लुका 3
3
बाप्तिस्मा पिखुबा युहान्ना
(मात्ति ३:१-१२; मार्कुस १:१-८; युहान्ना १:१९-२८)
1काइसार तिबेरियास रोमगा तायेन्राङ्बा लेक्साना एफा फिम्बिलिङ् तासुनिङ्, पान्तियास पिलातास याहुदिया लिङ्खामगा माडा-खाङ्खाङ्बा साया॥ ङ्खिङ्बेला हेरोद गालिल लिङ्खामगा तायेन्राङ्बा साया॥ उनुन्छा फिलिप इतुरिया नुङ् तार्खोनितिस लिङ्खामगा तायेन्राङ्बा साया, न्हाङा लुसानियास आबिलेने लिङ्खामगा तायेन्राङ्बा साया॥ 2हान्नास नुङ् काइयाफा मा-हाङ्खुबा सायाचि॥ ङ्खिङ्बेला जाकारियागा उच्या युहान्ना इसा चा मेॽनिङ्ना सुन्नेना ठोङ्बे वायानिङ् निङ्वाफुमागा चेॽया उङ्बे ताया॥ 3न्हाङा उङ् यार्दान होङ्मागा यो-खेहा लिङ्खामबे ख्याहोङ् याॽमिचि खाॽला लुचि, “न्निङ्दा पाप छेमा तोक्मागा पाप चोक्मा लेप्तिम्घोङ् निङ्वाफुमा पोटि हिक्सानि, न्हाङ् बाप्तिस्मा लियाचोगानुम॥” 4खाॽला निङ्वाफुमाभाङ् चेक्खुबा यासाइयाङा छेप्तुहा चेॽया पुरा लेक्सा–
“खेप्सानुम, इसा चा मेॽनिङ्ना सुन्नेना ठोङ्बे एको याॽमिङा माडा सेम्लाङा खाॽला कामासिम्मे, ‘हाङ्बा तामाना लाम्बु तोयानुम न्हाङ् उङ् लाम्माहा लाम्बुचि सिधा चोगानुम्चिम॥#यासाइया ४०:३-५
5घाक खोल्सा-खोल्सिचि लुप्माचि, कोङ्गुचि ओटेम्मा चोक्माचि, हिक्लिक-वाक्लिक्हा लाम्बुचि सिधा चोक्माचि, न्हाङ् लाम्मा मेनुमाहा लाम्बुचि उचुन चोक्माहाचि,
6न्हाङा घाक याॽमिचिङा निङ्वाफुमाङा पाक्सुना मुक्ति न्निस्वाना॥’”
7युहान्नागाबे प्याक याॽमि बाप्तिस्मा लियाचोक्से न्दाया॥ ङ्खाॽनिङ्गो उङा खाॽला लुचि, “ओ पुछाक्का उच्याचि, इसाङा न्निङ्दा निङ्वाफुमागा तायेॽना निरिकपाहाङ् हिङ्मा चिन्दिघा?#मात्ति १२:३४; २३:३३ 8न्निङ्दा जेप्पामाङ् पाप पाहाङ् लासिघोङ् निङ्वाफुमा पोटि निङ्वा हिक्सुक्सुम्गाना ओमभोङ् ङ्खाॽलामाङ् चोगानि, ङ्खाॽनिङ्गो ‘कानिङ् आब्राहामगा सान्तानसिङान’ कामाहोङ् निङ्वाफुमागा तायेॽना निरिक भाङ् हिङिॽवाङ्हा भोङ् म्मितानिन॥ इजाङ्बाङ्निङ् निङ्वाफुमाङा खा लुङ्खाक पाहाङ् होङ्चा आब्राहामगा सान्तान चोक्मा यास्वाचिहा॥#युहान्ना ८:३३ 9लोप्माङ् निङ्वाफुमागा निरिक्का फेन्दिक सिङ्गा उसामबे आयाब्यामा, उचुन उसा मेङ्गेङ्खुबा घाक सिङ्गा इम्मेहोङ् मिबे लेम्नाहाङ्मेहा॥”#मात्ति ३:१०; ७:१९
10न्हाङा याॽमिचिङा युहान्ना न्छिम्दु, “ङ्खाॽला ओमभोङ् कानिङ् इ चोगिङ्?”
11उङा खाॽलाना पोलोवा पिचि, “इसानुङ् हिच्चि लोकि ङ्वान्ने, न्नाङा मेवाखुबा एको पिहाक्सुनि, न्हाङा इसानुङ् चाम्योङ्बा वान्ने, न्नाङा चा मेवाखुबा पिनि॥”
12तिरो पोक्खुबाचि चा बाप्तिस्मा लियाचोक्से न्दायाहोङ् न्छिम्दु, “चिन्खुबा, कानिङ् इ चोगिङ्?”#लुका ७:२९
13उङ्चि खाॽला लुचि, “न्निङ्दा पोक्माहा लुइघा हाक्निङ् प्याक म्बोगानुम्निन॥”
14काङ्बाचिङा न्छिम्दु, “कानिङ् लो, इ चोगिङ्?”
उङा लुचि, “न्निङ्दा याॽमिचि किसिॽमा लाप्साङ्, मेन्हा आप्दिक एन्साङ् उङ्चिभाङ् याङ् म्बोगानुम्निन॥ न्निङ्दा पिइघा याङ्बेॽमाङ् निङ्वा तामेतानुम॥”
15याॽमिचिङा निङ्वाफुमाङा पाक्सुना मुक्ति पिखुबा हाङ् खिरिस्टका लाम्बु न्सोक्सा॥ उङ्चिङा न्ना खिरिस्ट युहान्नामाङ् लोप्पिभोङ् म्मितुक्सा॥ 16युहान्नाङा ङ्खाचि खाॽला लुचि, “का न्निङ्दा माङ्च्वाङा बाप्तिस्मा पिमेॽनेनिन, ङ्खाॽनिङ्गो का हाक्निङ् तोना ताये, का उका लाङ्खोपका उनाम फुङ्मा चा न्थेसिमेॽङान्ना॥ उङा न्निङ्दा पाबित्तारा आत्मा नुङ् मिङा बाप्तिस्मा पिइवाघा॥ 17थाप्माना नाङ्लो उमुकपे वान्ने, उङा गाउ थाब्वाहोङ् चाचिॽयादाङ्बे एन्द्वा, न्हाङ् उसिप च्हेन मेन्सिखुबा मिबे हान्दाहाक्स्वा॥”
18खाॽला प्याक आर्ति पिसाङ् युहान्नाङा याॽमिचि नुसाला खेम्मेतुचि॥ 19ङ्खाॽनिङ्गो तायेन्राङ्बा हेरोदङा उनुन्छा ताङ्मे हेरोदियास उहिङ्खुमा चोगुहोङ् युक्सुक्सा, न्हाङ् हेकोहाचा प्याक इसिॽहा काम चोगुक्साहोङ् युहान्नाङा थिन्दु॥ 20न्हाङा तायेन्राङ्बा हेरोदङा चोगुहा ङ्खा इसिॽहा काम छोङ्बे युहान्ना छेक्पाङ्बे छेक्तुहोङ् हेकोना झान इसिॽना काम पुसु॥#मात्ति ४:१२; १४:३-४; मार्कुस ६:१७-१८
येसुगा बाप्तिस्मा
(मात्ति ३:१३-१७; मार्कुस १:९-११; युहान्ना १:३२-३४)
21घाक याॽमिचि बाप्तिस्मा लियान्जोक्मास्यानिङ्, येसुङा चा बाप्तिस्मा लियाचोगु न्हाङा पार्थाना चोक्मास्यानिङ् वालोक होसा॥ 22न्हाङ् पाबित्तारा आत्मा ढुकुवा लोॽवा लेक्सुक्साहोङ् उङ् छोङ्बे युङा, न्हाङा वालोकपाहाङ् एको खाॽला चेक्ताना सेम्ला ताया, “न्दा का आलुङ्मा तुक्नेन्ना आच्यागान, का न्दा नुङ् तुक्नुङ् चोन्दास्यामाङ्ना॥”#उथुक २२:२; छेम २:७; यासाइया ४२:१; लुका ९:३५
खिरिस्ट येसुगा पुर्खाचि
(मात्ति १:१-१७)
23येसुङा उका काम तारोक्तुनिङ् उङ् सुम्खेङ् फिम्बिलिङ्हिङ् तासुक्सा॥ याॽमिचिङा येसुगा उप्पा योसेफ माङ् भोङ् म्मितामासा॥ योसेफका उप्पा एलि साया, 24एलिगा उप्पा मात्तात, मात्तातगा उप्पा लेबि, लेबिगा उप्पा माल्कि, माल्किगा उप्पा यान्ना, यान्नागा उप्पा योसेफ, 25योसेफका उप्पा मात्ताथियास, मात्ताथियासका उप्पा आमोस, आमोसका उप्पा नाहुम, नाहुमगा उप्पा इसालि, इसालिगा उप्पा नाग्गायि, 26नाग्गायिगा उप्पा माथ, माथका उप्पा मात्ताथियास, मात्ताथियासका उप्पा सेमाइन, सेमाइनगा उप्पा योसेख, योसेखका उप्पा योदा, 27योदागा उप्पा योआनान, योआनानगा उप्पा रेसा, रेसागा उप्पा यारुबाबेल, यारुबाबेलगा उप्पा साल्तिएल, साल्तिएलगा उप्पा नेरि, 28नेरिगा उप्पा माल्कि, माल्किगा उप्पा आद्दि, आद्दिगा उप्पा कोसाम, कोसामगा उप्पा एल्मादाम, एल्मादामगा उप्पा एर, 29एरगा उप्पा याहोसु, याहोसुगा उप्पा एलिएजार, एलिएजारगा उप्पा योरिम, योरिमगा उप्पा मात्तात, मात्तातगा उप्पा लेबि, 30लेबिगा उप्पा सिमियोन, सिमियोनगा उप्पा याहुदा, याहुदागा उप्पा योसेफ, योसेफका उप्पा योनान, योनानगा उप्पा एल्याकिम,
31एल्याकिमगा उप्पा मालेआ, मालेआगा उप्पा मिन्ना, मिन्नागा उप्पा मात्ताथा, मात्ताथागा उप्पा नातान, नातानगा उप्पा दाउद,
32दाउदका उप्पा यिसाइ, यिसाइगा उप्पा ओबेद, ओबेदका उप्पा बोआज, बोआजका उप्पा साल्मोन, साल्मोनगा उप्पा नाहासोन, 33नाहासोनगा उप्पा आम्मिनादाब, आम्मिनादाबगा उप्पा आराम, आरामगा उप्पा हेसोरोन, हेसोरोनगा उप्पा फारेस, फारेसगा उप्पा याहुदा, 34याहुदागा उप्पा याकुब, याकुबका उप्पा इसाहाक, इसाहाकका उप्पा आब्राहाम, आब्राहामगा उप्पा तेराहा, तेराहागा उप्पा नाहोर, 35नाहोरगा उप्पा सारुग, सारुगगा उप्पा राउ, राउगा उप्पा पेलेग, पेलेगगा उप्पा एबेर, एबेरगा उप्पा सेलाहा,
36सेलाहागा उप्पा केनान, केनानगा उप्पा आर्पाछेद, आर्पाछेदगा उप्पा सेम, सेमगा उप्पा नोआ, नोआगा उप्पा लेमेख, 37लेमेखका उप्पा मातुसेलाहा, मातुसेलाहागा उप्पा हानोक, हानोकका उप्पा येरेद, येरेदगा उप्पा माहालालेल, माहालालेलगा उप्पा केनान, 38केनानगा उप्पा एनोस, एनोसका उप्पा सेत, सेतका उप्पा आदाम, आदामगा उप्पा निङ्वाफुमा साया॥
Currently Selected:
लुका 3: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
