लुका 12
12
येसुङा किहि काप्खुबाचि चेतावानि पिचिहा
(मात्ति १०:२६-२७)
1ङ्खिङ्बेला न्नाबे माहोम्बोक हाक्निङ् प्याक याॽमिचि न्छुप्सानाङा एकोङा हेकोना चोसाङ् तुसाङ् न्जोघेक्सा सा॥ ङ्खिङ्बेला येसुङा ओन्दाङ् उका चेलाचि खाॽला लुचि, “न्निङ्दा फारिसिचिगा खामिरभाङ् थाङ्थाङ् वायानि॥ न्ना खामिर बाङ्ना किहि काप्माना निङ्वा ओम॥#मात्ति १६:६; मार्कुस ८:१५ 2एप्ताहा चेॽया इखिङ् वान्ने, ङ्खा घाक होम्भोङ्मे न्हाङ् चुमाहा चेॽया इखिङ् वान्ने, ङ्खा घाक था लेङ्मेहा॥#मात्ति ४:२२; लुका ८:१७ 3न्हाङामाङ् इहा न्निङ्दा स्वाक काइमिगा, ङ्खा चेॽया घाकङा खेम्मे॥ पाङ्होङ्बे स्वाक-स्वाक चेक्तिघा चेॽया पाङ्गा चुलिभाङ् पार्चार चोङ्मेहा॥”
इसानुङ् किसिॽमाहा
(मात्ति १०:२८-३३; १२:३२)
4येसुङा खाॽला लुचि, “काम्निभाकचि, का न्निङ्दा लुम्मेॽनेनिन, याॽमिचिनुङ् ङ्गिसितानिन॥ ङ्खाचिङा न्निङ्गा सालुङ् सिमा ङ्यासु होङ्चा न्निङ्गा आत्मा इच्चा चोक्मा ङ्यास्वानिन॥ 5ङ्खाॽनिङ्गो इसानुङ् किसिॽमाहा, का न्निङ्दा लुम्मेॽनेनिन्हा॥ इसानुङ् सालुङ् सिस्वाहोङ् नाराकपे लेम्नाहाङ्माना साक्ति वान्ने, न्नानुङ्माङ् किसितानि॥ 6इना याङ् हिच्चिबे फा ओटा पेचिरिॽवाचि न्छुङ्मेनिन्हायि? ङ्खाॽनिङ्गो ङ्खाचिबे एको चा निङ्वाफुमाङा म्मुन्दिॽवान्ना॥ 7उङा न्निङ्गा गो झान एको-एको ताम्फोक चा निरुक्सुहा न्हाङामाङ् ङ्गिसितानिन, न्निङ्दा प्याक पेचिरिॽवाचि हाक्निङ्चा प्याक ओमेन आखुबासिगान॥
8 “का न्निङ्दा लुम्मेॽनेनिन, इसाङा का याॽमिचिगा उयुम्बे आका हाङ्बा ओमभोङ् सुइकार चोङ्मेङ्, न्ना याॽमिगा उच्याङा चा निङ्वाफुमागा वालोक्दुतचिगा उयुम्बे सुइकार चोग्वा॥ 9ङ्खाॽनिङ्गो इसाङा का याॽमिगा उयुम्बे चिनान्दोक्त्वाङान्ना लुमेङ्, न्ना याॽमिगा उच्याङा चा निङ्वाफुमागा वालोक्दुतचिगा उयुम्बे चिनान्दोङ्मेॽनेन्ना ल्वाना॥ 10इसा याॽमिगा उच्यागा बिरुद्दाबे चेङ्मे, न्नाङा छेमा तोक्त्वा, ङ्खाॽनिङ्गो इसाङा पाबित्तारा आत्मागा बिरुद्दाबे इसिॽहा चेॽया चेक्त्वा, न्नाङा च्हेन हेॽनिङ्चा छेमा न्दोक्त्वान्ना॥#मात्ति १२:३२; मार्कुस ३:२९
11 “याॽमिचिङा न्निङ्दा लाबिॽवागाहोङ् याहुदि छुम्पाङ्चिबे, खाङ्खाङ्बाचि नुङ् तायेन्राङ्बाचिगा उयुम्बे खेतिॽवागा॥ ङ्खिङ्बेला कानिङ् इलुॽमाहाचि भोङ् चिन्ता न्जोगानिन॥ #
मात्ति १०:१९-२०; मार्कुस १३:११; लुका २१:१४-१५ 12पाबित्तारा आत्माङा ङ्खिङ्बेलामाङ् न्निङ्दा चिन्दिॽवाघा॥”
थुङ्दुना मुर्खा याॽमिगा ताप्चेॽया
13प्याक याॽमिलुम्भाङ् एको याॽमिङा येसु खाॽला लु, “चिन्खुबा, ‘न्नुन्छागा आङ्साबान्डा फोक्सुबि’ भोङ् आफु लुताब्याङ्, न्हाङ् उङा आका आङ्सा फोङ्बिॽङानि॥”
14येसुङा न्ना याॽमि खाॽला लु, “काम्निभाक का इसाङा न्जिङ्गा आङ्सा हाम्बिखुबा, नुङ् निरिक चोङ्बिखुबा चोगाघा?” 15न्हाङा उङा न्नाबे न्छुप्साहा याॽमिचि लुचि, “थाङ्थाङ् वायानि, याङ्सा लुङ्मा ङ्गिप्तानुम्निन, इजाङ्बाङ्निङ् याङ्सा इखिङ् प्याक वाहोङ्चा ङ्खाङा याॽमि हिङ्लुङ् म्बिवान्ना॥”
16न्हाङा येसुङा ङ्खाचि एको खाॽलाना ताप्चेॽया लुचि, “एको थुङ्दुना याॽमिगा उलाम्धाङ्बे प्याक चाचिॽया केक्सा॥ 17न्नाङा उनिङ्वाबे मिॽमा तारोक्तु, ‘खा घाक चाचिॽया हेॽने युङ्माहा लोप्पि? कानुङ् ठोङ्माङ् मान, हाकु इ चोक्ङा?’ 18न्हाङा न्नाङा काया, ‘का हाकु खाॽला चोङ्मेङ्ना, आका मिमिॽहा चाचिॽयादाङ् होराहाक्स्वाङ्चिङ्होङ् माम्माहा चोग्वाङ्चिङ् न्हाङा न्नाबेॽमाङ् घाक चाचिॽया नुङ् युबाक थिङ्खाक युक्स्वाङ्हा॥ 19न्हाङा का आफाइ कान्चामेङ्, न्दा इखिङ् तुवाराङ्बागान! न्दानुङ् प्याक फिम्बिलिङ् सोम्मा खोखुबा याङ्सा वान्ने, हाकु खुम्दु-खुम्दु चासाङ् नुङ् उङ्साङ् चोन्दास्या॥’
20 “ङ्खाॽनिङ्गो निङ्वाफुमाङा न्ना लु, ‘ओ मुर्खा, हेन सेॽनिमाङ् न्सोक्मा खेम्मे न्हाङ् न्दा ओप्तुघोङ् युक्सुघा खा घाक याङ्सा इसागा लेङ्मेहा?’” 21न्हाङा येसुङा ना ताप्चेॽया याॽनिसाङ् खाॽला लुचि, “आफाइगा लागि च्हेन प्याक याङ्सा ओप्खुबा, ङ्खाॽनिङ्गो निङ्वाफुमाबे थुङ्दुना मेलेङ्खुबा याॽमि खाॽलामाङ् लेङ्मेॽना॥”
चिन्ता मेन्जोक्माहा
(मात्ति ६:२५-३४)
22न्हाङा येसुङा उका चेलाचि लुचि, “का न्निङ्दा लुम्मेॽनेनिन हिङ्मागा लागि इहा चाम्ङा नुङ् इहा वाम्ङा भोङ् चिन्ता न्जोगानिन॥ 23चाम्योङ्बा हाक्निङ् हिङ्लुङ् न्हाङ् तेफेन हाक्निङ् सालुङ्माङ् माडा ओम॥ 24आॽवाचि सोयानुम्चिम! ङ्खाचिङा याङ्लि चा ङ्ङोहेत्वानिन, ङ्खोप्स्वानिन चा, चाचिॽयादाङ् चा म्मानिन, ङ्खोङ्चा निङ्वाफुमाङा ङ्खाचि चामेत्वाचि॥ न्निङ्दा गो ङ्खा न्वाकुच्याकचि हाक्निङ् प्याक ओमेन्गा सिगान॥ 25न्निङ्दा माध्येबे इसाङा चिन्ता चोङ्मेहोङ् उका हिङ्लुङ्बे मिॽयाङ् आयु पुमा यास्वानायि? 26खिङ् मिना काम चा चोक्मा ङ्यास्वाम्गान्नाभोङ् इजाङ् हेकोहा चेॽयागा चिन्ता चोगिॽवाघा?
27 “पुङ्दाबेॽहा लिलिफुङ् सोयानुम, ङ्खा इमिन पुमेहा? ङ्खाचिङा काम चा न्जोग्वानिन, तेक चा ङ्ङाग्वानिन॥ ङ्खाॽनिङ्गो का न्निङ्दा लुम्मेॽनेनिन, हाङ् सोलोमाननुङ् ङ्खिङाहा याङ्सा वायाहोङ्चा उङा ङ्खा फुङ्हिङ्गा चा उचुन्हा तेक ङ्वाक्सान॥ #
१ हाङ् १०:४-७; २ उथुक्साला ९:३-६ 28हेन उचुन्माचेक ओखुबा वान्दिक्ङा चोम्दिमेहोङ् मिबे हुन्नाहाङ्माहा याक्साङ् चा निङ्वाफुमाङा खाॽला सिङ्रा चोग्वाहाभोङ्, न्निङ्दा गो झान वाॽमाहा तेक म्बिइवागान्हायि? हेॽनायि न्निङ्गा बिस्वास?
29 “न्हाङामाङ् इहा चाम्ङा, इहा वाम्ङा भोङ् चिन्ता न्जोगानिन॥ 30हेकोहा जातिचिङाले खाॽलाहा चेॽयागा चिन्ता न्जोङ्मे॥ खा घाकथोक न्निङ्दा चाहाबा चोगिॽवाघा बाङ्ना चेॽया न्निङ्गा निङ्वाफुमाङा पा था वान्नेॽना॥ 31ङ्खाॽनिङ्गो ओन्दाङ् निङ्वाफुमागा राज्या योगानुम न्हाङा खा घाक थोक न्निङ्दा पिइवाघा॥”
वालोकपेॽहा याङ्सा
(मात्ति ६:१९-२१)
32येसुङा उका चेलाचि खाॽला लुचि, “न्निङ्दा मिॽयाङ् सामुङ्चि लोॽवासिगान, ङ्खाॽनिङ्गो ङ्गिसितानिन! इजाङ्बाङ्निङ् न्निङ्गा वालोकपेॽना पाङा न्निङ्दा उका राज्या पिॽमा मितिमिघा॥ 33न्निङ्दानुङ् वेॽहा घाकथोक इनुचायानुम न्हाङ् तुखिसुम्बाचि याङ् पियानुम्चिम॥ न्निङ्गा लागि हेॽनिङ्चा उलिप्पा मेलेङ्खुबा नुङ् मेनाङ्खेखुबा खेसुप चोगानुम्चिम न्हाङ् हेॽनिङ्चा नास मेलेङ्माहा याङ्सा वालोकपे छुप्सानुम॥ न्नाबे खुसुबाङ्चिङा चा ङ्खुस्वानिन, न्हाङा फिबाकचिङा चा न्ज्वानिन॥ 34इजाङ्बाङ्निङ् हेॽने न्निङ्गा याङ्सा वान्ने, न्नाबेॽमाङ् न्निङ्गा निङ्वा चा वाम्मेॽना॥”
मेइम्ले चेन्चेन वायानि
(मात्ति २४:४५-५१)
35 “न्निङ्गा फोखिमा उचुन छिक्सानुम्चिम न्हाङ् न्निङ्गा कुप्पि हान्दामासानुम्चिम॥ #
मात्ति २५:१-१३
36न्निङ्दा थाङ्छेङ्गा होक्ताभाङ् लान्दाराखुबा पाङ्ह्वाङ्बागा लाम्बु सोन्नुङ्खुबा नोकोरचि लोॽवा लेक्सानि॥ ङ्खाचिङा पाङ्ह्वाङ्बा तामेहोङ् वालाम्बुङ् ढ्वाक्ढ्वाक चोग्वाना सोलोक वालाम्बुङ् ङ्होसुबिवा॥ 37न्हाङ् पाङ्ह्वाङ्बा तामेॽनिङ् मेइम्ले चेन्चेन वाखुबा ङ्खा नोकोरचिङा सेब्बास न्दोक्त्वाहोङ् न्जोन्सिमे॥ जेप्पा का न्निङ्दा लुम्मेॽनेनिन, न्ना पाङ्ह्वाङ्बाङा ङ्खा नोकोरचि खोलोङ्बाचि लोॽवा तुमागा त्यार लेङ्मे, न्हाङ् ङ्खा नोकोरचि उचुन युङ्मेत्वाचिहोङ् चाम्योङ्बा पिवाचि॥
38 “ङ्खाॽलामाङ् न्ना पाङ्ह्वाङ्बा सेॽनिलुम्बे ताहोङ्चा, भेनिक ताहोङ्चा उङ् तामेॽनिङ् उका नोकोरचि मेइम्ले तुप्सुचिभोङ्, उङा झान प्याक सेब्बास पिवाचि न्हाङ् ङ्खा नोकोरचि झान तुक्नुङ् न्जोन्सिमे॥
39 “ङ्खाॽनिङ्गो खा चेॽया आसानुम, खुसुबाङ् इखिङ्बेला तामेॽनाभोङ् पाङ्ह्वाङ्बाङा था तोक्तुनिङ्बि उङ् मेइम्ले चेन्चेन वायाबि, न्हाङ् खुसुबाङ् खुङ्खेॽमा म्बिन्बि॥ 40ङ्खाॽलामाङ् न्निङ्दा चा चेन्चेन वायानि, इजाङ्बाङ्निङ् न्निङ्दा म्मितुम्गान्ना बेलाक्पे याॽमिगा उच्या तामेॽना॥”
41न्हाङा पात्तुरुसङा येसु छिम्दु, “हाङ्बा ना ताप्चेॽया आनिङ्गा लागि से लुयाघायेम, घाक्का लागि येम?”
42हाङ्बाङा पोलोवा पि, “बुद्दिमान नुङ् निङ्वाङा चोना भान्डारे इमिन्ना याॽमि लोप्पि? पाङ्ह्वाङ्बाङा उपाङ्गा घाक तार्तुम्बि तोङ्माहा जिम्मा पिइवाहोङ् बुद्दिमानि नुङ् निङ्वाङा चोना नोकोरङा हेकोहा उका नोकोरचि बेलाबे चामा-उङ्मागा तार्तुम्बि तोक्सुबिवाचि॥ 43पाङ्ह्वाङ्बा लान्दारामेॽनिङ् न्ना भान्डारे ङ्खाॽलामाङ् काम चोक्मास्याना तुप्स्वानिङ् न्ना भान्डारे इखिङ् प्याक आसिक तोक्खुबा याॽमि लेङ्मेॽना॥ 44जेप्पा का न्निङ्दा लुम्मेॽनेनिन, न्ना भान्डारे पाङ्ह्वाङ्बाङा उका घाक याङ्सा छोङ्बे चा चोक्तोक पिवाहा॥ 45ङ्खाॽनिङ्गो न्ना भान्डारेङा उनिङ्वाबे ‘मालिक ताम्बा लान्दारामेॽना’ मिमेहोङ्, उङ् चासाङ्, उङ्साङ् चोङ्मे न्हाङ् सिस्वाहोङ् हेकोहा नोकोर नोकोरनिचि मोक्मा तारोक्तुचि भोङ्, 46न्नागा ह्वाङ्बा न्नाङा म्मितुन्ना नुङ् आस न्जोगुन्ना लेनबे तान्दिमेहोङ् न्ना प्याक दान्डा पिवा, न्हाङ् न्नागा तुखि निङ्वाफुमागा चेॽया मेयेन्खुबाचिगा लोॽवा लेङ्मेहा॥
47 “पाङ्ह्वाङ्बागा उनिङ्वा था तोक्त्वाहोङ् चा त्यार मेवाखुबा नुङ् पाङ्ह्वाङ्बागा उनिङ्वा लोॽवा काम मेन्जोक्खुबा नोकोरङा च्हेन प्याक दान्डा तोक्त्वा॥ 48ङ्खाॽनिङ्गो पाङ्ह्वाङ्बागा उनिङ्वा था मेन्दोक्ले दान्डा तोक्माहा काम चोक्खुबाङा मिॽयाङ्से दान्डा तोक्त्वाहा॥ इसा प्याक पियामा, न्नाभाङ् प्याक माङ् नाङ्मे, ङ्खाॽलामाङ् इसा प्याक जिम्मा पियामा न्नाभाङ् झान प्याक लियाचोङ्मेहा॥”
तोङ्से मेन्ना फोङ्से
(मात्ति १०:३४-३६)
49न्हाङा येसुङा खाॽला लुचि, “का ताम्दाङ्फुमाबे मि तिसे#१२:४९ याॽमिचि खिमेॽमाचिहोङ् फोङ्मेसे॥ तायाङ्ना ओम॥ न्ना मि ओन्दाङ् नाहाङ्तोमाङ् हान्दुक्सानिङ्बि उचुन लेक्साबि॥ 50का चा एको तुखिगा बाप्तिस्मा लियाचोक्माना वान्ने॥ न्ना लियामेन्जोक्ले सोम्मा आसोक्मा हिप्सिसेहेक्सुना॥#मार्कुस १०:३८ 51इना, का कायुङ्लेनबे हाङ्हाङ् पिसे तायाङ्नाभोङ् मितिॽवाघायि? मेन्ना, का गो याॽमिचि फोङ्से तायामाङ्ना ओम॥ 52हाकु नाहाङ्तो फा याॽमि ङ्वान्नेॽना पाङ्बे सुम्भाङ्गा बिरुद्दाबे हिप्पाङ्, न्हाङ् ङ्खा हिप्पाङ्गा बिरुद्दाबे सुम्भाङ् म्बोङ्मेहोङ् म्फोङ्मेहा॥ 53उप्पा उच्या बाबुगा बिरुद्दाबे पोङ्मे, ङ्खाॽलामाङ् उच्या बाबु उप्पागा बिरुद्दाबे पोङ्मेॽना॥ न्हाङा उमा-उच्या मामुगा बिरुद्दाबे, ङ्खाॽलामाङ् उच्या मामु उमागा बिरुद्दाबे पोङ्मेॽना॥ उनाम्मा उताङ्मेक्का बिरुद्दाबे, न्हाङ् उताङ्मेक उनाम्मागा बिरुद्दाबे पोङ्मेॽना॥”#मिका ७:६
चिङ्गो सोयानुम्घोङ् आसानुम
(मात्ति १६:२-३)
54न्हाङा येसुङा न्नाबे ङ्वायाहा प्याक याॽमिचि लुचि, “न्निङ्दा नाम्युङ् पोटि खिम्फुरुम्मा पोगाक्याहा निसुम्गाभोङ् सोलोक काइवागा ‘हाकु वासिक तामेॽना’ न्हाङा ङ्खाॽलामाङ् वासिक चा तामे॥ 55छुप्तालाङ्भाङ् हिॽवा फेम्मेॽनिङ् काइवागा ‘हाकु ह्वाङ्मा पोक्त्वाना’ न्हाङ् ङ्खाॽलामाङ् लेङ्मे॥ 56ओ किहि काप्खुबाचि! खाॽला ताम्दाङ्फुमा नुङ् ताङ्खेङ् स्वाम्गाहोङ् वासिक तामेॽनायेम न्दामेन्नायेम भोङ् कामा गो यासिॽवागा, ङ्खाॽनिङ्गो खिङ्बेलाक लेक्सेहेक्साहा चेॽयागा चिङ्गो च्हेन इजाङ् ङ्ङास्वाम्गान्हा?
57 “न्निङ्दा न्निङ्गा लागि इचोक्मा उचुन लेङ्मेहाभोङ् इजाङ् ङ्ङास्वाम्गान्हा? 58न्निङ्दा आप्दिक एन्दिघोङ् निरिक्पाङ्बे खेतिगाभोङ् लाम्बुबेॽमाङ् न्नानुङ् तोङाब्यानि॥ मानुङ् न्नाङा न्निङ्दा निरिक्राङ्बागा ओन्दाङ् येप्मेतिवागा न्हाङ् न्ना निरिक्राङ्बाङा काङ्बाचिबे जिम्मा लाचोगिॽवागा, न्हाङ् ङ्खाचिङा न्निङ्दा खेतिॽवागाहोङ् छेक्पाङ्बे छेक्तिॽवाघा॥ 59का न्निङ्दा लुम्मेॽनेनिन, न्निङ्दा हुङ्माहा घाक याङ् मेहुङ्ले सोम्मा न्नाभाङ् लोन्मा ङ्यासिॽवागान्हा॥”
Currently Selected:
लुका 12: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
