युहान्ना 7
7
येसु नुङ् उनुन्छाचि
1न्हाङा येसु गालिल लिङ्खामबेॽमाङ् कोतामासा, ङ्खाॽनिङ्गो याहुदिया लिङ्खामबे खेॽमा म्मितान, इजाङ्बाङ्निङ् याहुदि हाङ्गुम्बाचिङा उङ् सिमागा माउका न्सोनेसुक्सा॥ 2ङ्खिङ्बेला याहुदिचिगा गोठ् चोक्माहोङ् मानाचोक्माना होक्नाम ताहेक्सासा॥#लेबि २३:३४; ब्यावास्था १६:१३ 3न्हाङा येसुगा उनुन्छाचिङा उङ् खाॽला न्लु, “ना ठोङ् नाओघोङ् याहुदियाबे ख्या, न्हाङ् न्दा चोक्मासिमेकाहा काम ङ्गा चेलाचिङा चा न्निसुनि॥ 4माडा निङ्ला तोक्मा मिखुबा याॽमिङा उका काम इसाङा चा था मेन्दोक्मागा स्वाक-स्वाक न्जोग्वान्हा॥ ङ्खाॽलामाङ् न्दा चा आच्चाम्माहा काम चोक्मासिमेका, खा काम कायुङ्लेनबे घाकङा था न्दोक्तुनि॥” 5इजाङ्बाङ्निङ् उनुन्छाचिङा चा उङ् बिस्वास न्जोगुनिन॥
6येसुङा ङ्खाचि पोलोवा पिचि, “आका खेॽमाना बेला हाकुचा न्दायामान्ना॥ ङ्खाॽनिङ्गो न्निङ्गा लागि गो इबेलाक होङ्चा ठिक्ना॥ 7कायुङ्लेनबेॽहा याॽमिचिङा न्निङ्दा इसिॽमा ङ्यासिॽवागान, ङ्खाॽनिङ्गो का च्हेन इसिमेहा, इजाङ्बाङ्निङ् ङ्खाचिङा न्जोगुहा काम इसिॽहा भोङ् का सोॽमेत्वाङ्चिङ्॥ 8न्निङ्दा होक्नामबे ख्यानि, का च्हेन लोप ङ्खेमेङान्ना, इजाङ्बाङ्निङ् आका बेला न्दायामान्ना॥” 9खाॽला लुचिहोङ् उङ् गालिलबेॽमाङ् वाया॥
गोठ् चोक्माहोङ् मानाचोक्माना होक्नाम
10ङ्खाॽनिङ्गो उका उनुन्छाचि होक्नामबे ङ्खेब्याहोङ् इसाङा चा था मेन्दोक्ले येसु चा ख्या॥ 11ङ्खिङ्बेला होक्नामबे याहुदि हाङ्गुम्बाचिङा उङ् ङ्योक्मास्या, न्हाङ् “उङ् हेॽने वेॽना?” कासाङ् न्छिम्मास्या॥ 12प्याक याॽमिचिगा उलुम्बे येसुगा उतुम्बे चेॽया लेङ्मास्या॥ इखिङ्ङा ङ्गाया, “न्ना याॽमि उचुन्ना॥” ङ्खाॽनिङ्गो हेकोहाचिङा ङ्गाया, “मेन्ना, न्नाङा याॽमिचि लेम्चामा सिमेॽना॥” 13ङ्खाॽनिङ्गो याहुदि हाङ्गुम्बाचिनुङ् ङ्गिसिताहोङ् इसाङा चा येसुगा उतुम्बे घाकङा था न्दोक्तुनुङ् चेक्माना आट् चोक्मा ङ्यासानिन॥
14होक्नामगा उचाबेलेक लेक्सामासानिङ् येसु निङ्वाफुमापाङ्बे ख्या, न्हाङ् याॽमिचि चिन्मा तारोक्तुचि॥ 15याहुदि हाङ्गुम्बाचिङा आच्चाम्मा एसाङ् खाॽला ङ्गाया, “ना याॽमि मेन्जिन्ले इमिन खिङ् प्याक निखुबा लेक्साना?”
16येसुङा ङ्खाचि पोलोवा पिचि, “का चिन्नेनिन्हा चेॽया आका मेनाहा, ङ्खाॽनिङ्गो का पाङ्खुबागा ओम॥ 17निङ्वाफुमागा उनिङ्वा लोॽवा काम चोक्मा योक्खुबाचिङा च्हेन का चिन्नेनिन्हा खा चेॽया निङ्वाफुमाभाङ् तायाहा ओम्येम का आफाइभाङ् येम, ङ्खा था न्दोक्त्वाहा॥ 18इसाङा उका उनिङ्वाबेॽहा चेॽया चेक्त्वा, न्नाङा उका आदार योग्वा, ङ्खाॽनिङ्गो इसाङा उङ् पाङ्खुबागा आदार योग्वा, न्ना च्हेन नुराङ्बा याॽमि ओम॥ न्हाङा उङ्बे इहाचा आप्दिक एम्माहा चेॽया म्मामेन्हा॥ 19इना मोसाङा न्निङ्दा ब्यावास्था म्बिइमिगान्हायि? ङ्खाॽनिङ्गो न्निङ्दा इसाङा चा ङ्खा ब्यावास्थाबेॽहा चेॽया ङ्ङेन्वाम्गान॥ न्निङ्दा इजाङ् का सिमा योङ्मेकाहा?”
20ङ्खा याॽमिचिङा येसु न्लु, “न्दा इसिॽना मुइङा तेप्सिॽयामागाना, इसाङा न्दा सिमा योगागाना?”
21येसुङा पोलोवा पिचि, “आराम चोक्माना लेन का एको आच्चाम्माना काम चोगुङ्निङ्, न्निङ्दा घाक आच्चाम्मा एतिगा॥ 22हाकु सोयानुम, मोसाङा न्निङ्दा खाताना चोगानि बाङ्ना आग्गे पिइगा॥ (जेप्पामाङ् ओमभोङ् खा काम मोसाङा तारोक्तुहा मेन, ङ्खाॽनिङ्गो न्निङ्गा पा-पुम्चिङा न्दारोक्तुहा ओम), ङ्खोङ्चा आराम चोक्माना लेनबे न्निङ् च्याचि खाताना चोक्तुबिवाम्चिम्गा॥#उथुक १७:१०; लेबि १२:३ 23न्निङ्दा मोसागा ब्यावास्था पालाना चोक्मागा आराम चोक्माना लेनबे खाताना चोग्वाम्चिम्घा भोङ्, का च्हेन आराम चोक्माना लेनबे एको याॽमिगा घाक सालुङ् नुमेतुङ्निङ् इजाङ् न्निङ् लोक खोमेॽना?#युहान्ना ५:९ 24याॽमिगा उनाचिक सोसाङ् मेन्ना, ङ्खाॽनिङ्गो उचुन निरिक चोगानुम॥”
मुक्ति पिखुबा हाङ्
25ङ्खिङ्बेला यारुसालेमबेॽहा एकोहिप्पाङ् याॽमिचिङा ङ्गाया, “ङ्खाचिङा सिमागा ङ्योक्मासिमेॽना याॽमि ना मेन्नायि? 26सोयानुम, ना गो मेङ्गिसिॽले चेक्मासिमेॽना, ङ्खाॽनिङ्गो ङ्खाचिङा इच्चा न्ल्वानिन्ना! जेप्पा एङ्गा हाङ्गुम्बाचिङा चा नामाङ् खिरिस्ट ओम ले ङ्ङेतेहेतुनालेम्बा? 27ङ्खाॽनिङ्गो ना याॽमि हेॽनाहाङ् तायाना कानिङ् था वान्ने॥ खिरिस्ट तामेॽनिङ् गो उङ् हेॽनाहाङ् तायाना बाङ्ना चेॽया इसाङा चा था न्दोक्त्वानिन॥”
28येसुङा निङ्वाफुमापाङ्बे चिन्मास्यानिङ् माडा सेम्लाङा खाॽला लुचि, “इना न्निङ्दा का चिनाचोङ्मेकाहा? का हेॽनाहाङ् तायाङ्ना ओम, इना ङ्खा जेप्पा न्निङ्दा था वेॽना? का आफाइ आनिङ्वाङा तायाङ्ना मेन्ना, का पाङ्खुबा च्हेन सात्याना॥ न्निङ्दा उङ् चिनान्जोग्वाम्गान, 29ङ्खाॽनिङ्गो का उङ् चिनाचोग्वाङ्ना, इजाङ्बाङ्निङ् का उङ्भाङ्माङ् तायाङ्ना ओम, न्हाङ् उङामाङ् का पाक्साङ्ना ओम॥”
30खा चेॽया ङ्खेप्सुहोङ् ङ्खाचिङा येसु लाप्मागा न्जोगु, ङ्खाॽनिङ्गो इसाङा चा उङ्चि मुक ङ्ङेन्दुनिन, इजाङ्बाङ्निङ् उका बेला हाकुचा न्दायामासान॥ 31ङ्खोङ्चा न्नाबे ङ्वायाहा याॽमिचिबे प्याकङा उङ्बे बिस्वास न्जोगु॥ न्हाङा खाॽला ङ्गाया, “इना खिरिस्ट तामेहोङ्, उङा ना याॽमिङा चोगुहा हाक्निङ् प्याक आच्चाम्माहा काम चोग्वाहा लोप्पि?”
येसु लाप्मागा न्जोगुना
32येसुगा उतुम्बे प्याक याॽमिचिगा उलुम्बे साला लेङ्मास्याहा फारिसिचिङा ङ्खेप्सु॥ न्हाङा ङ्खा फारिसिचि नुङ् खाङ्खाङ् हाङ्खुबाचिङा उङ् लाप्मागा निङ्वाफुमापाङ् कुखुबा पालेचि म्बाक्सुचि॥
33येसुङा ङ्खाचि लुचि, “का एहिलेनगा लागि न्निङ्दानुङ् वेॽङा, न्हाङा का पाङ्खुबागाबे लाङ्खेमेङ्ना॥ 34न्हाङा न्निङ्दा का योङ्मेका ङ्खाॽनिङ्गो न्दुम्मेकान, न्हाङ् का ख्याङ्ना ठोङ्बे न्निङ्दा तामा चा ङ्यासिॽवागान॥”
35खा चेॽया ङ्खेप्सुहोङ् याहुदिचि उङ्चि-उङ्चि खाॽला ङ्गाया, “ना हेॽने खेक्साहोङ् कानिङ् न्दुम्मेन्ना? इना नाङा गिरिकचिगा उलुम्बे ङ्हिसानेसाहा याहुदिचिगाबे खेमेहोङ् गिरिक जातिगा याॽमिचि चिन्मा मितुक्सुचिहा इ? 36उङा कायाना ‘न्निङ्दा का योङ्मेका, ङ्खाॽनिङ्गो न्दुम्मेकान, न्हाङ् का ख्याङ्नाबे न्निङ्दा तामा चा ङ्यासिॽवागान’ ना बाङ्ना इना ओम?”
हिङ्लुङ् पिखुबा माङ्च्वा
37हाकु होक्नामगा हेक्साङ्ना मुक्खे लेनबे येबाहोङ् येसुङा माडा सेम्लाङा खाॽला लुचि, “वेॽमा सिखुबा काबे तानि, न्हाङ् उङुनि॥#लेबि २३:३६ 38इसाङा का बिस्वास चोङ्मेङ्, न्ना याॽमिगा उनिङ्वा होङ्भाङ् धार्मासाप्लाङा कायाना लोॽवा हिङ्लुङ् पिखुबा होङ्माचि न्लोम्भोङ्मेहा॥”#इजिकिएल ४७:१; जाकारिया १४:८ 39खा चेॽया येसुङा उङ्बे बिस्वास चोक्खुबाचिङा न्दोक्तेहेक्सुक्साना पाबित्तारा आत्मागा उतुम्बे लुक्साचि॥ न्ना पाबित्तारा आत्मा खिङ् सोम्मा म्बियामासानिन, इजाङ्बाङ्निङ् ङ्खिङ्बेला सोम्मा येसुगा माहिमा न्लेक्सामासान॥
याॽमिचि म्फोक्साहा
40खा चेॽया ङ्खेप्सुहोङ् न्नाबेॽहा इखिङ् याॽमिङा खाॽला ङ्गाया, “ना याॽमि गो जेप्पा कानिङ् लाम्बु सोम्ना निङ्वाफुमाभाङ् चेक्खुबामाङ् ओम॥” 41हेकोहाचिङा ङ्गाया, “जेप्पा उङ् गो खिरिस्ट ओम॥” ङ्खाॽनिङ्गो इखिङ्ङा ङ्गाया, “खा गो लेङ्मायि ङ्यामेन्हा, इजाङ्बाङ्निङ् खिरिस्ट गालिलभाङ् न्दामेन्ना॥ 42इना खिरिस्ट हाङ् दाउदका छोङ्भाङ् नुङ् दाउदका तेन बेथ्लेहेमभाङ् तामेॽनाभोङ् धार्मासाप्लाबे न्छेप्तामान्हायि?”#७:४२ प्याक याहुदिचिङा येसुगा वाम बेथ्लेहेमबे लेक्साना ओमभोङ् था न्दोक्तुनिन॥ उङ्चिङा येसु पुसाना ठोङ् गालिलबे वाम लेक्साना म्मितु॥ २ सामुएल ७:१२; मिका ५:२ 43खाॽला येसुगा उतुम्बे उङ्चि निङ्वा न्दोङान्होङ् याॽमिचि म्फोक्सा॥ 44ङ्खाचिबे इखिङ्ङा उङ् लाप्मागा न्जोगु, ङ्खाॽनिङ्गो इसाङा चा उङ् छोङ्बे मुक एम्मा ङ्यासुनिन॥
याहुदि हाङ्गुम्बाचिगा आबिस्वास
45येसु लाप्से म्बाक्सुचिहा निङ्वाफुमापाङ् कुखुबा पालेचि खाङ्खाङ् हाङ्खुबाचि नुङ् फारिसिचिगाबे ङ्खाॽला न्लासाराया॥ न्हाङा ङ्खाचिङा न्छिम्दुचि, “हेॽनायि, न्निङ्दा न्ना इजाङ् न्लाबुराम्गान्ना?”
46ङ्खाचिङा पोलोवा म्बि, “ना याॽमिङा चेक्तुहा लोॽवा गो इसाङा चा चेक्तुहा हेॽनिङ्चा ङ्खेप्सुक्साम्ङान्हा॥”
47फारिसिचिङा ङ्खाचि न्लुचि, “न्निङ्दा चा उका चेॽया खेप्सुम्गाहोङ् उङ् पोटि लाचोगिघा लेम्बा? 48एङ्गा हाङ्गुम्बाचि नुङ् फारिसिचि माध्येबे इसाङा उङ् बिस्वास न्जोगुक्सुना? 49खा प्याक याॽमिचिगा उलुम्बे ङ्वान्नेहा उका हेक्साङ् लाचोक्खुबा याॽमिचिङा मोसागा ब्यावास्था ङ्ङास्वानिन्हा, ङ्खाचि छोङ्बे निङ्वाफुमागा साराप आयाब्यामाहा॥”
50न्नाबे ङ्वायाहा फारिसिचि माध्येबे निकोदेमास बाङ्ना एको याॽमि चा वाया॥ उङ् ओन्दाङ् इमा सेॽनि येसु तुप्से तायामासा॥ न्नाङा लुचि,#युहान्ना ३:१-२ 51“इना आप्दिक एन्दाना याॽमिगा ओचेॽया ओन्दाङ् मेङ्खेम्ले, न्हाङ् उङा चोगुहा काम था मेन्दोक्ले उङ् आप्दिक एम्मा एङ्गा ब्यावास्थाङा पिमेहायि?”
52ङ्खाचिङा उङ् पोलोवा म्बि, “इना न्दा चा गालिलबेकानायि? धार्मासाप्ला उचुन पोढाचोगु, न्हाङ् न्दा खा चेॽया आस्वाघा, गालिलभाङ् हेॽनिङ्चा निङ्वाफुमाभाङ् चेक्खुबा न्लोम्मेनिन्हा॥” 53न्हाङा घाक याॽमिचि उङ्चि पाङ्-पाङ्बे ङ्ख्या॥
Currently Selected:
युहान्ना 7: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
