युहान्ना 11
11
लाजारास स्याना
1बेथानिया तेनबेॽना लाजारास बाङ्ना एको याॽमि तुगाब्यामासा॥ न्ना तेनबे उङ्नुङ् उका हिप्पाङ् उनाचि वायाचि, ङ्खाचिगा उङ्चि निङ् मारियाम नुङ् मार्था न्साया॥#लुका १०:३८-३९ 2हाङ्बा येसुगा उलाङ्बे आत्तार नेक्तुबिहोङ् उताम्फोकङा तुङ्बिखुमा मारियाम न्नामाङ् साया॥ उका उनुन्छा लाजारास तुगाब्यामासा॥#युहान्ना १२:३ 3लाजारासका उनाचिङा येसुगाबे खाॽलाहा सालेन हाक्साचु, “हाङ्बा, न्दा न्लुङ्मा तुक्तुगाना याॽमि तुगाब्यामाना॥”
4खा सालेन खेप्सुहोङ् येसुङा लुचि, “लाजारास तुगाब्यामा, ङ्खाॽनिङ्गो आखेरिबे उङ् न्सिमेन्ना॥ उङ् तुगाब्याना गो निङ्वाफुमागा माहिमागा लागि ओम, न्हाङा खा चेॽयाभाङ्माङ् याॽमिचिङा निङ्वाफुमागा उच्यागा माहिमा न्जोग्वाना॥” 5येसुङा मार्था, उका उनुन्छा मारियाम नुङ् लाजारास प्याक उलुङ्मा तुक्तुचि॥ 6ङ्खाॽनिङ्गो लाजारास तुगाब्यामाना चेॽया खेप्सुहोङ् चा येसु हिच लेन सोम्मा न्ना ठोङ्बे वाया॥
7न्हाङा येसुङा उका चेलाचि लुचि, “हाकु कानिङ् फेरि याहुदिया लिङ्खामबे लासिखेइ॥”
8चेलाचिङा उङ् न्लु, “चिन्खुबा, एहिलेन ओन्दाङ् से न्नाबे याहुदि हाङ्गुबाचिङा न्दा लुङ्खाकङा लेम्सिॽमागा न्जोगागाना, फेरि न्दा न्नाबे लाङ्खेॽमाहा कामासिमेकाना?”
9येसुङा लुचि, “इना, लेनबे#११:९ ना “लेनबे एहिच घान्टा” बाङ्ना च्हेन, ए लेनबे एहिच घान्टा ओम (लेॽनि) लेङ्मेॽना कामा योगाना ओम॥ एहिच घान्टा न्सामेहा मेन्नायि? लेॽनि लाम्खुबा याॽमिचि न्लुङ्सिमेनिन्हा, इजाङ्बाङ्निङ् उङ्चिङा कायुङ्लेनगा जोति न्दोक्तुनेस्वा॥ 10ङ्खाॽनिङ्गो सेॽनि लाम्खुबाचि न्लुङ्सिमेहा, इजाङ्बाङ्निङ् ङ्खाचिनुङ् ओम्ना ङ्वामेन॥”
11न्हाङा येसुङा लुचि, “एङ्गा काम्निभाक लाजारास इप्साख्यामा, ङ्खाॽनिङ्गो का हाकु उङ् पोक्से न्नाबे खेमेङ्ना॥”
12चेलाचिङा न्लु, “हाङ्बा, उङ् इप्साख्याना ओमभोङ् गो नुमेॽना॥”
13येसुङा लाजारास स्याना चेॽयागा उतुम्बे लुक्साचि, ङ्खाॽनिङ्गो चेलाचिङा च्हेन उङ् जेप्पामाङ् इप्सामाना से लोप्पि म्मितु॥ 14ङ्खोङ्माङ् येसुङा ङ्खाचि उचुन ङ्ङासुनुङ् लुचि, “लाजारास सेब्यामाना॥ 15न्निङ्गा बिस्वास पुनिभोङ्माङ् का न्नाबे सोलोक ङ्ख्याङान्ना ओम, ङ्खोङ्माङ् का चोन्दास्यामाङ्ना॥ हाकु लामानि, कानिङ् उङ् वान्नेॽनाबे खेइ॥”
16येसुगा चेलाचिबे दिदुमास#११:१६ दिदुमासका तुम्बिला ओम “जोम्ले” ना गिरिक चेॽया ओम, ना हिब्रु चेॽयाबे “थोमास” लुमेॽना॥ बाङ्ना थोमाङा उकाम्निभाकचि लुचि, “लु कानिङ् चा चिन्खुबानुङ् खेइ, न्हाङ् उङ्नुङ् सिइ॥”
येसुङा लाजारास हिङ्मेतुना
17येसु बेथानियाबे तायाब्यानिङ् लाजारास सियापाङ्बे ङ्युक्सुना ना लेन लेक्साब्यामासाना चेॽया उङा था तोक्तु॥ 18बेथानिया यारुसालेमभाङ् सुम किलोमिटारहिङ् माङ्दु साया॥ 19न्नाबे प्याक याहुदि याॽमिचि मार्था नुङ् मारियाम सोकपे सान्त्वाना पिसे न्दायामासा॥ 20येसु तायेॽना चेॽया मार्थाङा खेप्सुहोङ् उङ् येसु तुप्से लाम्बुबे ख्या, ङ्खाॽनिङ्गो मारियाम च्हेन पाङ्बे वायामासा॥ 21येसु तुप्सुहोङ् मार्थाङा लु, “हाङ्बा, न्दा नाबे वायागानिङ्बि आनुन्छा न्स्यान्बि॥ 22ङ्खाॽनिङ्गो हाकुचा का खा चेॽया था वान्ने, न्दा निङ्वाफुमानुङ् इहा नाक्त्वागा, ङ्खा उङा न्दा पिमेकाहा॥”
23येसुङा मार्था लु, “न्नुन्छा फेरि हिङ्मेॽना॥”
24मार्थाङा लु, “ओम हाङ्बा, का था वान्ने, आखेरि लेनबे न्स्याहाचि घाक हिङ्गिलिक न्लेङ्मेॽनिङ् उङ् चा हिङ्गिलिक लेङ्मेॽना॥”
25येसुङा लु, “न्स्याहाचि हिङ्मेखुबा नुङ् हिङ्लुङ् पिखुबा काङान, का बिस्वास चोक्खुबा स्याभोङ्चा हिङ्मेॽना॥ 26न्हाङ् काबे बिस्वास चोङ्मेहोङ् हिङ्खुबाचि फेरि हेॽनिङ्चा न्सिमेनिन्हा, इना न्दा खा चेॽया बिस्वास चोग्वाघा?”
27मार्थाङा लु, “चोग्वाङ्हा हाङ्बा, न्दा कायुङ्लेनबे ताखुबा खिरिस्ट, निङ्वाफुमागा उच्यागान॥”
28खिङ् लुहोङ् मार्था ख्या, न्हाङा उनुन्छा मारियाम काहोङ् स्वाक खाॽला लु, “हाङ्बा तायाब्याना, न्हाङ् उङा न्दा काॽमा सिमेकाना॥” 29खा चेॽया खेप्सुहोङ् सोलोक मारियाम पोगा, न्हाङ् येसु तुप्से ख्या॥ 30ङ्खिङ्बेला सोम्मा येसु तेनबे न्दायाब्यामासान, ङ्खाॽनिङ्गो उङ् मार्थाङा तुप्सोओना ठोङ्बेॽमाङ् वाया॥ 31पाङ्बे सान्त्वाना पिसे न्दायाहा याॽमिचिङा मारियाम मुथिङ्गिरिक पोगाहोङ् लुक्ताख्याना न्निसुहोङ्, ना उनुन्छागा सियापाङ्बे हाप्से ख्याना लोप्पि म्मितु, न्हाङ् ङ्खाचिङा उका ओहेक्साङ्-ओहेक्साङ् ङ्ङिक्तेहेतु॥
32मारियाम येसु वायानाबे तासु, न्हाङ् येसु निसुहोङ् सेमेसाङ् लु, “हाङ्बा, न्दा नाबे वायागानिङ्बि आका आनुन्छा न्स्यान्बि॥”
33ङ्खिङ्बेला मारियाम हाप्मास्या न्हाङ् उङ्नुङ् न्दायाहा याॽमिचि चा ङ्हाप्मास्या॥ ङ्खाचि निसुचिहोङ् येसु चा उनिङ्वाबे ङ्खुम्दिन्नुङ् एता, न्हाङ् तुक्नुङ् उनिङ्वा तुगा॥ 34न्हाङ् छिम्दुचि, “उङ् हेॽने युक्सुक्सुम्गाना?”
ङ्खाचिङा न्लु, “हाङ्बा, आबाघोङ् सो॥”
35न्हाङा येसु हाबा॥ 36खा न्निसुहोङ् न्नाबे न्छुप्साहा याॽमिचि ङ्गाया, “सोयासानुम, लाजारास उङा इखिङ् प्याक उलुङ्मा तुक्तुक्सामाना॥”
37ङ्खाॽनिङ्गो इखिङ् याॽमिचिङा खाॽला ङ्गाया, “मिक्सुरुम्बा उमिक निमेखुबा नामाङ् मेन्नायि? नाङा लाजारास सिमाभाङ् हिङ्मेॽमा ङ्यासुन्बि?”
38न्हाङ् येसु उनिङ्वाबे तुक्नुङ् ङ्खुम्दिन्नुङ् एताहोङ् सियापाङ्बे ख्या॥ न्ना सियापाङ् एको लुङ्ढाङ्बे वाया॥ न्नागा उया एको लुङ्खाकङा एप्तामासा॥ 39येसुङा लुचि, “न्ना लुङ्खाक योरोक लाइयानुम॥”
लाजारासका उना मार्थाङा लु, “हाङ्बा, हाकु गो नाम्मा तारोक्तिना लोप्पि, इजाङ्बाङ्निङ् उङ् सियापाङ्बे युक्साना गो हेन ना लेन लेक्साब्या॥”
40येसुङा मार्था लु, “बिस्वास चोगुगाभोङ् न्दा निङ्वाफुमागा माहिमा निमा तोक्त्वागाना लुन्नुङ्नेन्सान्ना मेन्नायि?”
41न्हाङामाङ् ङ्खाचिङा लुङ्खाक योरोक न्लाइ न्हाङा येसुङा वालोकपोटि सोसाङ् खाॽला काया, “ओ आप्पा, का नुनिङ्वा पिमेॽनेन, इजाङ्बाङ्निङ् न्दा आका चेॽया खेप्सुक्सुगा॥ 42न्दा आका चेॽया साधाइ खेप्स्वाघा बाङ्ना चेॽया का था वान्ने॥ ङ्खाॽनिङ्गो नाबे ङ्येबाहा याॽमिचिङा न्दा का पाक्साङ्गाना ओम बाङ्ना चेॽया बिस्वास न्जोगुनिभोङ् का खा लुॽनेन्ना ओम॥” 43न्हाङा माडा सेम्लाङा खाॽला लुसाङ् का, “ओ लाजारास, पाखा लोन्दा!” 44न्हाङ् न्ना स्याना याॽमि पाखा लोन्दाक्या॥ उका उटुखुरुकपाहाङ् उलाङ् सोम्मा कात्तोरोङा कितामासा॥ येसुङा याॽमिचि लुचि, “कात्तोरो फुक्साब्यानुम्घोङ् उङ् खेॽमा पियानुम॥”
येसु सिमाना तार्तुम्बि
(मात्ति २६:१-५; मार्कुस १४:१-२; लुका २२:१-२)
45येसुङा चोगुहा काम न्निसुहोङ् मारियामगाबे न्दायाहा प्याक याॽमिचिङा येसुबे बिस्वास न्जोगु॥ 46ङ्खाॽनिङ्गो इखिङ् च्हेन फारिसिचिगाबे ङ्ख्याहोङ् येसुङा चोगुहा कामगा उतुम्बे ङ्योक्मेतुचि॥ 47न्हाङा खाङ्खाङ् हाङ्खुबाचि नुङ् फारिसिचिङा याहुदि माछुम्मागा सादास्याचि ङ्गाचिहोङ् न्लुचि, “हाकु कानिङ् इ चोगि? सोयानुम, न्ना याॽमिङा गो प्याक आच्चाम्माहा काम चोक्मासिमेॽना॥ 48ना याॽमि खाॽला चोक्मा पिनेसुम भोङ् घाक याॽमिचिङा उङ् बिस्वास न्जोग्वा, न्हाङा रोमि काङ्बाचि न्दामेहोङ् एङ्गा निङ्वाफुमापाङ् ङ्होराहाक्स्वा न्हाङ् कानिङ् याहुदिचि चा नास चोङ्मेहा॥”
49ङ्खाॽनिङ्गो ङ्खाचिबे काइयाफा बाङ्ना एको याॽमि वाया॥ उङ् च्हेन ङ्खिङ्बेलाक्ना मा-हाङ्खुबा साया॥ उङा लुचि, “न्निङ्दा इहाचा न्निस्वाम्गान्हा॥ 50एको जाति घाक नास लेङ्मा हाक्निङ्गो घाक याॽमिगा लागि एको सिमामाङ् उचुन लेङ्मेहा बाङ्ना चेॽया न्निङ्दा था मान्ना?”
51खा चेॽया उङा आफाइ कायाना म्मेतासान, ङ्खाॽनिङ्गो उङ् खिङ्बेलाक्ना खाङ्खाङ् हाङ्खुबा सायानाङा येसु याहुदि जातिचिगा लागि सिमेॽना बाङ्ना चेॽयागा आगाम्बानि चोगुक्सा॥ 52येसु उङ्चिगा लागि से मेन्ना, ङ्खाॽनिङ्गो ङ्हिसाख्याहा निङ्वाफुमागा सान्तानचि एकठोङ्बे छुम्मागा लागि येसु सिमेॽना कायामासा॥ 53न्ना लेन नाहाङ्तो याहुदि हाङ्गुम्बाचिङा येसु सिमागा माउका सोॽमा न्दारोक्तु॥
54ङ्खोङ्माङ् येसु फेरि याहुदि याॽमिचिगा उलुम्बे घाकङा था न्दोक्तुनुङ्गा न्लामान, ङ्खाॽनिङ्गो इसा चा मेॽनिङ्ना सुन्नेना ठोङ्गा उयुम्बेॽना एफाराइम साहारबे ख्या, न्हाङ् चेलाचिनुङ् न्नाबेॽमाङ् वाया॥
55याहुदिचिगा फोङ्होक्नाम ताहेक्सासा॥ ङ्खोङ्माङ् तेन-तेनभाङ् प्याक याॽमिचि आफाइ-आफाइ सुद्दा चोक्मागा होक्नाम सुरु लेङ्मा हाक्निङ् ओन्दाङ् यारुसालेमबे न्दाया॥ 56न्हाङा ङ्खाचिङा येसु तामेॽनायेमभोङ् लाम्बु न्सोनेसुक्सा॥ ङ्खाचि निङ्वाफुमापाङ्बे न्छुप्सानिङ् उङ्चि-उङ्चि खाॽला छिम्खुसा न्जाया, “न्निङ्दा इमिन एतिॽवाघा, इना उङ् होक्नामबे तामेॽना?” 57खाङ्खाङ् हाङ्खुबाचि नुङ् फारिसिचिङा येसु लाप्मा म्मितुक्सा॥ ङ्खोङ्माङ् “न्निङ्दा इसाङा येसु नाबे वेॽनाभोङ् था तोक्त्वाम्गा, न्ना याॽमि कानिङ् योक्मेसे तानि” भोङ् आग्गे म्बिक्साचि॥
Currently Selected:
युहान्ना 11: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
