लुका 7
7
रोमि केप्टेनगा बिस्वास
(मात्ति ८:५-१३)
1येसुङा खा घाक चेॽया याॽमिचि खेम्मेतिचिहोङ् उङ् काफार्नाहुम साहारबे ख्या॥ 2न्नाबे एको रोमि केप्टेनङा तुक्नुङ् उलुङ्मा तुक्तुना उका नोकोर तुगाहोङ् सेहेक्सासा॥ 3जोबो केप्टेनङा येसुगा उतुम्बे खेप्सु, न्हाङ् “उङ् हानि आप्होङ् आनोकोर नुमेतुनि” भोङ् लुसे याहुदि हाङ्गुम्बाचि येसुगाबे पाक्सुचि॥ 4ङ्खा हाङ्गुम्बाचि येसु वायानाबे न्दायाहोङ् सेमेसाङ् खाॽला न्लु, “हाङ्बा, न्ना केप्टेन ङ्गा साहायाता तोक्मा लाइक्ना याॽमि ओम, 5इजाङ्बाङ्निङ् उङा एङ्गा याहुदि जातिचि तुक्नुङ् लुङ्मा तुङ्मे, न्हाङ् उङामाङ् एङ्गा लागि छुम्पाङ् चा चोक्ताब्याहा ओम॥”
6खा चेॽया खेप्सुहोङ् येसु ङ्खाचिनुङ् ख्या, ङ्खाॽनिङ्गो उङ्चि पाङ्बे तामाहाक्निङ् ओन्दाङ् केप्टेनङा उकाम्निभाकचिभाङ् येसु खाॽलाहा सालेन हाक्तु, “हाङ्बा तुखि न्जोगान, इजाङ्बाङ्निङ् का लोॽवाना माङ्चुमाङ्ना याॽमिगा पाङ्होङ्बे उमा न्दा न्थेन्सिमेकान॥ 7न्हाङ् का आफाइ चा ङ्गा युम्बे तामा न्थेन्सिमेङान्ना॥ ङ्खाॽनिङ्गो न्दा हेॽने वेका न्नाभाङ् नुमेॽमाना चेॽया से चेक्ताब्याङ् न्हाङ् आका नोकोर नुन्दिमेॽना॥ 8का आफाइ चा का हाक्निङ् तोहा याॽमिचिगा तायेनबे वान्नेॽङा, न्हाङ् आका तायेनबे चा प्याक काङ्बाचि ङ्वान्ने॥ का एको ‘ख्या’ ल्वाङ्, न्हाङा न्ना खेम्मे, हेकोना ‘आबा’ ल्वाङ्, न्हाङा न्ना आम्मे॥ ङ्खाॽलामाङ् आनोकोर चा ‘खाॽला चोगु’ ल्वाङ्, न्हाङ् उङा चोग्वा॥”
9ङ्खा चेॽया खेप्सुहोङ् येसु आच्चाम्मा एता, न्हाङ् उका हेक्साङ् लाम्खुबा प्याक याॽमिचि पोटि हिक्साहोङ् सोसाङ् खाॽला लुचि, “का न्निङ्दा लुम्मेॽनेनिन, खिङ् माडा बिस्वास नुङ्ना याॽमि गो का इजिरेलिचिबे इसा चा न्निसुक्सुङान्ना॥” 10न्हाङा केप्टेनङा पाक्सुचिहा ङ्खा याॽमिचि न्लासाहोङ् पाङ् न्दासुनिङ् न्ना नोकोर नुयाब्यामासाना न्दुप्सु॥
येसुङा लाङ्निमागा उच्या हिङ्मेतुना
11हेक्साङ्ना लेन येसु नाइन बाङ्ना साहारबे ख्या॥ ङ्खिङ्बेला उका चेलाचि नुङ् प्याक याॽमिचि चा उङ्नुङ् ङ्ख्या॥ 12येसु साहारगा गेट्पे#७:१२ न्ना साहार चान्चान्ना गारोङा फाङामासा, न्हाङा न्ना साहारबे उमागा पाखा लोम्मागा गेट् युक्सामासा॥ तायाब्यानिङ् मालामिचिङा एको लास ङ्खेप्मास्या॥ न्ना लास एको लाङ्निमागा एको सेॽना उच्या बाबुगा साया॥ न्ना लाङ्निमा नुङ् मालामि खेखुबा साहारबेॽहा प्याक याॽमिचि चा ङ्वाया॥ 13हाङ्बा येसुङा लाङ्निमागा तुखि निसुहोङ् उलुङ्मा तुक्तुगेतु, न्हाङ् खाॽला लु, “ङ्हाबान॥” 14न्हाङा उयुम्बे ख्याहोङ् उङा ताप्चि तोक्ति, ङ्खिङ्बेला खुखुबाचि ङ्येबा॥ न्हाङा येसुङा लु, “ओ बाबु, का लुमेॽनेन, ‘न्दा पोगा॥’” 15ङ्खिङ्बेलामाङ् न्ना स्याना बाबु पोगाहोङ् युङा, न्हाङ् चेक्मा तारोक्तु॥ ङ्खोङ् येसुङा न्ना बाबु उमा जिम्मा पिहाक्सु॥
16निङ्वाफुमागा खाॽलाना साक्ति न्निसुहोङ् घाक ङ्गिसिता, न्हाङ् निङ्वाफुमागा माहिमा चोक्साङ् खाॽला ङ्गाया, “एको माडा निङ्वाफुमाभाङ् चेक्खुबा एङ्गा लुम्बे तायामाना॥” न्हाङा खाॽला चा ङ्गाया, “निङ्वाफुमा उका याॽमिचि हिङ्मेसे तायामाना॥” 17खा सालेन याहुदिया घाकपे नुङ् न्नागा यो-खेहा लिङ्खामचिबे हिसा॥
येसु नुङ् बाप्तिस्मा पिखुबा युहान्ना
(मात्ति ११:२-१९)
18बाप्तिस्मा पिखुबा युहान्नागा चेलाचिङा चा येसुङा चोगुहा खा घाक कामगा उतुम्बे उङ्चि चिन्खुबा ङ्खेम्मेतु॥ न्हाङ् युहान्नाङा उका हिप्पाङ् चेलाचि काचिहोङ्, 19हाङ्बा येसुगाबे खाॽला छिम्से पाक्सुचि, “कानिङ् आस चोगुम्ङाना मुक्ति पिखुबा हाङ् खिरिस्ट न्दागान्येम, कानिङ् हेकोना याॽमिगा लाम्बु सोम्ङायेम?”
20न्हाङा ङ्खाचि येसु वायानाबे तायाचिहोङ् खाॽला लुयाचु, “बाप्तिस्मा पिखुबा युहान्नाङा कान्चिङ् खा चेॽया छिम्से पाक्सामाहा, ‘कानिङ् आस चोगुम्ङाना मुक्ति पिखुबा हाङ् खिरिस्ट न्दागान्येम, कानिङ् हेकोना याॽमिगा लाम्बु सोम्ङायेम?’”
21ङ्खिङ्बेला येसुङा प्याक याॽमिचि तुक्माभाङ् नुङ् इसिॽहा मुइभाङ् नुमेतुचि न्हाङ् प्याक मिक्सुरुम्बाचि चा निमा याखुबा न्लेक्सा॥ 22येसुङा युहान्नागा चेलाचि लुचि, “न्जिङ्दा इहा निसाचुगा, खेप्साचुगा, ख्याचिघोङ् ङ्खा चेॽयामाङ् युहान्ना लुयाचु॥ मिक्सुरुम्बाचिङा न्निस्वा, लाम्मा मेयाखुबाचि न्लाम्मे, कोरिचि न्नुमे, नाभाक मेखेम्खुबाचिङा ङ्खेप्स्वा, न्स्याहा याॽमिचि हिङ्गिलिक न्लेङ्मे, न्हाङा तुखिसुम्बाचि निङ्वाफुमागा नुसाला ङ्खेम्मेमे॥#यासाइया ३५:५-६; ६१:१ 23कानुङ् निङ्वा मेन्दुक्मेखुबा नुङ् का साङ्का मेन्जोक्खुबा याॽमि जेप्पा आसिक तोक्खुबा ओम॥”
24युहान्नागा चेलाचि लासाख्याचिहोङ् येसुङा न्नाबेॽहा याॽमिचि युहान्नागा उतुम्बे लुचि, “न्निङ्दा इसा चा मेॽनिङ्ना सुन्नेना ठोङ्बे इना सोसे खेइघा? इना हिॽवाङा योक्सुना मिक्ला सोसे? 25इना उचुन्माचेक्हा तेक वाखुबा याॽमि सोसे? उचुन्हा-उचुन्हा तेक वाखुबाचि नुङ् खुम्दु-खुम्दु चाखुबा उङ्खुबाचि गो हाङ्पाङ्बेॽले ङ्वामे॥ 26ङ्खाॽनिङ्गो न्निङ्दा इहा सोसे खेइमिसिघा? इना निङ्वाफुमाभाङ् चेक्खुबा सोसे? जेप्पा कामाभोङ् न्निङ्दा निङ्वाफुमाभाङ् चेक्खुबा याॽमि हाक्निङ्चा एको माडा याॽमि निसुक्सुम्गा॥ 27इजाङ्बाङ्निङ् युहान्नागा उतुम्बे धार्मासाप्लाबे खाॽला छेप्तामा,
‘सो, न्दा हाक्निङ् ओन्दाङ्-ओन्दाङ् आका सालेन खेम्मेखुबा पाक्स्वाङ्,
न्हाङा उङा ङ्गा लाम्बु त्यार चोग्वाना॥’ #
मालाकि ३:१
28 “का न्निङ्दा लुम्मेॽनेनिन, कायुङ्लेनबेॽहा याॽमिचि माध्येबे युहान्ना हाक्निङ् माडा इसा चा मान्ना॥ ङ्खोङ्चा निङ्वाफुमागा राज्याबे इसा घाक हाक्निङ् मि, उङ् युहान्ना हाक्निङ्चा माडा लेङ्मेॽना॥”
29न्हाङा घाक याॽमिचि नुङ् तिरो पोक्खुबाचिङा खा चेॽया ङ्खेप्सुहोङ् निङ्वाफुमागा आग्गे जेप्पागा ठिक ओम ङ्गाया, इजाङ्बाङ्निङ् ङ्खाचिङा युहान्नाभाङ् बाप्तिस्मा लियान्जोगुक्सा॥#मात्ति २१:३२; लुका ३:१२ 30ङ्खाॽनिङ्गो फारिसिचि नुङ् धार्मासाप्ला चिन्खुबाचिङा च्हेन युहान्नाभाङ् बाप्तिस्मा लियाचोक्मा ङ्गाक्सानिन्होङ् उङ्चिगा लागि निङ्वाफुमाङा चोगुना योजाना इन्कार न्जोगु॥
31 “ना पुस्तागा याॽमिचि का इनुङ् तोक्सुङ्चिङ्? ङ्खाचि इमिन्हाचि? 32ङ्खाचि गो बाजारबे वाखुबा पिछानाछा लोॽवाहाचि, ङ्खाचि उङ्चि-उङ्चि खाॽला ङ्गाम्मे, ‘कानिङ् न्निङ्गा लागि फुलुलुबा मुम्बिॽनेनिन, ङ्खाॽनिङ्गो न्निङ्दा न्लाक्तिगान॥ न्हाङा कानिङ् बिलाप चोगिङ्, ङ्खाॽनिङ्गो न्निङ्दा ङ्हाबिगान॥’
33 “बाप्तिस्मा पिखुबा युहान्नाङा सिम्लेॽमाङ्गा माध ङ्ङुङुन॥ उङ् उपाबास युङ्साङ् ताया, ङ्खाॽनिङ्गो न्निङ्दा ‘उङ् इसिॽना मुइङा याक्सुक्सुना’ लुम्गा॥ 34याॽमिगा उच्या चासाङ्-उङ्साङ् तायाङ्, न्हाङा न्निङ्दा लुम्मेका, ‘सोयानुम, एको थेक्खुबा, सिङ्घोखुबा, तिरो पोक्खुबा नुङ् पापिचिगा काम्निभाक!’ 35ङ्खाॽनिङ्गो निङ्वाफुमाभाङ् बुद्दि न्दोक्त्वाहोङ् ङ्खाॽला चोक्खुबाचिङामाङ् उका बुद्दि ठिक ओमभोङ् पार्मानित न्जोग्वाहा॥”
येसुङा पापिनि मामु छेमा पिना
36एको फारिसिङा येसु चामा चासे का॥ न्हाङा येसु फारिसिगा पाङ्बे ख्याहोङ् चासे युङा॥ 37न्ना साहारबेॽना एको पापिनि मामुङा येसु फारिसिगा पाङ्बे चामा चासे तायामाना बाङ्ना खेप्सु॥ न्हाङ् छेङ्रोक्का एको बात्तालबे खुम्दुनुङ् नाम्खुबा किवा ताहोङ् न्नाबे ताया॥#मात्ति २६:७; मार्कुस १४:३; युहान्ना १२:३ 38न्हाङा हेक्साङ्भाङ् तायाहोङ् येसुगा उलाङ् युम्बे युङा॥ न्हाङा हाप्साङ् येसुगा उलाङ्चि उमिॽवाङा वासितुबिहोङ् उताम्फोकङा तुक्साङ् उम्मा चोगुचि, न्हाङ् ङ्खा खुम्दुनुङ् नाम्खुबा किवाङा नेक्तुबि॥
39खा निसुहोङ् येसु पाङ्बे काखुबा फारिसिङा उनिङ्वाबे खाॽला काया, “ना याॽमि निङ्वाफुमाभाङ् चेक्खुबा सायानिङ्बि उङ् तोक्निखुबा इसा ओम, इमिन्ना मामु ओमभोङ् था तोक्तुबि, इजाङ्बाङ्निङ् ना मामु गो पापिनि ओम॥”
40ङ्खिङ्बेला येसुङा न्ना फारिसि लु, “सिमोन, का न्दा एकोहिच्चि चेॽया लुमेॽनेन्ना॥”
सिमोनङा लु, “चिन्खुबा, लुयाङ्॥”
41न्हाङा येसुङा लु, “एको नाॽवाराङ्बागा हिप्पाङ् आसामि वायाचि॥ एकोङा फा होम्बोक युप्पा याङ् न्हाङ् हेकोनाङा फाखेङ् युप्पा याङ् खेतामासाचु॥ 42ङ्खाॽनिङ्गो ङ्खाचिनुङ् हुङ्माहा इहाचा म्मायान्होङ् नाॽवाराङ्बाङा हिपापाङ् नाॽवा लेतुबिचि॥ हाकु काया, हेॽनाङा नाॽवाराङ्बा प्याक उलुङ्मा तुक्त्वाना लोप्पि?”
43सिमोनङा लु, “का मिमेङ्, प्याक माफ तोक्खुबाङा॥”
येसुङा लु, “न्दा ठिक कायागाना॥”
44न्हाङा उङ् मामुपोटि हिक्साहोङ् सिमोन खाॽला लु, “ना मामु निस्वागाना? का म्बाङ्बे तायाङ्, न्दा आलाङ् वासिप्माहा माङ्च्वा चा म्ब्याङ्गान॥ ङ्खाॽनिङ्गो ना मामुङा गो आलाङ्चि उमिॽवाङा वासिताब्याङ्होङ् उताम्फोकङा तुक्ताब्याङ्॥ 45न्दा का उम्मा न्जोगाङ्गान, ङ्खाॽनिङ्गो उङा गो का नाबे तायाङ्ना नाहाङ्तो आलाङ्बे उम्मा चोक्मासिम्मेङ्॥ 46न्दा आटुखुरुकपे किवा न्नेक्ताब्याङ्गान, ङ्खाॽनिङ्गो ना मामुङा गो आलाङ्बे खुम्दुनुङ् नाम्खुबा किवा नेक्ताब्यामाङ्॥ 47का न्दा लुम्मेॽनेन, ना मामुगा प्याक्हा पाप छेमा लेक्सामा, न्हाङामाङ् नाङा प्याक उलुङ्मा तुङ्मेङ्ना॥ ङ्खाॽनिङ्गो मिसे पाप छेमा तोक्खुबाङा मिसेॽमाङ् लुङ्मा तुङ्मेङ्ना॥” 48न्हाङा येसुङा न्ना मामु लु, “ङ्गा घाक पाप छेमा लेक्साब्यामाहा॥”
49न्नाबे चासे युङ्खुबाचि उङ्चि-उङ्चि खाॽला कामा न्दारोक्तु, “पाप छेमा चोक्खुबा ना इसा ओम?”
50ङ्खाॽनिङ्गो येसुङा न्ना मामु लु, “ङ्गा बिस्वासङा न्दा हिङ्मेतामागा, हाकु उचुन ख्या॥”
Currently Selected:
लुका 7: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
