लुका 2
2
येसुगा वाम
(मात्ति १:१८-२५)
1ङ्खिङ्बेला रोम खाम्युक्का हाङ् आगास्टासङा न्ना खाम्युक भोरिहा याॽमिचि निङ् कोप्मेसे ख्यानिभोङ् हुकुम पिचि॥ 2न्ना याॽमि निप्माना इम्ना खेप साया॥ ङ्खिङ्बेला कुरेनियास सिरिया लिङ्खामगा माडा-खाङ्खाङ्बा साया॥ 3हाङ्ङा पिचिहा हुकुम लोॽवामाङ् घाक याॽमिचि उङ्चि तेन साहारचिबे निङ् कोप्मेसे ङ्ख्या॥
4ङ्खिङ्बेला योसेफ चा गालिल लिङ्खामगा नासारात साहारभाङ् याहुदिया लिङ्खामगा बेथ्लेहेम बाङ्ना हाङ् दाउदका वाम लेक्साना साहारबे उनिङ् कोप्मेसे ख्या, इजाङ्बाङ्निङ् उङ् दाउद छोङ्गा साया॥ 5उङ्नुङ् थाङ् छेङ्मागा न्नाक्तुक्साना मारियाम चा उङ्नुङ् खेतु॥ ङ्खिङ्बेला मारियाम चेराङ्मा लाखुमा साया॥ 6उङ्चि न्नाबे वायाचिनिङ् मारियामगा चेराङ्मा लामाना बेला ताया॥ 7न्नाबे उङा तुम्ना उच्या बाबु तोक्तु, न्हाङा छेॽलुङ्ङा सुम्दुहोङ् खोङ्बे इप्सु॥ इजाङ्बाङ्निङ् न्नाबे उङ्चि बास याक्माना ठोङ् म्मायान॥
गोठाला नुङ् वालोक्दुतचि
8ङ्खिङ्बेला बेथ्लेहेमगा युम्बेॽना चाउरबे सेॽनिङ् सामुङ्चिगा बागाल कोप्खुबा गोठालाचि सामुङ्चि कुसाङ् ङ्वाया॥ 9न्नाबे हाङ्बागा एको वालोक्दुत ओता, न्हाङा हाङ्बागा जोति गोठालाचिगा ओरिपोरि चाम्काचोगा॥ खा न्निसुहोङ् उङ्चि तुक्नुङ् ङ्गिसिता॥ 10ङ्खाॽनिङ्गो वालोक्दुतङा खाॽला लुचि, “ङ्गिसितानिन! इजाङ्बाङ्निङ् का घाक इब्बे-इब्बे चोन्सिमेप्माना नुसाला ताङ्होङ् न्निङ्दाबे तायामाङ्ना॥ 11हेन न्निङ्गा लागि दाउदका साहार बेथ्लेहेमबे एको मुक्ति पिखुबागा वाम लेक्सामा, उङ्माङ् निङ्वाफुमाङा पाक्सुना मुक्ति पिखुबा हाङ् खिरिस्ट#२:११ निङ्वाफुमाङा सेगुना, आभिसेक चोगुना॥ ओम॥ 12न्निङ्गा लागि चिङ्गो च्हेन ना लेङ्मे, न्निङ्दा एको पिछा छेॽलुङ्ङा सुम्दाहोङ् खोङ्बे इप्साना तुप्स्वाम्गाना॥” 13न्हाङा न्नाबे थाप्थुम्बे वालोक्दुत नुङ् प्याक वालोक्का सेनाचि ङ्ङोता॥ उङ्चिङा निङ्वाफुमागा निङ् थेन्साङ् खाॽलाना छेम लुॽमा न्दारोक्तु,
14“घाक हाक्निङ् तो वाखुबा निङ्वाफुमागा माहिमा लेङ्नि, न्हाङा ताम्दाङ्फुमाबे हेखा याॽमिचि नुङ् उङ् चोन्सिमे, ङ्खा घाक हाङ्हाङ् न्लेङ्नि॥”
15ङ्खा वालोक्दुतचि वालोकपे न्लासाख्याहोङ् सामुङ् कोप्खुबा गोठालाचि उङ्चि-उङ्चि खाॽला ङ्गाया, “लु, हाङ्बा निङ्वाफुमाङा वालोक्दुतभाङ् कानिङ् लुयाहा चेॽया सोसे बेथ्लेहेमबे खेइ॥” 16न्हाङा उङ्चि धावा-धावा चोक्साङ् ङ्ख्या॥ उङ्चिङा न्नाबे मारियाम, योसेफ नुङ् छेॽलुङ्ङा सुम्दाहोङ् खोङ्बे इप्साना पिछा न्दुप्सु॥ 17ङ्खा चेॽया सामुङ् कोप्खुबा गोठालाचिङा न्निसुहोङ् पिछागा उतुम्बे वालोक्दुतङा लुचिहा चेॽया घाक ङ्खेम्मेतुचि॥ 18न्हाङा खा चेॽया खेम्खुबा घाक आच्चाम्मा ङ्येता॥ 19ङ्खाॽनिङ्गो मारियामङा च्हेन खा घाक चेॽया उनिङ्वाबे मिसाङ् युक्सु॥ 20ङ्खा सामुङ् कोप्खुबाचि वालोक्दुतङा लुचिहा लोॽवा खेम्मा नुङ् निमा न्दोक्तुहाङा निङ्वाफुमागा माहिमा चोक्साङ् नुङ् स्तुति चोक्साङ् न्लासा॥
पिछागा उनिङ् येसु ङ्युक्सुना
21पिछा वायाना ता लेन लेक्साहोङ् उका खाताना न्जोगुनिङ् उनिङ् येसु ङ्युक्सुबि॥ न्ना निङ् उङ् फोकपे तामाहाक्निङ् ओन्दाङ् वालोक्दुतङा युङ्मानाभोङ् लुक्साचि॥#लेबि १२:३; लुका १:३१
येसु निङ्वाफुमापाङ्बे न्दाना
22मोसागा ब्यावास्थाबे छेप्ताहा लोॽवा उङ्चिगा चोक्खे चोक्माना बेला मेन्दाहोङ्, येसुगा उप्पा-उमाङा निङ्वाफुमाबे सामार्पान चोक्मागा उङ् यारुसालेमबेॽना निङ्वाफुमापाङ्बे तायाचु॥#लेबि १२:६-८ 23इजाङ्बाङ्निङ् हाङ्बा निङ्वाफुमाङा पिचिहा ब्यावास्थाबे खाॽला छेप्तामा, “घाक हाक्निङ् ओन्दाङ् वायाना च्या बाबु निङ्वाफुमागा भोङ् फोङ्मेॽना॥”#पारास्थान १३:२,१२ 24न्हाङा ब्यावास्थाबे “हिच्चि ढुकुवा मानुङ् हिच्चि पारेवागा उच्याचि” भोङ् छेप्ताहा लोॽवा तायाचुचिहोङ् बोलिदान तिसे तायाचि॥
25ङ्खिङ्बेला यारुसालेमबे सिमियोन बाङ्ना एको याॽमि वाया॥ उङ् धार्मोति नुङ् निङ्वाफुमागा सेवा चोक्खुबा साया, उङ्नुङ् पाबित्तारा आत्मा वाया॥ उङा इजिरेलिचि पाप पाहाङ् फोङ्खुबागा लाम्बु सोक्सा॥ 26“न्दा हाङ्बा निङ्वाफुमाङा पाक्सुना खिरिस्ट मेनिले न्सिमेकान्ना” भोङ् पाबित्तारा आत्माङा ओन्दाङ्माङ् उङ् योक्मेतुक्सा॥ 27पाबित्तारा आत्माङा उङ् निङ्वाफुमापाङ्बे ख्या लुहोङ् ख्या॥ ङ्खिङ्बेला पिछा येसु उप्पा-उमाङा ब्यावास्थाबे छेप्ताहा लोॽवा सामार्पान चोक्मागा न्नाबे तायाचु॥ 28न्ना पिछा निसुहोङ् सिमियोनङा उमुकपे याङु, न्हाङा निङ्वाफुमा नुनिङ्वा पिसाङ् खाॽला काया,
सिमियोनङा निङ्वाफुमागा पार्साम्सा चोगुना
29“हाङ्बा निङ्वाफुमा, न्दा कायाघा लोॽवा चोगुक्सुगा, हाकु का ङ्गा सेवाक उचुन सिमा पियाङ्॥
30इजाङ्बाङ्निङ् न्दा पाक्सुगाना मुक्ति पिखुबा आमिकङा निमा तोक्तुङ्॥
31न्दा उङ् घाक याॽमिचिङा न्निसुनिभोङ् पाक्सुगाना ओम॥
32उङ्माङ् हेकोहा जातिगा याॽमिचि निङ्वाफुमागा लाम्बु सोप्मेखुबा जोति ओम॥#यासाइया ४२:६; ४९:६; ५२:१० उङ्माङ् ङ्गा याॽमि इजिरेलिचिगा माहिमा चोक्मेखुबा ओम॥”
33न्हाङा उप्पा-उमाङा पिछागा उतुम्बे खाॽलाहा चेॽया खेप्साचुहोङ् आच्चाम्मा एताचि॥ 34सिमियोनङा उङ्चि आसिक पिचिहोङ् पिछागा उमा मारियाम खाॽला लु, “खेप्सु, ना पिछा इजिरेलबे प्याक्का उद्दार नुङ् प्याक्का नासका लागि निङ्वाफुमाङा सेगुक्सुना॥ उङ् निङ्वाफुमाङा सोप्मेताहा एको चिङ्गो ओम॥ प्याक याॽमिचिङा उका उतुम्बे इसिॽहा चेॽया चेक्साङ् उङ्चिगा निङ्वाबेॽहा चेॽया न्जेक्तुभोक्स्वा॥ 35न्हाङा ङ्गा न्निङ्वा साम्बेकङा होताना लोॽवा तुक्नुङ् तुङ्मेॽना॥”
36न्हाङा न्नाबे एको हान्ना बाङ्ना निङ्वाफुमाभाङ् चेक्खुमा माहुमा वाया॥ उङ् आसेर छोङ्गा फानुएलगा उच्या साया॥ उङ् थाङ् छेङाना ला फिम्बिलिङ् लेक्सानिङ् माङ् लाङ्निमा लासामासा॥ 37उङा ताना फिम्बिलिङ् तासुक्सा॥ उङा हेॽनिङ्चा निङ्वाफुमापाङ् न्नाओन, ङ्खाॽनिङ्गो उपाबास युङाहोङ् पार्थाना चोक्साङ् सेॽनि-लेॽनि निङ्वाफुमागा सेवा चोक्साङ् वाया॥ 38ङ्खिङ्बेला उङ् योसेफ नुङ् मारियामगा उयुम्बे तायाहोङ् निङ्वाफुमा नुनिङ्वा पिसाङ्, मुक्तिगा लाम्बु सोन्नुङ्खुबा घाक इजिरेलिचि पिछागा उतुम्बे योक्मेतुचि॥
39हाङ्बा निङ्वाफुमाङा पिचिहा ब्यावास्थाबे छेप्ताहा लोॽवा योसेफ नुङ् मारियामङा घाक काम याइयाचुहोङ्, उङ्चि पाङ् गालिल लिङ्खामगा नासारात साहारबे न्लासा॥#मात्ति २:२३ 40न्नाबे पिछा येसु पुसाङ्, चात्तु लेङ्साङ्, न्हाङ् उनिङ्वा छिसाङ् ख्या॥ उङ्बे निङ्वाफुमागा आनुगाराहा वाया॥
निङ्वाफुमापाङ्बे पिछा येसु
41येसुगा उप्पा-उमा फिम्बिलिङ्-फिम्बिलिङ्बे फोङ्होक्नाम मानाचोक्से यारुसालेम ख्यामासाचि॥#पारास्थान १२:१-२७; ब्यावास्था १६:१-८ 42येसु एहिच फिम्बिलिङ् तासुनिङ् होक्नामगा रिति आन्सार येसु खेताचुहोङ् उङ्चि यारुसालेमबे ख्याचि॥ 43होक्नाम मेन्दाहोङ् उङ्चि पाङ्बे न्लासानिङ् येसु यारुसालेमबे छोन्देगा॥ खा चेॽया उप्पा-उमाङा था न्दोक्तान्चुन॥ 44उङ् हेकोहा लाम्दिक्पाचिनुङ् लाम्मा सिम्मेॽना लोप्पि मिताचिहोङ् उङ्चि ए लेनगा लाम्बु लामाख्याचि॥ नासेक लेक्साहोङ् आफान्ता नुङ् काम्चिगा उलुम्बे योगाचु, 45ङ्खाॽनिङ्गो न्दुप्सान्चुन, ङ्खोङ् योक्साङ्-योक्साङ् यारुसालेमबेॽमाङ् लासाचि॥ 46सुम लेन हेक्साङ् उङ् निङ्वाफुमापाङ्बे याहुदि धार्मासाप्ला चिन्खुबाचिनुङ् युङाहोङ् उङ्चिगा चेॽया खेम्साङ्, उङ्चि छिम्योक छिम्साङ् चोक्मास्याना तुप्साचु॥ 47उका बुद्दि न्निसुहोङ् न्हाङा उका पोलोवा ङ्खेप्सुहोङ् घाक आच्चाम्मा ङ्येता॥ 48ङ्खाॽला उङ्चि च्या निसाचुहोङ् उप्पा-उमा चा आच्चाम्मा एताचि॥ उमाङा छिम्दु, “आच्या, न्दा इजाङ् कान्चिङ् खाॽला चोगाघा? सो, म्बानुङ् का आत्ते चोक्साङ् न्दा योक्मासिम्मेङ्चिङाहा॥”
49उङा खाॽला लुचि, “न्जिङ्दा इजाङ् योङ्मेकाहा? का आप्पागा पाङ्बे वामेङ्ना बाङ्ना न्जिङ्दा था म्मायान्ना?” 50ङ्खाॽनिङ्गो उङा लुचिहा चेॽया उप्पा-उमाङा ङ्ङासान्चुन॥ 51न्हाङा येसु उप्पा-उमानुङ् नासारातपे लासाहोङ् उप्पा-उमागा तायेनबे वाया॥ उमा मारियामङा च्हेन खा घाक चेॽया मेमुॽनिले उनिङ्वाबे युक्सु॥ 52येसु सालुङ्बे नुङ् बुद्दिबे निङ्वाफुमा नुङ् याॽमिचिगा आनुगाराहाबे पुसाङ् ख्या॥#१ सामुएल २:२६; हितोपादेस ३:४
Currently Selected:
लुका 2: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
