युहान्ना 17
17
येसुगा पार्थाना
1येसुङा खा चेॽया लुइचिहोङ् वालोकपोटि सोसाङ् खाॽला पार्थाना चोगा, “ओ आप्पा, हाकु बेला तायाब्यामा॥ न्ज्यागा माहिमा पार्काट चोगु॥ न्ज्याङा ङ्गा माहिमा पार्काट चोक्मा यासुनिभोङ् माहिमा पि॥ 2इजाङ्बाङ्निङ् न्दा उङ् घाक याॽमि छोङ्बे चोक्तोक पिक्सुगा, ङ्खोङ्माङ् न्दा उङ् जिम्मा पिघा घाक याॽमिचि हेॽनिङ्चा मेन्सिमाना हिङ्लुङ् पिचिनि॥ 3हेॽनिङ्चा मेन्सिमाना हिङ्लुङ् बाङ्ना न्दा एको सेॽना जेप्पागा निङ्वाफुमा चिनातोक्मा न्हाङ् न्दा पाक्सुगाना येसु खिरिस्ट चिनातोक्मा ओम॥ 4न्दा जिम्मा पियाङ्घा काम का पुरा चोगुङ्होङ् कायुङ्लेनबे न्दा माहिमा पिन्नुङ्नेन॥ 5हाकु ओ आप्पा, न्दा कायुङ्लेन चोक्मा हाक्निङ् ओन्दाङ् न्दानुङ् वायाङ्निङ् कानुङ् इमिन्ना माहिमा वाया, ङ्युम्बे न्ना माहिमा माङ् पियाङ्॥
6 “न्दा कायुङ्लेनभाङ् पियाङ्घा याॽमिचि ङ्गा न्निङ् चिना चोक्मेतुक्सुङ्चिङ्॥ ङ्खाचि ङ्गामाङ् न्साया, न्हाङ् न्दामाङ् का पियाङ्गा॥ ङ्खाचिङा ङ्गा चेॽया ङ्येनुक्सु॥ 7का पियाङ्घा घाक चेॽया न्दाभाङ्माङ् तायाहा ओम बाङ्ना चेॽया हाकु ङ्खाचिङा था वान्ने॥ 8इजाङ्बाङ्निङ् न्दा हेखा चेॽया का पियाङ्गा, ङ्खा का चा ङ्खाचि पिक्सुङ्चिङ् न्हाङ् ङ्खाचिङा ङ्खा येम्मा चा न्सिमे॥ जेप्पा न्दाभाङ्माङ् का तायाङ्ना बाङ्ना ङ्खाचिङा ङ्ङासुक्सु, न्हाङ् का न्दामाङ् पाक्साङ्गाना ओमभोङ् ङ्खाचिङा बिस्वास न्जोगुक्सु॥
9 “का ङ्खाचिगा लागि पार्थाना चोङ्मेङ्, कायुङ्लेनबेॽहा घाक याॽमिचिगा लागि मेन्ना, ङ्खाॽनिङ्गो न्दा पियाङ्घा याॽमिचिगा लागिमाङ् पार्थाना चोङ्मेङ्ना, इजाङ्बाङ्निङ् ङ्खाचि ङ्गामाङ् ओम्चि॥ 10कानुङ् वेॽयाहा घाक ङ्गामाङ् ओम, न्हाङ् न्दानुङ् वेॽयाहा घाक आका ओम॥ न्हाङ् ङ्खाचिभाङ् आका माहिमा लेक्सामा॥ 11हाकु का न्दा वेकानाबे तायेॽङा, का ना कायुङ्लेनबे प्याक ङ्वामेङान्ना॥ ङ्खाॽनिङ्गो खाचि च्हेन ना कायुङ्लेनबे ङ्वामे॥ ओ पाबित्तारा आप्पा, न्दा पियाङ्गाना ङ्गा न्निङ्बे ङ्खाचि उचुन युक्सुचि, न्हाङ् कान्चिङ् लोॽवा ङ्खाचि चा एको न्लेङ्नि॥ 12का ङ्खाचिनुङ् वायाङ्निङ् न्दा पियाङ्घा ङ्गा न्निङ्गा साक्तिङा ङ्खाचि जोगाचोगुङ्चिङ्॥ नास लेङ्खुबा हाक्निङ् हेकोहा इसा चा नास लेङ्मा म्बिन्चिङान, इजाङ्बाङ्निङ् धार्मासाप्लाबे छेप्ताहा चेॽया पुरा लेङ्मामाङ् पोर्ने साया॥#छेम ४१:९; युहान्ना १३:१८
13 “ङ्खाॽनिङ्गो हाकु का न्दाबे तायेॽङाना॥ ङ्खाचिगा निङ्वा आका आनान्दाङा इप्तुनिभोङ् खा चेॽया कायुङ्लेनबे वेॽङानिङ्माङ् कामासिमेङ्॥ 14का ङ्खाचि ङ्गा चेॽया चिन्दुङ्चिङ्, ङ्खाॽनिङ्गो ङ्खाचि कायुङ्लेनबेॽहा याॽमिचिङा ङ्ङिसितुचि, इजाङ्बाङ्निङ् का लोॽवा ङ्खाचि चा कायुङ्लेनबेॽहा मेनिन॥ 15ङ्खाचि कायुङ्लेनभाङ् खेतुचिभोङ् का पार्थाना न्जोङ्मेङान्ना, ङ्खाॽनिङ्गो ङ्खाचि दुस्टा साइतानभाङ् जोगाचोगुचिभोङ् का पार्थाना चोङ्मेङ्ना॥ 16का कायुङ्लेनबेॽना मेॽङान, ङ्खाॽलामाङ् ङ्खाचि चा ना कायुङ्लेनबेॽहा मेनिन्हा॥ 17ङ्खाचि ङ्गा सात्याताङा पाबित्तारा चोगुचि, इजाङ्बाङ्निङ् ङ्गा चेॽया सात्याहा॥ 18न्हाङा का कायुङ्लेनबे पाक्साङ्गाना लोॽवा ङ्खाचि चा कायुङ्लेनबे पाक्सुक्सुङ्चिङ्॥ 19ङ्खाचि जेप्पा आफाइ पाबित्तारा न्लेङ्निभोङ् ङ्खाचिगा लागि का चा आका हिङ्लुङ् न्दाबे तिमासिमेङ्ना॥
20 “का खाचिगा लागि से पार्थाना न्जोङ्मेङान, ङ्खाॽनिङ्गो खाचिङा ङ्खेम्मेतुचिहा चेॽया ङ्खेप्सुहोङ् काबे बिस्वास चोक्खुबाचिगा लागि चा पार्थाना चोङ्मेङ्ना॥ 21ङ्खाचि घाक एको निङ्वागा न्लेङ्निभोङ् आमुक फाक्मासिमेङ्॥ ओ आप्पा, न्दा काबे वान्नेका न्हाङ् का न्दाबे वेॽङा, ङ्खाॽलामाङ् ङ्खाचि चा कान्चिङ्बे ङ्वानि, न्हाङ् न्दा का पाक्साङ्गाना ओमभोङ् कायुङ्लेनबेॽहा याॽमिचिङा बिस्वास न्जोगुनि॥ 22कान्चिङ् एको लेक्साचिहा लोॽवा ङ्खाचि चा एको न्लेङ्निभोङ् न्दा का हेॽना माहिमा पियामाङ्गा, ङ्खाचि चा न्ना माहिमा पिक्सुङ्चिङ्हा॥ 23का ङ्खाचिबे, न्हाङ् न्दा काबे वान्नेका, खाॽलामाङ् ङ्खाचि चा एको लेङ्मा ङ्यानि॥ खाॽला न्दा का पाक्साङ्गाना चेॽया, न्हाङा का न्लुङ्मा तुङ्मेङ्गाना लोॽवा ङ्खाचि चा न्लुङ्मा तुक्त्वाचिघा भोङ् कायुङ्लेनबेॽहा याॽमिचिङा था न्दोक्तुनि॥
24 “ओ आप्पा, का मिमेङ्, न्दा पियाङ्गाहा याॽमिचि कानुङ् ङ्वानि, न्हाङ् कायुङ्लेन चोक्मा हाक्निङ् ओन्दाङ् न्दा न्लुङ्मा तुक्ताङ्गाहोङ् पियाङ्गाना माहिमा ङ्खाचिङा निमा ङ्यासुनि॥
25 “ओ धार्मोति आप्पा, कायुङ्लेनबेॽहा याॽमिचिङा न्दा चिनान्दोङ्मेकानिन, ङ्खाॽनिङ्गो का चिनातोङ्मेॽनेन, न्हाङा न्दामाङ् का पाक्साङ्गाना ओम बाङ्ना चेॽया खा चेलाचिङा था वान्ने॥ 26का ङ्गा उतुम्बे ङ्खाचि चिन्दुक्सुङ्चिङ्, न्हाङ् ङ्गा उतुम्बे का ङ्खाचि चिन्दुनेस्वाङ्चिङ्हा, ङ्खोङ्माङ् न्दा न्लुङ्मा तुक्ताङ्गाना लोॽवा ङ्खाचि चा एकोङा हेकोना लुङ्मा तुक्खुसा न्जानि, न्हाङ् का आफाइ ङ्खाचिनुङ् वामेङ्ना॥”
Currently Selected:
युहान्ना 17: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
