लुका 1
1
लुकाङा येसुगा उतुम्बे थियोफिलास छेप्तुना
1खाङ्खाङ्बा थियोफिलास, प्याक याॽमिचिङा एङ्गा लुम्बे लेक्साहा चेॽयागा उतुम्बे छेप्माहा काम न्जोगुक्सु॥ 2ङ्खा लेक्साहा चेॽया सुरु नाहाङ्तोमाङ् उङ्चिगा मिकङा निखुबा नुङ् नुसाला खेम्मेखुबाचिङा कानिङ् योक्मेतामा॥ 3खा चेॽयागा उतुम्बे का चा सुरु नाहाङ्तोमाङ् उचुन योगुक्तुक्सुङ्, न्हाङ् खा घाक चेॽया न्दा छेप्मा उचुन एताङ्होङ् छेप्मासिम्मेङ्॥ 4ना छेप्ताप पोढाचोगुगाहोङ् न्दा ङ्योक्मेताघा घाक चेॽया जेप्पा ओम्येम मेन्नायेमभोङ् था तोक्तुगानि॥
बाप्तिस्मा पिखुबा युहान्नागा वामगा उतुम्बे
5याहुदिया लिङ्खामगा हाङ् हेरोद सायानिङ् हारुन#१:५ घाक हाक्निङ् ओन्दाङ्ना याहुदि हाङ्खुबा॥ छोङ्गा एको जाकारिया बाङ्ना हाङ्खुबा वाया॥ उङ् आबिया हाङ्खुबा छुमगा याॽमि साया॥ न्नागा उहिङ्खुमा एलिसिबा चा हारुन छोङ्गा साया॥#१ उथुक्साला २४:१० 6ङ्खा हिपापाङ् निङ्वाफुमागा उयुम्बे धार्मोति सायाचि, उङ्चि निङ्वाफुमागा घाक आग्गे नुङ् नियाम येन्खुबा सायाचि॥ 7ङ्खाॽनिङ्गो उङ्चि च्याचि म्मायानिन, इजाङ्बाङ्निङ् एलिसिबा उच्या मेन्दोक्खुमा साया, न्हाङा उङ्चि हिपापाङ् पाघ्याम-माघ्याम चा लासाब्यामासाचि॥
8इमा जाकारिया उङ्चिगा छुमगा पालोबे निङ्वाफुमागा उयुम्बे हाङ्खुबागा काम चोक्मास्या॥ 9ङ्खिङ्बेला हाङ्खुबाचिगा चालान आन्सार चिठ्ठा ङ्ङेन्दुनिङ् निङ्वाफुमापाङ् होङ्बे धुप हुॽमाहा काम जाकारियागा उनिङ्बे आया॥ 10इलेन धुप हुॽमाना बेलाबे पाखा न्छुप्साहा घाक याॽमिचि पार्थाना न्जोक्मास्या॥
11ङ्खिङ्बेला निङ्वाफुमागा एको वालोक्दुत धुप हुॽमाना बेदिगा छुप्ताङ् पोटि येबाना ओता॥ 12जाकारिया न्ना निसुहोङ् किसिॽमाङा आत्ते चोगा॥ 13ङ्खाॽनिङ्गो वालोक्दुतङा उङ् लु, “ङ्गिसितान जाकारिया, इजाङ्बाङ्निङ् ङ्गा पार्थाना निङ्वाफुमाङा खेप्सुक्सुहा, हाकु ङ्हिङ्खुमा एलिसिबाङा ङ्गा लागि एको च्या बाबु तोङ्बिमेका, न्हाङ् न्दा न्नागा उनिङ् युहान्ना युक्सुबि॥ 14ङ्खिङ्बेला न्दा इब्बे-इब्बे चोन्सिमेका, न्हाङ् प्याक याॽमिचि चा उका वाम लेक्सानाङा न्जोन्सिमे॥ 15इजाङ्बाङ्निङ् न्ना निङ्वाफुमागा उयुम्बे माडा याॽमि लेङ्मे॥ न्नाङा सिम्लेॽमाङ्गा माध इहाचा ङ्ङुङ्वान॥ उङ् वामेॽना नाहाङ्तो पाबित्तारा आत्माङा भोरिपुर्ना लेङ्मे॥#निप ६:३ 16उङा प्याक इजिरेलिचि उङ्चिगा हाङ्बा निङ्वाफुमा पोटि हिक्स्वाचि॥ 17उङ् हाङ्बा हाक्निङ् ओन्दाङ् आत्मा नुङ् साक्तिबे निङ्वाफुमाभाङ् चेक्खुबा एलिया लोॽवा लेङ्दारामेहोङ् हाङ्बागा लाम्बु त्यार चोग्वा॥ उङा पा नुङ् च्याचिगा उलुम्बे तोङ्मेत्वाचि न्हाङ् निङ्वाफुमागा आग्गे मेयेन्खुबाचि निङ्वाफुमागा आग्गे येन्खुबा याॽमिचिगा ग्यान पोटि हिक्स्वाचि॥ ङ्खाॽला उङा हाङ्बागा लागि याॽमिचि त्यार चोग्वाचिहा॥”#मालाकि ४:५-६
18न्हाङा जाकारियाङा वालोक्दुत खाॽला लु, “खा चेॽया जेप्पा लेङ्मेहाभोङ् का इमिन पात्तेचोगुङ्? कान्चिङ्गो पाघ्याम-माघ्याम लेक्साब्यामाङ्चिङ्॥”
19वालोक्दुतङा जाकारिया लु, “का निङ्वाफुमागा उयुम्बे येम्नुङ्खुबा गाब्रिएल वालोक्दुतङान, उङामाङ् का खा नुहा सालेन खेम्मेसे न्दाबे पाक्साङ्ना ओम॥#दानिएल ८:१६; ९:२१ 20का लुॽनेन्हा खा चेॽया ठिक बेलाबे पुरा लेङ्मे, ङ्खाॽनिङ्गो सो, न्दा का लुॽनेन्हा चेॽया बिस्वास न्जोगुगान्हाङा हाकु खा चेॽया पुरा मेलेङ्ले सोम्मा न्दा लेम्सुरुम्बा लेङ्मेकाहोङ् चेक्मा ङ्यामेकान्ना॥”
21याॽमिचिङा जाकारिया निङ्वाफुमापाङ्गा चारामबे ङ्गुसुक्सा, न्हाङ् उङ् ढिलो चोगानाङा आच्चाम्मा ङ्येतामासा॥ 22जोबो जाकारिया पाखा लोन्दा ङ्खिङ्बेला उङ् याॽमिचि नुङ् चेक्मायि ङ्यासान्होङ् उमुक्का चालङा चेक्लाप्तुचि॥ न्हाङ् ङ्खा याॽमिचिङा निङ्वाफुमापाङ् होङ्बे जाकारियाङा सेन्चि तोक्तुक्सुहा बाङ्ना चेॽया था न्दोक्तु॥
23जाकारियागा सेवा चोक्माहा लेनचि म्मेन्दाहोङ् उपाङ्बे ख्या॥ 24न्नागा मिहेक्साङ् उहिङ्खुमा एलिसिबागा ओफोकपे पिछा युङा, न्हाङ् उहिङ्खुमा फा मोनाम सोम्मा हेॽने चा मेङ्खेॽले पाङ्बे वायामासा॥ 25उङा खाॽला काया, “याॽमिचिङा का इसिसि लुॽमा न्दोक्निन्निभोङ् निङ्वाफुमाङा उलुङ्मा तुक्ताङ्होङ् आका लागिमाङ् खा घाक काम चोगुहा ओम॥”
येसुगा वामगा उतुम्बे
26एलिसिबागा ओफोकपे पिछा युङाना या मोनाम तासुनिङ् निङ्वाफुमाङा गाब्रिएल वालोक्दुत गालिल लिङ्खामगा नासारात बाङ्ना साहारबे वाखुमा एको थाङ् न्छेङान्ना मामु मारियामगाबे पाक्सु॥ 27उका थाङ् छेङ्माहा चेॽया हाङ् दाउदका छोङ्बे वायाना योसेफ बाङ्ना बाबुनुङ् लेक्साब्यामासा॥
28वालोक्दुतङा न्ना मामुगाबे तायाहोङ् खाॽला लु, “सेवायो, न्दा निङ्वाफुमाङा तुक्नुङ् उसाप थाक्तामागा, उङ् न्दानुङ् वान्नेॽना॥” 29वालोक्दुतङा लुहा चेॽयाङा मारियाम आत्ते चोगा, न्हाङ् ना इमिन्ना सेवा ओमभोङ् आमा ङ्यासुन्होङ् तोप्सास्या॥
30वालोक्दुतङा लु, “मारियाम ङ्गिसितान, निङ्वाफुमाङा न्दा तुक्नुङ् उसाप थाक्तामागा॥ 31हाकु सो, न्दा म्फोक ख्वागा न्हाङ् एको न्ज्या बाबु तोक्त्वागा, न्नागा उनिङ् न्दा येसु युक्सुबि॥ 32उङ् माडा लेङ्मे, न्हाङ् उङ् घाक हाक्निङ् तो वाखुबा निङ्वाफुमागा उच्या बाबु न्ल्वा॥ हाङ्बा निङ्वाफुमाङा उङ् उका पुर्खा दाउद लोॽवा हाङ् चोग्वाना॥ 33न्हाङा उङा इजिरेलिचिगा छोङ्बे साधाइ राज्या चोग्वा॥ उका राज्या हेॽनिङ्चा म्मेम्मेन्ना॥”#२ सामुएल ७:१२,१३,१६; यासाइया ९:७
34खा खेप्सुहोङ् मारियामङा वालोक्दुत खाॽला लु, “खा इमिन लेङ्मेहा? इजाङ्बाङ्निङ् का गो थाङ्माङ् न्छेङामाङान॥”
35वालोक्दुतङा खाॽलाना पोलोवा पि, “निङ्वाफुमागा पाबित्तारा आत्मा न्दाबे तामे, न्हाङा घाक हाक्निङ् तो वाखुबा निङ्वाफुमागा साक्तिगा लालामे न्दा छोङ्बे आमे॥ न्हाङामाङ् वाखुबा पिछा पाबित्तारा लेङ्मे, न्हाङ् निङ्वाफुमागा उच्या बाबु भोङ् न्ल्वाना॥ 36सो, ङ्गा आफान्ता एलिसिबा याॽमिचिङा उच्या मेन्दोक्खुमा मामु न्लुहोङ् चा, खिङ्बेला माघ्याम लेक्साब्यामानिङ् या मोनामगा पिछा ओफोकपे वान्नेॽना॥ 37इजाङ्बाङ्निङ् निङ्वाफुमाङा चोक्मा मेयामाहा चेॽया इहाचा मान्हा॥”#उथुक १८:१४
38न्हाङा मारियामङा खाॽला लु, “लेङ्मेॽना, का गो निङ्वाफुमागा सेवा चोक्खुमा मामुङान॥ न्दा इमिन लुयाङ्गा ङ्खा घाक चेॽया ङ्खाॽलामाङ् लेङ्नि॥” न्हाङा वालोक्दुत न्नाभाङ् ख्या॥
मारियाम एलिसिबानुङ् तुप्से ख्याना
39एहिलेन हेक्साङ् मारियाम धावाधावा चोक्साङ् याहुदिया लिङ्खामगा चोम्कोङ्बेॽना एको तेनबे ख्या॥ 40न्नाबे उङ् जाकारियागा पाङ्बे उयाहोङ् एलिसिबा सेवायो लु॥ 41मारियामङा सेवायो लुना एलिसिबाङा खेप्सुहोङ् सोलोक ओफोकपेॽना पिछा पुक्ता, न्हाङा एलिसिबा पाबित्तारा आत्माङा भोरिपुर्ना लेक्साहोङ् माडा सेम्लाङा खाॽला काया, 42“न्दा गो मामु याॽमिचिबे घाक हाक्निङ् प्याक आसिक तोक्तुक्सुगा, न्हाङ् न्दा तोक्तेहेक्सुगाना न्ज्या बाबुङा चा आसिक तोक्तुक्सुहा॥ 43का इखिङ् माडा निङ्ला तोक्तुक्सुङ्ना, इजाङ्बाङ्निङ् न्दा आका हाङ्बागा उमा लेक्सागाहोङ् चा का तुप्से तायागा? 44सो, न्दा सेवायो लुयाङ्गाना खेप्सुङ्ना सोलोक आफोकपेॽना पिछा चोन्सिॽमाङा पुक्ताना॥ 45निङ्वाफुमाङा न्दा लुयाघा चेॽया पुरा लेङ्मेहाभोङ् बिस्वास चोक्खुमा न्दा इखिङ् प्याक आसिक तोक्खुमागान॥”
मारियामङा छेम लुतुना
46न्हाङा मारियामङा खाॽलाना छेम लुतु,
“का निङ्वाफुमागा उनिङ् थेन्द्वाङ् आनिङ्वाभाङ्,
47न्हाङ् आका आत्मा चोन्सिमे, का पाप पाहाङ् फोङ्खुबा निङ्वाफुमानुङ्॥
48इजाङ्बाङ्निङ् उङा का लोॽवाना सेवा चोक्खुमा माङ्चुमाङ्ना मामु मितामाङ्,
हाकु नाहाङ्तो घाक याॽमिचिङा का लुम्मे आसिक तोक्खुमाभोङ्॥
49इजाङ्बाङ्निङ् घाक हाक्निङ् साक्तिसालि निङ्वाफुमाङा आका लागि माडा काम चोक्ताब्यामाङ्,
न्हाङ् उका उनिङ् पाबित्ताराना॥
50उङ् आदार चोक्खुबाचि घाक उङा पुस्ता-पुस्ता सोम्मा मिम्मे॥
51उङा उका साक्तिसालि उमुकङा निङ्वाबे घामान्डा चोक्खुबा याॽमिचि हिसाहाक्सुक्सुचि,
52उङा घामान्डि हाङ्चि हाङ्युक्थामभाङ् मो आएन्दुक्सुचि,
ङ्खाॽनिङ्गो का मिङान मिखुबा याॽमिचि तो थेन्दुक्सुचि॥#आयुब ५:११; १२:१९
53उङा साकङा सिखुबाचि उचुन्हा थोक पिक्सुचि,
ङ्खाॽनिङ्गो थुङ्दुहाचि इहाचा मेम्बिॽले लासाहाक्सुक्सुचि॥
54निङ्वाफुमाङा एङ्गा पुर्खाचि लुचिहा लोॽवा चोगुहोङ् उका सेवाक इजिरेलिचि फातुक्सुचि,
55उङा लुङ्मातुक्मा हेॽनिङ्चा म्मुन्दिक्सुन्चिन आब्राहाम नुङ् उका सान्तानचि॥”
56ङ्खिङ्बेला मारियाम सुम मोनाम हिङ् उका आफान्ता एलिसिबानुङ् वायाहोङ् उपाङ्बे लासा॥
बाप्तिस्मा पिखुबा युहान्नागा वाम
57एलिसिबागा चेराङ्मा लामाना बेला तायाहोङ् उङा एको उच्या बाबु तोक्तु॥ 58हाङ्बा निङ्वाफुमाङा खिङ् प्याक उलुङ्मा तुक्तुना न्निसुहोङ् उका आफान्ता नुङ् पाङ्निवाकचि चा उङ्नुङ् न्जोन्दास्या॥ 59पिछा वायाना ताम्ना लेन पिछागा खाताना#१:५९ पिछानिङ् बाबुगा छिॽमा छिमानागा ह्वारिक हेक्माना॥ ना च्हेन याहुदिचिगा घाकङा पालाना चोक्माइ पोर्ने एको नियाम साया॥ चोक्से उका पाङ्निवाक नुङ् आफान्ताचि न्छुप्सा, न्हाङ् ङ्खाचिङा उप्पागा लोॽवा पिछागा उनिङ् चा जाकारिया ङ्युक्सुबिहेक्सुसा,#लेबि १२:३ 60ङ्खाॽनिङ्गो उका उमाङा लुचि, “मेन्ना, नागा उनिङ्गो युहान्ना युङ्बिॽमाना॥”
61ङ्खाचिङा एलिसिबा न्लु, “ङ्गा आफान्ताचिबे खाॽलाना उनिङ् युक्साना याॽमि गो इसा चा मान्ना॥” 62न्हाङा ङ्खाचिङा पिछागा उप्पा मुक्का चालङा न्छिम्दु, “न्दा नागा उनिङ् इना युङ्मा मितुक्सुगाना?” 63उङा एको छेप्माना फाल्लेक्का पाटि नाक्तुचिहोङ् न्नाबे “नागा उनिङ् युहान्नामाङ् युङ्बिॽमाना” भोङ् छेप्तुबिचि॥ खा न्निसुहोङ् ङ्खाचि घाक आच्चाम्मा ङ्येता॥ 64ङ्खिङ्बेलामाङ् जाकारिया चेक्मा याखुबा लेक्साहोङ् निङ्वाफुमागा पार्साम्सा चोक्मा तारोक्तु॥ 65खा घाक चेॽया न्निसुहोङ् पाङ्निवाकचि निङ्वाफुमा नुङ् ङ्गिसिता॥ न्हाङा खा चेॽया याहुदिया लिङ्खामगा चोम्कोङ्बे आखुबा घाक तेनचिबे हिसा॥ 66खा चेॽया खेम्खुबा घाकङा उङ्चि निङ्वाबे ङ्गाया, “ना पिछा वान्दिक इमिन्ना लेङ्मेॽना लोप्पि?” इजाङ्बाङ्निङ् निङ्वाफुमागा साक्ति उङ् छोङ्बे आयामासा॥
जाकारियाङा निङ्वाफुमागा उनिङ् थेन्दुना
67पिछागा उप्पा जाकारिया पाबित्तारा आत्माङा भोरिपुर्ना लेक्साहोङ् निङ्वाफुमाङा लुहा चेॽया चेक्मा तारोक्तु,
68“इजिरेलिचिगा हाङ्बा निङ्वाफुमागा पार्साम्सा लेङ्नि, इजाङ्बाङ्निङ् उङ् उका याॽमिचि फासे तायाहोङ् फोक्सामा॥
69उङा एङ्गा लागि उका सेवाक दाउदका छोङ्भाङ् एको मुक्ति पिखुबा साक्तिसालि हाङ् पाक्सुक्सु॥
70-71उङा कानिङ् एङ्गा सात्तुरचि नुङ् कानिङ् इसिखुबाचिगा मुकपाहाङ् हिङ्मेमेहा बाङ्ना चेॽया पाबित्तारा निङ्वाफुमाभाङ् चेक्खुबाचिगा याभाङ् ओन्दाङ्माङ् निङ्वाफुमा चेक्तामासा॥
72उङा एङ्गा पुर्खाचि लुङ्मा तुक्तुचिहा सोॽमेमागा, न्हाङ् ङ्खाचिनुङ् थुन्दुना पाबित्तारा बाचा पुरा चोक्मागा एङ्गा लागि खाॽलाहा काम चोगु॥
73न्ना बाचा निङ्वाफुमाङा एङ्गा पुर्खा आब्राहामनुङ् थुन्दुक्सा,
74-75न्ना बाचा कानिङ् सात्तुरचिगा मुकपाहाङ् फोक्सिहोङ्, कानिङ् हिङिॽवानुङ् मेङ्गिसिॽले पाबित्तारा नुङ् धार्मोति लेक्सिहोङ् उका सेवा चोक्मा यासुम्निभोङ् पिक्सा॥
76ओ आच्या, न्दा घाक हाक्निङ् तो वाखुबा निङ्वाफुमागा निङ्वाफुमाभाङ् चेक्खुबाभोङ् न्लुमेका॥#मालाकि ३:१ इजाङ्बाङ्निङ् न्दा हाङ्बागा ओन्दाङ्-ओन्दाङ् उका लाम्बु त्यार चोक्से खेमेका॥
77न्दा उका याॽमिचि पाप छेमाभाङ् मुक्ति तोक्त्वाम्गाना बाङ्ना चेॽया चिन्द्वाचिगा॥ 78इजाङ्बाङ्निङ् एङ्गा निङ्वाफुमा लुङ्माराङ्बाना॥ न्हाङामाङ् उङा खिरिस्ट भेनिक्ना नामगा जोति लोॽवा वालोकभाङ् कानिङ्बे पाक्स्वा,
79न्हाङा कुइम्नाबे वाखुबाचि नुङ् कालगा उयाबे ङ्ङाहेक्साहाचि जोति पिवाचि॥#यासाइया ९:२ न्हाङ् न्ना जोतिङा माङ् कानिङ् हाङ्हाङ्गा लाम्बुबे तिङ्मेहा॥”
80न्हाङा पिछा युहान्ना सालुङ्बे नुङ् आत्माबे पुसाङ् ख्या, ङ्खाॽनिङ्गो इजिरेलिचिगा उलुम्बे उङा पार्चार मेन्जोक्ले सोम्मा उङ् इसा चा मेॽनिङ्ना सुन्नेना ठोङ्बे वाया॥
Currently Selected:
लुका 1: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
