युहान्ना 16
16
1 “न्निङ्दा बिस्वास न्लेप्तिम्गान्निभोङ्माङ् का खा घाक चेॽया लुॽनेनिन्हा ओम॥ 2याॽमिचिङा न्निङ्दा याहुदि छुम्पाङ्चिभाङ् लोन्धाक्सिइवाघा॥ जेप्पा खाॽलाना बेला चा ताये, न्निङ्दा सिखुबाङा ‘का निङ्वाफुमागा सेवा चोक्मासिमेङ्ना’ भोङ् मिमे॥ 3ङ्खाचिङा खाॽलाहा काम न्जोगा, इजाङ्बाङ्निङ् ङ्खाचिङा आप्पा नुङ् का चिना न्जोङ्मेन॥ 4खा घाक चेॽया लेङ्माना बेलाक्पे न्निङ्दा ‘खा घाक चेॽया गो उङा ओन्दाङ्माङ् कानिङ् लुयामासाहा’ भोङ् मितुरोक्त्वाम्घा॥ ङ्खोङ्माङ् खा चेॽया न्निङ्दा लुॽमासिमेॽनेनिन्हा॥ खा चेॽया खिङ् सोम्मा न्निङ्दा न्लुन्नुङ्नेन्सानिन, इजाङ्बाङ्निङ् का न्निङ्दानुङ् वायाङ्॥
पाबित्तारा आत्मागा काम
5 “हाकु च्हेन का पाङ्खुबागाबे खेॽमासिमेङ्, ङ्खाॽनिङ्गो ‘न्दा हेॽने खेहेक्सागाना?’ भोङ् न्निङ्दा इसाङा चा न्छिम्मेकान॥ 6इजाङ्बाङ्निङ् का खा घाक चेॽया लुॽनेनिन्हाङा न्निङ्दा निङ्वाबे तुक्नुङ् तुखि नुङ् पिर आइमिगा॥ 7ङ्खाॽनिङ्गो का जेप्पा लुमेॽनेनिन, का नाभाङ् खेॽमामाङ् न्निङ्गा लागि उचुन लेङ्मेहा, इजाङ्बाङ्निङ् का ङ्ख्याङानभोङ् न्निङ्दा फाखुबा पाबित्तारा आत्मा न्निङ्दाबे न्दामेन्ना॥ ङ्खाॽनिङ्गो का ख्याङ्भोङ् उङ् का न्निङ्दाबे पाक्स्वाङ्ना॥ 8न्हाङा उङ् तामेहोङ् कायुङ्लेनबेॽहा याॽमिचि पाप, धार्मिक्ता नुङ् निङ्वाफुमागा निरिक्का उतुम्बे न्दोप्सास्यामाहाभोङ् सोॽमेत्वाचि॥ 9उङा काबे बिस्वास मेन्जोक्मामाङ् पाप ओमभोङ् ङ्खाचि सोॽमेत्वाचि॥ 10उङा निङ्वाफुमागा ओन्दाङ् इहा ठिक्हा ङ्खा सोॽमेत्वाचि, इजाङ्बाङ्निङ् का आप्पागाबे खेक्साङ् न्हाङ् न्निङ्दा फेरि का न्निमेकान्हा॥ 11उङा ङ्खाचि निङ्वाफुमागा निरिक बाङ्ना इना ओम, ङ्खा सोॽमेत्वाचि, इजाङ्बाङ्निङ् ना कायुङ्लेनगा हाङ् ओन्दाङ्माङ् निरिक्पे आयाब्यामाना॥”
12 “न्निङ्दा लुॽमाहा चेॽया गो प्याक वान्ने, ङ्खाॽनिङ्गो लोप खा हाक्निङ् प्याक न्निङ्दा आमा ङ्यास्वाम्गान्हा॥ 13ङ्खाॽनिङ्गो पाबित्तारा आत्मा तामेहोङ् उङामाङ् न्निङ्दा घाक सात्याताबे तिक्तिॽवाघा॥ उङा उङ् आफाइगा चेॽया न्जेक्त्वान्हा, उङा इहा खेप्स्वा, ङ्खामाङ् न्निङ्दा लुइवागा न्हाङ् वान्दिक लेङ्माहा चेॽया चा योक्मेतिॽवाघा॥ 14उङा आका माहिमा चोग्वा, इजाङ्बाङ्निङ् इहा आका ओम, ङ्खा काभाङ् लियाचोग्वाहोङ् न्निङ्दा लुइवागा॥ 15आप्पानुङ् इहा-इहा वान्ने, ङ्खा घाक आका ओम॥ न्हाङामाङ् ‘पाबित्तारा आत्माङा न्निङ्दा आका चेॽया पार्काट चोक्तुबिइवाघा’ लुॽनेनिन्हा ओम॥”
चेलाचिगा सोक नुङ् आनान्दा
16 “हाकु मिहेक्साङ् नाहाङ्तो न्निङ्दा का निमा न्दोङ्मेकान्हा, न्हाङ् मिहेक्साङ् फेरि का न्निङ्दा निमेकाहा॥”
17न्हाङ् उका चेलाचिबे एकोहिप्पाङ् उङ्चि-उङ्चि खाॽला छिम्खुसा न्जाया, “उङा कानिङ् लुयाहा खा चेॽया इहा ओम? ‘मिहेक्साङ् नाहाङ्तो न्निङ्दा का न्निमेकान, न्हाङ् मिहेक्साङ् फेरि न्निङ्दा का निमेकाहा’, न्हाङ् खाॽला चा कामासिम्मे ‘इजाङ्बाङ्निङ् का आप्पागाबे खेहेक्साङ्ना॥’” 18ङ्खाचिङा ङ्गाया, “ना मिहेक्साङ् बाङ्ना इना ओम? उङा इगा उतुम्बे चेक्मासिमेॽना, कानिङ् गो इहाचा ङ्ङासुम्ङान्हा॥”
19ङ्खाचिङा खा चेॽयागा उतुम्बे छिम्मा मितामाहा बाङ्ना चेॽया येसुङा था तोक्तुहोङ् ङ्खाचि लुचि, “का लुॽनेनिन ‘हाकु मिहेक्साङ् नाहाङ्तो का न्निमेकान, न्हाङ् मिहेक्साङ् फेरि न्निङ्दा का निमेकाहा॥’ इना खा चेॽयागा उतुम्बे न्निङ्दा छिम्खुसा चाइघा मेन्नायि? 20जेप्पा का न्निङ्दा लुमेॽनेनिन, न्निङ्दा हाबिॽवागा, ओक्तिॽवागा, ङ्खाॽनिङ्गो कायुङ्लेनबेॽहा याॽमिचि न्जोन्सिमे॥ न्निङ्दा सोक चोगिॽवागा, ङ्खाॽनिङ्गो न्निङ्दा सोक चोक्मा लेप्तिॽवाम्गाहोङ् आनान्दित लेक्सिॽवाघा॥ 21पिछा वामाना बेलाक्पे उमा बेथाङा ओक्खिपिक्खि लेङ्मे, इजाङ्बाङ्निङ् पिछा वामाना बेला लेङ्नुङ्मे॥ ङ्खाॽनिङ्गो पिछा वान्दिमेहोङ् सोलोक उङा ङ्खा घाक तुखि मुन्दिॽवा, इजाङ्बाङ्निङ् ‘कायुङ्लेनबे एको पिछागा वाम लेक्साना’ बाङ्ना चेॽयाङा उङ् तुक्नुङ् चोन्सिमे॥ 22खाॽलामाङ् लोप न्निङ्दा सोक चोगिॽवागा, ङ्खाॽनिङ्गो का फेरि न्निङ्दा तुप्से तामेङ्निङ् न्निङ्गा निङ्वाबे प्याक आनान्दाङा इप्तिॽवागा॥ न्निङ्गा न्ना आनान्दा न्निङ्दाभाङ् इसाङा चा नाम्खेॽमा ङ्यासिॽवागान्हा॥ 23न्ना लेन न्निङ्दा का इहाचा न्छिम्मेकान्हा॥ का जेप्पा लुमेॽनेनिन, न्निङ्दा आका आनिङ्बे इहा नाक्तुम्गाभोङ्चा आप्पाङा न्निङ्दा पिइवाघा॥ 24खिङ् सोम्मा गो न्निङ्दा आनिङ्बे इहाचा न्नाक्तुक्सुम्गान॥ नाक्तानुम, न्हाङा न्निङ्दा तोक्त्वाम्घा॥ खाॽला न्निङ्गा आनान्दा पुरा लेङ्नि॥
येसुङा कायुङ्लेन हेचोना
25 “खा चेॽया न्निङ्दा ताप्चेॽयाभाङ् लुॽमासिमेॽनेनिन, ङ्खाॽनिङ्गो खाॽलाना बेला ताये, ङ्खिङ्बेला च्हेन का न्निङ्दा आप्पागा उतुम्बे ताप्चेॽयाभाङ् मेन्ना, ङ्खाॽनिङ्गो न्निङ्दा उचुन आसुम्गानुङ् लुमेॽनेनिन्हा॥ 26का न्निङ्गा लागि आप्पानुङ् नाङ्बिॽमा पोरान्जोङ्मेन्हा, इजाङ्बाङ्निङ् न्ना लेन न्निङ्दा आफाइ आका आनिङ्बे नाक्त्वाम्गा॥ 27आप्पा आफाइङा न्निङ्दा उलुङ्मा तुक्तिॽवागा, इजाङ्बाङ्निङ् न्निङ्दा का लुङ्मा तुक्तामागा न्हाङ् का निङ्वाफुमाभाङ् तायाङ्ना ओमभोङ् बिस्वास चोगामागा॥ 28का आप्पाभाङ्माङ् कायुङ्लेनबे तायाङ्ना ओम, न्हाङ् कायुङ्लेन नाॽवाङ्होङ् फेरि आप्पागाबेॽमाङ् लाङ्खेॽमासिमेङ्ना॥”
29न्हाङ् चेलाचिङा येसु न्लु, “हाकु न्दा ताप्चेॽयाभाङ् मेन्ना, ङ्खाॽनिङ्गो कानिङ् आसुम्ङानुङ् चेक्मासिमेका॥ 30हाकु कानिङ् खा चेॽया आसुम्ङा, न्दा घाक चेॽया निस्वाघा॥ न्दा हाकु इसाङा चा छिम्मा ङ्यामेकानिन्ना, इजाङ्बाङ्निङ् छिम्मा हाक्निङ् ओन्दाङ् न्दा था तोक्तिॽवाघा॥ ङ्खोङ्माङ् न्दा निङ्वाफुमाभाङ्माङ् तायागाना ओमभोङ् कानिङ् बिस्वास चोङ्मेॽनेनिन॥”
31येसुङा पोलोवा पिचि, “इना न्निङ्दा हाकु बिस्वास चोङ्मेकाहा? 32ङ्खाॽनिङ्गो बेला ताये, न्हाङ् जेप्पा तायाब्यामाना॥ न्निङ्दा घाक हिसिखेइवागाहोङ् न्निङ्दा न्निङ् पाङ्-पाङ्बे खेइवागा, न्हाङ् का आतोखुमाक नाॽनामेका॥ ङ्खाॽनिङ्गो सोयानुम, का आतोखुमाक न्लेङ्मेङान्ना, इजाङ्बाङ्निङ् कानुङ् आप्पा वान्नेॽना॥
33 “न्निङ्दा काबे हाङ्हाङ् तोक्तुम्गानिभोङ्माङ् खा घाक चेॽया लुॽनेनिनाहा ओम॥ कायुङ्लेनबे न्निङ्दा तुखि चाइवागा, ङ्खाॽनिङ्गो साहास चोगानि, इजाङ्बाङ्निङ् का कायुङ्लेन हेचोक्सुङ्ना॥”
Currently Selected:
युहान्ना 16: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
