लुका 21
21
लाङ्निमागा भेटि
(मार्कुस १२:४१-४४)
1येसुङा निङ्वाफुमापाङ्गा भेटि याङ्धाङ्बे थुङ्दुहा याॽमिचिङा भेटि ङ्ङेन्मास्याहा निसुचि॥ 2न्नाबे उङा एको तुखिसुम्मा लाङ्निमाङा चा ताबागा हिच्चि याङ् एन्दुचिहा निसु॥
3खा निसुहोङ् येसुङा लुचि, “जेप्पा का न्निङ्दा लुमेॽनेनिन, ना तुखिसुम्मा लाङ्निमाङा घाक हाक्निङ् प्याक भेटि एन्दुक्सुहा॥ 4इजाङ्बाङ्निङ् खाचि घाकङा ङ्ङोन्दुहा याङ्साभाङ् भेटि ङ्ङेन्दुक्सु, ङ्खाॽनिङ्गो ना लाङ्निमा तुखिसुम्मा होङ्चा उका घाकथोक चोक्माहा याङ् नाबे एन्दुक्सुहा॥”
आखेरि लेनगा चिङ्गोचि
(मात्ति २४:१-१४; मार्कुस १३:१-१३)
5इमा येसुगा चेलाचि निङ्वाफुमापाङ्गा उतुम्बे खाॽला कासाङ् साला न्लेन्मास्या, “उचुन्माचेक्हा लुङ्खाकचिङा चोगाना नुङ् निङ्वाफुमाबे न्दिसुहा भेटिङा सिङ्रा चोगाना ना निङ्वाफुमापाङ् इखिङ् उचुन्ना उङ्!” ङ्खाॽनिङ्गो येसुङा ङ्खाचि खाॽला लुचि, 6“खाॽलाना लेन तामे, न्ना लेन लोप नाबे ङ्ङोताहा पाङ्चिगा एको लुङ्खाक छोङ्बे हेकोना लुङ्खाक चा मेयुङ्ले घाक ङ्होन्नाहाङ्मेहा॥”
7ङ्खाचिङा न्छिम्दु, “चिन्खुबा, खा घाक हेॽनिङ् लेङ्मेहा? न्हाङ् खाॽला लेक्सेहेक्साहाभोङ् कानिङ् इमिन था तोक्माहा?”
8येसुङा लुचि, “थाङ्थाङ् वायानि, न्निङ्दा इसाङा चा लेम्चामा ङ्यासिगान्नि, इजाङ्बाङ्निङ् प्याक याॽमिचि आनिङ्बे ‘खिरिस्ट कामाङ् ओम्ङान’ कासाङ् न्दामे न्हाङ् ‘हाकु ना कायुङ्लेन नास्टा लेङ्माना बेला तायाब्याना’ भोङ् लुइवागा, ङ्खाॽनिङ्गो ङ्खाचिगा हेक्साङ् लान्जोगानिन॥ 9माम्माहा लाडाइ नुङ् ङ्खियाहा न्दुयाहा चेॽया खेप्स्वाम्गानिङ् ङ्गिसितानिन॥ ङ्खा घाक चेॽया ओन्दाङ् इमिन्होङ्चा लेङ्मामाङ् पोर्ने ओम, ङ्खाॽनिङ्गो ङ्खिङ्बेलाक्माङ् कायुङ्लेन नास को न्लेङ्मेन्ना॥”
10येसुङा फेरि लुचि, “जातिगा बिरुद्दाबे जाति, नुङ् खाम्युक्का बिरुद्दाबे खाम्युक म्बोङ्मे॥ 11प्याक ठोङ्बे माम्माहा लुक्लिबा ङ्खेमे, न्हाङा घाकपे आनिकाल पोक्त्वा, उमुरुङ् पोक्त्वा न्हाङ् ताङ्खेङ्बे किसिॽमालुलुहा चिङ्गो ङ्ङोमे॥ 12ङ्खाॽनिङ्गो खा घाक चेॽया लेङ्मा हाक्निङ् ओन्दाङ्, न्निङ्दा का बिस्वास चोगाघाङा याॽमिचिङा लाबिॽवागा, तुखि पिइवागा, याहुदि छुम्पाङ्चिबे खेतिॽवागाहोङ् आप्दिक एन्दिॽवागा न्हाङ् छेक्पाङ्बे छेक्तिॽवागा॥ ङ्खाचिङा न्निङ्दा हाङ्चि नुङ् माम्माहा खाङ्खाङ्बाचिगा ओन्दाङ् येप्मेतिॽवागा॥ 13न्ना च्हेन आका उतुम्बे याॽमिचि लुॽमाना न्निङ्गा उचुन्ना माउका लेङ्मेॽना॥ 14न्हाङामाङ् न्निङ्दा हिङ्मागा लागि इलुॽमाहाचि लोप्पिभोङ् ओन्दाङ्माङ् चिन्ता न्जोगानिन॥ 15इजाङ्बाङ्निङ् का न्निङ्दा खाॽलाहा चेक्माहा चेॽया नुङ् बुद्दि पिमेॽनेनिन, न्निङ्दा लुम्चिम्घा चेॽयागा पोलोवा न्निङ्गा बिरोधि इसाङा चा पिॽमा ङ्यासिॽवागान न्हाङ् न्निङ्गा चेॽया मेन्हाभोङ् कामा चा ङ्यामेनिन॥#लुका १२:११-१२ 16न्निङ्दा न्निङ्पा माङा, फुनुन्छाङा, आफान्ताचिङा नुङ् काम्निभाकचिङा चा लाप्मेतिॽवागा, न्हाङ् न्निङ्दाबे इखिङ्गो सिमेतिॽवागा॥ 17का बिस्वास चोगाघाङा घाक याॽमिचिङा न्निङ्दा इसितिॽवागा॥ 18ङ्खाॽनिङ्गो न्निङ्गा एको ताम्फोक चा न्निङ् टुखुरुकपाहाङ् ङ्ङाङ्खेमेन्ना॥ 19न्निङ्दा खा घाक चेॽया आङ्दानुम न्हाङ् न्निङ्दा हिङ्लुङ् तोक्त्वाम्गाना॥”
यारुसालेम साहार नास लेङ्माना सालेन
(मात्ति २४:१५-२१; मार्कुस १३:१४-१९)
20 “न्निङ्दा यारुसालेम साहार काङ्बाचिङा ओरिपोरि ङ्ङोन्दुना निस्वाम्गानिङ् हाकु न्ना साहारगा नास लेङ्माना बेला तायामाना बाङ्ना चेॽया था तोक्तानुम॥ 21ङ्खिङ्बेला याहुदिया लिङ्खामबे वाखुबाचि चोम्कोङ् पोटि न्लुङ्खेॽनि॥ साहारबे वाखुबाचि साहार पाखा न्लुङ्खेॽनि, न्हाङ् तेनबे वाखुबाचि साहारबे ङ्ङुनिन्नि॥ 22इजाङ्बाङ्निङ् धार्मासाप्लाबे छेप्ताहा घाक चेॽया पुरा लेङ्मागा खा दान्डा पिप्माहा लेनचि न्लेङ्मेहा॥#होसे ९:७ 23ङ्खा लेनचि फोक खुखुमाचि नुङ् नु उङ्मेखुमा मामुचिगा लागि इखिङ् किॽमालुलु लेङ्मेहा लोप्पि! इजाङ्बाङ्निङ् ना खाम्युक घाकपे किसिॽमालुलुहा तुखि आन्दारामे, न्हाङ् निङ्वाफुमागा दान्डा खा घाक याॽमिचि छोङ्बे आमे॥ 24ङ्खाचि कि साम्बेकङा न्जेनिसिॽवाचि कि खाम्युक खाम्युकपे छेक्पा न्जोघेत्वाचि॥ ङ्खोङ् हेकोहा जातिचिगा लेन पुरा मेलेङ्ले सोम्मा ङ्खाचिङा यारुसालेम साहार म्बात्वा म्बित्वाना॥”
याॽमिगा उच्या तामाना उतुम्बे
(मात्ति २४:२९-३१; मार्कुस १३:२४-२७)
25 “न्हाङा नाम, ला नुङ् चोक्चोकिचिबे आच्चाम्माहा चिङ्गो ओमे॥ सामुन्दारा कायाना नुङ् किसिॽमालुलुहा छालचिङा ताम्दाङ्फुमाभोरि घाक जातिगा याॽमिचि तुक्नुङ् ङ्गिसिमे न्हाङ् चिन्ताबे ङ्ङामे॥ #
यासाइया १३:१०; इजिकिएल ३२:७; योएल २:३१; पार्कास ६:१२-१३ 26हाकु ताम्दाङ्फुमाबे ताहेक्साहा तुखि म्मित्वाहोङ् किसिॽमाङा याॽमिचि उङ्चि लावाङा नाॽवाचि, इजाङ्बाङ्निङ् ताङ्खेङ्बेॽहा घाक साक्तिचि ङ्योङ्मे॥ 27न्हाङा याॽमिगा उच्या खिम्फुरुम्माबे माडा साक्ति नुङ् माहिमाबे तायेॽना न्निस्वा॥#दानिएल ७:१३; पार्कास १:७ 28खाॽलाहा चेॽया लेङ्मा तारोक्त्वानिङ् न्निङ्दा मेङ्गिसिॽले चेङ् येबानि, इजाङ्बाङ्निङ् न्निङ्गा मुक्ति न्निङ्युम्बे तान्दिनुङ्मेॽना॥”
वेक्पुगा उथाप्पाहाङ् चिन्दुचिहा
(मात्ति २४:३२-३५; मार्कुस १३:२८-३१)
29न्हाङा येसुङा ङ्खाचि ना ताप्चेॽया लुचि, “वेक्पु नुङ् हेकोहा घाक सिङ्गा उथाप सोयानुम, 30ङ्खाबे ओछोङा उलाभाक क्याहा निस्वाम्गानिङ् न्निङ्दा था तोक्त्वाम्गा नाम्तुक्नाम#२१:३० गिरिस्मा रितु लाचोघेक्साना॥ 31ङ्खाॽलामाङ् का लुॽनेनिन्हा खा घाक चेॽया लेङ्मा तारोक्तुहा निस्वाम्गानिङ् निङ्वाफुमागा राज्या तायाबेहेक्सानाभोङ् था तोक्तानुम॥ 32जेप्पा का न्निङ्दा लुमेॽनेनिन, खा घाक चेॽया पुरा मेलेङ्ले सोम्मा ना पुस्तागा याॽमिचि नास न्लेङ्मेनिन्हा॥ 33ताङ्खेङ् नुङ् ताम्दाङ्फुमा मान्दिमेचि, ङ्खाॽनिङ्गो आका चेॽया हेॽनिङ्चा म्मान्दिमेन्हा॥
थाङ्थाङ् वायानि
34 “न्निङ्दा थाङ्थाङ् वायानि, प्याक होक्ता-नाम्दाबे न्लामानिन, सिङ्घोसाङ् न्लामानिन, ना हिङ्लुङ्गा चिन्ता न्जोगानिन॥ मानुङ्गो न्निङ्गा निङ्वा पोम्ना लेङ्मे न्हाङ् न्ना लेन निङ्गा लागि न्वाकुच्याकचि वाइबे ङ्ङामेहा लोॽवा म्मितुम्गान्ना बेलाबे तामे॥ 35ताम्दाङ्फुमाबे वाखुबा घाक याॽमिचि छोङ्बे न्ना लेन आन्दारामे॥ 36न्हाङामाङ् चेन्चेन वायानि, ङ्खा घाक किसिॽमालुलुहा चेॽयाभाङ् हिङ्माहोङ् याॽमिगा उच्यागा उयुम्बे मेङ्गिसिॽले येप्मा यामाना साक्ति कानिङ् पियाभोङ् निङ्वाफुमा नुङ् साधाइ पार्थाना चोगानि॥”
37येसुङा लेॽनि-लेॽनि निङ्वाफुमापाङ्बे चिन्दुचि, न्हाङ् सेॽनि च्हेन जाइतुन बाङ्ना कोङ्गुबे बास याक्से ख्या॥#लुका १९:४७ 38उका चेॽया खेम्से याॽमिचि भेनिक निङ्वाफुमापाङ्बे न्दायामासा॥
Currently Selected:
लुका 21: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
