लुका 11
11
येसुङा चिन्दुचिहा पार्थाना
(मात्ति ६:९-१३; ७:७-११)
1इलेन हाङ्बा येसु एकठोङ्बे पार्थाना चोक्मास्या॥ पार्थाना चोगाब्याहोङ् उका एको चेलाङा खाॽला लु, “हाङ्बा, युहान्नाङा उका चेलाचि पार्थाना चोक्मा चिन्दुचिहा लोॽवा कानिङ् चा पार्थाना चोक्मा चिन्दा॥”
2येसुङा ङ्खाचि लुचि, “न्निङ्दा खाॽला पार्थाना चोगानि–
‘ओ निङ्वाफुमा आप्पा, ङ्गा निङ् पाबित्तारा लेङ्नि, ङ्गा राज्या तानि,
3 आनिङ्गा लेन-लेनगा चाम्योङ्बा कानिङ् पिया॥
4 कानिङ् चोगुम्ङाहा पाप छेमा चोक्ताब्या, कानिङ् चा आनिङ्गा बिरुद्दाबे पाप चोक्खुबाचि छेमा चोगुक्सुम्चिम्ङा, न्हाङा कानिङ् आङ्मा मेयामाहा जाचपे आमेॽमा म्ब्यान॥’”
5न्हाङा उङा ङ्खाचि लुचि, “मितानि, न्निङ्दाबे एकोगा एको काम्निभाक वान्ने॥ न्दा न्ना काम्निभाक्काबे सेॽनिलुम्बे खेमेकाहोङ् ल्वागा, ‘ओ, काम्निभाक, का मिॽयाङ् चाम्योङ्बा लोक्मा पियाङ्॥ 6इजाङ्बाङ्निङ् आपाङ्बे एको काम्निभाक माङ्दुन्धाङ् तायामा, न्हाङा उङ् पिॽमाहा चाम्योङ्बा कानुङ् इहाचा मान्हा॥’ 7न्ना ङ्गाम्निभाकङा पाङ्होङ् भाङ् कामे, ‘का तुखि म्ब्याङान॥ वालाम्बुङ् चा छेक्तिक्सुङ् न्हाङा आका पिछानाछाचि कानुङ् नेथाम न्लाबाब्यामा॥ का पोङ्मेङ्होङ् न्दा लोप इहाचा पिॽमा ङ्यामेॽनेन्हा॥’ 8ङ्खाॽनिङ्गो का न्निङ्दा लुम्मेॽनेनिन, उङा न्दा काम्निभाक्का नाताङा इहाचा म्बिॽकान लोप्पि, ङ्खाॽनिङ्गो नाक्तुघा-नाक्तुघा चोगुक्सागाभोङ् उङ् पोङ्मेहोङ् न्दा नाक्तुघाहिङ् पिमेकाहा॥
9 “ङ्खोङ्माङ् का न्निङ्दा लुमेॽनेनिन, नाक्तानुम न्हाङा न्निङ्दा तोक्त्वाम्गा, योगानुम न्हाङा न्निङ्दा तुप्स्वाम्गा, वालाम्बुङ् ढ्वाक्ढ्वाक चोगानुम न्हाङा न्निङ्गा लागि वालाम्बुङ् होमे॥ 10इजाङ्बाङ्निङ् इसाङा नाक्त्वा, न्नाङा तोक्त्वा, इसाङा योग्वा, न्नाङा तुप्स्वा, न्हाङ् इसाङा वालाम्बुङ् ढ्वाक्ढ्वाक चोग्वा, न्नागा लागि वालाम्बुङ् होमेॽना॥ 11न्निङ्दा माध्येबे हेॽना ङ्खाॽलाना पा लोप्पि, उका उच्याङा नासा नाक्त्वानिङ् पुछाक पिवा, 12न्हाङ् वागिन नाक्त्वानिङ् बिच्छि पिवा? 13न्निङ्दा पापि याॽमिसिगानहोङ्चा न्निङ् च्याचि उचुन्हा थोक पिॽमा निस्वाम्चिम्घाभोङ्, वालोकपे वाखुबा न्निङ्गा पाङा उङ्नुङ् नाक्खुबाचि इखिङ् प्याक पाबित्तारा आत्मा पिवाचिहा॥”
येसु नुङ् बाल्जिबुल
(मात्ति १२:२२-३०,४३-४५; मार्कुस ३:२०-२७)
14इलेन येसुङा एको लेम्सुरुम्बा याॽमिभाङ् इसिॽना मुइ लोन्नाहाङ्मा स्या॥ येसुङा न्ना याॽमिबे वायाना इसिॽना मुइ लोन्धाक्सुहोङ् न्ना याॽमि चेक्मा तारोक्तु, न्हाङा खा न्निसुहोङ् घाक याॽमिचि आच्चाम्मा ङ्येता॥ 15ङ्खाॽनिङ्गो ङ्खाचिबे इखिङ्ङा ङ्गाया, “नाङा गो इसिॽहा मुइचिगा खाङ्खाङ्बा बाल्जिबुलगा साक्तिङा इसिॽहा मुइ लोन्द्वाचिहा॥”#मात्ति ९:३४; १०:२५; मार्कुस ३:२२
16इखिङ्ङा च्हेन उका जाच चोक्मागा खाॽला न्लु, “खा काम जेप्पा निङ्वाफुमागा साक्तिङा चोगुघा ओमभोङ् कानिङ् वालोकभाङ् एको चिङ्गो सोॽमेता॥”#मात्ति १२:३८; १६:१; मार्कुस ८:११
17ङ्खाॽनिङ्गो येसुङा ङ्खाचिगा निङ्वाबेॽहा चेॽया था तोक्तुहोङ् खाॽला लुचि, “हेॽना राज्या बेॽहा याॽमिचि म्फोङ्मे, ङ्खिमे-न्दुमे, न्ना राज्या नास लेङ्मे॥ हेॽना पाङ्बेॽहा याॽमिचि उङ्चि-उङ्चि ङ्खिमे-न्दुमे, न्ना पाङ् चा नास लेङ्मेॽना॥ 18ङ्खाॽलामाङ् साइतानगा राज्याबे चा उङ्चि-उङ्चि म्फोङ्मेहोङ् ङ्खिमे-न्दुमेहाभोङ् इमिन ङ्खाचिगा राज्या वान्नुङ्मा यामेॽना? इजाङ्बाङ्निङ् न्निङ्दा का इसिॽहा मुइगा खाङ्खाङ्बा बाल्जिबुलगा साक्तिङा इसिॽहा मुइ लोन्द्वाचिहाभोङ् लुम्मेका॥ 19का बाल्जिबुलगा साक्तिङा इसिॽहा मुइचि लोन्द्वाङ्चिङाहाभोङ्, न्निङ्गा चेलाचिङा च्हेन इसागा साक्तिङा न्लोन्द्वाचिहा? ङ्खाचिङामाङ् न्निङ्दा चोगुम्घा गाल्ति काम सोॽमेतिमिगा॥ 20ङ्खाॽनिङ्गो का निङ्वाफुमागा साक्तिङा इसिॽहा मुइ लोन्द्वाङ्चिङाहाभोङ्, निङ्वाफुमागा राज्या न्निङ्दाबे तायाब्यामाना॥ 21चात्तुना याॽमिङा प्याक आप्चेङ् नुङ् उपाङ् कुसुभोङ् न्नागा इहाचा युबाक थिङ्खाक म्मान्दिमेनाहा॥ 22ङ्खाॽनिङ्गो उङ् हाक्निङ् चात्तुना याॽमि चुङ्से तायाहोङ् उङ् हेचोभोङ्, उङ् हेखा आप्चेङ्बे भोर पोराचोगामासा ङ्खा घाक नाप्तेहेत्वा, न्हाङा न्नागा युबाक थिङ्खाक चा नाप्तेहेत्वाहोङ् उकाम्चिनुङ् हाप्स्वा॥ 23इसा का पोटि मान, न्ना आका बिरोधि ओम, न्हाङा इसाङा का छुम्मा म्फामेङान, न्नाङा छुप्साहा चा हिसाहाक्स्वा॥”#मार्कुस ९:४०
इसिॽना मुइ लामेॽना
(मात्ति १२:४३-४५)
24 “याॽमिभाङ् इसिॽना मुइ लोङ्खेमेहोङ् आरामनुङ् वामाना फुक्कोना ठोङ् योक्साङ् खेम्मे॥ ङ्खाॽनिङ्गो ङ्खाॽलाना ठोङ् न्दोक्त्वान्होङ्, ‘एन्छो वायाङ्ना पाङ्बे लाङ्खेमेङ्ना’ भोङ् न्नाबे लान्दारामे॥ 25न्नाबे तामेॽनिङ् उङा ओन्दाङ् वायाना पाङ् फेक्ताहोङ् उचुन्माचेक तोक्साना तुप्स्वा॥ 26न्हाङ् खा निस्वाहोङ् उङा उङ् हाक्निङ्चा इसिॽहा ला ओटा इसिॽहा मुइचि कारावाचिहोङ् उङ्चि घाक न्ना याॽमिहोङ्बे ङ्ङुमे॥ नाहाङ्तो न्ना याॽमिगा तुखि ओन्दाङ्हा हाक्निङ् झान प्याक किॽमालुलु लेङ्मेहा॥”
जेप्पागा आसिक तोक्खुबा
27येसुङा खा चेॽया चेक्मास्यानिङ् प्याक याॽमिलुम्भाङ् एको मामुङा माडा सेम्लाबे खाॽला काया, “न्दा तोक्खुमा नुङ् नु उङ्मेखुमा मामु इखिङ् आसिक तोक्खुमा ओम!” 28खा खेप्सुहोङ् येसुङा खाॽलाना पोलोवा पि, “ङ्खाॽला मेन्ना, निङ्वाफुमागा चेॽया ङ्खेप्स्वाहोङ् ङ्खाॽलामाङ् चोक्खुबाचि च्हेन आसिक तोक्खुबा ओम्चि॥”
योनागा चिङ्गो
(मात्ति १२:३८-४२)
29येसुगा ओरिपोरि प्याक याॽमिचि छुम्साङ् ङ्ख्या॥ ङ्खिङ्बेला येसुङा लुचि, “हेन्सेन्हा याॽमिचि इखिङ् इसिॽहाचि!#११:२९ दुस्टा ङ्खाचिङा चिङ्गो ङ्योग्वा, ङ्खाॽनिङ्गो ङ्खाचि निङ्वाफुमाभाङ् चेक्खुबा योनागा चिङ्गो हाक्निङ् हेकोना चिङ्गो म्बिमेनिन्हा॥#मात्ति १६:४; मार्कुस ८:१२ 30योना निनाबे साहारबेॽहा याॽमिचिगा लागि इमिन चिङ्गो लेक्सामासा ङ्खाॽलामाङ् का याॽमिगा उच्या चा हेन्सेन्हा याॽमिचिगा लागि चिङ्गो लेङ्मेङ्ना॥#योना ३:४ 31निरिक्का लेनबे सेबा बाङ्ना खाम्युक्का हाङ्मा हेन्सेन्हा याॽमिचिगा बिरुद्दाबे पोङ्मेहोङ् उङ्चि आप्दिक एन्द्वाचि, इजाङ्बाङ्निङ् उङ् ताम्दाङ्फुमागा योना उलाप्पाहाङ् हाङ् सोलोमानगा बुद्दिगा चेॽया खेम्से तायामासा॥ हाकु सोयानुम, नाबे सोलोमान हाक्निङ्चा एको माडा याॽमि वान्ने,#१ हाङ् १०:१-१०; २ उथुक्साला ९:१-१२ ङ्खाॽनिङ्गो न्निङ्दा उका चेॽया ङ्खेप्स्वाम्गान॥ 32निरिक्का लेनबे निनाबे साहारबेॽहा याॽमिचि ङ्येम्मेहोङ् हेन्सेन्हा याॽमिचि आप्दिक ङ्ङेन्द्वाचि, इजाङ्बाङ्निङ् योनाङा चोगुहा पार्चार ङ्खेप्सुहोङ् ङ्खाचि पास्चाताप न्जोगा, ङ्खाॽनिङ्गो सोयानुम, योना हाक्निङ्चा एको माडा याॽमि नाबे वान्नेहोङ्चा न्निङ्दा पास्चाताप न्जोगिॽवागान॥”#योना ३:५
हिङ्लुङ्गा ओम्ना
(मात्ति ५:१५; ६:२२-२३)
33 “इसाङा चा कुप्पि हान्द्वाहोङ् पाथिङा म्फोप्त्वान न्हाङ् न्जुमिॽवान, ङ्खाॽनिङ्गो पाहोङ्बे उखुबाचि ओम ओतुचिनिभोङ् चान्चान्ना ठोङ्बे युक्स्वा॥ #
मात्ति ५:१५; मार्कुस ४:२१; लुका ८:१६ 34न्निङ्गा सालुङ्गा कुप्पि न्निङ्गा मिक ओम्चि॥ न्निङ्गा मिक ठिक्हाचि भोङ् न्निङ्गा घाक सालुङ् चा ओम लेङ्मे, ङ्खाॽनिङ्गो न्निङ्गा मिक ठिक मेनिन्हाभोङ् न्निङ्गा घाक सालुङ् चा कुइम लेङ्मेॽना॥ 35न्हाङामाङ् थाङ्थाङ् वायानि, न्निङ्दाबेॽना ओम्ना कुइम न्लेङ्निन्नि॥ 36न्निङ्गा घाक सालुङ् हेॽने चा कुइम मान्नाभोङ्, कुप्पिगा ओम्ना न्निङ्दाबे चाम्काचोगाना लोॽवा न्निङ्गा घाक हिङ्लुङ् चा ओम लेङ्मे॥”
येसुङा फारिसिचि नुङ् धार्मासाप्ला चिन्खुबाचि चेतावानि पिचिहा
(मात्ति २३:१-३६; मार्कुस १२:३८-४०)
37येसुङा खा चेॽया लुइचिहोङ् एको फारिसि याॽमिङा उङ् उपाङ्बे चामा चासे का॥ न्हाङा येसु न्ना फारिसिगा उपाङ्बे ख्याहोङ् चामा चासे युङा॥ 38ङ्खाॽनिङ्गो येसुङा उमुक मेवासिॽले चाम्योङ्बा चोहा निसुहोङ् न्ना काखुबा फारिसि आच्चाम्मा एता॥ 39न्हाङा हाङ्बाङा न्ना फारिसि खाॽला लु, “न्निङ्दा फारिसिचि न्निङ्गा थाल नुङ् खोरेक ओछोङ्पोटि गो नान्द्वाम्चिम्गा, ङ्खाॽनिङ्गो न्निङ्गा निङ्वाबे च्हेन पोहोङ् नुङ् इसिॽहा चेॽयाङा इप्तिमिगा॥ 40ओ मुर्खा याॽमिचि, ओछोङ्पोटि चोक्खुबाङा ओहोङ् पोटि चा चोगुना मेन्नायि? 41ङ्खाॽनिङ्गो न्निङ्गा थाल खोरेकपे इहा वान्ने ङ्खा घाकथोक तुखिसुम्बाचि पियानुम्चिम, न्हाङ् न्निङ्गा लागि घाक चेॽया सुद्दा लेङ्मेहा॥
42 “धिक्कार न्निङ्दा फारिसिचि! इजाङ्बाङ्निङ् न्निङ्दा पाधेना, आरुद् नुङ् हेकोहा घाक सिधाक पाङ्धाक्का दासाम्सा निङ्वाफुमा पिवाम्गा, ङ्खाॽनिङ्गो निरिक नुङ् निङ्वाफुमा लुङ्मा तुक्माना चेॽया च्हेन वास्ता न्जोग्वाम्गान॥ खा चेॽयागा सोरि-सोरि न्निङ्दा निरिक नुङ् लुङ्मा तुक्माहा काम चा चोक्मा साया॥ #
लेबि २७:३०
43 “धिक्कार न्निङ्दा फारिसिचि! इजाङ्बाङ्निङ् न्निङ्दा याहुदि छुम्पाङ्चिबे माम्माहा याॽमिचि युङ्माहा युक्थामचिबे युङ्मा मितिॽवागा, न्हाङ् बाजारबे याॽमिचिङा सेमेॽनिभोङ् मितिॽवागा॥ 44न्निङ्दा धिक्कार! इजाङ्बाङ्निङ् न्निङ्दा गो चिना चोक्मायि मेयामाहा सियापाङ् लोॽवाहासिगान॥ ङ्खाॽलाहा सियापाङ् छोङ्बेको याॽमिचि था मेन्जोक्ले न्लाम्मेहा॥”
45एको धार्मासाप्ला चिन्खुबाङा येसु खाॽला लु, “चिन्खुबा खा चेॽया चेक्तुगाहोङ् न्दा गो आनिङ्गा चा आब्रुक लेम्नाहाङ्मा सिम्मेकाना॥”
46येसुङा खाॽलाना पोलोवा पि, “न्निङ्दा ब्यावास्था चिन्खुबाचि चा धिक्कार! इजाङ्बाङ्निङ् न्निङ्दा खुॽमा मेयामाहा भारि याॽमिचि खुॽमेॽत्वाम्चिम्गा, ङ्खाॽनिङ्गो न्निङ्दा च्हेन भारि पोक्मा गो मेन्ना, एको मुक खेॽवाङा चा न्दोक्तिॽवाम्गान॥
47 “धिक्कार न्निङ्दा! इजाङ्बाङ्निङ् न्निङ्गा पुर्खाचिङा न्सिसुचिहा निङ्वाफुमाभाङ् चेक्खुबाचिगा उचुन्माचेक्हा सियापाङ् न्निङ्दा चोग्वाम्चिम्गा॥ # ११:४७ ङ्खाचिङा निङ्वाफुमाभाङ् चेक्खुबाचिगा स्मिर्तिगा लागि सियापाङ् न्जोगुचि ङ्खाॽनिङ्गो उङ्चिङा न्जिन्दुचिहा चेॽया च्हेन ङ्येनुनिन॥ 48खाॽला न्निङ्दा न्निङ्गा पुर्खाचिङा खाॽलाहा काम न्जोगुक्सुहाभोङ् सुइकार चोग्वाम्गा॥ ङ्खाचिङा निङ्वाफुमाभाङ् चेक्खुबाचि न्सिसुचि न्हाङा न्निङ्दा च्हेन ङ्खाचिगा सियापाङ् चोग्वाम्चिम्गा॥ 49न्हाङामाङ् घाक चेॽया निखुबा निङ्वाफुमाङा ओन्दाङ्माङ् कायामासा, ‘का ङ्खाचिगाबे निङ्वाफुमाभाङ् चेक्खुबा नुङ् सेगुम्पाकचि पाक्स्वाङ्चिङ्, ङ्खाॽनिङ्गो ङ्खाचिङा इखिङ् तुखि म्बिवाचि न्हाङ् इखिङ् न्सिस्वाचि॥’ 50कायुङ्लेनगा उथुकपाहाङ् खिङ्बेला सोम्मा न्सिसुचिहा निङ्वाफुमाभाङ् चेक्खुबाचिगा हेलिगा लेखा ना पुस्तागा याॽमिचिङा पिॽमा पोराचोङ्मेहा॥ 51जेप्पा ओम, का न्निङ्दा लुमेॽनेनिन, हाबिल न्सिसु नाहाङ्तो निङ्वाफुमापाङ् नुङ् बेदिगा उलुम्बे न्सिसुना जाकारिया#११:५१ ना एको हाङ्खुबा साया॥ उङा निङ्वाफुमागा चेॽया पार्चार चोगुहाङा न्सिसु॥ निङ्वाफुमाभाङ् चेक्खुबा सोम्मागा हेलिगा लेखा ना पुस्तागा याॽमिचिभाङ् लियाचोङ्मेहा॥#उथुक ४:८; २ उथुक्साला २४:२०-२१
52 “धिक्कार न्निङ्दा ब्यावास्था चिन्खुबाचि! इजाङ्बाङ्निङ् न्निङ्दानुङ् निङ्वाफुमा चिनाचोक्माना वालाम्बुङ्गा साचो वान्ने, ङ्खाॽनिङ्गो न्निङ्दा आफाइ चा ङ्ङुइमिगान, न्हाङा हेकोहाचि चा उमा म्बिक्सुम्चिम्गान॥”
53येसु न्नाभाङ् लोन्दाख्याहोङ्, ब्यावास्था चिन्खुबाचि नुङ् फारिसिचिङा बिरोध चोक्साङ् प्याक उतुम्बे छिम्योक छिम्मा न्दारोक्तु॥ 54न्हाङा उङा पोलोवा पिमेॽनिङ् चेॽया खोक्सिॽवाहोङ् लाप्मा तोङ्मेॽनायेमभोङ् माउका सोॽमा न्दारोक्तु॥
Currently Selected:
लुका 11: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
