लुका 19
19
येसु नुङ् तिरो पोक्खुबा जाखायास
1येसु यारिहो साहार लेङ्साङ् खेॽमास्या॥ 2न्ना साहारबे जाखायास बाङ्ना एको थुङ्दुना याॽमि वाया, उङ् तिरो पोक्खुबाचिगा हाङ्गुम्बा साया॥ 3उङा येसु इसा ओमभोङ् सोॽमा मितु, ङ्खाॽनिङ्गो उङ् नेप्नेप्ना साया, न्हाङा प्याक याॽमिचिङा ङ्ङेप्तिहोङ् येसु निमा ङ्यासुन॥ 4न्हाङा येसु सोॽमाभोङ् उङ् ओन्दाङ्-ओन्दाङ् लुक्साङ् ख्याहोङ् एको वेक्पुगा सिङ्छोङ्बे थाङा॥ इजाङ्बाङ्निङ् येसु न्ना लाम्बुभाङ् खेॽमास्या॥
5येसु न्ना ठोङ्बे तायाब्याहोङ् तो जाखायास सोहोङ् खाॽला लु, “ओ जाखायास, हानि मो उक्सा, इजाङ्बाङ्निङ् हेन का म्बाङ्बे बास याङ्मेङ्ना॥” 6जाखायास सोलोक चोन्सिसाङ् मो उक्सा, न्हाङा येसु उपाङ्बे तिक्तेहेतुहोङ् स्वागात चोगु॥ 7खा न्निसुहोङ् ङ्खा घाक याॽमिचि खाॽला कासाङ् गान्गान चोक्मा न्दारोक्तु, “ना याॽमि गो पापिगा पाङ्बेॽले बास याक्से ख्याना॥”
8जाखायास उपाङ्बे चेङ् पोगाहोङ् येसु खाॽला लु, “हाङ्बा खेप्सु, हाकु का आका याङ्सागा उचाबेलेक तुखिसुम्बाचि हाप्सुबिवाङ्चिङ्, न्हाङ् याॽमिचिभाङ् लेम्चासाङ् याङ् पोगुक्सुङ्हा भोङ्, का ङ्खाचिगा ना गुना लासुबिवाङ्चिङाहा॥”
9येसुङा जाखायास लु, “हेन निङ्वाफुमाङा ना पाङ्बेॽहा याॽमिचि मुक्ति पिइमिघा, इजाङ्बाङ्निङ् न्दा चा आब्राहामगा सान्तानमाङ् ओम्गान॥ 10याॽमिगा उच्या म्मासाब्याहाचि योक्से नुङ् मुक्ति पिसे तायाना ओम॥”#मात्ति १८:११
साम्मेङ् याङ्गा ताप्चेॽया
(मात्ति २५:१४-३०)
11येसुङा लुचिहा चेॽया ङ्खाचिङा ङ्खेम्मास्या॥ ङ्खिङ्बेला येसु यारुसालेम साहारगा उयुम्बे तायाब्यामासा॥ याॽमिचिङा निङ्वाफुमागा राज्या येसु यारुसालेम तास्वाहोङ् सोलोक तामेॽनाभोङ् म्मितामासा॥ ङ्खा चेॽया था तोक्तुहोङ् उङा ङ्खाचि एको खाॽलाना ताप्चेॽया लुचि, 12“एको थुङ्दुना याॽमि उका खाम्युक्का हाङ् लेङ्दाराॽमागा एको माङ्दुना खाम्युकपे ख्या॥#१९:१२ ङ्खिङ्बेला रोमि हाङ्गा तायेनबे प्याक खाम्युकचि ङ्वाया॥ ङ्खाबे राज्या चोक्खुबा घाकङा रोमि हाङ्गा तायेनबे युङ्माहोङ् राज्या चोक्माहा साया॥ 13उङ् खेॽमाहाक्निङ् ओन्दाङ् एखेङ् उका नोकोरचि काचिहोङ् एको-एको साम्मेङ् याङ् पिसाङ् खाॽला लुचि, ‘का मेलान्दाराॽले सोम्मा खा याङ्ङा बेपार चोगानुम॥’ 14ङ्खाॽनिङ्गो उका खाम्युकपेॽहा याॽमिचिङा च्हेन उङ् साप न्थाक्तुक्सानिन, न्हाङ् उङ् खेब्याहोङ् खाॽला लुसे हाङ्लाम्बाचि म्बाक्सुचि, ‘ना याॽमि आनिङ्गा लागि हाङ् न्लेङ्निन्नि॥’
15 “हेक्साङ् न्ना याॽमि हाङ् लेक्साहोङ्माङ् लासाराया॥ तायाब्याहोङ् सोलोक उङा याङ् पिओचिहा नोकोरचिङा बेपार न्जोगुहोङ् इखिङ् याङ् ङ्ङुबुहा भोङ् छिम्मागा काचि॥ 16इम्ना नोकोरङा तायाहोङ् खाॽला लु, ‘आहाङ्बा, न्दा पिॽयाङ्गाना एको साम्मेङ् याङ्ङा हेकोहा एखेङ् याङ् उबुक्सुङ्चिङ्हा॥’
17 “ह्वाङ्बाङा न्ना लु, ‘सेब्बास! न्दा उचुन्ना नोकोरगान, न्दा मिना चेॽयाबे चा बिस्वासिलो लेक्सागा, हाकु का न्दा एखेङ् साहारचिगा तायेन्राङ्बा चोङ्मेॽनेन्ना॥’ 18हिम्ना नोकोर तायाहोङ् लु, ‘आहाङ्बा, न्दा पिॽयाङ्गाना एको साम्मेङ् याङ्ङा हेकोहा फा याङ् उबुक्सुङ्चिङ्हा॥’ 19न्हाङा न्ना लु, ‘न्दा चा फा साहारगा तायेन्राङ्बा चोङ्मेॽनेन्ना॥’
20 “हेकोना नोकोर तायाहोङ् लु, ‘आहाङ्बा, ङ्गा याङ् न्हे वेॽना॥ ना का रुमोलबे छुङुङ्होङ् चुमुक्साङ्ना॥ 21का न्दानुङ् किसिताङ्, इजाङ्बाङ्निङ् न्दा छाक्ना याॽमिगान॥ न्दा गो म्बिन्चिगान्हा चा नाक्त्वाचिगा, न्दा ङ्होयेतुगान्हा ठोङ्भाङ् चा चाचिॽया खोप्स्वागा॥’
22 “ह्वाङ्बाङा न्ना लु, ‘ओ इसिॽना नोकोर, ङ्गा चेॽयाभाङ्माङ् का ङ्गा निरिक चोङ्बिॽमेॽनेन्हा॥ म्बिन्चिङान्हा चा नाक्खुबा, न्हाङ् ङ्होयेतुङान्ना ठोङ्भाङ् चा खोम्खुबा का छाक्ना याॽमिङान भोङ् न्दा था वायामा, 23ङ्खाॽलाभोङ् न्दा आका याङ् इजाङ् ब्याजपे न्दिसुगान्ना? ब्याजपे तिसुक्सागानिङ्बि का लासारायाङ्निङ् आका याङ्गा ब्याज को तोक्तुङ्बि॥’
24 “न्हाङा ह्वाङ्बाङा न्नाबे ङ्येबाहाचि खाॽला लुचि, ‘न्नानुङ् वेॽना याङ् नाप्तानुम्घोङ् एखेङ् याङ् वाखुबा पियानुम॥’ 25ङ्खाचिङा न्लु, ‘आहाङ्बा उका गो एखेङ् याङ् ङ्ङोॽह्याचि!’ 26हाङ्ङा खाॽला लुचि, ‘का न्निङ्दा लुमेॽनेनिन, इसानुङ् वान्ने, न्ना हाकुचा प्याक पिमे, ङ्खाॽनिङ्गो इसानुङ् मान, न्नाभाङ् मिॽयाङ् वायाहा चा नाप्निमे॥#मात्ति १३:१२; मार्कुस ४:२५; लुका ८:१८ 27हाकु का हाङ् लेक्साङ्ना साप मेन्थाक्खुबा आका सात्तुरचि नाबे तायानुम्चिम्घोङ् आयुम्बे सिसानुम्चिम॥’”
यारुसालेमबे येसु स्वागात न्जोगुना
(मात्ति २१:१-११; मार्कुस ११:१-११; युहान्ना १२:१२-१९)
28ना ताप्चेॽया लुइचिहोङ् येसु यारुसालेम पोटि लाचोगा॥ 29उङ् बेथ्फागे नुङ् बेथानिया तेनगा उयुम्बेॽना जाइतुन बाङ्ना कोङ्गुबे तासु॥ न्हाङा हिप्पाङ् उका चेलाचि खाॽला लुचिहोङ् पाक्सुचि, 30“युयुन्ना तेनबे ख्याचि, न्नाबे न्जिङ्दा खिङ् सोम्मा इसाङा चा ङ्युक्तुनिन्ना गाधागा उच्या छुयानेसाना तुम्मेचुगा॥ न्ना फुक्साचुघोङ् न्हे तायाचु॥ 31याॽमिचिङा ‘ना इजाङ् फुङ्मेचुगाना?’ लुयाचिगा भोङ्, ‘हाङ्बा चाहाबा चोगामाना’ भोङ् लुयाचुचि॥” 32ङ्खा हिप्पाङ् चेलाचि तेनबे ख्याचि, न्हाङ् येसुङा लुचिहा लोॽवा उङ्चिङा छुयामासाना गाधागा उच्या तुप्साचु॥ 33ङ्खाचिङा न्ना फुङ्मास्याचिनिङ् उह्वाङ्बाचिङा न्छिम्दुचि, “ना इजाङ् फुङ्मासिम्मेचिघा?”
34ङ्खाचिङा लुयाचुचि, “ना हाङ्बा चाहाबा चोगामाना॥” 35न्हाङा उङ्चिङा न्ना गाधा खेताचुहोङ् न्नागा उमिसिङ्बे उङ्चि फोॽमा थिक्साचुचि न्हाङा येसु न्ना छोङ्बे थाङ्मेताचु॥
36येसु खेॽमास्यानिङ् याॽमिचिङा उङ् आदार चोक्मागा उङ्चिगा फोॽमाचि लाम्बुबे न्थिक्सुबि॥
37येसु जाइतुन कोङ्गुगा उइमालाङ्नाबे तायाब्यानिङ् उङा चोगुहा आच्चाम्माहा काम म्मितुहोङ् घाक याॽमिचिङा चोन्सिसाङ् माडा सेम्लाङा निङ्वाफुमागा पार्साम्सा चोक्मा न्दारोक्तु–
38“हाङ्बा निङ्वाफुमागा उनिङ्बे ताखुबा हाङ्
इखिङ् आसिक तोक्खुबा ओम!
वालोकपे हाङ्हाङ् लेङ्नि,
न्हाङा निङ्वाफुमागा माहिमा लेङ्नि॥”#छेम ११८:२६
39ङ्खाॽनिङ्गो प्याक याॽमिचिगा उलुम्बे ङ्वाह्या एकोहिप्पाङ् फारिसिचिङा येसु न्लु, “चिन्खुबा, ङ्गा चेलाचि स्वाक वायानि लुचि॥”
40येसुङा पोलोवा पिचि, “का न्निङ्दा लुमेॽनेनिन, खाचि स्वाक ङ्वायाभोङ् गो लुङ्खाकचि ले ङ्ङोङ्मेहा॥”
येसु यारुसालेमगा लागि हाबाना
41येसु यारुसालेम साहारगा उयुम्बे तायाब्यानिङ् न्ना साहार निसुहोङ् हाबा न्हाङा खाॽला काया, 42“ओ यारुसालेमबेॽहा याॽमिचि, न्निङ्दा हेन हाङ्हाङ् इमिन तोक्माना भोङ् निसुम्गानिङ्बि उचुन लेक्साबि! ङ्खाॽनिङ्गो न्निङ्दा न्निसुम्गान॥ 43हाकु खाॽलाहा लेन न्दामे, न्निङ्गा सात्तुरचिङा न्निङ्दा यो-खे, तो-मो घाकपाहाङ् ओरिपोरि ओन्दिॽवाघोङ् छेक्तिॽवागा॥ 44ङ्खाचिङा यारुसालेम नुङ् न्नाबे वाखुबा घाक याॽमिचि नास चोगिॽवागा॥ ङ्खाचिङा एको लुङ्खाक छोङ्बे हेकोना लुङ्खाक चा मेनाॽनाले घाक ङ्होराक्स्वा, इजाङ्बाङ्निङ् निङ्वाफुमा न्निङ्दा हिङ्मेसे तायाना बेला चिनातोक्मा ङ्यासुम्गान॥”
येसु निङ्वाफुमापाङ्बे
(मात्ति २१:१२-१७; मार्कुस ११:१५-१९; युहान्ना २:१३-२२)
45न्हाङा येसु निङ्वाफुमापाङ्गा चारामबे ख्या, न्हाङ् उङा न्नाबे बेपारिचि खाॽला लुसाङ् लोन्धाक्सुचि, 46“धार्मासाप्लाबे खाॽला छेप्तामा, ‘आपाङ् पार्थाना चोक्माना पाङ् लेङ्मेॽना’ ङ्खाॽनिङ्गो न्निङ्दा ना खुसुबाङ्चिगा लुङ्ढाङ्ले चोगुक्सुम्गा॥”#यासाइया ५६:७; यार्मिया ७:११
47न्हाङा येसुङा लेनगा लेन निङ्वाफुमापाङ्बे चिन्दुचि॥ ङ्खाॽनिङ्गो खाङ्खाङ् हाङ्खुबाचि, धार्मासाप्ला चिन्खुबाचि नुङ् हेकोहा हाङ्गुम्बाचिङा उङ् सिमा ङ्योगु॥#लुका २१:३७ 48ङ्खाॽनिङ्गो ङ्खाचिङा हेॽने चा माउका न्दोक्तुनिन, इजाङ्बाङ्निङ् घाक याॽमिचिङा उङा चिन्दुचिहा चेॽया खेम्मा साप न्थाक्तु॥
Currently Selected:
लुका 19: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
