युहान्ना 6
6
येसुङा फा माहोम्बोक याॽमिचि चामेतुचिहा
(मात्ति १४:१३-२१; मार्कुस ६:३०-४४; लुका ९:१०-१७)
1मिहेक्साङ् येसु गालिल ताल काक्तेहेतुहोङ् योप्पारिक ख्या॥ (न्ना ताल तिबेरियासका ताल चा लुमेॽना॥) 2न्हाङ् प्याक याॽमिचि उका हेक्साङ् लान्जोगा, इजाङ्बाङ्निङ् उङा तुखाबाङ्चि आच्चाम्मा तारिकाङा नुमेतुचिहा ङ्खाचिङा न्निसुक्सा॥ 3न्हाङ् येसु कोङ्गुबे थाङाहोङ् चेलाचिनुङ् युङा॥ 4ङ्खिङ्बेला याहुदिचिगा फोङ्होक्नाम ताहेक्सासा॥
5येसुङा यो-खे सोचिनिङ् प्याक याॽमिचि उङ् पोटि न्दायेतासाहा निसुचिहोङ् फिलिप खाॽला लु, “खा याॽमिचि चामेॽमागा कानिङ् हेॽनाहाङ् चालेप्पा इनुराम?” 6खा चेॽया फिलिपका उनिङ्वा खुमागा येसुङा छिम्दुक्सा, इजाङ्बाङ्निङ् उङा इहा चोघेक्सुक्सा, ङ्खा चेॽया उङा था वाया॥
7फिलिपङा लु, “नाबे ङ्ङोॽयाहा घाक याॽमिचि मिमिक से चालेप्पा पिम्चिम्भोङ्चा हिच होम्बोक युप्पा याङ्ङा चा ङ्खोत्वान्चिन्हा॥”
8उका चेलाचि माध्येबे सिमोन पात्तुरुसका उनुन्छा आन्दिरियासङा लु, 9“नाबे एको बाबुनुङ् फा ओटा चिचामागा चालेप्पा नुङ् हिच्चि नासाचि ङ्वान्नेहा, ङ्खाॽनिङ्गो खिङाहा याॽमिचि ङ्खिङ्नुङ्ङा इखोतुचि?”
10येसुङा उका चेलाचि लुचि, “खा याॽमिचि युङ्मेतानुम्चिम॥” न्नाबे प्याक याक्साङ् पोगाना फिम्ना चाउर वाया, न्हाङा घाक याॽमिचि चाउरबे ङ्युङा॥ न्नाबे बाबुचि से फा माहोम्बोक हिङ् ङ्वाया॥ 11न्हाङा येसुङा ङ्खा फा ओटा चालेप्पा उमुकपे याङुचिहोङ् निङ्वाफुमा नुनिङ्वा पि, न्हाङ् न्नाबे ङ्युङाहा याॽमिचिङा न्जोनिभोङ् उका चेलाचि हाम्मेतुचि॥ न्हाङा नासाचि चा ङ्खाॽलामाङ् हाम्मेतुचि॥ घाक याॽमिचिङा फोक खानुङ् न्जो॥ 12ङ्खाचि खासुचिहोङ् येसुङा चेलाचि लुचि, “ङोन्दाहा टुक्रा कोबानुम, मिॽयाङ् चा खेरा ङ्खेॽनिन्नि॥” 13चाखुबाचिङा ङ्ओन्दुहा चिचामागा चालेप्पागा टुक्रा ङ्गोबुनिङ् एहिच डालो इप्तुचि॥
14खाॽलाहा साक्तिसालि काम न्निसुहोङ् याॽमिचि ङ्गाया, “जेप्पा कायुङ्लेनबे तामेॽनाभोङ् कानिङ् आसा चोगुम्ना निङ्वाफुमाभाङ् चेक्खुबा उङ्माङ् ओम॥” 15हाकु याॽमिचिङा जोबारजोस्ति का हाङ् चोघेक्साहा बाङ्ना चेॽया येसुङा था तोक्तुहोङ् फेरि उङ् ओतोखुमाक कोङ्गुपोटि ख्या॥
येसु माङ्च्वा छोङ्बे लामाना
(मात्ति १४:२२-३३; मार्कुस ६:४५-५२)
16नाम आयाहोङ् येसुगा चेलाचि तालगा उलाप्पे ङ्ङुक्सा॥ 17ङ्खिङ्बेला कुइम लेक्साब्यामासा, न्हाङ् खिङ् सोम्मा चा येसु ङ्खाचि ङ्वायानाबे न्दायामासान॥ न्हाङ् ङ्खाचि डुङ्गाबे न्थाङाहोङ् काफार्नाहुम पोटि लान्जोगा॥ 18ङ्खिङ्बेला माडा हिॽवा फेनानाङा सामुन्दाराबे छाल पोक्मा तारोक्तु॥ 19येसुगा चेलाचि डुङ्गा खियाचोक्साङ् फाया किलोमिटारहिङ् माङ्दु न्दासुक्सानिङ् येसु माङ्च्वा छोङ्बे लाम्साङ् उङ्चि पोटि तायेतासाना चेलाचिङा न्निसु, न्हाङ् ङ्खाचि तुक्नुङ् ङ्गिसिता॥ 20ङ्खाॽनिङ्गो येसुङा लुचि, “काङान, ङ्गिसितानिन!” 21ङ्खाचिङा येसु चोन्सिसाङ् डुङ्गाबे न्थाङ्मेतु, न्हाङ् सोलोक ङ्खाचि ङ्खेॽमास्याना ठोङ्बे डुङ्गा तासु॥
22हेक्साङ्ना लेन तालगा योप्पारिक ङ्वायाहा याॽमिचिङा न्नाबे एको से डुङ्गा ङ्खेतुहोङ् चेलाचि ङ्ख्याहा न्निसुचि॥ न्हाङ् ङ्खाचिङा येसु च्हेन चेलाचिनुङ् ङ्ख्यान्ना चेॽया था न्दोक्तु॥ 23न्हाङा येसुङा निङ्वाफुमा नुनिङ्वा पिहोङ् याॽमिचि चालेप्पा चामेतुचिना ठोङ्गा उयुम्बे तिबेरियास साहारभाङ् हेकोहा डुङ्गाचि चा न्दायाब्या॥ 24ङ्खा याॽमिचिङा येसु नुङ् उका चेलाचि न्नाबे न्निसुन्चिनिन्होङ् डुङ्गाचिबे न्थाङा न्हाङ् योक्साङ् मिना साहार काफार्नाहुम पोटि ङ्ख्या॥
येसु हिङ्लुङ् पिखुबा चालेप्पा
25ङ्खाचिङा येसु तालगा योप्पारिक न्दुप्सुहोङ् न्छिम्दु, “राब्बि, न्दा नाबे हेॽनिङ् तायागाना?”
26येसुङा ङ्खाचि लुचि, “जेप्पा का न्निङ्दा लुमेॽनेनिन, न्निङ्दा चिङ्गो निसुम्गाहोङ् मेन्ना, ङ्खाॽनिङ्गो खासिगानुङ् चालेप्पा चामा तोक्तुम्गाहोङ् का योक्मासिम्मेकाहा॥ 27चाम्योङ्बा लोॽवा नास लेङ्खेखुबा चेॽयाबे निङ्वा म्बियानुम्निन, ङ्खाॽनिङ्गो हेॽनिङ्चा नास मेलेङ्खुबा चेॽयाबे निङ्वा पियानुम, ङ्खा याॽमिगा उच्याङा न्निङ्दा पिइवाघा॥ इजाङ्बाङ्निङ् निङ्वाफुमा पाङा खिङ्गा लागि उङ् पाक्सुना ओम॥”
28ङ्खाचिङा न्छिम्दु, “ङ्खाॽलाभोङ् निङ्वाफुमाङा मितुहा काम चोक्मागा कानिङ् इ चोक्मासिङान?”
29येसुङा ङ्खाचि लुचि, “निङ्वाफुमाङा पाक्सुना बिस्वास चोगानुम, नामाङ् निङ्वाफुमाङा मितुना काम ओम॥”
30न्हाङामाङ् ङ्खाचिङा न्लु, “न्दा इहा चिङ्गो सोॽमेमेकाहोङ् कानिङ् बिस्वास चोक्नेनिन? न्दा इमिन्हा काम चोग्वाघा? 31आनिङ्गा पा-पुम्चिङा इसा चा मेॽनिङ्ना सुन्नेना ठोङ्बे मान्ना न्जो॥ धार्मासाप्लाबे खाॽला छेप्तामा, ‘चामागा उङा ङ्खाचि वालोकपाहाङ् चालेप्पा पिचि॥’”#पारास्थान १६:४,१५; छेम ७८:२४
32येसुङा ङ्खाचि लुचि, “जेप्पा का न्निङ्दा लुमेॽनेनिन, न्निङ्दा वालोकपाहाङ् चालेप्पा पिखुबा मोसा मेन्ना, ङ्खाॽनिङ्गो वालोकपाहाङ् जेप्पागा चालेप्पा पिखुबा निङ्वाफुमा आप्पा ओम॥ 33इजाङ्बाङ्निङ् इसा वालोकपाहाङ् उङ्मेहोङ् कायुङ्लेनबेॽहा याॽमिचि हिङ्लुङ् पिवाचि, न्नामाङ् निङ्वाफुमागा न्ना चालेप्पा ओम॥”
34ङ्खाचिङा न्लु, “चिन्खुबा, न्ना चालेप्पा साधाइगा लागि कानिङ् पिया॥”
35येसुङा ङ्खाचि लुचि, “हिङ्लुङ् पिखुबा चालेप्पा कामाङ् ओम्ङान॥ काबे ताखुबा साॽङा न्सिमेन, न्हाङ् का बिस्वास चोक्खुबा हेॽनिङ्चा वेॽमा न्सिमेन्ना॥ 36ङ्खाॽनिङ्गो का न्निङ्दा लुन्नुङ्नेनिन, न्निङ्दा का निसामागा ङ्खोङ्चा बिस्वास न्जोङ्मेकान्हा॥ 37आप्पाङा पियाङ्हा घाक काबे न्दामे, न्हाङ् काबे ताखुबाचि का हेॽनिङ्चा न्नासिॽवान्चिङान्हा॥ 38का आनिङ्वा लोॽवा चोक्से वालोकपाहाङ् उक्साङ्ना मेन्ना, ङ्खाॽनिङ्गो का पाङ्खुबागा उनिङ्वा पुरा चोक्से उक्साङ्ना ओम॥ 39का पाङ्खुबागा उनिङ्वा ना ओम, उङा का पियाङ्हाचिबे एको चा म्मासिन्चिङान्नि, ङ्खाॽनिङ्गो आखेरि लेनबे ङ्खाचि हिङ्गिलिक लेङ्मेतुङ्चिङ्नि॥ 40इजाङ्बाङ्निङ् आका आप्पागा उनिङ्वा ना ओम, उच्या सोखुबा नुङ् उङ्बे बिस्वास चोक्खुबा घाकङा हेॽनिङ्चा मेन्सिमाना हिङ्लुङ् न्दोक्तुनि, न्हाङ् आखेरि लेनबे ङ्खाचि का हिङ्गिलिक लेङ्मेत्वाङ्चिङाहा॥”
41याहुदिचि येसुगा बिरुद्दाबे गान्गान कामा न्दारोक्तु, इजाङ्बाङ्निङ् येसुङा “वालोकपाहाङ् उक्साना चालेप्पा कामाङ् ओम्ङान” लुक्साचि॥ 42ङ्खाचिङा ङ्गाया, “इना ना याॽमि न्ना योसेफका उच्या येसु मेन्नायि? नागा उप्पा-उमा कानिङ् चिना न्जोग्वाम्चिम्निन्हायि? इमिन नाङा ‘का वालोकपाहाङ् उक्साङ्ना’ भोङ् कामेॽना?”
43येसुङा ङ्खाचि पोलोवा पिचि, “आका बिरुद्दाबे न्निङ्दा-न्निङ्दा गान्गान न्जोगानिन॥ 44का पाङ्खुबा आप्पाङा काबे तामाना निङ्वा म्बिन्चिनभोङ् इसा चा काबे तामा ङ्यामेनिन्हा, काबे ताखुबाचि च्हेन आखेरि लेनबे का हिङ्गिलिक लेङ्मेत्वाङ्चिङाहा॥ 45निङ्वाफुमाभाङ् चेक्खुबाचिङा धार्मासाप्लाबे खाॽला न्छेप्तुक्सु, ‘निङ्वाफुमाङामाङ् घाक याॽमिचि चिन्द्वाचिहा॥’ खाॽला निङ्वाफुमा पागा चेॽया खेम्खुबा नुङ् चिन्खुबा घाक काबे न्दामेहा॥#यासाइया ५४:१३ 46निङ्वाफुमा पा इसाङा चा न्निसुक्सुन्ना॥ निङ्वाफुमाभाङ् ताखुबाङा से उङ् निसुक्सुना॥
47 “जेप्पा का न्निङ्दा लुमेॽनेनिन, बिस्वास चोक्खुबानुङ् हेॽनिङ्चा मेन्सिमाना हिङ्लुङ् वान्नेॽना॥ 48हिङ्लुङ् पिखुबा चालेप्पा कामाङ् ओम्ङान॥ 49न्निङ्गा पा-पुम्चिङा इसा चा मेॽनिङ्ना सुन्नेना ठोङ्बे मान्ना न्जो ङ्खोङ्चा न्स्याख्या॥ 50ङ्खाॽनिङ्गो वालोकपाहाङ् उक्साना चालेप्पा नामाङ् ओम, इसाङा ना च्वा न्ना हेॽनिङ्चा न्सिमेन्ना॥ 51वालोकपाहाङ् उक्साना हिङ्गिलिक्ना चालेप्पा कामाङ् ओम्ङान॥ ना चालेप्पा चाखुबा साधाइ हिङ्नुङ्मेॽना॥ का पिमेॽनेनिन्हा न्ना चालेप्पा च्हेन आका सालुङ् ओम॥ का ना आका सालुङ् कायुङ्लेनबेॽहा याॽमिचिङा हिङ्लुङ् न्दोक्तुनिभोङ् पिवाङ्चिङाहा॥”
52खा चेॽया ङ्खेप्सुहोङ् याहुदिचि खाॽला लुखुसा न्जाया, “ना याॽमिङा इमिन कानिङ् उका सालुङ् चामेॽमा यामेहा?”
53येसुङा ङ्खाचि लुचि, “जेप्पा का न्निङ्दा लुमेॽनेनिन, न्निङ्दा याॽमिगा उच्यागा सालुङ् न्जाम्गान न्हाङ् उका हेलि ङ्ङुङुम्गान भोङ् न्निङ्दाबे हिङ्लुङ् म्मामेन्ना॥ 54ङ्खाॽनिङ्गो आका सालुङ् चाखुबा न्हाङ् आहेलि उङ्खुबानुङ् च्हेन हेॽनिङ्चा मेन्सिमाना हिङ्लुङ् वामे॥ न्हाङा आखेरि लेनबे का उङ् स्यानाभाङ् हिङ्गिलिक लेङ्मेत्वाङ्ना॥ 55इजाङ्बाङ्निङ् आका सालुङ् जेप्पागा चाम्योङ्बा ओम, न्हाङ् आहेलि जेप्पागा उङ्माहा थोक ओम॥ 56आका सालुङ् चाखुबा नुङ् आहेलि उङ्खुबा च्हेन काबे वामे न्हाङ् का उङ्बे वामेङ्ना॥ 57हिङ्गिलिक्ना निङ्वाफुमा पाङा का पाक्साङ् न्हाङ् का उका कारानङा हिङ्मेङ्, ङ्खाॽलामाङ् आका सालुङ् चाखुबा चा आका कारानङा हिङ्मेॽना॥ 58वालोकपाहाङ् उक्साना ना चालेप्पा न्निङ्गा पुर्खाचिङा न्जोहा चालेप्पा लोॽवाना मेन्ना॥ ङ्खाचिङा ङ्खा न्जो न्हाङ् हेक्साङ् न्स्याख्या, ङ्खाॽनिङ्गो ना चालेप्पा चाखुबा च्हेन साधाइ हिङ्मेॽना॥”
59येसुङा खा चेॽया काफार्नाहुम बेॽना छुम्पाङ्बे चिन्दुचिनिङ् लुक्साचि॥
हेॽनिङ्चा मेन्सिमाना हिङ्लुङ्गा उतुम्बे
60खा चेॽया ङ्खेप्सुहोङ् येसुगा चेलाचिबे प्याकङा खाॽला ङ्गाया, “खा चेॽया गो आमा छाक्हा, खा इसाङा खेम्मा यास्वाहा?”
61ङ्खाॽनिङ्गो येसुङा खा चेॽयागा उतुम्बे उका चेलाचि गान्गान न्जोगाहा था तोक्तुचिहोङ् ङ्खाचि लुचि, “इना खा चेॽयाङा न्निङ्दा आप्ठेरो आइमिघा? 62ङ्खाॽलाभोङ् याॽमिगा उच्या ओन्दाङ् उङ् हेॽने वाया न्नाबे लाङ्खेॽमास्याना निसुम्गाभोङ् लो इ चोगिॽवाघा? 63हिङ्लुङ् पिखुबा च्हेन निङ्वाफुमागा आत्मामाङ् ओम॥ खा काम गो याॽमिगा साक्तिङा लेङ्मायि मेयामाहा चेॽया ओम॥ का न्निङ्दा लुॽनेनिनाहा चेॽया च्हेन आत्मा नुङ् हिङ्लुङ् ओम॥ 64ङ्खाॽनिङ्गो न्निङ्दा इखिङ्ङा का बिस्वास न्जोङ्मेकान॥” (येसुङा उङ् बिस्वास मेन्जोक्खुबाचि नुङ् उङ् धोका पिखुबा इसा-इसा ओम्चि बाङ्ना चेॽया ओन्दाङ् नाहाङ्तोमाङ् था वाया॥) 65न्हाङ् उङा लुचि, “ङ्खोङ्माङ् का न्निङ्दा खाॽला लुॽनेनिन्हा ओम, आप्पाङा काबे तामाना निङ्वा मेम्बिॽले सोम्मा इसा चा काबे तामा ङ्यामेनिन्हा॥”
66ङ्खिङ्बेला येसुगा चेलाचिबे प्याकङा येसुगा हेक्साङ् लाम्मा न्लेप्ति॥
67येसुङा एहिच चेलाचि छिम्दुचि, “इना न्निङ्दा चा का नाॽनामेकाहोङ् खेइवाघायि?”
68सिमोन पात्तुरुसङा लु, “ओ हाङ्बा, कानिङ् इसागाबे खेइङ्? न्दानुङ् से हेॽनिङ्चा मेन्सिमाना हिङ्लुङ् पिखुबा चेॽया वान्ने॥#मात्ति १६:१६; मार्कुस ८:२९; लुका ९:२० 69न्हाङा न्दामाङ् निङ्वाफुमाभाङ् तायागाना पाबित्तारा याॽमि ओम्गान बाङ्ना चेॽया था तोक्तुम्ङाहोङ् न्दा बिस्वास चोङ्नुङ्नेनिन॥”
70येसुङा ङ्खाचि लुचि, “इना कामाङ् न्निङ्दा एहिच जाना सेक्नेनिन्हा मेन्नायि? ङ्खाॽनिङ्गो न्निङ्दा माध्येबे एको च्हेन दियाबालासका याॽमि ओम॥” 71येसुङा खा चेॽया सिमोन इस्कारियोतका उच्या याहुदागा उतुम्बे लुक्साचि, इजाङ्बाङ्निङ् न्ना एहिच चेलाबे एको सायाहोङ्चा उङा येसु धोका पिहेक्सुसा॥
Currently Selected:
युहान्ना 6: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
