लुका 5
5
येसुङा सुम्भाङ् चेला लेङ्से काचिहा
(मात्ति ४:१८-२२; मार्कुस १:१६-२०)
1इलेन येसु गानेसारेत#५:१ ना गालिलगा ताल चा लुमेॽना॥ बाङ्ना तालगा उलाप्पे येबामासा॥#मात्ति १३:१-२; मार्कुस ३:९-१०; ४:१ ङ्खिङ्बेला न्नाबे उका ओरिपोरि प्याक याॽमिचि ओङ्चाखुपाङ्चाखु चोक्साङ् निङ्वाफुमागा चेॽया खेम्से न्दाया॥ 2येसुङा तालगा उलाप्पे हिच्चि डुङ्गा निसुचि, ङ्खाॽनिङ्गो जाल लेप्खुबाचि च्हेन डुङ्गा न्नाओचिहोङ् जाल ङ्वासिॽमा न्स्या॥ 3न्नाबेॽना एको डुङ्गा च्हेन सिमोनगा साया॥ न्ना डुङ्गाबे थाङाहोङ् येसुङा सिमोन खाॽला लु, “डुङ्गा उलाप पाहाङ् मियोरोक खेतु॥” न्हाङा उङ् डुङ्गाबे युङाहोङ् याॽमिचि चिन्मा तारोक्तुचि॥
4उङा चिन्दिचिहोङ् सिमोन खाॽला लु, “माङ्च्वा मिप्याक वेॽना ठोङ्बे खेतुघोङ् नासा लाप्मागा न्जाल लेप्तु॥”
5सिमोनङा खाॽलाना पोलोवा पि, “आहाङ्बा, कानिङ् सेॽनाम्फोक जाल लेप्तुम्चिम्ङा ङ्खाॽनिङ्गो एको चा नासा ङ्ङायान, ङ्खोङ्चा न्दा लुयाङ्गानाङा जाल लेप्त्वाङ्ना॥”#युहान्ना २१:३ 6न्हाङा जाल लेप्तु, ङ्खिङ्बेला खिङ् प्याक नासाचि ङ्ङाया, उङ्चि जालमाङ् नाङ्खेॽमा तारोक्तु॥#युहान्ना २१:६ 7उङ्चिङा हेकोना डुङ्गाबे ङ्वायाहा काम्निभाकचि चा मुक्का चालङा फासे ङ्गाचि॥ ङ्खाचि न्दायाहोङ् नासा लोम्मा न्दारोक्तुचि॥ न्लोन्दुचिनुङ्-न्लोन्दुचिनुङ् हिचिचि डुङ्गा नासाङा इप्तुचिहोङ् न्लुप्साखेक्सा॥
8खा निसुहोङ् सिमोन पात्तुरुसङा येसुगा उलाङ्बे फोप फोप्ताहोङ् खाॽला लु, “हाङ्बा का पापि याॽमिङान, आयुम्भाङ् खेब्या॥” 9इजाङ्बाङ्निङ् खिङ् प्याक नासाचि ङ्ङायाहा न्निसुचिहोङ् सिमोन नुङ् उकाम्निभाकचि घाक आच्चाम्मा ङ्येतामासा॥ 10न्हाङा ङ्खाॽलामाङ् सिमोन नुङ् काम चोक्खुबा जाब्दियागा उच्याचि याकुब नुङ् युहान्ना चा आच्चाम्मा एताचि॥ येसुङा सिमोन खाॽला लु, “न्दा ङ्गिसितान, हाकु नाहाङ्तो न्दा नासा मेन्ना, ङ्खाॽनिङ्गो याॽमिचि लाब्वाचिघोङ् काबे ताखुबा लेङ्मेकाना॥” 11न्हाङा उङ्चिङा डुङ्गाचि पाखाबे न्लोन्दुचि, न्हाङ् घाकथोक न्नाओहोङ् येसुनुङ् ङ्ख्या॥
येसुङा कोरि नुमेतुना
(मात्ति ८:१-४; मार्कुस १:४०-४५)
12इमा येसु एको साहारबे वायानिङ् सालुङ् भोरि कोरनुङ्ना याॽमि न्नाबे ताया॥ न्हाङ् लाङ्छुकपे युङाहोङ् येसु सेमेसाङ् खाॽला लु, “हाङ्बा न्दा मितागाभोङ् का नुमेॽमा यामेङ्गाना॥” 13येसुङा न्ना याॽमि छोङ्बे उमुक युक्सुहोङ् खाॽला लु, “न्दा नुगानि बाङ्ना का मिम्मेङ्, न्दा नुया॥” ङ्खिङ्बेलामाङ् न्ना कोरि याॽमि नुया॥ 14न्हाङा येसुङा न्ना याॽमि खाॽला लु, “खा चेॽया इसा चा ङ्योक्मेतुन्चिन, ङ्खाॽनिङ्गो हाङ्खुबागाबे ख्याघोङ् सोप्मेतु न्हाङा मोसाङा चिन्दिघा लोॽवा निङ्वाफुमाबे भेटि तिसुघोङ् घाक्का युम्बे न्दा नुयागाना पार्मान पिचि॥”#लेबि १४:१-३२
15ङ्खाॽनिङ्गो घाकपे उका उतुम्बे झान प्याक चेॽया हिसा॥ प्याक याॽमिचि उका चेॽया खेम्से नुङ् तुक्मा-छाक्माभाङ् नुमागा तामा न्दारोक्तु॥ 16ङ्खाॽनिङ्गो येसु च्हेन याॽमि मेॽनिङ्ना ठोङ्बे ख्याहोङ् पार्थाना चोगा॥
येसुङा पुप्साब्याना याॽमि नुमेतुना
(मात्ति ९:१-८; मार्कुस २:१-१२)
17इलेन येसुङा याॽमिचि चिन्मास्या॥ ङ्खिङ्बेला फारिसिचि नुङ् धार्मासाप्ला चिन्खुबाचि उका उयुम्बे ङ्युङामासा॥ ङ्खाचि गालिल नुङ् याहुदिया लिङ्खामबेॽहा घाक तेनचिभाङ्, न्हाङा यारुसालेम साहारभाङ् चा न्दायामासा॥ येसुनुङ् तुखाबाङ्चि नुमेॽमाना हाङ्बा निङ्वाफुमागा साक्ति वाया॥ 18याॽमिचिङा एको पुप्साब्याना तुखाबाङ् नेथाम नुङ् न्नाबे ङ्खुरा॥ ङ्खाचिङा न्ना तुखाबाङ् पाङ्होङ्बे येसुगा युम्बे खेॽमागा न्जोगु, 19ङ्खाॽनिङ्गो न्नाबे प्याक याॽमिचि ङ्वायाहोङ् पाङ्होङ्बे उमाना लाम्बु न्दुप्सुनिन॥ न्हाङा मोम्दालुङ् छोङ्बे न्थाङा, ङ्खोङ् झिङ्कुटिगा मोम्दालुङ् ङ्ङोक्तुहोङ् नेथाम नुङ् न्ना तुखाबाङ् येसुगा उयुम्बे ताम्बा ङ्ङाएन्दु॥ 20न्हाङा येसुङा ङ्खाचिगा बिस्वास निसुहोङ् न्ना तुखाबाङ् खाॽला लु, “ङ्गा पाप छेमा लेक्साहा॥”
21ङ्खा चेॽया ङ्खेप्सुहोङ् धार्मासाप्ला चिन्खुबाचि नुङ् फारिसिचि उङ्चि-उङ्चि खाॽला छिम्खुसा न्जाया, “निङ्वाफुमागा बिरुद्दाबे चेक्खुबा ना इसा ओम? पाप को निङ्वाफुमाङासे छेमा चोक्मा यास्वाहा॥ याॽमिङा चा पाप छेमा चोक्मा यास्वाहायि?” 22ङ्खाॽनिङ्गो येसुङा ङ्खाचिगा निङ्वाबेॽहा चेॽया था तोक्तुहोङ् खाॽला लुचि, “न्निङ्दा इजाङ् खाॽला मितिॽवाघा? 23ना पुप्साब्याना याॽमि ‘ङ्गा पाप छेमा लेक्साहा’, लुॽमायेम ‘पोगाघोङ् लामा’ लुॽमा, हेॽना च्हेन साजिलोना? 24ङ्खाॽनिङ्गो याॽमिगा उच्यानुङ् ताम्दाङ्फुमाबे पाप छेमा चोक्माहा चोक्तोक वेॽहा बाङ्ना चेॽया न्निङ्दा था तोक्तानुम॥” न्हाङा उङा न्ना पुप्साब्याना याॽमि खाॽला लु, “का न्दा लुम्मेॽनेन, हाकु पोगा ङ्खोङ् न्नेथाम खुघोङ् म्बाङ्बे ख्या॥” 25ङ्खिङ्बेलामाङ् न्ना पुप्साब्याना याॽमि उङ्चि युम्बे पोगा, न्हाङा नेथाम खुहोङ् निङ्वाफुमागा माहिमा चोक्साङ् पाङ्बे ख्या॥ 26न्नाबे ङ्वायाहा घाक याॽमिचि आच्चाम्मा ङ्ङेता॥ न्हाङा निङ्वाफुमागा खाॽलाना माडा साक्ति न्निसुहोङ् तुक्नुङ् ङ्गिसिता, न्हाङ् उङ्चिङा निङ्वाफुमागा माहिमा चोक्साङ् खाॽला ङ्गाया, “हेन कानिङ् इमिन्हा आच्चाम्माहा चेॽया निसुम्हा!”
येसुङा लेबि चेला लेङ्से काना
(मात्ति ९:९-१३; मार्कुस २:१३-१७)
27न्नाभाङ् येसु खेप्मास्यानिङ् तिरो हुङ्माना पाङ्बे एको लेबि#५:२७ ना लेबि छोङ् मेन्ना, ङ्खाॽनिङ्गो मात्ति छेप्ताप छेप्खुबा मात्तिगा हेकोना उनिङ् ओम॥ मात्ति ९:९; मार्कुस २:१४ बाङ्ना याॽमि युङामासाना निसु॥ न्हाङा येसुङा खाॽला लु, “आहेक्साङ् लाचोगा॥” 28न्हाङा लेबिङा घाकथोक नाओहोङ् येसुगा हेक्साङ् लाचोगा॥
29हेक्साङ् लेबिङा उपाङ्बे येसुगा लागि माडा होक्ता एन्दु॥ न्ना होक्ताबे प्याक तिरो पोक्खुबाचि नुङ् हेकोहा याॽमिचि चा उङ्नुङ् ङ्युङाहोङ् न्जामास्या॥ 30ङ्खिङ्बेला फारिसिचि नुङ् धार्मासाप्ला चिन्खुबाचिङा गान्गान चोक्साङ् येसुगा चेलाचि खाॽला न्लुचि, “न्निङ्दा इजाङ् तिरो पोक्खुबा नुङ् हेकोहा पापिचिनुङ् युङिॽवाघोङ् चावाम्घा?”#लुका १५:१-२
31येसुङा खाॽलाना पोलोवा पिचि, “न्दुगाब्यान्ना याॽमिगा लागि सिधाक्राङ्बा चाहान्जोङ्मेन्ना, ङ्खाॽनिङ्गो तुखाबाङ्गा लागि से चाहाचोङ्मे॥ 32ङ्खाॽलामाङ् का चा धार्मोति याॽमिचि मेन्ना, ङ्खाॽनिङ्गो पापिचि उङ्चिगा पाप पाहाङ् न्लानिभोङ् कासे तायामाङ्ना ओम॥”
उपाबासका उतुम्बे छिम्योक
(मात्ति ९:१४-१७; मार्कुस २:१८-२२)
33ङ्खाचिङा उङ् खाॽला न्लु, “युहान्ना नुङ् फारिसिचिगा चेलाचि गो उपाबास ङ्युङ्मे, पार्थाना न्जोङ्मे, ङ्खाॽनिङ्गो ङ्गा चेलाचि गो साधाइ चासाङ्-उङ्साङ् से ङ्वामेहाचि॥”
34येसुङा खाॽला लुचि, “इना थाङ्छेङ्गा होक्ताबे न्दायाहा खोलोङ्बाचि थाङ्स्योङ्बा उङ्चिनुङ् वानुङ् सोम्मा उपाबास वामेॽमा यास्वाम्चिघायि? 35ङ्खाॽनिङ्गो खाॽलाहा लेनचि चा न्दामे, हेॽना लेन थाङ्स्योङ्बा उङ्चिभाङ् फोङ्मे, ङ्खा लेनचिबे उङ्चि उपाबास ङ्युङ्मेहा॥”
36येसुङा ङ्खाचि एको हेकोना ताप्चेॽया चा लुचि, “इसाङा चा ओछोङा तेक्का टालो छिन्वाहोङ् उलिप्पा तेक न्लेप्त्वान्ना, इजाङ्बाङ्निङ् न्नाङा ओछोङा तेक चा नाघाक्स्वा, न्हाङा ओछोङा टालो उलिप्पानुङ् न्दोङ्मेन चा॥
37 “इसाङा चा ओछोङा सिम्लेॽमाङ्गा माध उलिप्पाना ह्वारिक्का खेसुप्पे # ५:३७ ङ्खिङ्बेला मेन्थुॽलेहा पोसुचिगा ह्वारिक्का खेसुप्पे याङ्माहा चालान वाया॥ ङ्युक्स्वान्हा, युक्सुभोङ् न्ना खेसुप नाङ्खेमे, सिम्लेॽमाङ्गा माध फोम्खेमे न्हाङा खेसुप चा नास लेङ्मे॥ 38न्हाङामाङ् ओछोङा सिम्लेॽमाङ्गा माध ओछोङाना ह्वारिक्का खेसुप्पे युङ्माहा॥ 39इसाङा चा उलिप्पाहा चिक्तुहा सिम्लेॽमाङ्गा माध उङ्वाहोङ् न्जिक्तुन्हा उङ्मा ङ्गाङ्मेन, इजाङ्बाङ्निङ् उङा काम्मे, ‘चिक्तुहा माङ् खुम्दुहा॥’”
Currently Selected:
लुका 5: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
