युहान्ना 18
18
येसु न्लाबुना
(मात्ति २६:४७-५६; मार्कुस १४:४३-५०; लुका २२:४७-५३)
1पार्थाना चोगाब्याहोङ् येसु उका चेलाचिनुङ् किदोरोन खोल्सागा योप्पारिक एको फुङ्साहाम्बे ख्या॥ 2न्ना ठोङ् येसु लाप्मेखुबा याहुदाङा चा था वाया॥ इजाङ्बाङ्निङ् प्याक लोॽवा येसु नुङ् उका चेलाचि ओन्दाङ् चा न्नाबे ङ्ख्यामासा॥ 3ङ्खिङ्बेला रोमि काङ्बाचि, फारिसिचि नुङ् खाङ्खाङ् हाङ्खुबाचिङा म्बाक्सुचिहा निङ्वाफुमापाङ् कुखुबाचि तिक्तुराचिहोङ् याहुदा न्ना फुङ्साहाम्बे ताया॥ उङ्चिङा बात्ति, मिचुॽवा नुङ् आप्चेङ् ङ्खुक्साचि॥
4येसुङा उङ् छोङ्बे आहेक्सासाहा घाक चेॽया था वाया, ङ्खोङ्माङ् ओन्दाङ् तायाहोङ् ङ्खाचि छिम्दुचि, “न्निङ्दा इसा योक्मासिइवाघा?”
5ङ्खाचिङा न्लु, “नासारातपेॽना येसु!”
येसुङा लुचि, “न्ना कामाङ् ओम्ङान॥” (येसु लाप्मेखुबा याहुदा चा ङ्खाचिनुङ् येबामासा)॥ 6जोबो येसुङा “का उङ्माङ् ओम्ङान” लुचि, ङ्खा ङ्खेप्सुहोङ् घाक हेक्साङ् सारान्जोगा, न्हाङ् खामबे ङ्गाक्साख्या॥ 7फेरि उङा छिम्दुचि, “न्निङ्दा इसा योक्मासिइवाघा?”
ङ्खाचिङा न्लु, “नासारातपेॽना येसु॥”
8येसुङा ङ्खाचि लुचि, “का खेम्माङ् लुॽनिनेनिन्बा, न्ना कामाङ् ओम्ङान! जेप्पा कामाङ् योगाघा ओमभोङ् खाचि च्हेन ल्याहाक्सानुम्चिम॥” 9खाॽला उङा “ओ आप्पा, न्दा पियाङ्घाचिबे एको चा म्मासिङान्ना” भोङ् येसुङा कायाहा चेॽया पुरा लेक्सा॥
10न्हाङा सिमोन पात्तुरुसङा उङ्नुङ् वायाना साम्बेक फिगुहोङ् मा-हाङ्खुबागा नोकोरगा उनाभाक च्वाट्टाइ चेन्धाक्तुबि॥ न्ना नोकोरगा उनिङ् माल्खास साया॥ 11येसुङा पात्तुरुस लु, “ङ्गा साम्बेक उसुप्पे एन्दु! इना का आप्पाङा पियाङ्ना तुखिगा खोरेकपाहाङ् का ङ्ङुङुङान?”#मात्ति २६:३९; मार्कुस १४:३६; लुका २२:४२
हान्नासका उयुम्बे येसु
12न्हाङा काङ्बाचि, ङ्खाचिगा केप्टेनचि नुङ् निङ्वाफुमापाङ्बेॽहा पालेचिङा येसु न्लाबुहोङ् न्थुन्दु॥ 13ङ्खाचिङा ओन्दाङ् हान्नासकाबे ङ्खेतु॥ हान्नास च्हेन न्ना फिम्बिलिङ्गा मा-हाङ्खुबा काइयाफागा उनाम्बा साया॥ 14ना काइयाफाङामाङ् “एको जाति घाक नास लेङ्मा हाक्निङ्गो ङ्खाचिगा लागि एको याॽमि सिमामाङ् उचुन लेङ्मेहा” भोङ् याहुदि हाङ्गुम्बाचि साल्लाहा पिक्साचि॥#युहान्ना ११:४९-५०
पात्तुरुसङा येसु इन्कार चोगुना
(मात्ति २६:६९-७०; मार्कुस १४:६६-६८; लुका २२:५५-५७)
15सिमोन पात्तुरुस नुङ् एको हेकोना चेला येसुगा हेक्साङ्-हेक्साङ् लाचोगाचि॥ न्ना हेकोना चेलाङा च्हेन मा-हाङ्खुबा चिनातोक्तुक्सा॥ ङ्खोङ्माङ् उङ् येसुनुङ् मा-हाङ्खुबागा चारामबे उयाख्या॥ 16ङ्खाॽनिङ्गो पात्तुरुस च्हेन वालाम्बुङ्बे येबामासा॥ मा-हाङ्खुबाङा चिनाचोगुना न्ना चेला पाखा लोन्दा, न्हाङ् न्नाबे पाले युङाना मामु लुहोङ् पात्तुरुस चा खेतु॥ 17न्हाङा वालाम्बुङ्बे येबाना मामुङा पात्तुरुस छिम्दु, “इना न्दा चा न्ना याॽमिगा चेला मेकान्नायि?”
पात्तुरुसङा पोलोवा पि, “का गो मेॽङान्ना॥”
18चुङ् तुगानाङा न्नाबे नोकोरचि नुङ् पालेचि इघुरुम ङ्येबाहोङ् मि ङ्हुन्चामास्या॥ पात्तुरुस चा ङ्खाचिनुङ् येबाहोङ् मि हुन्चामा तारोक्तु॥
मा-हाङ्खुबागा छिम्योक
(मात्ति २६:५९-६६; मार्कुस १४:५५-६४; लुका २२:६६-७१)
19पाङ्होङ्बे मा-हाङ्खुबाङा येसु उङा चिन्दुचिहा चेॽया नुङ् उका चेलाचिगा उतुम्बे छिम्दु॥ 20येसुङा उङ् लु, “का घाकङा ङ्खेप्सुनुङ् कायुङ्लेन लुक्सुङ्॥ का याहुदिचि छुम्माहा छुम्पाङ् नुङ् निङ्वाफुमापाङ्बे साधाइ चिन्दुक्सुङ्चिङ्॥ का स्वाक इहाचा ङ्गायामाङान्ना॥ 21का इजाङ् छिम्मेङ्गाना? का चिन्दुङ्चिङ्हा खेम्खुबाचि छिम्दुचि॥ का लुङ्चिङ्हा घाक चेॽया ङ्खाचिङा था वान्नेहा॥”
22येसुङा खा चेॽया लुनिङ् उका उयुम्बे ङ्येबाहा पालेचि माध्येबे एकोङा येसु फेक्साङ् खाॽला लु, “इजाङ् मा-हाङ्खुबानुङ् ङ्या लेवागाना?”
23येसुङा लु, “का इसिॽहा चेॽया चेक्तुक्सुङ्हाभोङ् आका गाल्ति सोॽमेता, ङ्खाॽनिङ्गो जेप्पा चेॽया ओमभोङ् का इजाङ् मोङ्मेकाहा?” 24न्हाङा हान्नासङा येसु मेम्फुङ्ले ङ्खाॽला मा-हाङ्खुबा काइयाफागाबे पाक्साहाक्सु॥
पात्तुरुसङा फेरि येसु इन्कार चोगुना
(मात्ति २६:७१-७५; मार्कुस १४:६९-७२; लुका २२:५८-६२)
25सिमोन पात्तुरुसङा मि हुन्चामास्या॥ न्नाबे मि ङ्हुन्चामास्याहा हेकोहा याॽमिचिङा उङ् न्निसुहोङ् खाॽला न्छिम्दु, “इना न्दा चा उका चेलाचिबे एको मेकान्नायि?”
उङा इन्कार चोक्साङ् लुचि, “का मेॽङान्ना॥”
26मिहुन्चाखुबा माध्येबे पात्तुरुसङा उनाभाक चेन्धाक्तुबिना याॽमिगा एको आफान्ता न्नाबे वाया॥ उङ् चा मा-हाङ्खुबागा नोकोर साया॥ न्नाङा पात्तुरुस लु, “न्दा का ना याॽमिनुङ् फुङ्साहाम्बे निन्नुङ्सानेन्ना मेन्नायि?” 27फेरि चा पात्तुरुसङा इन्कार चोगु, न्हाङा सोलोक तितिॽलिङ्वा काया॥
येसुगा मुद्दा
(मात्ति २७:१-२,११-३१; मार्कुस १५:१-२०; लुका २३:१-५,१३-२५)
28न्हाङा याहुदि खाङ्खाङ्बाचिङा भेनिक येसु काइयाफागा पाङ्भाङ् रोमि माडा-खाङ्खाङ्बागा हाङ्पाङ्पोटि ङ्खेतु॥ याहुदि हाङ्गुम्बाचि पाङ्होङ्बे उमा ङ्गाक्सानिन, इजाङ्बाङ्निङ् फोङ्होक्नामगा होक्ता चामागा लागि ङ्खाचि चोक्खो वामा म्मितामासा॥ 29न्हाङामाङ् रोमि माडा-खाङ्खाङ्बा पिलातास पाखा लोन्दाहोङ् ङ्खाचि खाॽला लुचि, “न्निङ्दा ना याॽमिगा बिरुद्दाबे इहा आप्दिक एन्द्वाम्घा?”
30ङ्खाचिङा न्लु, “ना जेप्पामाङ् इसिॽना याॽमि न्सायान्निङ्बि न्दाबे न्दाम्ङान्बि॥”
31पिलातासङा ङ्खाचि लुचि, “ना याॽमि न्निङ्दा आफाइ खेतानुम, न्हाङ् न्निङ्गा ब्यावास्थाङा कामेॽना लोॽवा नागा निरिक चोगानुम॥”
याहुदिचिङा उङ् न्लु, “कानिङ्नुङ् गो इसा चा याॽमि सिमाना चोक्तोक मान्ना॥” 32येसुङा उङ् इमिन सिमेॽना बाङ्ना चेॽया लुक्साचि, न्हाङ् ङ्खा चेॽया पुरा लेङ्निभोङ्माङ् खाॽला लेक्सामासा॥#युहान्ना ३:१४; १२:३२
33पिलातास फेरि हाङ्पाङ् होङ्बे उया, न्हाङ् येसु काहोङ् छिम्दु, “इना न्दा याहुदिचिगा हाङ् ओम्गान?”
34येसुङा पोलोवा पिसाङ् लु, “न्दामाङ् आफाइ खाॽला कामासिम्मेकाना येम, इसाङा आका उतुम्बे न्लुयागाना?”
35पिलातासङा लु, “इना न्दा का याहुदि मितामाङ्गानायि? ङ्गा जातिगा याॽमिचि नुङ् खाङ्खाङ् हाङ्खुबाचिङा माङ् काबे जिम्मा पिसे न्दायागाना ओम॥ न्दा इहा इसिॽहा काम चोगुघा?”
36येसुङा पिलातास लु, “आका राज्या गो ना कायुङ्लेनबेॽहा राज्याचि लोॽवाना मेन्ना, ना कायुङ्लेनबेॽहा राज्याचि लोॽवा सायानिङ्बि आका सेवाकचि का हिङ्मेॽमागा लाडाइ न्जोगाबि, न्हाङ् का याहुदिचिगा मुकपे ङ्ङायाङान्बि॥ ङ्खाॽनिङ्गो आका राज्या गो कायुङ्लेनबेॽहा राज्याचि लोॽवाना मेन्ना॥”
37पिलातासङा उङ् लु, “ङ्खाॽलाभोङ् न्दा हाङ् माङ् ओम्गान?”
येसुङा पोलोवा पि, “का हाङ् ओम्ङानभोङ् न्दा आफाइ कामासिम्मेका॥ सात्या पार्काट चोक्मागा लागि आका वाम लेक्साना ओम, न्हाङ् नागा लागिमाङ् कायुङ्लेनबे तायाङ्ना ओम॥ सात्या चेॽया साप थाक्खुबाचि घाकङा आका चेॽया ङ्खेप्स्वाहा॥”
38पिलातासङा छिम्दु, “सात्या चेॽया च्हेन इना ओम?” न्हाङा उङ् फेरि पाखा लोन्दाख्याहोङ् याहुदि हाङ्गुम्बाचि लुचि, “ना याॽमि दान्डा पिॽमागा नाबे इहाचा इसिॽहा आप्दिक का न्दुप्सुङान्हा॥
39“ङ्खाॽनिङ्गो फोङ्होक्नामगा बेला न्निङ्गा लागि साधाइ एको छेक्पा लेम्बिॽमाना चालान वान्ने॥ ङ्खोङ्माङ् न्निङ्दा इ एतिॽवाघा, नापालिक न्ना याहुदिचिगा हाङ् लेम्बिॽनेनिन?”
40ङ्खाॽनिङ्गो ङ्खाचि खाॽला कासाङ् ङ्ओक्ता, “न्ना मेन्ना, बाराब्बा च्हेन लेताब्या॥” न्ना बाराब्बा च्हेन नाम्चाखुबा खुन्चाखुबा साया॥
Currently Selected:
युहान्ना 18: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
