लुका 6
6
आराम चोक्माना लेनगा उतुम्बे छिम्योक
(मात्ति १२:१-८; मार्कुस २:२३-२८)
1इमा येसु नुङ् उका चेलाचि याहुदिचिगा आराम चोक्माना लेन गाउहाम लेङ्साङ् ङ्ख्यानिङ् उका चेलाचिङा गाउगा बाला न्सेप्सुहोङ् मुकपे नुक्साङ् चामा न्दारोक्तु॥#६:१ याहुदिचिगा चालानबे लाम्दिक्पा साकङा सिमानिङ् तुमाहा चाचिॽया हेॽने चा सेम्चामा तोक्माना चालान साया॥#ब्यावास्था २३:२५ 2ङ्खाॽनिङ्गो एकोहिप्पाङ् फारिसिचिङा उङ्चि खाॽलाना छिम्योक न्छिम्दुचि, “इजाङ् न्निङ्दा आराम चोक्माना लेन गाउ सेप्स्वाम्गाहोङ् ब्यावास्थाङा चोक्मा न्लेङ्मेन्हा कायाहा काम चोग्वाम्घा?”#६:२ ब्यावास्थाबे मिना हाक्निङ् मिना काम चा आराम चोक्माना लेन चोक्मा न्लेङ्मेन्हाभोङ् छेप्तामा॥
3येसुङा खाॽलाना पोलोवा पिचि, “दाउद न्हाङ् उङ्नुङ् ङ्वायाहा याॽमिचि साकङा न्स्यानिङ् उङ् इ चोगाना?#१ सामुएल २१:१-६ न्निङ्दा धार्मासाप्ला पोढा न्जोगुक्सुम्गान्ना? 4उङ् निङ्वाफुमागा पाङ्बे उयाहोङ् निङ्वाफुमाबे तिसाहा चालेप्पा ताप्तुचो, न्हाङ् उङ्नुङ् ङ्वायाहाचि चा पिचि॥ ब्यावास्थाबे छेप्ताहा लोॽवा ओमभोङ् ङ्खा चालेप्पा हाङ्खुबाचिङा से चामा लेङ्माहा साया॥”#लेबि २४:९
5न्हाङा येसुङा खाॽला लुचि, “याॽमिगा उच्या आराम चोक्माना लेनगा चा हाङ्बाङान॥”
येसुङा मुक हेराब्याना याॽमि नुमेतुना
(मात्ति १२:९-१४; मार्कुस ३:१-६)
6येसु हेकोना आराम चोक्माना लेन याहुदि छुम्पाङ्बे ख्याहोङ् चिन्मास्या॥ न्नाबे छुप्ताङ् मुक हेराब्याना एको याॽमि चा वाया॥ 7आराम चोक्माना लेन न्ना याॽमि नुमेत्वाहोङ् आप्दिक एम्मा तोङ्मेॽनायेमभोङ् धार्मासाप्ला चिन्खुबाचि नुङ् फारिसिचिङा माउका न्सोक्सा॥ 8ङ्खाॽनिङ्गो येसुङा उङ्चि निङ्वाबेॽहा चेॽया था तोक्तुहोङ् न्ना उमुक हेराब्याना याॽमि खाॽला लु, “आबा, न्हाङ् घाक्का युम्बे चेङ् येबा॥” न्हाङा न्ना याॽमि तायाहोङ् चेङ् येबा॥ 9न्हाङा येसुङा ङ्खाचि खाॽला लुचि, “का न्निङ्दा एको छिम्योक छिम्मेॽनेनिन्हा, आराम चोक्माना लेन उचुन चोक्मायेम इसिसि चोक्मायेम, हिङ्मेॽमायेम सिमायेम? एङ्गा ब्यावास्था आन्सार हेॽना ठिक्ना?” 10न्हाङा उङा ङ्खाचि घाक सोचिहोङ् न्ना याॽमि खाॽला लु, “म्मुक सोसु॥” उङा ङ्खाॽलामाङ् चोगु, न्हाङ् उमुक नुयाब्या॥
11खा न्निसुहोङ् ब्यावास्था चिन्खुबाचि नुङ् फारिसिचि लोक खोॽमाङा मि न्लेक्सा, न्हाङ् हाकु येसु इ चोगुमभोङ् साल्लाहा चोक्मा न्दारोक्तु॥
येसुङा एहिच चेलाचि सेगुचिहा
(मात्ति १०:१-४; मार्कुस ३:१३-१९)
12इलेन येसु कोङ्गुबे ख्याहोङ् सेॽनाम्फोक निङ्वाफुमा नुङ् पार्थाना चोगा॥ 13भेनिक लेक्साहोङ् उङा चेलाचि काचि, न्हाङ् ङ्खाचिभाङ् एहिच जाना सेगुचिहोङ् सेगुम्पाक निङ् पिचि॥ 14ङ्खाचिबे एको सिमोन साया, न्ना येसुङा पात्तुरुस उनिङ् युक्सुबि, सिमोनगा उनुन्छा आन्दिरियास, याकुब, युहान्ना, फिलिप, बार्थोलोमाइ 15मात्ति, थोमा, आल्फायासका उच्या याकुब, न्हाङा खाम्युकभाक्ता बाङ्ना सिमोन, 16याकुबका उच्या याहुदा न्हाङ् याहुदा इस्कारियोत, न्नाङा हेक्साङ् येसु धोका पि॥
येसुङा प्याक तुखाबाङ् नुमेतुचिहा
(मात्ति ४:२३-२५)
17येसु सेगुम्पाकचिनुङ् कोङ्गुभाङ् मो उक्सा, न्हाङ् एको चाउरबे ङ्येबा॥ न्नाबे प्याक उका चेलाचि नुङ् हेकोहा याॽमिचि न्छुप्सामासा॥ ङ्खा याॽमिचि याहुदिया लिङ्खामगा घाक ठोङ्भाङ्, यारुसालेम साहारभाङ् न्हाङ् सामुन्दारागा उयुम्बेॽना टुरोस नुङ् सिदोन लिङ्खामभाङ् न्दायामासा॥ 18ङ्खाचि येसुगा चेॽया खेम्से नुङ् उङ्चि तुक्मा-छाक्माभाङ् नुमागा न्दायामासा॥ न्नाबे इसिॽहा मुइङा याक्सुचिहोङ् तुखि न्जायाहाचि चा न्नुया॥ 19न्हाङा घाक याॽमिचिङा उङ् तोक्निमागा न्जोगु, इजाङ्बाङ्निङ् उङ्भाङ् लोन्दाहा साक्तिङा घाक न्नुमास्या॥
येसुङा पिचिहा उपादेस
(मात्ति ५:१-१२)
20न्हाङा येसुङा उका चेलाचि सोसाङ् खाॽला लुचि,
“तुखिसुम्बाचि निङ्वाफुमाङा न्निङ्दा आसिक पिइवागा, इजाङ्बाङ्निङ् निङ्वाफुमागा राज्या न्निङ्गामाङ् ओम॥
21 लोप साकङा सिखुबाचि, निङ्वाफुमाङा न्निङ्दा आसिक पिइवागा, इजाङ्बाङ्निङ् न्निङ्दा खासिॽवागा॥ लोप हाप्खुबाचि, निङ्वाफुमाङा न्निङ्दा आसिक पिइवागा इजाङ्बाङ्निङ् न्निङ्दा युतुचाइवाघा॥
22 “याॽमिगा उच्याबे बिस्वास चोगाघाङा याॽमिचिङा इसितिॽवागानिङ्, याॽमिलुम्भाङ् लोन्धाक्सिॽवागानिङ्, लुचाइवागानिङ् न्हाङ् ङोन्सिप्माबे आमेतिॽवागानिङ् निङ्वाफुमाङा न्निङ्दा आसिक पिइवाघा॥ #
१ पात्तुरुस ४:१४
23ङ्खिङ्बेला न्निङ्दा चोन्सिसाङ् पुक्तानि, इजाङ्बाङ्निङ् न्निङ्दा वालोकपे माडा इनाम तोक्त्वाम्गाना॥ न्निङ्दा तुखि पिखुबाचिगा पुर्खाचिङा चा निङ्वाफुमाभाङ् चेक्खुबाचि ङ्खाॽलामाङ् तुखि म्बिक्साचि॥#२ उथुक्साला ३६:१६; सेगुम्पाक ७:५२
24 ङ्खाॽनिङ्गो धिक्कार, न्निङ्दा थुङ्दुहाचि! इजाङ्बाङ्निङ् न्निङ्दा सुखा तोक्तिक्सुम्गा॥
25 धिक्कार, न्निङ्दा लोप खाखुबाचि! इजाङ्बाङ्निङ् न्निङ्दा साकङा सिइवागा॥ धिक्कार, लोप न्निङ्दा युन्चाखुबाचि! इजाङ्बाङ्निङ् न्निङ्दा तुखि तोक्त्वाम्गाहोङ् हाबिॽवाघा॥
26 धिक्कार, खिङ्बेला याॽमिचिभाङ् उचुन्ना निङ्ला तोक्खुबाचि! इजाङ्बाङ्निङ् उङ्चि पुर्खाचिङा चा निङ्वाफुमाभाङ् चेक्खुबाङान कासाङ् लेम्चाखुबाचि ङ्खाॽलामाङ् उचुन न्जोगुक्साचि॥”
सात्तुरचि चा लुङ्मा तुक्तानुम्चिम
(मात्ति ५:३८-४८; ७:१२)
27 “ङ्खाॽनिङ्गो आचेॽया खेम्खुबाचि का न्निङ्दा लुम्मेॽनेनिन, सात्तुरचि लुङ्मा तुक्तानुम्चिम, न्हाङ् न्निङ्दा इसिॽखुबाचि उचुन चोगानुम्चिम॥ 28न्निङ्दा साराप पिखुबाचि आसिक पियानुम्चिम॥ इसाङा न्निङ्दा इसिसि चोगिॽवागा, ङ्खाचिगा लागि पार्थाना चोगानि॥ 29न्दा एकपोटि न्नाम्छेङ्बे म्फेक्तागाभोङ् हेकोना न्नाम्छेङ् चा ताप्तुबिचि॥ ङ्गोट नाम्खेखुबा न्लोकि चा खेप्मा पिचि॥ 30न्दानुङ् नाक्खुबाचि पिचि, न्हाङा ङ्गा युबाक्थिङ्खाक खेखुबाचि फेरि न्नाक्तुन्चिन॥ 31याॽमिचिङा न्निङ्दा इमिन चोक्नि मितिॽवागा, न्निङ्दा चा उङ्चि ङ्खाॽलामाङ् चोगानुम्चिम॥#मात्ति ७:१२
32 “न्निङ्दा लुङ्मा तुक्खुबाचि से लुङ्मा तुक्त्वाम्चिम्घाभोङ्, इना माडा काम चोगुम्गाना लेक्साना? ङ्खाॽला गो पापिचि चा न्जोङ्मेहा॥ 33न्निङ्दा उचुन चोक्खुबाचि से उचुन चोग्वाम्चिम्घा भोङ्, इना माडा काम चोगुम्गाना लेक्साना? ङ्खाॽला गो पापिचि चा न्जोङ्मेहा॥
34 “न्निङ्दा हुङ्मा याखुबाचि से नाॽवा पिवाम्चिम्घा भोङ्, इना माडा काम चोगुम्गाना लेक्साना? हुङ्मा याखुबाचि गो पापिचिङा चा म्बिवाचिहा॥
35 “ङ्खाॽनिङ्गो न्निङ्गा सात्तुरचि लुङ्मा तुक्तानुम्चिम, न्हाङ् ङ्खाचि उचुन चोगानुम्चिम॥ हेक्साङ् लाम्बिॽनिभोङ् आस मेन्जोक्ले नाॽवा पियानुम्चिम, न्हाङा वालोकपे न्निङ्दा माडा इनाम तोक्त्वाम्गाना, न्हाङ् घाक हाक्निङ् तो वाखुबा निङ्वाफुमागा सान्तान लेक्सिॽवाघा॥ इजाङ्बाङ्निङ् उङा गो बाइगुनि नुङ् इसिॽहा घाक याॽमिचि चा लुङ्मा तुक्त्वाचिहा॥ 36निङ्वाफुमा इमिन लुङ्माराङ्बाना, ङ्खाॽलामाङ् न्निङ्दा चा लुङ्माराङ्बा लेक्सानि॥”
याॽमिचि आप्दिक ङ्ङेन्दानुम्चिम्निन
(मात्ति ७:१-५)
37 “याॽमिचिगा निरिक न्जोगानुम्निन, न्हाङा निङ्वाफुमाङा चा न्निङ्गा निरिक न्जोग्वान्हा॥ याॽमिचि आप्दिक ङ्ङेन्दानुम्चिम्निन, न्हाङ् निङ्वाफुमाङा चा न्निङ्दा आप्दिक ङ्ङेन्दिॽवागान्हा॥ याॽमिचि छेमा पियानुम्चिम, न्हाङा निङ्वाफुमाङा चा न्निङ्दा छेमा पिइवाघा॥ 38याॽमिचि पियानुम्चिम न्हाङ् निङ्वाफुमाङा चा न्निङ्दा पिइवाघा॥ उङा सोक्साङ्-सोक्साङ् जोम्जोम चोग्वाहोङ् फोम्खेॽनुङ् पिइवाघा॥ इजाङ्बाङ्निङ् हेॽना नापङा न्निङ्दा पिवाम्चिम्गा, न्ना नापङामाङ् न्निङ्दा चा तोक्त्वाम्घा॥”#मात्ति ७:२; मार्कुस ४:२४
39न्हाङा येसुङा ङ्खाचि एको खाॽलाना ताप्चेॽया लुचि, “मिक्सुरुम्बा याॽमिङा मिक्सुरुम्बा तिक्मा यास्वानायि? ङ्खाचि हिपापाङ् होॽलुम्बे ङ्ङामेन्चिन्हा?#मात्ति १५:१४ 40चेला चिन्खुबा हाक्निङ् मा न्लेङ्मेन्ना, ङ्खाॽनिङ्गो उङ् उचुन चिन्दिमेहोङ् चिन्खुबा लोॽवा लेङ्मेॽना॥#मात्ति १०:२४-२५; युहान्ना १३:१६; १५:२०
41 “न्हाङा इजाङ् न्नुन्छागा उमिकपेॽना मिना सिन्का निस्वागा, ङ्खाॽनिङ्गो ङ्गा म्मिकपेॽना मुढा च्हेन न्निस्वागान्ना? 42ङ्गा म्मिकपेॽना मुढा न्निस्वागान्नाभोङ्, न्नुन्छा, ‘आनुन्छा म्मिकपेॽना सिन्का लोम्बिमेॽनेन्ना’ भोङ् इमिन लुॽमा यास्वागाना? ओ किहि काप्खुबा, ओन्दाङ् ङ्गा मिकपेॽना मुढा लोन्धाक्सु, ङ्खोङ्से न्दा न्नुन्छागा उमिकपेॽना सिन्का लोन्नाहाङ्मागा उचुन निमा यास्वागाना॥”
सिङ् नुङ् न्नागा उसा
(मात्ति ७:१६-२०; १२:३३-३५)
43 “उचुन्ना सिङ्ङा इसिॽहा उसा ङ्गेक्स्वान, ङ्खाॽलामाङ् इसिॽना सिङ्ङा चा उचुन्हा उसा ङ्गेक्स्वान्हा॥ 44घाक सिङ् न्नागा उसाभाङ् चिनाचोङ्मे, इजाङ्बाङ्निङ् तिङ्गिभाक्का उथाप पाहाङ् इसाङा चा वेक्पु न्सेप्स्वान, ङ्खाॽलामाङ् खाम्बुॽमाङ्गा उथाप पाहाङ् सिम्लेॽमाङ् न्सेप्स्वान्हा॥#मात्ति १२:३३ 45उचुन्ना याॽमिङा उनिङ्वा होङ्बेॽहा उचुन्हा चेॽयाभाङ् उचुन्हा काम माङ् चोग्वा॥ ङ्खाॽलामाङ् इसिॽना याॽमिङा चा उनिङ्वा होङ्बेॽहा इसिॽहा चेॽयाभाङ् इसिॽहा काम माङ् चोग्वा, इजाङ्बाङ्निङ् उनिङ्वा होङ्बे इमिन्हा चेॽया वान्ने, ङ्खामाङ् न्ना याॽमिङा चेक्त्वा॥”#मात्ति १२:३४
हिच्चि पाङ्गा ताप्चेॽया
(मात्ति ७:२४-२७)
46 “का लुॽनेनिन्हा चेॽया ङ्येन्वाम्गान्हाभोङ् इजाङ् का ‘हाङ्बा, हाङ्बा’ लुम्मेकाहा? 47आचेॽया खेप्स्वाहोङ् ङ्खाॽला चोक्खुबा याॽमि इमिन्ना साम्मेॽना, हाकु का न्निङ्दा लुम्मेॽनेनिन्हा॥ 48न्ना घाइरो चाहारि खोन्दुहोङ् लुङ्खाक छोङ्बे पाङ् चोक्खुबा याॽमि लोॽवाना ओम॥ न्हाङ् माडा भोल तायानिङ् भोलङा न्ना पाङ् लुक्तु, ङ्खोङ्चा न्ना पाङ् इङा चा ङ्हान, इजाङ्बाङ्निङ् न्ना पाङ् चात्तुनुङ् चोगामासा॥ 49ङ्खाॽनिङ्गो आचेॽया खेप्स्वाहोङ्चा ङ्खाॽला मेन्जोक्खुबा याॽमि च्हेन चाहारि मेङ्खोन्ले खाम छोङ्बे पाङ् चोक्खुबा लोॽवाना ओम॥ न्हाङ् माडा भोल तायानिङ् न्ना भोल न्ना पाङ्बे लुक्तास्या, लुक्तास्याहोङ् सोलोक न्ना पाङ् काक्साख्या न्हाङ् नास लेक्सा॥”
Currently Selected:
लुका 6: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
