युहान्ना 20
20
खालि सियापाङ्
(मात्ति २८:१-८; मार्कुस १६:१-८; लुका २४:१-१२)
1नाम्लेन भेनिक कुचिक्कुचिक्पे मारियाम माग्दालिनि येसुगा लास युक्साना सियापाङ्बे ख्या॥ उङा न्नाबे सियापाङ् एप्ताना लुङ्खाक योरोक लाइयामासाना निसु॥ 2न्ना निसुहोङ् सिमोन पात्तुरुस नुङ् येसुङा उलुङ्मा तुक्तुना चेलागाबे लुक्साङ् ख्या न्हाङ् खाॽला लुचि, “ङ्खाचिङा हाङ्बा सियापाङ्भाङ् न्लोन्धेतुक्सुना, न्हाङ् ङ्खेतुहोङ् हेॽने ङ्युक्सु, न्ना कानिङ् था मान्ना!” 3न्हाङा पात्तुरुस नुङ् हेकोना चेला लोन्दाचिहोङ् सियापाङ् पोटि ख्याचि॥ 4ङ्खाचि सोरि-सोरि लुक्ताचि, ङ्खाॽनिङ्गो हेकोना चेलाङा पात्तुरुस ओन्दुचोओहोङ् ओन्दाङ् येसुगा सियापाङ्बे तासु॥ 5उङा उकुरिक उगाहोङ् सियापाङ्बे सोनिङ् येसुगा लास किताना तेक से निसु, ङ्खाॽनिङ्गो उङ् सियापाङ्बे ङ्ङुयान॥ 6सिमोन पात्तुरुस उका हेक्साङ्-हेक्साङ् तायाब्या, न्हाङ् सियापाङ्होङ्बे उया॥ उङा चा लास किताना सुतिगा तेक से न्नाबे निसु॥ 7येसुगा उटुखुरुक थुन्दाना रुमोल च्हेन सुतिगा तेकनुङ् म्मायान, ङ्खाॽनिङ्गो मियोरोक न्ना से पेक्तामासा॥ 8न्हाङा ओन्दाङ् सियापाङ् तान्दिखुबा येसुगा चेला चा सियापाङ्बे उया, न्हाङ् उङा खा घाक चेॽया निसुहोङ् येसु हिङ्गिलिक लेक्सामानाभोङ् बिस्वास चोगु॥ 9इजाङ्बाङ्निङ् ङ्खाचिङा “उङ् स्यानाभाङ् हिङ्गिलिक लेङ्मेॽना” भोङ् धार्मासाप्लाबे छेप्ताहा चेॽया खिङ् सोम्मा ङ्ङासुक्सानिन॥ 10न्हाङा ङ्खा चेलाचि लासाचि॥
मारियामङा येसु निसुना
(मात्ति २८:९-१०; मार्कुस १६:९-११)
11ङ्खाॽनिङ्गो मारियाम हाप्साङ् पाखा येबामासा॥ न्हाङा हाप्साङ् उकुरिक उगाहोङ् सियापाङ्होङ्बे सोनिङ् 12फुहा तेक वायाचुहा हिप्पाङ् वालोक्दुतचि निसुचि॥ ङ्खाचि एको येसुगा उटुखुरुक पोटि, न्हाङ् हेकोना च्हेन उलाङ् पोटि युङामासाचि॥ 13ङ्खाचिङा उङ् छिम्दाचु, “ओ आना, न्दा इजाङ् हाम्मेकाना?”
मारियामङा पोलोवा पिचि, “ङ्खाचिङा आका हाङ्बा ङ्खेतुक्सुना, न्हाङ् हेॽने ङ्युक्सुक्सुना, का था मान्ना॥”
14खिङ् लुइचिहोङ् खिरिक हिक्सानिङ् उङा येसु येबामासाना निसु, ङ्खाॽनिङ्गो येसुमाङ् ओमभोङ् चिनान्जोगुन॥
15येसुङा मारियाम लु, “ओ मामु, न्दा इजाङ् हाम्मेकाना? न्दा इसा योक्मासिमेकाना?”
मारियामङा उङ् फुङ्हाम्बे काम चोक्खुबा लोप्पि मितुहोङ् लु, “आहाङ्बा, उका लास न्दा खेतुक्सुगानाभोङ्, हेॽने युक्सुक्सुगाना का लुयाङ्, न्हाङ् का उङ् खेत्वाङ्ना॥”
16येसुङा उङ् लु, “मारियाम!”
येसुगा ओसेम्ला खेप्सुहोङ् मारियाम येसुपोटि हिक्सा, न्हाङा हिब्रु चेॽयाभाङ् खाॽला लु, “राब्बोनि!” (न्नागा तुम्बिला “चिन्खुबा” ओम॥)
17येसुङा मारियाम लु, “का न्दोक्तिॽयाङान, इजाङ्बाङ्निङ् का खिङ् सोम्मा आप्पागाबे ङ्ख्यामाङान्ना॥ ङ्खाॽनिङ्गो आनुन्छाचिगाबे ख्याघोङ्, ‘का आका आप्पा नुङ् न्निङ्गा पा, न्हाङ् आका निङ्वाफुमा नुङ् न्निङ्गा निङ्वाफुमागाबे खेॽमासिमेङ्ना’ भोङ् लुताब्याङ्॥”
18न्हाङा मारियाम माग्दालिनि चेलाचि ङ्वायाना ठोङ्बे ख्याहोङ् लुचि, “का हाङ्बा निसुङ्ना॥” न्हाङ् उङा लुहा घाक चेॽया ङ्खाचि खेम्मेतुचि॥
चेलाचिगा उलुम्बे येसु
(मात्ति २८:१६-२०; मार्कुस १६:१४-१८; लुका २४:३६-४९)
19न्ना नाम्लेनगा नाॽमासेक, चेलाचि याहुदिचिभाङ् किसिॽमाङा वालाम्बुङ् न्छेक्तुचिहोङ् ङ्युङामासा॥ ङ्खिङ्बेलाक्माङ् थाप्थुम्बे येसु तायाहोङ् ङ्खाचिगा उलुम्बे येबा, न्हाङ् ङ्खाचि लुचि, “न्निङ्दा हाङ्हाङ् लेक्सिगानि!” 20खिङ् लुचिहोङ् उका उमुक नुङ् उङ् छोम्लाम्फिङा ङ्होतुना ठोङ् सोॽमेतुचि॥ हाङ्बा न्निसुहोङ् चेलाचि इब्बे-इब्बे न्जोन्दास्या॥ 21न्हाङा फेरि चा येसुङा लुचि, “न्निङ्दा हाङ्हाङ् लेक्सिगानि! आप्पाङा का इमिन पाक्साङ्, का चा न्निङ्दा ङ्खाॽलामाङ् पाङ्मासिमेॽनेनिन्हा॥” 22न्हाङा उङा ङ्खाचि छोङ्बे ओसोक्माङा मुसाङ् लुचि, “पाबित्तारा आत्मा ताप्तानुम॥ 23न्निङ्दा इसा पाप छेमा पिवाम्चिम्गा, ङ्खाचिगा पाप छेमा लेङ्मे, ङ्खाॽनिङ्गो इसा पाप छेमा म्बिवाम्चिम्गान, ङ्खाचिगा पाप छेमा न्लेङ्मेन्हा॥”#मात्ति १६:१९; १८:१८
साङ्का चोक्खुबा थोमा
24चेलाचि ङ्वायानाबे येसु तायानिङ् एहिच चेलाचि माध्येबे दिदुमास बाङ्ना थोमा#२०:२४ न्ना दिदुमास चा न्लु॥ च्हेन न्नाबे म्मायान॥ 25ङ्खोङ्माङ् चेलाचिङा न्लु, “कानिङ् हाङ्बा निसुम्ङाना!”
ङ्खाॽनिङ्गो उङा लुचि, “उका उमुकपे न्थेप्ताहा काटिगा ओयोक मेनिले, काटिगा ओयोकपे आमुक्खेॽवा मेएन्ले न्हाङ् उङ् छोम्लाम्फिङा ङ्होतुनाबे आमुक मेएन्ले सोम्मा का बिस्वास न्जोग्वाङान्हा॥”
26ए हाप्ता हेक्साङ् फेरि चेलाचि वालाम्बुङ् न्छेक्तुहोङ् पाङ्बे ङ्युङामासा॥ थोमा चा न्नाबे वाया॥ ङ्खिङ्बेला वालाम्बुङ् मेहोले येसु थाप्थुम्बे ङ्खाचिगा उयुम्बे तायाहोङ् लुचि, “न्निङ्दा हाङ्हाङ् लेक्सिगानि!” 27न्हाङा उङा थोमा लु, “म्मुक्खेॽवा नाबे एन्दु, न्हाङ् आका आमुकचि सोचि॥ का छोम्लाम्फिङा होताहा ठोङ्बे म्मुकङा सोप्सु! का साङ्का न्जोगाङान, ङ्खाॽनिङ्गो बिस्वास चोगाङ्॥”
28थोमाङा लु, “आका हाङ्बा, नुङ् आका निङ्वाफुमा!”
29येसुङा थोमा लु, “न्दा गो का निसाङ्गाहोङ् बिस्वास चोगाङ्गा, ङ्खाॽनिङ्गो का मेनिले बिस्वास चोक्खुबाचि च्हेन प्याक आसिक तोक्खुबा ओम्चि॥”
ना छेप्तापका उदेस्या
30येसुङा प्याक आच्चाम्माहा काम चेलाचिगा उयुम्बे चोगु, ङ्खा घाक चेॽया ना छेप्तापपे न्छेप्तामान्हा॥ 31ङ्खाॽनिङ्गो येसु च्हेन खिरिस्ट नुङ् निङ्वाफुमागा उच्या ओमभोङ् बिस्वास चोगानुम, न्हाङा बिस्वास चोगुम्घोङ् उका उनिङ्बे मेन्सिमाना हिङ्लुङ् तोक्तानुम भोङ् ना छेप्तापपे छेप्ताहा॥
Currently Selected:
युहान्ना 20: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
