लुका 20
20
येसुगा चोक्तोक्का उतुम्बे छिम्योक
(मात्ति २१:२३-२७; मार्कुस ११:२७-३३)
1इलेन येसुङा निङ्वाफुमापाङ्गा चारामबे याॽमिचि चिन्साङ् नुसाला खेम्मेॽमास्या॥ ङ्खिङ्बेला धार्मासाप्ला चिन्खुबाचि, खाङ्खाङ् हाङ्खुबाचि नुङ् हेकोहा हाङ्गुम्बाचि न्नाबे न्दायाहोङ् येसु न्छिम्दु, 2“कानिङ् लुया, न्दा हेॽना चोक्तोकङा खा काम चोक्मा सिम्मेकाना? ना चोक्तोक इसाङा पियागाना?”
3येसुङा ङ्खाचि खाॽलाना पोलोवा पिचि, “का चा न्निङ्दा एको चेॽया छिम्मेॽनेनिन, का पोलोवा पिया॥ 4युहान्नाङा बाप्तिस्मा पिॽमाना चोक्तोक हेॽनाहाङ् तोक्तुना? निङ्वाफुमाभाङ् येम, याॽमिचिभाङ् येम?”
5खा ङ्खेप्सुहोङ् उङ्चि-उङ्चि खाॽला कामा न्दारोक्तु, “हाकु कानिङ् इ लुम? निङ्वाफुमाभाङ् लुम्बाङ्निङ् ‘इजाङ् उङ् बिस्वास न्जोगुम्गान्ना?’ भोङ् छिम्मे॥ 6याॽमिभाङ् लुम्बाङ्निङ् खा न्छुप्साहा याॽमिचिङा लुङ्खाकङा लेम्सिमे, इजाङ्बाङ्निङ् ङ्खाचिङा युहान्ना निङ्वाफुमाभाङ् चेक्खुबाभोङ् जेप्पागा बिस्वास न्जोग्वा॥” 7न्हाङामाङ् ङ्खाचिङा येसु न्लु, “इस्साङ्, हेॽनाहाङ् तोक्तुना कानिङ् था मान्ना॥”
8ङ्खोङ् येसुङा चा खाॽला लुचि, “ङ्खाॽलाभोङ् का चा हेॽनाहाङ् चोक्तोक तोक्तुङ्होङ् खा काम चोक्मासिम्मेङ्ना, न्निङ्दा न्लुमेॽनेनिन्हा॥”
सिम्लेॽमाङ्हाम आध्या चोक्खुबाचिगा ताप्चेॽया
(मात्ति २१:३३-४६; मार्कुस १२:१-१२)
9न्हाङा येसुङा याॽमिचि खाॽलाना ताप्चेॽया लुचि, “एको याॽमिङा लाम्धाङ्बे सिम्लेॽमाङ् एन्दु, न्हाङ् न्ना सिम्लेॽमाङ्हाम आध्याबे याॽमिचि पिओचिहोङ् प्याक लेनगा लागि उङ् हेकोना खाम्युकपे ख्या॥#यासाइया ५:१ 10सिम्लेॽमाङ् तुमाहोङ् ह्वाङ्बाङा उभाक लाल्लासे एको उका नोकोर पाक्सु, ङ्खाॽनिङ्गो ङ्खा याॽमिचिङा न्ना म्मोक्तुहोङ् इहाचा मेम्बिॽले खाॽला न्लासाहाक्सु॥ 11न्हाङा लाम्धाङ्गा ह्वाङ्बाङा हेकोना नोकोर चा पाक्सु, ङ्खाचिङा न्ना चा म्मोक्तु न्हाङ् इसिॽनुङ् न्जोगुहोङ् इहाचा मेम्बिॽले न्लासाहाक्सु॥ 12न्हाङा उङा फेरि हेकोना नोकोर पाक्सु॥ ङ्खाचिङा न्ना चा सिमानाहिङ्मा न्जोगुहोङ् सिम्लेॽमाङ्हामभाङ् न्लोधाहाक्सु॥
13 “खिङ् लेक्साब्याहोङ् सिम्लेॽमाङ्हाम्गा ह्वाङ्बाङा काया, ‘हाकु का इ चोक्ङा? आलुङ्मा तुक्तुङ्ना आच्या पाक्स्वाङ्ना, ङ्खाचिङा उङ् गो आदार न्जोग्वाना लोप्पि॥’ 14ङ्खाॽनिङ्गो ङ्खा आध्या चोक्खुबा याॽमिचिङा उङ्चि ह्वाङ्बागा उच्या तायेॽना न्निसुहोङ् खाॽला साल्लाहा न्जोगा, ‘न्ना तायेॽना सिम्लेॽमाङ्हाम्गा ह्वाङ्बागा उच्या ओम॥ आबानि, कानिङ् न्ना सिसुम न्हाङ् न्नागा याङ्सा घाक एङ्गा लेङ्मेहा॥’ 15न्हाङ् ङ्खाचिङा उङ् सिम्लेॽमाङ्हामभाङ् न्लोन्धेतुहोङ् न्सिसु॥”
येसुङा छिम्दुचि, “हाकु न्ना सिम्लेॽमाङ्हाम्गा ह्वाङ्बाङा ङ्खाचि इ चोग्वाचिहा लोप्पि? 16का न्निङ्दा लुमेॽनेनिन, उङ् तामेहोङ् ङ्खा आध्या चोक्खुबाचि घाक सिस्वाचि, न्हाङ् सिम्लेॽमाङ्हाम हेकोहा याॽमिचि पिवाचि॥”
खा ङ्खेप्सुहोङ् याॽमिचिङा ङ्गाया, “ङ्खाॽला गो हेॽनिङ्चा न्लेङ्निन्नि॥”
17येसुङा ङ्खाचि सोसाङ् खाॽला लुचि, “ङ्खाॽलाभोङ् धार्मासाप्लाबे छेप्ताहा खा चेॽयागा तुम्बिला इना ओम?
‘लुङ्छेङ्बाचिङा काम लान्जोङ्मेन्ना ङ्गायाहोङ् न्लेप्ताहाक्सुना लुङ्खाकमाङ् सुरगा मुक्खे लुङ्खाक लेक्सा॥’ #
छेम ११८:२२
18 “न्ना लुङ्खाक छोङ्बे आॽनुङ्खुबा घाक टुक्रा-टुक्रा न्लेङ्मे, न्हाङ् इसा छोङ्बे न्ना लुङ्खाक आॽनुङ्मे न्ना पिच्चिक-वाच्चिक लेङ्मेॽना॥” 19धार्मासाप्ला चिन्खुबा नुङ् खाङ्खाङ् हाङ्खुबाचिङा खा चेॽया उङ्चिगा बिरुद्दाबे येसुङा लुचिहा ओम बाङ्ना था न्दोक्तुहोङ् उङ् न्नाबेॽमाङ् लाप्मागा न्जोगु, ङ्खाॽनिङ्गो याॽमिचिनुङ् ङ्गिसिता॥
तिरो हुङ्माना उतुम्बे छिम्योक
(मात्ति २२:१५-२२; मार्कुस १२:१३-१७)
20न्हाङामाङ् उङ्चिङा येसु स्वाक लाप्माना माउका सोॽमा न्दारोक्तु॥ उङ्चिङा एकोहिप्पाङ् याॽमिचि “न्निङ्दा धार्मोति याॽमिचि लोॽवा लेक्सिखेइघोङ् उङा खोक्सिॽवाहा चेॽयाबे लाबानुम” न्लुचिहोङ् येसुगा चियो चोक्से म्बाक्सुचि॥ उङ्चिङा येसुङा खोक्सिहा चेॽयाबे लाप्माहोङ् रोमिचिगा माडा-खाङ्खाङ्बागा उमुकपे सुम्पेचोक्मा म्मितुक्सा॥ 21ङ्खाचि ङ्ख्याहोङ् येसु खाॽला न्छिम्दु, “चिन्खुबा, कानिङ् था वान्ने, न्दा ठिक चेङ्मेका न्हाङ् ठिक चिम्मेका, इसा चा तो-मो न्स्वान्चिगान, न्दा गो जेप्पागा निङ्वाफुमागा लाम्बु सोॽमेमेका॥ 22कानिङ् रोमि हाङ् तिरो हुङ्मा ठिक्नायेम मेन्नायेम?”
23ङ्खाॽनिङ्गो येसुङा ङ्खाचिगा इसिॽना निङ्वा था तोक्तुहोङ् खाॽला लुचि, 24“का एको युप्पा याङ् सोप्मेता॥ नाबे इसागा छाप नुङ् उनिङ् वेॽना?”
ङ्खाचिङा न्लु, “काइसारगा॥”
25उङा ङ्खाचि लुचि, “ङ्खाॽलाभोङ् हेखा काइसारगा ओम, ङ्खा काइसार पियानुम, न्हाङ् हेखा निङ्वाफुमागा ओम निङ्वाफुमा पियानुम॥”
26ङ्खाचिङा याॽमिचिगा उयुम्बे हेखाचा चेॽयाबे येसु आन्सिमेॽमा ङ्यासुनिन, न्हाङ् उङा पिचिहा पोलोवाबे आच्चाम्मा एसाङ् स्वाक ङ्वाया॥
सिमाहोङ् हिङ्गिलिक लेङ्माना चेॽयागा उतुम्बे छिम्योक
(मात्ति २२:२३-३३; मार्कुस १२:१८-२७)
27याॽमि सिमाहोङ् हिङ्गिलिक न्लेक्सिवान्हा भोङ् मिखुबा सादुकि छुमगा एकोहिप्पाङ् याॽमिचि येसु वायानाबे न्दायाहोङ् उङ् खाॽलाना छिम्योक न्छिम्दु,#सेगुम्पाक २३:८ 28“चिन्खुबा मोसाङा कानिङ् ब्यावास्थाबे खाॽला छेप्ताब्यामा, ‘इसा बाबु थाङ् छेङ्मेहोङ् उच्या मेवाले सिम्मे, न्नागा लाङ्निमा लेक्साना उहिङ्खुमा उका उमोटेङ्बाङा थाङ् छेङुहोङ् उफुगा लागि च्याचि तोक्चुचिनि॥’#ब्यावास्था २५:५ 29इमा ला जाना फुनुन्छा ङ्वाया॥ ङ्खाचिबे तुम्ना थाङ् छेङाहोङ् उच्या मेवाले स्या, 30न्हाङा छालुम्बाङा लाङ्निमा उभाउजु थाङ् छेङु, ङ्खाॽनिङ्गो उङ् चा उच्या मेवाले स्या॥ 31न्हाङा पाक्छालुम्बाङा थाङ् छेङु, उङ् चा उच्या मेवाले स्या॥ ङ्खाॽलामाङ् ङ्खा घाक फुनुन्छाचि उङ्चि भाउजुनुङ् थाङ् न्छेङा ङ्खाॽनिङ्गो च्या मेवाले घाक न्स्या॥ 32हेक्साङ् न्ना मामु चा स्या॥ 33हाकु सिमाहोङ् हिङ्गिलिक लेङ्मानिङ् न्ना मामु इसागा उहिङ्खुमा लेङ्मेॽना लोप्पि? इजाङ्बाङ्निङ् ङ्खाचि घाकनुङ् उङ् थाङ् छेङामा॥”
34येसुङा ङ्खाचि खाॽलाना पोलोवा पिचि, “ना कायुङ्लेनबे वाखुबा याॽमिचि थाङ् न्छेङ्मे, न्हाङ् न्छेङ्दुबिवाचि॥ 35ङ्खाॽनिङ्गो न्स्याहाभाङ् हिङ्गिलिक न्लेक्साहोङ् वालोकपे खेॽमा लाइक न्लेक्साहा याॽमिचि च्हेन थाङ् न्छेङ्मेनिन न्हाङ् न्छेङ्दुबिवान्चिनिन चा॥ 36ङ्खाचि फेरि हेॽनिङ्चा न्सिमेनिन, इजाङ्बाङ्निङ् वालोक्दुतचि लोॽवा न्लेङ्मेहा॥ ङ्खाचि निङ्वाफुमाङा न्स्याहाभाङ् हिङ्गिलिक लेङ्मेतुचिहोङ् हेॽनिङ्चा मेन्सिमाना हिङ्लुङ् पिचिहाङा निङ्वाफुमागा उच्याचि न्लेङ्मे॥ 37न्स्याहा याॽमिचि ङ्हिङ्मेहा बाङ्ना चेॽयागा पार्मान गो मोसाङा चा उचुन पियामा॥ उङा हाम्मास्याना बुट्टागा उतुम्बे छेप्तुनिङ् हाङ्बा निङ्वाफुमा, ‘आब्राहाम, इसाहाक नुङ् याकुबका निङ्वाफुमाभोङ् लुक्सु॥’#सेगुम्पाक ३:६ 38उङ् गो न्स्याहाचिगा मेन्ना, ङ्खाॽनिङ्गो हिङ्गिलिक्हाचिगा निङ्वाफुमा ओम, इजाङ्बाङ्निङ् निङ्वाफुमागा सोयायिबेको घाक हिङ्गिलिक्हाचि॥”#२०:३८ याॽमि सिमे होङ्चा उका आत्मा न्सिमेन्ना॥
39एकोहिप्पाङ् धार्मासाप्ला चिन्खुबाचिङा येसु खाॽला न्लु, “चिन्खुबा, न्दा उचुन्ना पोलोवा पियाघा॥” 40न्हाङा ङ्खा याॽमिचिङा येसु इहाचा चेॽया छिम्माना आट् माङ् चोक्मा ङ्यासानिन॥
खिरिस्टका उतुम्बे छिम्योक
(मात्ति २२:४१-४६; मार्कुस १२:३५-३७)
41येसुङा ङ्खाचि छिम्दुचि, “याॽमिचिङा खिरिस्ट इमिन दाउद हाङ्गा सान्तान भोङ् न्ल्वाना? 42-43दाउदङा छेप्तुना छेमगा छेप्तापपे उङा खाॽला कायामा–
‘हाङ्बा निङ्वाफुमाङा आका हाङ्बा लु,
ङ्गा सात्तुरचि न्लाङ्ङा
मेम्बाॽमेले सोम्मा
न्दा आका छुप्ताङ् आमुक पोटि युङा॥’ #
छेम ११०:१
44 “दाउदङा माङ् निङ्वाफुमाङा पाक्सुना खिरिस्ट ‘हाङ्बा’ ल्वानाभोङ्, फेरि इमिन उङ् दाउदका सान्तान लेक्साना?”
ब्यावास्था चिन्खुबाचिगा बिरुद्दाबे चेतावानि
(मात्ति २३:१-३६; मार्कुस १२:३८-४०)
45घाक याॽमिचिङा ङ्खेप्सुक्सानिङ्माङ् येसुङा उका चेलाचि खाॽला लुचि, 46“धार्मासाप्ला चिन्खुबाचिभाङ् थाङ्थाङ् वायानि॥ ङ्खाचिङा गो सोॽमेमागा लागि प्याक ओमेन आखुबा तेक ङ्वावाहोङ् कोॽमा म्मिमे, न्हाङ् बाजारबे याॽमिचिङा आदार चोक्होङ् सेमेॽनिभोङ् म्मिमे न्हाङ् याहुदि छुम्पाङ्बे नुङ् होक्ताबे उचुन्हा-उचुन्हा माम्माहा याॽमिचि युङ्माहा युक्थामबे युङ्मा ङ्योङ्मे॥ 47ङ्खाचिङा लाङ्निमाचिगा घाक याङ्सा न्नाप्तेहेतुबिवाचि न्हाङ् सोॽमेमागा लागि केङ्गेहा पार्थाना न्जोङ्मे॥ ङ्खाॽलाहा याॽमिचिङा घाक हाक्निङ् माडा दान्डा न्दोक्त्वाना॥”
Currently Selected:
लुका 20: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
