युहान्ना 19
19
1न्हाङा येसु खेॽमाहोङ् कोर्रा एम्माना हुकुम पिलातासङा काङ्बाचि पिचि॥ 2न्हाङा काङ्बाचिङा तिङ्गिभाक्का मुकुट् न्जोगुहोङ् उटुखुरुकपे म्फोम्मेतु, न्हाङ् हाङ्ङा वाॽमाहा लोॽवाहा बाइजानि राङ्गा तेक ङ्वाॽमेतु॥ 3न्हाङा उका उयुम्बे न्दायाहोङ् “सेमेॽनेन्नायो, यहुदिचिगा हाङ्!” लुसाङ् म्फेक्तु॥
4पिलातास फेरि पाखा लोन्दाहोङ् ङ्खाचि लुचि, “सोयानुम, का ना याॽमिबे दान्डा पिॽमाहा आप्दिक इहाचा न्दुप्सुङान्हा॥ खा चेॽया था तोक्तुम्गानिभोङ्माङ् का न्निङ्गा ओन्दाङ् तायेतुङ्ना॥” 5न्हाङ् येसु पाखा लोन्दा॥ उङा तिङ्गिभाक्का मुकुट् फोप्सुक्सा, न्हाङ् बाइजानि राङ्गा तेक वाक्सा॥ पिलातासङा ङ्खाचि लुचि, “लु सोयानुम, ना याॽमि!”
6खाङ्खाङ् हाङ्खुबाचि नुङ् पालेचिङा येसु न्निसुहोङ् सोलोक खाॽला कासाङ् ओक्मा न्दारोक्तु, “न्ना कुरुसपे छुएन्दु, न्ना कुरुसपे छुएन्दु!”
पिलातासङा ङ्खाचि लुचि, “न्निङ्दामाङ् खेतुम्घोङ् ना छुएन्दानुम, इजाङ्बाङ्निङ् नाबे का इहाचा आप्दिक न्दोक्तुङान्हा॥”
7याहुदिचिङा उङ् पोलोवा म्बि, “आनिङ्गा ब्यावास्था लोॽवा ओमभोङ् ना याॽमि सिमाना, इजाङ्बाङ्निङ् नाङा उङ् आफाइ ‘का निङ्वाफुमागा उच्या ओम्ङान’ कायामाना॥”
8खा चेॽया खेप्सुहोङ् झान पिलातास किसिता॥ 9उङ् फेरि हाङ्पाङ् होङ्बे उयाहोङ् येसु छिम्दु, “न्दा हेॽनाहाङ् तायागाना?” ङ्खाॽनिङ्गो येसुङा इहाचा पोलोवा म्बिन॥ 10ङ्खोङ्माङ् पिलातासङा उङ् लु, “इना न्दा कानुङ् न्जेङ्मेकान्ना? न्दा लेॽमाना, कुरुसपे छुॽनेम्माना चोक्तोक कानुङ् वेॽना बाङ्ना चेॽया न्दा था मान्ना?”
11येसुङा पोलोवा पि, “न्दा तोन्धाङ्माङ् न्दोक्तुगान्निङ्बि का छोङ्बे न्दा इहाचा चोक्तोक चोक्मा न्दोक्तुगान्बि॥ ङ्खोङ्माङ् का म्मुकपे जिम्मा पिखुबा झान प्याक पापका दोसिना॥”
12खा चेॽया खेप्सुहोङ् पिलातासङा येसु लेन्नाहाङ्मागा चा चोगु, ङ्खाॽनिङ्गो याहुदिचि खाॽला कासाङ् ङ्ओक्ता, “ना याॽमि लेहाक्सुगाभोङ् न्दा हाङ् काइसारगा उकाम्निभाक म्मेकान्ना॥ इसाङा का हाङ् ओम्ङान कामे, न्ना च्हेन हाङ् काइसारगा बिरोधि ओम॥”
13पिलातासङा खा चेॽया खेप्सुहोङ् येसु पाखा खेतु, न्हाङ् उङ् “लुङ्खाक्का पाटि” (हिब्रु चेॽयाबे गाब्बाथा लुमेॽना) बाङ्ना निरिक चोक्माना युक्थामबे युङा॥ 14ङ्खिङ्बेला फोङ्होक्नामगा ओन्दाङ्ना लेनगा लेन्लुम लेक्सामाना लोप्पि, पिलातासङा याहुदिचि लुचि, “सोयानुम, न्निङ्गा हाङ्!”
15ङ्खाॽनिङ्गो ङ्खाचि खाॽला कासाङ् ङ्ओक्ता, “खेतु, खेतु, न्ना कुरुसपे छुएन्दु!”
पिलातासङा ङ्खाचि छिम्दुचि, “इना न्निङ्गा हाङ् का कुरुसपे छुएन्दुङ्?”
खाङ्खाङ् हाङ्खुबाचिङा पोलोवा म्बि, “काइसार से आनिङ्गा हाङ् ओम, हेकोना इसा चा मान्ना॥”
16खा चेॽया खेप्सुहोङ् पिलातासङा येसु कुरुसपे छुॽनेम्मागा ङ्खाचिगा मुकपे पिचि॥ न्हाङा काङ्बाचिङा येसुगा जिम्मा लियान्जोगु॥
येसु कुरुसपे
(मात्ति २७:३२-४४; मार्कुस १५:२१-३२; लुका २३:२६-४३)
17येसुङा उका कुरुस आफाइ खुघेतुहोङ् खाप्पारे बाङ्ना ठोङ्बे ख्या॥ (ना हिब्रु चेॽयाबे गाल्गाथा लुमेॽना॥) 18न्नाबे न्दासुहोङ् ङ्खाचिङा येसु कुरुसपे न्छुएन्दु, न्हाङ् हेकोहा हिप्पाङ् याॽमिचि चा येसुगा छुप्ताङ् नुङ् फेक्साङ्पोटि हेकोहा कुरुसचिबे न्छुएन्दुचि॥ 19पिलातासङा एको आप्दिक एन्दाना छेप्फा चा छेप्तु, न्हाङ् कुरुस छोङ्बे थेप्मेतुचि॥ न्नाबे खाॽला छेप्तामासा, “नासारातपेॽना येसु, ना याहुदिचिगा हाङ् ओम॥”
20न्ना आप्दिक एन्दाना छेप्फा प्याक याॽमिचिङा पोढा न्जोगु, इजाङ्बाङ्निङ् येसु कुरुसपे न्छुएन्दुना ठोङ् साहारगा उयुम्बे साया॥ न्ना हिब्रु, ल्याटिन नुङ् गिरिक चेॽयाबे छेप्तामासा॥ 21याहुदिचिगा खाङ्खाङ् हाङ्खुबाचिङा पिलातास न्लु, “ना याहुदिचिगा हाङ् ओमभोङ् न्छेप्तुन, ङ्खाॽनिङ्गो नाङा ‘का याहुदिचिगा हाङ् ओम्ङान’ कायामासाना भोङ् छेप्तु॥”
22पिलातासङा पोलोवा पिचि, “का इहा छेप्तुङ्, हाकु छेप्तिङ्हा॥”
23काङ्बाचिङा येसु कुरुसपे न्छुएन्दिहोङ् येसुगा ओतेक ङ्खेतु न्हाङ् ना भाक न्जोगुहोङ् उङ्चि-उङ्चिबे ङ्हाप्सु॥ येसुङा ओछोङ्बे वाना तेक चा ङ्खाचिङा ङ्खेतु, ङ्खाॽनिङ्गो न्ना च्हेन सिउनि मेॽनिङ्ना तोन्धाङ् मो सोम्मा एप्खुबा फायाना तेक साया॥ 24ङ्खोङ्माङ् ङ्खाचिङा उङ्चि-उङ्चि खाॽला ङ्गाया, “ना मेन्छिम्माना, ङ्खाॽनिङ्गो ना इसागा भाकपे आमेॽना, चिठ्ठा एन्दुम॥” धार्मासाप्लाबे खाॽला छेप्ताहा खा चेॽया पुरा लेङ्निभोङ्माङ् खाॽला लेक्सामासा, “ङ्खाचिङा आका तेक उङ्चि-उङ्चिबे ङ्हाप्सु, न्हाङ् ओछोङ्बे वाॽमाना तेक च्हेन चिठ्ठा ङ्ङेन्दु॥”#छेम २२:१८
25येसुगा कुरुसका उयुम्बे उका उमा, ओकोङ्मा, क्लोपासका उहिङ्खुमा मारियाम नुङ् मारियाम माग्दालिनि ङ्येबामासा॥ 26येसुङा उका उमा नुङ् उङा उलुङ्मा तुक्तुना उका चेला उयुम्बे येबामासाचिहा निसुचिहोङ् उमा खाॽला लु, “आमा सो, ना न्ज्या ओम॥” 27न्हाङा न्ना उका चेला चा लु, “सो, ङ्गा म्मा॥” न्ना लेनमाङ् न्ना चेलाङा येसुगा उमा उपाङ्बे खेतु॥
येसु स्याना
(मात्ति २७:४५-५६; मार्कुस १५:३३-४१; लुका २३:४४-४९)
28हाकु येसुङा घाक काम मेन्दाहा था तोक्तुहोङ् धार्मासाप्लाबे छेप्ताहा पुरा लेङ्निभोङ् खाॽला काया, “का वेॽमा स्याङ्ना॥”#छेम २२:१५; ६९:२१ 29न्नाबे सुहा सिम्लेॽमाङ्गा माधङा#१९:२९ खाॽलाहा माध सोस्तो साया॥ न्हाङ् खाॽलाहा माध तुखिसुम्बा, माङ्चुमाङ्हा याॽमिचि, काङ्बाचिङा ङ्ङुङु॥ इप्तुना एको भाडा वाया॥ काङ्बाचिङा ङ्खा उवाबे एको झुम्रो न्लुप्सुहोङ् हिसापका एको ह्वाकपे ङ्हेतुहोङ् येसुगा उयाबे ङ्येन्दुबि॥ 30येसुङा ङ्खा सुहा उवा उङुहोङ् खाॽला काया, “हाकु मेन्दाहा!” न्हाङा उकुरिक उगाहोङ् ओसोक्मा लेहाक्सु॥
येसु छोम्लाम्फिङा ङ्होतुना
31न्ना लेन च्हेन त्यार लेङ्माना लेन साया, न्हाङ् न्नागा हेक्साङ्ना लेन च्हेन मुख्या पाबित्तारा आराम चोक्माना लेन साया॥ ङ्खोङ्माङ् याहुदि खाङ्खाङ्बाचि ना आराम चोक्माना लेन, लास कुरुसपे युङ्नुङ्मा न्लेमेनिन्हा म्मिताहोङ् पिलातासकाबे ङ्ख्या, न्हाङ् “कुरुसपेॽहाचि हानि न्सिनिभोङ् उङ्चि लाङ् एङ्बिसाङ् कुरुसपाहाङ् लोॽनिमाहाचि” लुसाङ् उङ्चि मुक म्फाक्तुचि॥ 32न्हाङा काङ्बाचि न्दायाहोङ् येसुनुङ् कुरुसपे न्छुयाहा हिप्पाङ्गा लाङ् ङ्ङेक्तुबिचि॥ 33ङ्खाॽनिङ्गो ङ्खाचि येसु वायानाबे न्दायानिङ् येसु स्याब्यामासा, न्हाङ् उका उलाङ् ङ्ङेक्तुबिनिन॥ 34ङ्खाॽनिङ्गो काङ्बाचि माध्येबे एकोङा येसुगा उसाप्लेक्पे होतु, न्हाङ् सोलोक हेलि नुङ् माङ्च्वा लोन्दा॥ 35(न्निङ्दा चा बिस्वास चोक्मा यासुम्गानिभोङ् खा घाक चेॽया उमिकङा निखुबाङा इमिन निसु ङ्खाॽला कायामा, न्हाङ् उका गाबाहि सात्याहा॥) 36धार्मासाप्लाबे, “उका एको चा ओसेङ्खोक ङ्ङेङ्मेन्ना”#पारास्थान १२:४६; निप ९:१२; छेम ३४:२० भोङ् छेप्ताहा चेॽया पुरा लेङ्निभोङ् खाॽला लेक्साहा ओम॥ 37न्हाङ् हेकोना ठोङ्बे चा खाॽला छेप्तामा, “इसाङा उङ् ङ्होतुक्सु, ङ्खाचिङा उङ् न्स्वाना॥”#जाकारिया १२:१०; पार्कास १:७
येसु सियापाङ्बे
(मात्ति २७:५७-६१; मार्कुस १५:४२-४७; लुका २३:५०-५६)
38न्नाबे आरिमाथिया साहारभाङ् तायाना योसेफ बाङ्ना एको याॽमि चा येसुगा चेला साया॥ उङा याहुदि खाङ्खाङ्बाचिभाङ् किसिॽमाङा इसाङा चा था मेन्दोक्ले येसुबे बिस्वास चोगुक्सा॥ उङा येसुगा लास खेॽमा तोक्तुङ्निभोङ् पिलातास नाक्तु॥ न्हाङ् पिलातासङा खेॽमाना आग्गे पि, न्हाङा योसेफ ख्याहोङ् येसुगा लास लोन्धेतु॥ 39न्हाङा येसु सेॽनि तुप्से खेखुबा निकोदेमासङा चा मुर्रा नुङ् एलावाभाङ् चोगाहा सुम्सुम किलो हिङ् खुम्दुनुङ् नाम्खुबा आत्तार ताहोङ् न्नाबे ताया॥#युहान्ना ३:१-२ 40खाॽला उङ्चिङा येसुगा लास याहुदिचि हुम्माना रिति आन्सार खुम्दु नाम्खुबा आत्तार नेक्ताचुहोङ् सुतिगा तेकङा किताचु॥ 41येसु कुरुसपे छुयाना ठोङ्गा उयुम्बे एको फुङ्साहाम वाया॥ न्ना फुङ्साहाम्बे हेॽनिङ्चा लास ङ्युक्सान्ना एको ओछोङा सियापाङ् वाया॥ 42न्ना लेन आराम चोक्माना लेन सुरु लेङ्मा हाक्निङ् ओन्दाङ् त्यार लेङ्माना लेन सायानाङा उङ्चिङा येसुगा लास न्ना उयुम्बेॽना सियापाङ्बे युक्साचु॥
Currently Selected:
युहान्ना 19: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
