमोन, इना न्दा खाचिङा हाक्निङ् प्याक न्लुङ्मा तुङ्मेङ्गाना?”
पात्तुरुसङा पोलोवा पि, “ओम हाङ्बा, न्दा था वान्ने, का प्याक आलुङ्मा तुङ्मेॽनेन्ना॥”
येसुङा लु, “आका सामुङ्चि उचुन कोप्तुचि॥”
16येसुङा फेरि हिम्ना खेप लु, “ओ युहान्नागा उच्या सिमोन, इना न्दा का न्लुङ्मा तुङ्मेङ्गाना?”
उङा लु, “ओम हाङ्बा, न्दा था वान्ने, का न्दा आलुङ्मा तुङ्मेॽनेन्ना॥”
न्हाङ् येसुङा लु, “आका सामुङ्चि उचुन सोचि॥”
17न्हाङा येसुङा सुम्ना खेप पात्तुरुस छिम्दु, “युहान्नागा उच्या सिमोन, इना न्दा का न्लुङ्मा तुङ्मेङ्गाना?”
येसुङा उङ् सुम्मा “इना का न्दा न्लुङ्मा तुङ्मेङ्गाना?” लुसाङ् छिम्दुनाङा पात्तुरुसका उनिङ्वा तुगा॥ उङा लु, “हाङ्बा, न्दा घाक चेॽया था वान्ने, का आलुङ्मा तुङ्मेॽनेन्ना॥”
येसुङा उङ् लु, “आका सामुङ्चि उचुन कोप्तुचि॥ 18का न्दा जेप्पा लुमेॽनेन, न्दा वेन्चा सायागानिङ् म्फोखिमा आफाइ छिक्सुगा, न्हाङ् हेॽने खेॽमा मितागा न्नाबे ख्यागा॥ ङ्खाॽनिङ्गो न्दा पाघ्याम लेङ्मेकाहोङ् म्मुक सोस्वाचिगा, न्हाङ् याॽमिचिङा म्फोखिमा न्थुम्बिमेका, न्हाङ् न्दा खेॽमा म्मितागान्ना ठोङ्बे ङ्खेमेका॥” 19(पात्तुरुसङा निङ्वाफुमागा माहिमा चोक्मागा इमिन सिमापोराचोङ्मेहाभोङ् येसुङा खा चेॽया पात्तुरुस लुक्सा॥) न्हाङा येसुङा पात्तुरुस लु, “न्दा आका हेक्साङ् लाचोगा॥”
येसुङा उलुङ्मा तुक्तुना चेला
20पात्तुरुसङा हिक्साहोङ् सोनिङ् येसुङा उलुङ्मा तुक्तुना चेला हेक्साङ्-हेक्साङ् तायेतासा॥ न्नाङामाङ् नाॽमासेक्का होक्तागा बेला येसुगा उछात्तिबे आडेस लाचोगाहोङ्, “हाङ्बा, न्दा लाप्मेखुबा इसा ओम?” लुसाङ् छिम्दुक्सा॥#युहान्ना १३:२५ 21न्ना निसुहोङ् पात्तुरुसङा येसु छिम्दु, “हाङ्बा नागा उतुम्बे च्हेन इलेङ्मेहा?”
22येसुङा पात्तुरुस लु, “का मेन्दाले सोम्मा ना हिङ्नुङ्नि बाङ्ना आनिङ्वा चोगुङ्भोङ्चा न्दा च्हेन नागा उतुम्बे इगा चासो? न्दा च्हेन आका हेक्साङ् लाचोगा॥”
23ङ्खोङ्माङ् न्ना चेला न्सिमेन्ना बाङ्ना चेॽया ङ्खाचिबे हिसा॥ येसुङा न्ना याॽमि न्सिमेन्ना न्लुक्सान, ङ्खाॽनिङ्गो “का मेन्दाले सोम्मा ना हिङ्नुङ्नि बाङ्ना आनिङ्वा चोगुङ्भोङ्चा न्दा च्हेन नागा उतुम्बे इगा चासो” भोङ् लुक्सा॥
24न्ना चेलाङामाङ् खा घाक निसुहोङ् नाबे गाबाहि पियामा, उङामाङ् खा चेॽया छेप्तुक्सु, न्हाङ् उका गाबाहि जेप्पाहा भोङ् कानिङ् आस्वाम॥
मेन्दाहा
25येसुङा हेकोहाचा प्याक काम चोगुक्सु॥ का खाॽला एमेङ् ङ्खा घाक्का उतुम्बे छेप्तानिङ्बि, उका उतुम्बे न्छेप्ताहा छेप्तापचि कायुङ्लेनबे ङ्होन्दुन्चिन्बि॥
Currently Selected:
युहान्ना 21: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
