युहान्ना 15
15
जेप्पागा सिम्लेॽमाङ्गा उथाप
1 “जेप्पागा सिम्लेॽमाङ्गा उथाप काङान, न्हाङ् आप्पा च्हेन सिम्लेॽमाङ् सोखुबा टोॽवा ओम॥ 2काबेॽहा हेखा ह्वाकङा उसा ङ्गेक्स्वान, उङा ङ्खा चेनाहाक्स्वा, न्हाङा उसा केङ्खुबाङा च्हेन झान प्याक उसा केक्सुनिभोङ् उङा छाटाचोग्वा॥ 3सिम्लेॽमाङ् सोखुबाङा ह्वाक छाटाचोग्वाहोङ् उचुन चोग्वाहा लोॽवा न्निङ्दा चा का लुॽनेनिन्हा चेॽयाङा ओन्दाङ्माङ् सुद्दा लेक्सिबिमिघा॥ 4न्निङ्दा काबे वायानि, न्हाङ् का न्निङ्दाबे वामेङ्ना॥ इमिन ह्वाक उथाप्पे ङ्वायानभोङ् न्नाङा उसा केङ्मा ङ्यास्वान, ङ्खाॽलामाङ् न्निङ्दा चा काबे ङ्वाइगानभोङ् उसा केङ्मा ङ्यास्वाम्गान्हा॥
5 “सिम्लेॽमाङ्गा उथाप काङान, न्हाङ् न्निङ्दा च्हेन ह्वाक सिगान॥ इसा काबे वामे, का चा उङ्बे वामेङ् न्हाङा उङा प्याक उसा केक्स्वाहा, इजाङ्बाङ्निङ् काभाङ् फोक्सिखेइगाभोङ्, न्निङ्दा इहाचा चोक्मा ङ्यास्वाम्गान्हा॥ 6काबे मेवाखुबा च्हेन चेनाहाक्साना ह्वाक लोॽवा लेम्नाहाङ्मे, न्हाङ् न्ना हेन्दिमे॥ ङ्खाॽलाहा ह्वाक याॽमिचिङा ङ्खोप्स्वाहोङ् मिबे न्लेप्तेन्द्वा न्हाङ् हान्धेत्वा॥ 7न्निङ्दा काबे वाइगाभोङ् नुङ् का लुॽनेनिन्हा चेॽया न्निङ्दाबे वेॽहाभोङ् न्निङ्दा इहा नाक्मा मितुक्सुम्गा ङ्खा नाक्तानुम, ङ्खा न्निङ्दा तोक्त्वाम्घा॥ 8न्निङ्दा प्याक उसा केङ्मेतुम्घोङ् आका चेलासिङानभोङ् सोॽमेतुम्चिम्गाभोङ् नाबेॽमाङ् आप्पागा माहिमा लेङ्मेॽना॥
9 “आप्पाङा का लुङ्मा तुक्ताङ्ना लोॽवा का चा न्निङ्दा आलुङ्मा तुङ्नुङ्नेनिन्हा॥ का न्निङ्दा आलुङ्मा तुङ्मेॽनेनिन्हा बाङ्ना चेॽया म्मुन्दिॽयानुम्निन॥ 10का आप्पागा आग्गे येनुङ्होङ् उका लुङ्मा तुक्तायिबे वान्नुङ्मेङ्ना लोॽवा न्निङ्दा चा आका आग्गे येनुम्गाभोङ् आका लुङ्मा तुक्तायिबे वाइनेसिॽवाघा॥ 11आका आनान्दा न्निङ्दाबे वानि, न्हाङ् न्निङ्गा आनान्दा पुरा लेङ्निभोङ्माङ् का न्निङ्दा खा चेॽया लुॽनेनिन्हा ओम॥
12 “आका आग्गे ना ओम– का न्निङ्दा आलुङ्मा तुक्नेनिन्हा लोॽवा न्निङ्दा चा लुङ्मा तुक्खुसा चायानि॥ #
युहान्ना १३:३४; १५:१७; १ युहान्ना ३:२३; २ युहान्ना ५ 13काम्निभाक्का लागि सिमा चा त्यार लेङ्मामाङ् घाक हाक्निङ् प्याक लुङ्मा तुक्ताना ओम, ना हाक्निङ् माडा इनाचा मान्ना॥ 14न्निङ्दा आका आग्गे येनुम्गाभोङ् न्निङ्दा आका काम्निभाक सिगान॥ 15हाकु नाहाङ्तो का न्निङ्दा नोकोर न्लुमेॽनेनिन्हा, इजाङ्बाङ्निङ् उका मालिकङा इ चोक्मासिमे ङ्खा चेॽया नोकोरङा था न्दोक्त्वान्हा॥ ङ्खाॽनिङ्गो का न्निङ्दा काम्निभाक लुन्नुङ्नेनिन्हा, इजाङ्बाङ्निङ् का आप्पाभाङ् खेप्सुङ्हा घाक चेॽया का न्निङ्दा लुॽनिनुङ्नेनिन॥ 16का न्निङ्दा सेगाघा मेन्ना, ङ्खाॽनिङ्गो का न्निङ्दा सेक्नेनिन्हा ओम॥ न्निङ्दा खेइघोङ् साधाइ वान्नुङ्खुबा उसा केङ्मेतुम्गानिभोङ् का न्निङ्दा पाङ्मासिमेॽनेनिन॥ न्हाङा न्निङ्दा आनिङ्बे आप्पानुङ् इहा नाक्त्वाम्गा ङ्खा उङा पिइवाघा॥ 17हाकु का न्निङ्दा ना आग्गे पिमेॽनेनिन, न्निङ्दा लुङ्मा तुक्खुसा चायानि॥
कायुङ्लेनबेॽहा याॽमिचिङा चेलाचि ङ्ङिसित्वाचिहा
18 “कायुङ्लेनबेॽहा याॽमिचिङा न्निङ्दा इसितिइगाभोङ् खा चेॽया आसानुम, न्निङ्दा इसिॽमा हाक्निङ् ओन्दाङ् न्नाङा का इसिताङ्ना ओम॥ 19न्निङ्दा ना कायुङ्लेनगा याॽमि साइगानिङ्बि कायुङ्लेनङा न्निङ्दा आफान्ता एतिघोङ् लुङ्मा तुक्तिगाबि॥ ङ्खाॽनिङ्गो न्निङ्दा ना कायुङ्लेनगा म्मेतिसिगान्हा॥ का न्निङ्दा कायुङ्लेनभाङ् सेक्नेनिन, ङ्खोङ्माङ् न्निङ्दा कायुङ्लेनङा इसितिॽवाघा॥ 20का लुॽनेनिन्हा खा चेॽया मितानुम ‘नोकोर उका मालिक हाक्निङ् माडा न्लेङ्मेन्ना॥’ ङ्खाचिङा का तुखि पियाभोङ् न्निङ्दा चा तुखि पिइवाघा॥ ङ्खाॽलामाङ् ङ्खाचिङा आका आग्गे ङ्येनुभोङ् न्निङ्दा लुम्चिम्घा चेॽया चा ङ्येन्वाहा॥#मात्ति १०:२४; लुका ६:४०; युहान्ना १३:१६ 21ङ्खाॽनिङ्गो खा घाक चेॽया न्निङ्दा आका कारानङा चोगिॽवागा, इजाङ्बाङ्निङ् ङ्खाचिङा का पाङ्खुबा चिनान्जोग्वानिन॥
22 “का न्दायाङान्निङ्बि, न्हाङ् ङ्खाचि ङ्योक्मेतुन्चिङान्निङ्बि ङ्खाचिबे पापका आप्दिक ङ्ङायान्बि॥ ङ्खाॽनिङ्गो हाकु ङ्खाचिङा उङ्चिगा पापका उतुम्बे इच्चा कामा न्दोक्त्वानिन्ना॥ 23इसाङा का इसिम्मेङ्, न्नाङा आप्पा चा इसित्वाना॥ 24इसाङा चा चोक्मा ङ्यासुनिन्हा आच्चाम्माहा काम ङ्खाचिगा उलुम्बे का न्जोगुङान्निङ्बि, ङ्खाचिबे पापका आप्दिक ङ्ङायान्बि॥ ङ्खाॽनिङ्गो हाकु ङ्खाचिङा का चोगुङ्हा आच्चाम्माहा काम न्निसुक्सुहोङ्चा का नुङ् आप्पा हिपापाङ् हेला चोङ्मे॥ 25ङ्खाॽनिङ्गो ब्यावास्थाबे छेप्ताहा खा चेॽया पुरा लेङ्निभोङ्माङ् खा लेक्साहा ओम, ‘ङ्खाचिङा का इनाचा कारान मेॽनिङ् इसिता॥’#छेम ३५:१९; ६९:४
26 “न्निङ्दा फाखुबा पाबित्तारा आत्मा का आप्पाभाङ् न्निङ्दाबे पाक्स्वाङ्, उङ् घाक सात्याताबे तिक्खुबा पाबित्तारा आत्मा ओम॥ उङामाङ् आका उतुम्बे गाबाहि पिवाचिहा॥ 27न्हाङ् न्निङ्दा सुरु नाहाङ्तोमाङ् कानुङ् वेतिघाङा न्निङ्दा चा आका गाबाहि पिखुबा लेक्सिॽवाघा॥”
Currently Selected:
युहान्ना 15: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
