युहान्ना 14
14
वालोक खेॽमाना लाम्बु येसु
1येसुङा उका चेलाचि लुचि, “न्निङ्दा सुर्ता न्जायानिन॥ न्निङ्दा निङ्वाफुमाबे बिस्वास चोग्वाम्गा, का चा बिस्वास चोगा॥ 2आप्पागा पाङ्बे प्याक वामाहा ठोङ् ङ्वान्नेहा॥ म्मायानिन्निङ्बि इना का न्निङ्गा लागि ठोङ् त्यार चोक्से खेॽमासिमेङ्ना लुॽनेनिन्बि? 3का खेमेङ्होङ् न्निङ्गा लागि ठोङ् त्यार चोग्वाङ्होङ् फेरि लान्दारामेङ्, न्हाङा न्निङ्दा चा का वेॽङाना ठोङ्बे खेमेॽनेनिन्हा॥ ङ्खाॽला न्निङ्दा न्नाबे कानुङ् वाइवाघा॥ 4का खेक्साङ्ना लाम्बु न्निङ्दा था वान्नेॽमाङ्॥”
5थोमाङा उङ् लु, “हाङ्बा, न्दा हेॽने खेक्सागा कानिङ् इनाचा था मान, न्हाङ् न्दा खेक्सागाना ठोङ्गा लाम्बु कानिङ् इमिन चिनातोक्माना?”
6येसुङा लु, “लाम्बु, सात्या नुङ् हिङ्लुङ् कामाङ् ओम्ङान॥ काभाङ् मेॽनिङ् इसाङा चा पागाबे तामा ङ्यास्वान्ना॥ 7न्निङ्दा का चिनाचोगागानिङ्बि, आप्पा चा चिनाचोगुम्गाबि॥ हाकु नाहाङ्तो उङ् चिनाचोग्वाम्गा, न्हाङ् न्निङ्दा उङ् निसिक्सुम्गाना॥”
8फिलिपङा येसु लु, “हाङ्बा, कानिङ् पा सोॽमेता, ङ्खिङ्होङ् कानिङ् होइ॥”
9येसुङा पोलोवा पि, “फिलिप, खिङ् सोम्मा का न्निङ्दानुङ् वान्नेॽङा, ङ्खोङ्चा चिनान्जोङ्मेकान्हा? का निखुबाचिङा पा न्निसुक्सुना॥ न्दा ‘कानिङ् पा सोॽमेता’ भोङ् इमिन कामा कामेकाना? 10का आप्पाबे वेॽङा, न्हाङ् आप्पा काबे वेॽनाभोङ् न्दा बिस्वास न्जोग्वागान्हा? न्निङ्दा का इहा लुमेॽनेनिन, ङ्खा चेॽया का आफाइ लुॽनेनिन्हा मेन्ना, ङ्खाॽनिङ्गो काबे वेॽना आप्पाङा काभाङ् उका काम चोक्मासिमेॽना॥ 11का आप्पाबे नुङ् आप्पा काबे वेॽना बाङ्ना चेॽया न्निङ्दा बिस्वास चोगानुम॥ मेन्नाभोङ् का चोगुङ्हा काम सोम्घोङ् चा बिस्वास चोगा॥
12 “जेप्पा का न्निङ्दा लुमेॽनेनिन, इसाङा का बिस्वास चोङ्मेङ्, न्नाङा का चोगुङ्हा काम चा चोग्वा, न्हाङ् का चोगुङ्हा हाक्निङ्चा माम्माहा काम चोग्वाहा, इजाङ्बाङ्निङ् का आप्पागाबे खेक्साङ्॥ 13न्निङ्दा आका आनिङ्बे इहा नाक्तुम्गाहोङ्चा काभाङ् आप्पागा माहिमा लेङ्निभोङ् का पुरा चोङ्बिॽमेनेनिन्हा॥ 14न्निङ्दा आका आनिङ्बे इहा नाक्तुम्गाहोङ्चा का ङ्खा पिमेॽनेनिन्हा॥”
पाबित्तारा आत्मागा बाचा
15 “न्निङ्दा का लुङ्मा तुङ्मेकाहाभोङ् आका आग्गे येन्वाम्घा॥ 16न्हाङा का आप्पानुङ् आमुक फाक्त्वाङ्चिङ्, न्हाङ् उङा न्निङ्दा फाखुबा एको पाक्सिबिइवागा, उङ् साधाइ न्निङ्दानुङ् वामेॽना॥ 17उङ् सात्यागा आत्मा ओम॥ उङ् कायुङ्लेनबेॽहा याॽमिचिङा गाराहान चोक्मा ङ्यास्वानिन्ना, इजाङ्बाङ्निङ् कायुङ्लेनबेॽहा याॽमिचिङा उङ् न्निस्वानिन न्हाङ् चिनान्दोक्त्वानिन॥ ङ्खाॽनिङ्गो न्निङ्दा उङ् चिनाचोग्वाम्गा, इजाङ्बाङ्निङ् उङ् न्निङ्दानुङ् वान्ने, न्हाङ् न्दायेॽहा लेनचिबे न्निङ्दाबे वामे॥ 18का न्निङ्दा टुहुरा न्नाॽनामेनेनिन्हा, का न्निङ्दाबे लान्दारामेङ्ना॥ 19हाकु मिहेक्साङ् कायुङ्लेनबेॽहा याॽमिचिङा का हेॽनिङ्चा न्निमेन्हा, ङ्खाॽनिङ्गो न्निङ्दा का निमेकाहा॥ का हिङ्गिलिकङा ङ्खोङ्माङ्, न्निङ्दा चा हिङिनेसिॽवाघा॥ 20न्ना लेन न्निङ्दा खा चेॽया था तोक्त्वाम्गा, का आप्पाबे वेॽङा, न्निङ्दा काबे वेॽनेतिगा, न्हाङा का न्निङ्दाबे वेॽङाना॥ 21आका आग्गे खेप्स्वाहोङ् येन्खुबा माङ् का लुङ्मा तुक्खुबा याॽमि ओम, न्हाङा का लुङ्मा तुक्खुबा आप्पाङा चा उलुङ्मा तुक्त्वाना॥ का चा न्ना आलुङ्मा तुक्त्वाङ् न्हाङ् का आफाइ उङ्बे पार्काट लेङ्मेङ्ना॥”
22याहुदाङा (इस्कारियोत च्हेन मेन्ना) येसु छिम्दु, “हाङ्बा, इजाङ् कानिङ्बे से पार्काट लेङ्मेका, ङ्खाॽनिङ्गो कायुङ्लेनबेॽहा याॽमिचिबे च्हेन पार्काट न्लेङ्मेकान्ना?”
23येसुङा पोलोवा पि, “इसाङा का उलुङ्मा तुङ्मेङ्, न्नाङा आचेॽया येन्वाहा, न्हाङ् आप्पाङा न्ना उलुङ्मा तुक्त्वा, न्हाङा कान्चिङ् न्नागाबे तामेङ्चिङ्होङ् उङ्नुङ् वामेङ्चिङ्हा॥ 24आचेॽया मेयेन्खुबाङा का उलुङ्मा न्दुङ्मेॽङान्ना॥ न्निङ्दा खेप्सुम्घा चेॽया आका मेन्हा, ङ्खाॽनिङ्गो का पाङ्खुबा आप्पागा ओम॥
25 “खा घाक चेॽया का न्निङ्दानुङ् वायाङ्निङ् माङ् लुॽनिनुङ्नेनिन्हा॥ 26ङ्खाॽनिङ्गो आप्पाङा आनिङ्बे पाक्सेहेक्सुना फाखुबा पाबित्तारा आत्माङा न्निङ्दा घाक चेॽया चिन्दिॽवागा, न्हाङ् का लुॽनेनिनाहा घाक चेॽया मिॽमेतिइवाघा॥
27 “हाङ्हाङ् न्निङ्दानुङ् नाॽवाङ्॥ का आका हाङ्हाङ् न्निङ्दा पिॽनामेनेनिन्हा॥ न्ना हाङ्हाङ् गो कायुङ्लेनङा पिइघा लोॽवाना मेन्ना॥ न्निङ्दा हारेस न्जायानिन, न्हाङ् ङ्गिसितानिन॥ 28‘का नाभाङ् खेक्साङ् न्हाङ् फेरि न्निङ्दाबे लान्दारामेङ्ना’ भोङ् लुॽनेनिन्हा चेॽया गो न्निङ्दा खेप्सिक्सुम्गा॥ न्निङ्दा का जेप्पा लुङ्मा तुक्तागानिङ्बि का आप्पागाबे खेक्साङ्ना लुॽनेनिन्हा चेॽया खेप्सुम्गानिङ् न्निङ्दा चोन्दिसिइगाबि॥ इजाङ्बाङ्निङ् का हाक्निङ् माडा च्हेन आप्पा वेॽना॥ 29हाकु खा चेॽया लेङ्मा हाक्निङ् ओन्दाङ् का लुन्नुङ्नेनिन, इजाङ्बाङ्निङ् खा चेॽया लेङ्मेॽनिङ् न्निङ्दा बिस्वास चोक्मा यागानि॥ 30का न्निङ्दानुङ् हाकु प्याक न्जेङ्मेॽङान्ना, इजाङ्बाङ्निङ् ना कायुङ्लेनगा तायेन्राङ्बा तायेॽना॥ न्नागा का छोङ्बे इहाचा चोक्तोक मान, 31ङ्खाॽनिङ्गो का आप्पा आलुङ्मा तुक्त्वाङ्, न्हाङ् आप्पाङा इमिन्हा आग्गे पियामाङ् का ङ्खाॽलामाङ् चोङ्मेङ्ना भोङ् कायुङ्लेनबेॽहा याॽमिचिङा ङ्ङासुनि॥ पोगानि, हाकु नाभाङ् खेइ॥”
Currently Selected:
युहान्ना 14: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
