लुका 22
22
येसु सिमागा न्जोगुना
(मात्ति २६:१-५,१४-१६; मार्कुस १४:१-२,१०-११; युहान्ना ११:४५-५३)
1खामिर मेएन्लेहा चालेप्पा चामाना याहुदिचिगा फोङ्होक्नाम ताहेक्सासा॥#पारास्थान १२:१-२७ 2खाङ्खाङ् हाङ्खुबाचि नुङ् धार्मासाप्ला चिन्खुबाचिङा येसु सिमा न्जोगुक्सा, ङ्खाॽनिङ्गो याॽमिचिनुङ् ङ्गिसिताहोङ् उङ् स्वाक सिमाना माउका सोॽमा न्दारोक्तु॥
3न्हाङा ङ्खा एहिच चेलाचि माध्येबे एको याहुदा इस्कारियोतका उनिङ्वाबे साइतान उया॥ 4न्हाङ् याहुदा इस्कारियोत खाङ्खाङ् हाङ्खुबाचि नुङ् निङ्वाफुमापाङ् कुखुबाचिगा केप्टेनचिगाबे ख्याहोङ् “येसु इमिन लाम्बिॽमा यामेॽनेनिन्हा” बाङ्ना चेॽयागा उतुम्बे ङ्खाचिनुङ् साल्लाहा चोगा॥ 5खा ङ्खेप्सुहोङ् ङ्खाचि न्जोन्दास्या, न्हाङ् याहुदा “कानिङ् याङ् पिमेॽनेनिन्हा” भोङ् न्लु॥ 6खा चेॽयाबे याहुदा चा काक्सा न्हाङ् याॽमिचिङा था मेन्दोक्ले येसु स्वाक लाप्मेमाचिगा उङा माउका सोॽमा तारोक्तु॥
घाक हाक्निङ् हेक्साङ्ना होक्ता
(मात्ति २६:१७-३०; मार्कुस १४:१२-२६; युहान्ना १३:२१-३०; १ कोरिन्थि ११:२३-२५)
7खामिर मेएन्लेहा चालेप्पा चामाना फोङ्होक्नाम ताया, न्ना लेन सामुङ्गा उच्या बोलि पिॽमाना लेन साया॥ 8येसुङा पात्तुरुस नुङ् युहान्ना खाॽला लुचिहोङ् पाक्सुचि, “ख्याचिघोङ् फोङ्होक्नामगा होक्ता त्यार चोगाचु॥”
9ङ्खाचिङा छिम्दाचु, “हेॽने त्यार चोक्चुङ्?”
10उङा ङ्खाचि लुचि, “सोयाचु, न्जिङ्दा साहारबे उमेचिगानिङ् घाइलाबे माङ्च्वा खुखुबा एको याॽमि तुम्मेचुगा, न्ना याॽमि हेॽना पाङ्बे उमे न्ना सोम्मा ओहेक्साङ्-ओहेक्साङ् ख्याचि॥ 11न्हाङा न्ना पाङ्गा उह्वाङ्बा खाॽला लुयाचु, ‘आका चेलाचिनुङ् फोङ्होक्नामगा होक्ता चामाना कोठा हेॽने वेॽना?’ भोङ् चिन्खुबाङा न्दा छिम्दामागाना॥ 12उङा न्जिङ्दा तोप्पारिक्ङा उचुन सेक्साना, उचुन तोक्साना माडा कोठा सोॽमेमेचिगा, न्नाबेॽमाङ् होक्ता त्यार चोगाचु॥” 13ङ्खाचि ख्याचि, ङ्खोङ् घाक चेॽया येसुङा लुचिहा लोॽवामाङ् तुप्साचु न्हाङा ङ्खाचिङा फोङ्होक्नामगा होक्ता न्नाबेॽमाङ् त्यार चोगाचु॥
14चामाना बेला लेक्साहोङ् येसु एहिच उका चेलाचिनुङ् चासे युङा॥ 15येसुङा ङ्खाचि लुचि, “का तुखि आङ्मा हाक्निङ् ओन्दाङ् ना फोङ्होक्नामगा होक्ता न्निङ्दानुङ् चामाभोङ् तुक्नुङ् मितामासाङ्॥ 16इजाङ्बाङ्निङ् का न्निङ्दा लुमेॽनेनिन, निङ्वाफुमागा राज्याबे ना होक्तागा तुम्बिला पुरा मेलेङ्ले सोम्मा#२२:१६ निङ्वाफुमागा राज्याबे उका याॽमिचिङा पुरा छुट्कारा मेन्दोक्ले सोम्मा॥ का ना होक्ताबे फेरि न्जावाङान्हा॥”
17न्हाङा येसुङा खोरेकपेॽहा सिम्लेॽमाङ्गा उवा उमुकपे याङुहोङ् निङ्वाफुमा नुनिङ्वा पि, न्हाङ् खाॽला लुचि, “खा ताप्तानुम, न्हाङ् न्निङ्दा घाकङा हाप्साचायानुम॥ 18का न्निङ्दा जेप्पा लुमेॽनेनिन, हाकु नाहाङ्तो निङ्वाफुमागा राज्या मेन्दाले सोम्मा का फेरि सिम्लेॽमाङ्गा उवा ङ्ङुङ्वाङान्हा॥”
19न्हाङा येसुङा चालेप्पा उमुकपे याङु न्हाङ् निङ्वाफुमा नुनिङ्वा पिइहोङ् न्ना एगु, न्हाङ् ङ्खाचि खाॽला लुसाङ् पिचि, “न्निङ्दा पिॽनेन्निन्हा ना आका सालुङ् ओम॥ हाकु नाहाङ्तो का मिॽमागा लागि खाॽलामाङ् चायानुम॥” 20ङ्खाॽलामाङ् न्जोइहोङ् येसुङा खोरेक याङुहोङ् चेलाचि खाॽला लुचि, “ना खोरेक आहेलिबे थुन्दाना ओछोङा कारार ओम॥#यार्मिया ३१:३१-३४ खा न्निङ्गा लागि याङाहा#२२:२० बागाचोगाहा आका हेलि ओम॥
21 “ङ्खाॽनिङ्गो सोयानुम! का लाप्मेखुबा याॽमि कानुङ् चासे युङामा॥ #
छेम ४१:९
22याॽमिगा उच्या गो निङ्वाफुमाङा मितुहा लोॽवामाङ् इमिन्होङ्चा सिमे, ङ्खाॽनिङ्गो धिक्कार, न्ना याॽमि! इसाङा याॽमिगा उच्या धोका पिवा॥” 23खा चेॽया ङ्खेप्सुहोङ् चेलाचि उङ्चि-उङ्चि “खाॽलाहा काम चोक्खुबा इसा लोप्पि?” कासाङ् छिम्खुसा न्जाया॥
घाक हाक्निङ् माडा इसा ओम?
(मात्ति २०:२५-२८; १९:२८; मार्कुस १०:४२-४५)
24न्हाङा चेलाचिबे घाक हाक्निङ् माडा इसा ओम? भोङ् उङ्चि-उङ्चि कामा न्दारोक्तु॥#मात्ति १८:१; मार्कुस ९:३४; लुका ९:४६ 25येसुङा ङ्खाचि लुचि, “कायुङ्लेनबेॽहा हाङ्चिङा उङ्चिगा याॽमिचि छोङ्बे राज्या न्जोग्वा, न्हाङ् ङ्खाचि ‘कानिङ् उङ्चिगा काम्निभाक सिङान’ भोङ् ङ्गाम्मे॥#मात्ति २०:२५-२७; १०:४२ 26ङ्खाॽनिङ्गो न्निङ्दा च्हेन ङ्खाॽला न्लेक्सानिन॥ न्निङ्दाबे इसा मा, न्ना मि लेङ्नि, न्हाङ् हाङ्गुम्बा च्हेन नोकोर लोॽवा लेङ्नि॥#मात्ति २३:११; मार्कुस ९:३५ 27चासे युङ्खुबा उह्वाङ्बा नुङ् चामा पिखुबा नोकोरबे हेॽना च्हेन माडा ओम? उह्वाङ्बा मेन्नायि? ङ्खाॽनिङ्गो सोयानुम, का गो न्निङ्गा युम्बे चामा पिखुबा नोकोर लोॽवाङान॥#युहान्ना १३:१२-१५
28 “आका घाक तुखिबे न्निङ्दा कानुङ् वाइगा॥ 29आप्पाङा का तायेन चोक्माना चोक्तोक पियाङ्ना लोॽवा का चा न्निङ्दा पिमेॽनेनिन्हा॥ 30आका राज्याबे न्निङ्दा कानुङ् युङिॽवाघोङ् चावाम्गा न्हाङा हाङ्युक्थामबे युङिॽवाघोङ् इजिरेलबेॽहा एहिच छोङ्बे तायेन चोग्वाम्घा॥”#मात्ति १९:२८
पात्तुरुसङा येसु इन्कार चोगुना चेॽयागा उतुम्बे
(मात्ति २६:३१-३५; मार्कुस १४:२७-३१; युहान्ना १३:३६-३८)
31न्हाङा येसुङा लु, “सिमोन, ओ सिमोन खेप्सु, टोॽवाङा#२२:३१ खेति चोक्खुबा चाचिॽयाभाङ् उसिप थाभाक्स्वाहा लोॽवा साइतानङा चा न्निङ्गा बिस्वास थाप्माना आग्गे निङ्वाफुमानुङ् नाक्तुक्सु॥ 32ङ्खाॽनिङ्गो ङ्गा बिस्वास म्मान्दिॽनिन्निभोङ् का पार्थाना चोङ्बिनुङ्नेन॥ फेरि न्दा पाप पाहाङ् लासाघोङ् म्फुनुन्छाचि चा बिस्वासपे चात्तु चोगुचि॥”
33पात्तुरुसङा लु, “हाङ्बा का न्दानुङ् छेक्पाङ् सोम्मा से मेन्ना, ङ्खाॽनिङ्गो सिमा पोराचोगाभोङ्चा त्यारिङाना॥”
34ङ्खाॽनिङ्गो येसुङा न्ना लु, “पात्तुरुस जेप्पा का न्दा लुमेॽनेन, न्दा ‘का उङ् चिनान्जोग्वाङान्ना’ कासाङ् सुम्मा इन्कार मेन्जोक्ले सोम्मा हेन तितिॽलिङ्वा ङ्गामेन्ना॥”
येसुङा चेलाचि चेतावानि पिचिहा
35येसुङा उका चेलाचि खाॽला लुचि, “का न्निङ्दा नुसाला खेम्मेसे खेसुप, लाङ्खोप नुङ् याङ् मेॽनिङ् पाङ्नेनिन, इना न्निङ्दा खाचोबे आइघा?”#मात्ति १०:९-१०; मार्कुस ६:८-९; लुका ९:३; १०:४
ङ्खाचिङा लु, “मान्ना॥”
36येसुङा लुचि, “ङ्खाॽनिङ्गो हाकु याङ् वाखुबाङा याङ् खुनि, ङ्खाॽलामाङ् खेसुप वाखुबाङा खेसुप खुनि॥ न्हाङा इसानुङ् साम्बेक मान, न्नाङा उका तेक इनुचोहोङ् चा एको साम्बेक इनुनि॥ 37इजाङ्बाङ्निङ् का न्निङ्दा लुमेॽनेनिन, धार्मासाप्लाबे ‘उङ् आपाराधिचिनुङ् निराना’#यासाइया ५३:१२ भोङ् छेप्ताहा चेॽया इमिन्होङ्चा आका हिङ्लुङ्बे पुरा लेङ्मे न्हाङ् जेप्पा लेङ्मासिम्मेहा चा॥”
38चेलाचिङा न्लु, “खेप्सु हाङ्बा, नाबे हिच्चि साम्बेक ङ्वान्नेहा॥”
येसुङा लुचि, “ङ्खिङ्होङ् होइ!”#२२:३८ ङ्खाॽलाहा चेॽया न्जोगानुम्निन॥
जाइतुन कोङ्गुबे येसु पार्थाना चोगाना
(मात्ति २६:३६-४६; मार्कुस १४:३२-४२)
39साधाइहा लोॽवामाङ् येसु साहारभाङ् लोन्दाहोङ् जाइतुन बाङ्ना कोङ्गुबे ख्या, न्हाङ् उका चेलाचि चा उङ्नुङ् ङ्ख्या॥ 40न्नाबे न्दासुहोङ् उङा चेलाचि खाॽला लुचि, “जाचपे ङ्ङाइङान्निभोङ् पार्थाना चोगानि॥”
41न्हाङा येसु मियोरोक ख्याहोङ् लाङ्छुकपे युङाहोङ् खाॽला कासाङ् पार्थाना चोगा, 42“ओ आप्पा, ना तुखिगा खोरेक काभाङ् लाॽनिम्बिॽमाना न्निङ्वा वेॽनाभोङ् लातिताङ्॥ ङ्खाॽनिङ्गो आनिङ्वा लोॽवा मेन्ना, न्निङ्वा लोॽवामाङ् लेङ्नि॥” 43(न्हाङा वालोकपाहाङ् एको वालोक्दुत तायाहोङ् येसु तुखि आङ्मा यामाना साक्ति पि॥ 44उका उनिङ्वाबे प्याक तुखि लेक्साहोङ् झान प्याक पार्थाना चोक्मा तारोक्तु॥ ङ्खिङ्बेला उका ह्वाङ्मा हेलिगा माम्माहा थोपा लोॽवा खामबे आॽनुङ्मास्या)॥#२२:४४ कोइ-कोइ सोरोत बाइबोलबे ना पाद् न्दोङ्मेन्ना॥
45येसु पार्थाना चोगाब्याहोङ् चेलाचिगाबे लासाआबानिङ् ङ्खाचि सोकङा ङ्यागास्याहोङ् ङिप्सामासाहा तुप्सुचि॥ 46उङा ङ्खाचि खाॽला लुचि, “न्निङ्दा इजाङ् इप्सिनेसिॽवाघा? पोगानि न्हाङ् जाचपे ङ्ङाइङान्निभोङ् पार्थाना चोगानि॥”
येसु न्लाबुना
(मात्ति २६:४७-५६; मार्कुस १४:४३-५०; युहान्ना १८:३-११)
47येसु चेक्मास्यानिङ् एहिच चेलाचि माध्येबे एको याहुदाङा प्याक याॽमिचि तिक्तुराचि, न्हाङ् येसु उम्मा#२२:४७ याहुदि चालानबे सेमेॽमागा साटोबे उम्मा चोक्माना चालान साया॥ चोक्मागा उयुम्बे ख्या॥ 48ङ्खाॽनिङ्गो येसुङा न्ना लु, “याहुदा, इना उम्मा चोङ्मेङ्घोङ् का याॽमिगा उच्या धोका पिमेङ्गानायि?”
49न्हाङा न्नाबे इलेङ्मेहा लोप्पि म्मिताहोङ् येसुनुङ् वाखुबा चेलाचिङा न्लु, “हाङ्बा साम्बेक साक्सुम्चिम्ङा?” 50ङ्खाचि माध्येबे एको चेलाङा च्हेन मा-हाङ्खुबागा उनोकोरगा छुप्ताङ् उनाभाक च्वाट्टाइ चेन्धाक्तुबि॥
51ङ्खाॽनिङ्गो येसुङा लुचि, “होइ, हाकु खाॽला न्जोगानिन!” न्हाङा येसुङा न्ना याॽमिगा उनाभाक तोक्तितुहोङ् नुमेतुबि॥
52येसु लाप्से ताखुबाचि च्हेन खाङ्खाङ् हाङ्खुबाचि, निङ्वाफुमापाङ्गा केप्टेनचि नुङ् याहुदि हाङ्गुम्बाचि न्साया॥ येसुङा ङ्खाचि लुचि, “इना का खुसुबाङ्ङान्होङ् न्निङ्दा साम्बेक, डाङ्गाक नुङ् लाप्से ताइघाइ? 53का लेन-लेन निङ्वाफुमापाङ्बे न्निङ्दानुङ् वायाङ्निङ् लाप्मा ङ्यासागान॥ ङ्खाॽनिङ्गो हाकु न्निङ्गा काम चोक्माना बेला तायामा, न्हाङ् कुइम्नागा साक्तिङा तायेन चोक्माना बेला नामाङ् ओम॥”#लुका १९:४७; २१:३७
पात्तुरुसङा येसु इन्कार चोगुना
(मात्ति २६:५७-५८,६९-७५; मार्कुस १४:५३-५४,६६-७२; युहान्ना १८:१२-१८,२५-२७)
54ङ्खा याॽमिचिङा येसु न्लाबुहोङ् मा-हाङ्खुबागा पाङ्बे ङ्खेतु॥ न्हाङा पात्तुरुसङा चा ङ्खाचिगा उयुम्बे मेङ्खेॽले मियोरोक्पाहाङ् इक्तेहेतुचि॥ 55न्नाबे याॽमिचिङा चारामबे मि न्दुप्तुहोङ् ङ्हुन्चामा न्स्या, पात्तुरुस चा उङ्चिनुङ् युङा॥ 56एको नोकोरनिङा पात्तुरुस मि हुन्चामास्याना निसुहोङ् उचुन सोसाङ् खाॽला काया, “ना याॽमि चा येसुनुङ् वायाना॥”
57ङ्खाॽनिङ्गो पात्तुरुसङा लु, “ना मामुङा इले कामेॽना बा? का उङ् चिनान्जोग्वाङान्ना॥”
58मिहेक्साङ् हेकोना एको याॽमिङा चा उङ् निसुहोङ् खाॽला लु, “न्दा चा ङ्खाचिगा काम्निभाक्कान॥”
ङ्खाॽनिङ्गो पात्तुरुसङा पोलोवा पि, “मेन्ना, का गो मेॽङान्ना!”
59न्हाङा ए घान्टा हेक्साङ् फेरि हेकोना एको याॽमिङा लु, “जेप्पा ना याॽमि येसुनुङ् वायाना, इजाङ्बाङ्निङ् ना याॽमि चा गालिल लिङ्खामबेॽना ओम॥”
60ङ्खाॽनिङ्गो पात्तुरुसङा लु, “न्दा इ कामासिम्मेकाना, का उङ् चिनायि न्जोग्वाङान्ना॥” पात्तुरुसङा खाॽला कामास्यानुङ् तितिॽलिङ्वा चा काया॥
61ङ्खिङ्बेला येसुङा हिक्साहोङ् पात्तुरुस सो॥ न्हाङा “हेन तितिॽलिङ्वा कामा हाक्निङ् ओन्दाङ् न्दा का सुम्मा चिनान्जोग्वाङान्ना लुमेङ्गाना” भोङ् येसुङा लुहा चेॽया पात्तुरुसङा मितुरोक्तु॥ 62न्हाङ् उङ् पाखा लोन्दाहोङ् उमिॽवा लेॽनेन्साङ् इब्बे-इब्बे हाबा॥
येसु खिजेचासाङ् म्मोक्तुना
(मात्ति २६:६७-६८; मार्कुस १४:६५)
63न्हाङा येसु कुखुबा याॽमिचिङा उङ् खिजेचासाङ् म्मोक्तु॥ 64उका उमिक ङेप्तुबिहोङ् मोक्साङ् खाॽला न्छिम्दु, “लु काया, न्दा इसाङा मोक्तागाना?” 65ङ्खाचिङा येसु इसिॽनुङ् न्जोगुहोङ् नानाओलि लुसाङ् न्थिन्दु॥
येसु माछुम्माबे ङ्खेतुना
(मात्ति २६:५९-६६; मार्कुस १४:५५-६४; युहान्ना १८:१९-२४)
66ओम लेक्साहोङ् खाङ्खाङ् हाङ्खुबाचि नुङ् धार्मासाप्ला चिन्खुबा ङ्खा घाक हाङ्गुम्बाचि माछुम्माबे न्छुप्सा॥ न्हाङ् ङ्खाचिङा येसु माछुम्माबे ङ्खेतुहोङ्, 67खाॽला न्लु, “कानिङ् लुया, इना न्दा खिरिस्ट ओम्गान?”
येसुङा ङ्खाचि खाॽला लुचि, “का लुॽनेनिन भोङ्चा न्निङ्दा का बिस्वास न्जोङ्मेकान, 68न्हाङ् का छिम्नेनिन भोङ्चा पोलोवा म्बिमेकान॥ 69ङ्खाॽनिङ्गो हाकु नाहाङ्तो याॽमिगा उच्या घाक हाक्निङ् तो वाखुबा निङ्वाफुमागा छुप्ताङ् पोटि युङ्मेङ्ना॥”
70ङ्खाचि घाकङा न्लु, “ङ्खाॽलाभोङ् इना न्दा निङ्वाफुमागा उच्यागान्यि?”
येसुङा पोलोवा पिचि, “न्निङ्दामाङ् कामासिॽवागा, का निङ्वाफुमागा उच्यामाङ् ओम्ङान॥”
71उका चेॽया ङ्खेप्सुहोङ् ङ्खाचि ङ्गाया, “हाकु नागा बिरुद्दाबे कानिङ् हेकोहा साचि चाहाबा न्जोङ्मेन्हा, इजाङ्बाङ्निङ् उका उयाभाङ् माङ् खेप्सिॽया!”
Currently Selected:
लुका 22: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
