युहान्ना 13
13
येसुङा चेलाचिगा लाङ् वासिचिहा
1फोङ्होक्नामगा सुरु लेक्सेहेक्सासा॥ हाकु ना कायुङ्लेन नाॽनामाहोङ् उप्पागाबे खेॽमाना बेला ताहेक्साना बाङ्ना चेॽया येसुङा था तोक्तु॥ उङा कायुङ्लेनबेॽहा उका याॽमिचि साधाइ उलुङ्मा तुक्तुचि, न्हाङ् ङ्खाचि आखेरि सोम्मा उलुङ्मा तुक्तुक्साचि॥
2येसुङा उका चेलाचिनुङ् नाॽमासेक्का चामा चामास्या॥ ङ्खिङ्बेला दियाबालासङा सिमोनगा उच्या याहुदा इस्कारियोतका उनिङ्वाबे येसु लाप्मेमाना निङ्वा एन्दितुक्सा॥ 3निङ्वाफुमाङा का घाक चोक्तोक पियामाङ्हा बाङ्ना चेॽया येसुङा था वाया॥ न्हाङा का निङ्वाफुमाभाङ् तायाङ्, फेरि निङ्वाफुमागाबेॽमाङ् लाङ्खेॽमासिमेङ्ना बाङ्ना चेॽया चा उङा था वाया॥ 4न्हाङामाङ् येसु पोगा, न्हाङ् ओछोङ्बे वाना तेक फुक्सुहोङ् ताउल्या उकाम्बोरबे कितु॥ 5न्हाङा येसुङा एको आरिबे माङ्च्वा लिक्तुहोङ् उका चेलाचिगा उङ्चि लाङ् वासिम्बिसाङ् उकाम्बोरबे कितुना ताउल्याङा तुङ्बिॽमा तारोक्तुचि॥
6येसुङा सिमोन पात्तुरुसका उलाङ् वासितुबिहेक्सुसानिङ् पात्तुरुसङा लु, “हाङ्बा, इना न्दा आलाङ् वासिताबेहेक्साङ्घायि?”
7येसुङा पात्तुरुस लु, “का इ चोक्मासिमेङ्, ङ्खा न्दा लोप ङ्ङास्वागान्हा, ङ्खाॽनिङ्गो वान्दिक आस्वाघा॥”
8पात्तुरुसङा लु, “मेन्ना, न्दा हेॽनिङ्चा आलाङ्चि वासिॽमा न्लेङ्मेनिन्हा!”
येसुङा लु, “का न्लाङ्चि ङ्वासिन्चिङान भोङ् न्दा आका चेला माङ् न्लेङ्मेकान्ना॥”
9न्हाङ् सिमोन पात्तुरुसङा लु, “ङ्खाॽलाभोङ् हाङ्बा, आलाङ्चि से मेन्ना, ङ्खाॽनिङ्गो आमुकचि नुङ् आटुखुरुक चा वासिताब्याङ्॥”
10येसुङा न्ना लु, “नुहाबा चोगाब्याना याॽमिगा उलाङ्चि से वासिॽमाचिहोङ् न्लेङ्मेहा, हेकोहा इहाचा वासिॽमा पोरान्जोङ्मेन्हा, इजाङ्बाङ्निङ् न्ना घाक सुद्दाना॥ न्हाङ् न्निङ्दा च्हेन सुद्दा लेक्सिबिमिघा, ङ्खाॽनिङ्गो घाक को मेन्ना॥” 11इजाङ्बाङ्निङ् उङ् लाप्मेखुबा इसा ओम बाङ्ना चेॽया येसुङा था वाया, न्हाङामाङ् येसुङा “न्निङ्दा घाक सुद्दा न्लेक्सिबिमिगान्हा” लुक्साचि॥
12येसुङा चेलाचिगा लाङ् वासिॽमाहा काम याइहोङ् ओछोङ्बे वाॽमाना तेक वाहोङ् फेरि युङा॥ न्हाङा उङा ङ्खाचि लुचि, “का इजाङ् न्निङ्लाङ् वासिङ्चिङ्हा आसुम्घा?#लुका २२:२७ 13न्निङ्दा का ‘चिन्खुबा नुङ् हाङ्बा’ लुम्मेका, खा चेॽया ठिक्माङ् ओम, का न्निङ्गा हाङ्बा नुङ् चिन्खुबामाङ् ओम्ङान॥ 14का न्निङ्गा हाङ्बा नुङ् चिन्खुबाङान, ङ्खोङ्चा न्निङ्लाङ् वासिम्बिनुङ्नेनिन, न्निङ्दा चा एकोङा हेकोनागा उलाङ् वासिॽमाहाचि॥ 15इजाङ्बाङ्निङ् न्निङ्दा चा का लोॽवा चोगिगानि भोङ्माङ् एको साङ्खालाम सोॽमेॽनेनिन्हा ओम॥ 16जेप्पा का न्निङ्दा लुमेॽनेनिन, नोकोर उका मालिक हाक्निङ् माडा मेन्ना, न्हाङा सालेन खेखुबा चा सालेन हाङ्खुबा हाक्निङ् माडा न्सामेन्ना॥#मात्ति १०:२४; लुका ६:४०; युहान्ना १५:२० 17न्निङ्दा खा चेॽया आसुम्घोङ् ङ्खाॽला चोगिगाभोङ्, न्निङ्दा प्याक आसिक तोक्त्वाम्घा॥
येसु लाॽमेखुबा चेला
(मात्ति २६:२०-२५; मार्कुस १४:१७-२१; लुका २२:२१-२३)
18 “का न्निङ्दा घाक्का उतुम्बे लुॽनेनिन्हा मेन्ना, का सेगुङ्चिङ्हा का चिनाचोग्वाङ्चिङ्॥ ङ्खाॽनिङ्गो धार्मासाप्लाबे छेप्ताहा खा चेॽया पुरा लेङ्निभोङ् खाॽला लेक्साहा ओम, ‘कानुङ् चालेप्पा चाखुबा आका बिरोधि लेक्साना॥’ #
छेम ४१:९
19खा चेॽया लेङ्मा हाक्निङ् ओन्दाङ्माङ् का न्निङ्दा लुन्नुङ्नेनिन, न्हाङामाङ् खा चेॽया लेङ्मेॽनिङ् ‘कामाङ् खिरिस्ट ओम्ङान’ भोङ् न्निङ्दा बिस्वास चोङ्मेकाहा॥ 20जेप्पा का न्निङ्दा लुमेॽनेनिन, का पाक्सुङ्ना सुइकार चोक्खुबाङा का सुइकार चोङ्मेङ्, न्हाङा का सुइकार चोक्खुबाङा का पाङ्खुबा सुइकार चोग्वा॥”#मात्ति १०:४०; मार्कुस ९:३७; लुका ९:४८; १०:१६
21खिङ् लुइचिहोङ् येसु उनिङ्वाबे इब्बे-इब्बे ङ्खुम्दिन्नुङ् एता, न्हाङ् ओचेलाचि गाबाहि पिसाङ् लुचि, “जेप्पा का न्निङ्दा लुमेॽनेनिन, न्निङ्दा माध्येबे एकोङा का लाप्मेमेकाहा॥” 22येसुङा खा चेॽया इसागा उतुम्बे लुचिहाभोङ् चेलाचिङा ङ्ङासुनिन्होङ् उङ्चि-उङ्चि सोखुसा न्जाया॥ 23चेलाचि माध्येबे येसुङा उलुङ्मा तुक्तुना चेला च्हेन येसुगा उछात्तिबे आडेस लाचोगाहोङ् युङामासा॥ 24न्हाङ् सिमोन पात्तुरुसङा उङ् खोॽलिक खोतुहोङ् लु, “न्दा छिम्दुसो, खा चेॽया इसागा उतुम्बे कायाना ओम?”
25न्ना चेलाङा येसुगा उछात्तिबे आडेस लाचोक्साङ् छिम्दु, “हाङ्बा, न्ना याॽमि इसा ओम?”
26येसुङा लु, “का चालेप्पा लुप्स्वाङ्होङ् इसा पिवाङ्, का कायाङ्ना याॽमि न्नामाङ् ओम॥” न्हाङा येसुङा चालेप्पा लुप्सुहोङ् सिमोन इस्कारियोतका उच्या याहुदा पि॥ 27याहुदाङा चालेप्पा चोहोङ् सोलोक साइतान उङ्बे उया॥ न्हाङ् येसुङा लु, “न्दा चोक्माहा काम, हानि चोगि॥” 28येसुङा उङ् इजाङ् खाॽला लुना, ङ्खा चेॽया न्नाबे चासे ङ्युङाहा इसाङा चा ङ्ङासुनिन॥ 29ङ्खाचिबे इखिङ्ङा खाॽला ङ्ङेता, याङ्गा खेसुप याहुदानुङ् वान्नेहोङ् होक्नामगा लागि चाहाचोक्माहा थोक इन्से पाक्सेहेक्सुना लोप्पि॥ न्हाङ् इखिङ्ङा च्हेन तुखिसुम्बाचि इहा पिसे पाक्सुना लोप्पि म्मिता॥ 30याहुदाङा च्हेन चालेप्पागा टुक्रा चोइहोङ् सोलोक पाखा लोन्दाख्या॥ ङ्खिङ्बेला कुइम लेक्साब्यामासा॥
येसुङा एको ओछोङा आग्गे पिचिहा
31याहुदा खेब्याहोङ् येसुङा उका उतुम्बे आफाइ खाॽला लुचि, “हाकु याॽमिगा उच्यागा माहिमा लेङ्माना बेला लेक्सामा, उङ्भाङ् निङ्वाफुमागा माहिमा लेङ्मेॽना॥ 32उच्याबे निङ्वाफुमा माहिमित लेक्सामानाभोङ्, निङ्वाफुमाङा उङ् आफाइबे उच्या माहिमित चोग्वाना, उङा खा काम हानि चोग्वाहा॥
33 “आका पिछाचि, का हाकु न्निङ्दानुङ् प्याक ङ्वामेङान्ना॥ न्हाङा का याहुदि हाङ्गुम्बाचि लुङ्चिङ्हा लोॽवा न्निङ्दा चा लुमेॽनेनिन ‘न्निङ्दा का योङ्मेका, ङ्खाॽनिङ्गो का खेक्साङ्ना ठोङ्बे न्निङ्दा तामा ङ्यासिॽवागान्हा॥’ #
युहान्ना ७:३४
34हाकु न्निङ्दा का एको ओछोङा आग्गे पिमेॽनेनिन, न्निङ्दा लुङ्मा तुक्खुसा चायानि॥ का इमिन लुङ्मा तुङ्नुङ्नेनिन, ङ्खाॽलामाङ् न्निङ्दा चा एकोङा हेकोना लुङ्मा तुक्खुसा चायानि॥#युहान्ना १५:१२,१७; १ युहान्ना ३:२३; २ युहान्ना १:५ 35न्निङ्दा लुङ्मा तुक्खुसा चाइगाभोङ्, न्निङ्दा आका चेला सिगानभोङ् घाक याॽमिचिङा चिनाचोगिॽवाघा॥”
पात्तुरुसङा येसु इन्कार चोगुना
(मात्ति २६:३१-३५; मार्कुस १४:२७-३१; लुका २२:३१-३४)
36सिमोन पात्तुरुसङा येसु छिम्दु, “हाङ्बा, न्दा हेॽने खेक्सागाना?”
येसुङा लु, “का खेक्साङ्ना ठोङ्बे न्दा लोप कानुङ् खेॽमा ङ्यामेकान्ना, ङ्खाॽनिङ्गो वान्दिक च्हेन यामेकाना॥”
37पात्तुरुसङा छिम्दु, “हाङ्बा, का न्दानुङ् इजाङ् लोप खेॽमा ङ्यामेङान्ना? का ङ्गा लागि सिमा चा त्यारिङाना॥”
38येसुङा पोलोवा पि, “इना न्दा आका लागि सिमा चा त्यारिगाना? का जेप्पा लुमेॽनेन, वान्दिक्ङा भेनिक तितिॽलिङ्वा कामा हाक्निङ् ओन्दाङ्, ‘का उङ् चिनान्जोग्वाङान्ना’ कासाङ् सुम्मा न्दा इन्कार चोङ्मेङ्गाना॥”
Currently Selected:
युहान्ना 13: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
