युहान्ना 12
12
मारियाम नुङ् येसु
(मात्ति २६:६-१३; मार्कुस १४:३-९)
1फोङ्होक्नामगा या लेन ओन्दाङ् येसु बेथानिया बाङ्ना तेनबे ताया॥ न्ना तेनबेॽमाङ् उङा स्यानाभाङ् हिङ्मेतुना लाजारास वाया॥ 2येसु न्नाबे तायानाङा उङ्चिङा येसुगा लागि नाॽमासेक्का चाम्योङ्बा त्यार न्जोगु॥ मार्थाङा चामा पिॽमास्या॥ लाजारास च्हेन येसु न्हाङ् हेकोहा खोलोङ्बाचिनुङ् चासे युङामासा॥ 3ङ्खिङ्बेला मारियामङा जाट्मासिभाङ् चोगाहा उचाबेलेक लिटार प्याक ओमेन आखुबा खुम्दु नाम्खुबा आत्तार ता न्हाङ् येसुगा उलाङ्बे नेक्तुबिहोङ् उताम्फोकङा तुक्तुबि॥ ङ्खा आत्तारङा न्ना घाक पाङ्माङ् खुम्दुनुङ् नाम्खुबा लेक्सा॥#लुका ७:३७-३८
4ङ्खाॽनिङ्गो उङ् धोका पिखुबा याहुदा इस्कारियोत चा ङ्खिङ्बेला न्नाबे वाया॥ न्नाङा लु, 5“खा आत्तार सुम होम्बोक युप्पा याङ्बे#१२:५ ङ्खिङ्बेला ए फिम्बिलिङ् काम चोगाहागा जेला सुम होम्बोक युप्पा याङ् लेक्सा॥ इन्चामाहोङ् ङ्खा याङ् तुखिसुम्बाचि पिॽमाचिहोङ् न्लेक्सान्बि?” 6न्नाङा तुखिसुम्बाचि उलुङ्मा तुक्तुचिहोङ् खाॽला कायाना म्मेतासान, ङ्खाॽनिङ्गो न्ना खुसुबाङ् सायाहोङ् ङ्खाॽला कायामासा॥ उङ् याङ् युङ्माहा जिम्मा म्बिक्सा, न्हाङ् बेला-बेलाबे न्नाभाङ् याङ् खुसुनेसुक्सा॥
7येसुङा लुचि, “ना इच्चा न्लुयानुम्निन, ना मामुङा खा आत्तार नेक्ताब्याङ्होङ् का हुम्मागा लागि त्यार चोगाङ्ना ओम॥ 8इजाङ्बाङ्निङ् तुखिसुम्बाचि साधाइ न्निङ्दानुङ् ङ्वामे, ङ्खाॽनिङ्गो का साधाइ न्निङ्दानुङ् ङ्वामेङान॥”#ब्यावास्था १५:११
9येसु बेथानियाबे वेॽनाभोङ् था न्दोक्तुहोङ् प्याक याॽमिचि न्नाबे न्दाया॥ ङ्खाचि येसु सोसे से मेन्ना, ङ्खाॽनिङ्गो स्याहोङ् फेरि हिङाना लाजारास सोसे चा न्दायामासा॥ 10ङ्खोङ्माङ् खाङ्खाङ् हाङ्खुबाचिङा लाजारास चा सिमागा चेॽया ङ्हुप्तु॥ 11इजाङ्बाङ्निङ् लाजारास हिङाना चेॽयाङा याहुदिचि माध्येबे प्याकङा उङ्चिभाङ् म्फोक्साख्याहोङ् येसुबे बिस्वास न्जोघेक्सुसा॥
यारुसालेमबे येसु आदार न्जोगुना
(मात्ति २१:१-११; मार्कुस ११:१-११; लुका १९:२८-४०)
12हेक्साङ्ना लेन फोङ्होक्नामबे न्दायाहा प्याक याॽमिचिङा येसु यारुसालेमबे तायेॽना बाङ्ना चेॽया ङ्खेप्सु॥ 13न्हाङ् ङ्खाचिङा खाजुरगा ह्वाक ङ्खेतुहोङ् खाॽला कासाङ् येसुगा स्वागात चोक्से न्दाया,
“होसान्ना#१२:१३ कानिङ् हिङ्मेता॥! हाङ्बा निङ्वाफुमागा उनिङ्बे ताखुबा
इजिरेलगा हाङ्, इखिङ् प्याक आसिक तोक्खुबा ओम॥”
14न्हाङा एको गाधागा उच्या तुप्सुहोङ् येसु न्ना छोङ्बे थाङा॥ खा चेॽयागा उतुम्बे धार्मासाप्लाबे खाॽला छेप्तामा–
15“ओ यारुसालेमबे वाखुबाचि, ङ्गिसितानिन!
सोयानुम, न्निङ्गा हाङ् गाधागा उच्याबे थाङ्दारायेॽना!”#जाकारिया ९:९
16येसुगा चेलाचिङा ङ्खा चेॽया ङ्खिङ्बेला ङ्ङासुनिन, ङ्खाॽनिङ्गो येसु हिङ्गिलिक लेक्साहोङ् वालोक्का माहिमाबे लासाख्याहोङ् से उङ्चिङा खा घाक चेॽया उका उतुम्बे छेप्तामासा, न्हाङ् खा काम उका लागि उङ्चिङा न्जोगुहा ओमभोङ् ङ्ङासु॥
17येसुङा स्याना लाजारास सियापाङ्भाङ् काहोङ् हिङ्मेतुना निखुबा याॽमिचिङा खा चेॽया जेप्पा लेक्साहा ओमभोङ् योक्मेमा न्लेप्तिन्चिनिन॥ 18ङ्खा साक्तिसालि कामगा उतुम्बे ङ्खेप्सुक्साहोङ् प्याक याॽमिचि येसु तुप्से ङ्ख्यामासा॥ 19न्हाङा फारिसिचि उङ्चि-उङ्चि खाॽला ङ्गाया, “हेॽनायि, कानिङ् इच्चा चोक्मा ङ्यासुम्निन्ना॥ सोयानुम, घाक उका हेक्साङ् लान्जोगाब्याहा॥”
20हाकु याहुदि फोङ्होक्नामगा बेला आराधाना चोक्से ताखुबाचिबे इखिङ् गिरिक जातिगा याॽमिचि चा ङ्वाया॥ 21ङ्खाचिङा गालिल लिङ्खामगा बेथ्सेदाबेॽना फिलिपकाबे न्दायाहोङ् खाॽला लुसाङ् उङ्चि मुक म्फाक्तुचि, “हाङ्बा, कानिङ् येसुनुङ् तुप्मा मितिमिङ्हा॥” 22फिलिप ख्याहोङ् खा चेॽया आन्दिरियास लु, न्हाङ् हिपापाङ् ख्याचिहोङ् येसु लुयाचु॥
23येसुङा उङ्चि लुचि, “हाकु याॽमिगा उच्यागा माहिमा लेङ्माना बेला तायाना॥ 24ङ्खाॽनिङ्गो का न्निङ्दा जेप्पा लुमेॽनेनिन, गाउगा दाना खामबे आमेहोङ् न्स्यान्भोङ् न्ना एको से वान्नुङ्मे, ङ्खाॽनिङ्गो खामबे आयाहोङ् स्याभोङ् न्नाङा प्याक उसा केङ्मेत्वाहा॥ 25ङ्खाॽलामाङ् इसाङा उका हिङ्लुङ् प्याक उलुङ्मा तुक्त्वा न्नाङा मासिॽवा॥ ङ्खाॽनिङ्गो इसाङा उका हिङ्लुङ् कायुङ्लेनबे इच्चा ङ्ङेत्वान, न्नाङा च्हेन हेॽनिङ्चा मेन्सिमाना हिङ्लुङ्गा लागि जोगा चोगुनेस्वा॥#मात्ति १०:३९; १६:२५; मार्कुस ८:३५; लुका ९:२४; १७:३३ 26आका काम चोक्मा मिखुबा कानुङ् लाम्नि, न्हाङा का हेॽने वामेङ्, न्नाबेॽमाङ् उङ् चा वामेॽना॥ आका काम चोक्खुबाचि आप्पाङा आदार चोग्वाचिहा॥”
का सिमेहा बाङ्ना चेॽया येसुङा लुचिहा
27 “हाकु खिङ्बेला आनिङ्वाबे ओक्खिपिक्खि लेक्सानेसाङ्, का इ काङा? ‘ओ आप्पा, ना तायेॽना तुखिभाङ् का हिङ्मेताङ्’ काङा? मेन्ना, खा तुखि आङ्मागा लागिमाङ् का ना कायुङ्लेनबे तायामाङ्ना ओम॥ 28ओ आप्पा, ङ्गा न्निङ्गा माहिमा चोगु॥”
न्हाङा वालोकपाहाङ् खाॽलाना एको सेम्ला ताया, “का न्ना माहिमित चोगुक्सुङ्, न्हाङ् फेरि चोग्वाङ्ना॥”
29न्नाबे ङ्येबाहा प्याक याॽमिचिङा खा चेॽया ङ्खेप्सु, न्हाङ् इखिङ्ङा ङ्गाया, “ताङ्खेङ् कायाना ओम!” इखिङ्ङा ङ्गाया, “वालोक्दुत उङ्नुङ् चेक्ताना ओम!”
30ङ्खाॽनिङ्गो येसुङा लुचि, “वालोकपाहाङ् उक्साना ना सेम्ला आका लागि मेन्ना, ङ्खाॽनिङ्गो न्निङ्गा लागिमाङ् ओम॥ 31हाकु ना कायुङ्लेन आप्दिक एम्माना बेला तायाब्यामाना॥ ना कायुङ्लेनबे तायेन चोक्खुबा हाकु निङ्वाफुमाङा पाखा लेप्ताहाक्स्वा, 32न्हाङा का ताम्दाङ्फुमाभाङ् चाङ्खेमेङ्निङ् घाक याॽमिचि का पोटि उन्द्वाङ्चिङ्हा॥” 33खा चेॽया येसुङा उङ् इमिन सिमेॽना, ङ्खा चेॽयागा उतुम्बे लुक्साचि॥
34याॽमिचिङा न्लु, “खिरिस्ट को साधाइ हिङ्नुङ्मेॽनाभोङ् कानिङ् धार्मासाप्लाभाङ् खेप्सुक्सुम्ङा, ङ्खाॽनिङ्गो न्दा च्हेन याॽमिगा उच्या चाङ्खेमेॽनाभोङ् इमिन कामा यामेकाना? न्ना याॽमिगा उच्या इसा ओम?”#छेम ११०:४; यासाइया ९:७; इजिकिएल ३७:२५; दानिएल ७:१४
35येसुङा लुचि, “ना जोति न्निङ्दानुङ् हाकु प्याक सोम्मा ङ्वामेन्ना॥ जोति न्निङ्दानुङ् वानुङ् सोम्मा न्निङ्दा जोतिबे लामानि, न्हाङा कुइम्नाङा ङ्येप्तिसिइवागान्हा॥ कुइम्नाबे लाम्खुबाङा का हेॽने खेॽमासिमेङ्ना, ङ्खा इहाचा था न्दोक्त्वान्हा॥ 36न्निङ्दानुङ् जोति वानुङ् जोतिबेॽमाङ् बिस्वास चोगानुम, न्हाङ् न्निङ्दा जोतिगा सान्तान लेक्सानि॥”
खिङ् लुइचिहोङ् येसु न्नाभाङ् खेब्या, न्हाङ् ङ्खाचिभाङ् चुम्साङ् वाया॥
याहुदिचिङा बिस्वास न्जोगुनिन्ना
37येसुङा ङ्खा याॽमिचिगा उयुम्बे ङ्खिङाहा आच्चाम्माहा चिङ्गो सोॽमेतुक्साचि, ङ्खोङ्चा ङ्खाचिङा उङ् बिस्वास न्जोगुनिन॥ 38खाॽला निङ्वाफुमाभाङ् चेक्खुबा यासाइयाङा कायाहा खा चेॽया पुरा लेक्सा–
“ओ हाङ्बा निङ्वाफुमा, आनिङ्गा सालेन इसाङा बिस्वास न्जोगुहा?
न्हाङा हाङ्बा निङ्वाफुमाङा चोगुहा साक्तिसालि काम इसाङा न्निसुहा?”#यासाइया ५३:१
39ङ्खोङ्माङ् ङ्खाचिङा बिस्वास चोक्मा ङ्यासुनिन, इजाङ्बाङ्निङ् यासाइयाङा फेरि खाॽला कायामा–
40“निङ्वाफुमाङा ङ्खाचिगा मिक एप्तितुक्सुचि,
न्हाङ् ङ्खाचिगा निङ्वा काठोर चोक्तुबिक्सुचि॥
ङ्खोङ्माङ् ङ्खाचिगा मिकङा न्निस्वानिन,
निङ्वाङा ङ्ङास्वानिन, न्हाङ् का पोटि न्लामेनिन॥
न्लासानिङ्बि ङ्खाचि का नुमेतुङ्चिङ्बि॥”#यासाइया ६:१०
41यासाइयाङा ओन्दाङ्माङ् येसुगा माहिमा निसुहोङ्माङ् उका उतुम्बे कायामासा॥
42ङ्खोङ्चा याहुदि तायेन्राङ्बाचिबे प्याकङा येसुबे बिस्वास न्जोगु, ङ्खाॽनिङ्गो फारिसिचिभाङ् किसिॽमाङा नुङ् ङ्खाचिङा छुम्पाङ्भाङ् लोन्नाहाङ्मेहा लोप्पिभोङ् किसिॽमाङा खा चेॽया सुइकार न्जोगुनिन॥ 43इजाङ्बाङ्निङ् ङ्खाचिङा निङ्वाफुमाभाङ् हाक्निङ्चा याॽमिचिभाङ् आदार तोक्मा ङ्योगु॥
बिस्वास मेन्जोक्खुबाङा दान्डा न्दोक्त्वाहा
44येसुङा माडा सेम्लाङा लुचि, “का बिस्वास चोक्खुबाङा का से मेन्ना, ङ्खाॽनिङ्गो का पाङ्खुबा बिस्वास चोग्वाना॥ 45का निखुबाङा, का पाङ्खुबा निस्वाना॥ 46काबे बिस्वास चोक्खुबा इसा चा कुइम्नाबे ङ्वानिन्निभोङ् का कायुङ्लेनबे जोति लेक्सारायामाङ्॥ 47इसाङा आका चेॽया खेप्स्वाहोङ् ङ्येन्वान, का न्नागा निरिक न्जोग्वाङान्हा॥ इजाङ्बाङ्निङ् का कायुङ्लेनबेॽहा याॽमिचिगा निरिक चोक्से मेन्ना, ङ्खाॽनिङ्गो उङ्चि हिङ्मेसे तायाङ्ना ओम॥ 48का इन्कार चोक्खुबा नुङ् आका आचेॽया मेङ्खेम्खुबागा लागि एको निरिक्राङ्बा वान्ने॥ का चेक्तुङ्हा चेॽयाङामाङ् आखेरि लेनबे न्नागा निरिक चोग्वाहा॥ 49इजाङ्बाङ्निङ् खा चेॽया का आफाइ चेक्तुङ्हा मेन्ना, ङ्खाॽनिङ्गो का पाङ्खुबा आप्पाङा माङ् का लुॽमाहा नुङ् चेक्माहा चेॽयागा आग्गे पियाङ्हा ओम॥ 50का था वान्ने, उका आग्गेङा हेॽनिङ्चा मेन्सिमाना हिङ्लुङ् पिमेहा॥ ङ्खोङ्माङ् का इहा चेङ्मेङ्, ङ्खा आप्पाङा लुयाङ्हा लोॽवा चेङ्मेङ्ना॥”
Currently Selected:
युहान्ना 12: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
