मार्कुस 14
14
येसु सिमागा न्जोगुना
(मात्ति २६:१-५; लुका २२:१-२; युहान्ना ११:४५-५३)
1हिच लेन हेक्साङ् फोङ्होक्नाम नुङ् खामिर मेएन्लेहा चालेप्पा चामाना होक्नाम साया॥ खाङ्खाङ् हाङ्खुबाचि नुङ् धार्मासाप्ला चिन्खुबाचिङा येसु स्वाक सिमाना माउका न्सोॽमास्या॥#पारास्थान १२:१-२७ 2ङ्खाॽनिङ्गो ङ्खाचिङा खाॽला ङ्गाया, “होक्नामगा बेला च्हेन खाॽला चोक्मा न्लेङ्मेन्हा, खाॽला चोगिभोङ् माडा खाइलाबाइला माच्चा चोङ्मेॽना॥”
बेथानियाबे येसुगा आभिसेक
(मात्ति २६:६-१३; युहान्ना १२:१-८)
3येसु बेथानिया बाङ्ना तेनबे कोरि सिमोनगा पाङ्बे ख्या॥ उङा न्नाबे चाम्योङ्बा चामास्यानिङ् एको मामुङा छेङ्रोक्का बात्तालबे प्याक ओमेन आखुबा खुम्दु नाम्खुबा जाट्मासिगा किवा ताहोङ् ताया॥ न्हाङ् न्ना बात्ताल पेगुहोङ् येसुगा उटुखुरुकपे किवाङा तुक्तु॥#लुका ७:३७-३८ 4ङ्खाॽनिङ्गो खा न्निसुहोङ् न्नाबेॽहा एकोहिप्पाङ् याॽमिचिगा उङ्चि लोक खोता न्हाङ् उङ्चि-उङ्चि खाॽला ङ्गाया, “खिङ् प्याक ओमेन आखुबा किवा इजाङ् नाङा खाॽला खेरा एन्द्वाहा? 5खा इन्चामानिङ्बि सुम होम्बोक युप्पा याङ् हाक्निङ्चा प्याक तायाबि, न्हाङ् ङ्खा याङ् तुखिसुम्बाचि हाप्सुबिचिनिङ्बि इखिङ् उचुन लेक्साबि॥” न्हाङा ङ्खाचिङा न्ना मामु न्थिन्दु॥
6ङ्खाॽनिङ्गो येसुङा लुचि, “भेला, ना इजाङ् थिन्द्वाम्गाना? नाङा आका लागि उचुन्ना काम चोगुक्सुना॥ 7तुखिसुम्बाचि गो साधाइ न्निङ्दानुङ् ङ्वामे न्हाङा हेॽनिङ्चा फाॽमा यास्वाम्चिम्गा, ङ्खाॽनिङ्गो का गो न्निङ्दानुङ् साधाइ ङ्वामेङान॥#ब्यावास्था १५:११ 8ना मामुङा इहा चोक्मा यासु, ङ्खामाङ् उङा चोगुक्सुहा॥ उङा ओन्दाङ्माङ् खुम्दुनुङ् नाम्खुबा किवाङा तुक्ताङ्होङ् आका सालुङ् हुम्मागा लागि त्यार चोगुक्सुना॥ 9का जेप्पा लुमेॽनेनिन, कायुङ्लेनबे हेखा-हेखा ठोङ्बे नुसाला पार्चार लेङ्मे, ङ्खा-ङ्खा ठोङ्बे ना मामुङा चोगुहा खा काम चा याॽमिचिङा म्मित्वाहा॥”
याहुदा येसु लाम्बिॽमाचिगा त्यार लेक्साना
(मात्ति २६:१४-१६; लुका २२:३-६)
10येसुगा एहिच चेलाचि माध्येबे याहुदा इस्कारियोत च्हेन येसु लाम्बिॽमाचिगा लागि खाङ्खाङ् हाङ्खुबाचिगाबे ख्या॥ 11याहुदागा ओचेॽया ङ्खेप्सुहोङ् खाङ्खाङ् हाङ्खुबाचि इब्बे-इब्बे न्जोन्दास्या, न्हाङ् कानिङ् न्दा याङ् पिमेॽनेनिन्हाभोङ् न्लु॥ ङ्खिङ्बेला नाहाङ्तो याहुदाङा येसु लाम्बिॽमाना माउका सोॽमा तारोक्तु॥
घाक हाक्निङ् हेक्साङ्ना होक्ता
(मात्ति २६:१७-३०; लुका २२:७-२३; युहान्ना १३:२१-३०; १ कोरिन्थि ११:२३-२५)
12खामिर मेएन्लेहा चालेप्पा चामाना होक्नामगा इम्ना लेनबे फोङ्होक्नामगा सामुङ् बोलि पिॽमाना चालान साया॥ येसुगा चेलाचिङा उङ् न्छिम्दु, “हाङ्बा, कानिङ् हेॽने खेइङ्होङ् ङ्गा लागि होक्नामगा होक्ता त्यार चोगुम्ङा?”
13न्हाङा येसुङा उका हिप्पाङ् चेलाचि खाॽला लुचिहोङ् पाक्सुचि, “न्जिङ्दा साहारबे ख्याचि, न्नाबे न्जिङ्दा घाइलाबे माङ्च्वा खुखुबा एको याॽमिङा तुम्मेचिगा न्हाङ् न्ना याॽमि पाङ्बे मेउले सोम्मा उका ओहेक्साङ्-ओहेक्साङ् ख्याचि॥ 14न्हाङा न्ना याॽमि हेॽना पाङ्बे उमे, न्ना पाङ्गा ह्वाङ्बा लुयाचु, ‘आका चेलाचिनुङ् युङ्मेङ्होङ् फोङ्होक्नामगा होक्ता चामाना कोठा हेॽने वेॽना?’ भोङ् चिन्खुबाङा छिम्दामागाना॥ 15न्हाङा उङा न्जिङ्दा तोप्पारिक्ङा उचुन तोक्साना माडा कोठा सोॽमेमेचिगा, न्नाबेॽमाङ् एङ्गा लागि होक्ता त्यार चोगाचु॥”
16चेलाचि न्नाभाङ् ख्याचि, न्हाङ् साहारबे उयाचिनिङ् घाक चेॽया येसुङा लुचिहा लोॽवा तुप्साचु॥ न्हाङा ङ्खाचिङा फोङ्होक्नामगा होक्ता न्नाबे त्यार चोगाचु॥ 17न्ना लेन नाॽमासेक येसु उका एहिच चेलाचिनुङ् न्नाबे तायाब्या॥ 18होक्ताबे न्जामास्यानिङ् येसुङा लुचि, “जेप्पा का न्निङ्दा लुमेॽनेनिन, न्निङ्दा माध्येबे कानुङ् चाखुबा एकोङा का लाप्मेमेङ्ना॥”#छेम ४१:९ 19खा चेॽया ङ्खेप्सुहोङ् चेलाचिगा तुक्नुङ् निङ्वा तुगा, न्हाङ् घाकङा येसु छिम्मा न्दारोक्तु, “न्दा कायागाना याॽमि काङान?”
20येसुङा लुचि, “न्निङ्दा एहिच जाना माध्येबे एकोसिगान, न्नाङा लोप कानुङ् थालबे चालेप्पा लुम्मासिमेॽना॥ 21याॽमिगा उच्या गो धार्मासाप्लाबे छेप्ताहा लोॽवा सिमेॽमाङ्, ङ्खाॽनिङ्गो धिक्कार, न्ना याॽमि इसाङा याॽमिगा उच्या लाप्मेत्वाचि! न्ना याॽमिगा गो वाम माङ् न्लेक्सान्निङ्बि उचुन लेक्साबि॥” 22उङ्चिङा न्जामास्यानिङ् येसुङा चालेप्पा याङुहोङ् निङ्वाफुमा नुनिङ्वा पि, न्हाङ् एगुहोङ् उका चेलाचि पिसाङ् खाॽला लुचि, “ना ताप्तानुम, ना आका सालुङ् ओम॥” 23न्हाङा उङा खोरेक याङुहोङ् निङ्वाफुमा नुनिङ्वा पि, न्हाङ् उका चेलाचि पिचि न्हाङा ङ्खाचि घाकङा ङ्ङुङु॥ 24न्हाङा येसुङा लुचि, “खा ओछोङा कारारगा आहेलि ओम, खा प्याक याॽमिचिगा लागि याङ्मेहा॥#१४:२४ बागाचोङ्मेहा#पारास्थान २४:८; यार्मिया ३१:३१-३४ 25जेप्पा का न्निङ्दा लुमेॽनेनिन, निङ्वाफुमागा राज्याबे ओछोङा सिम्लेॽमाङ्गा माध मेउङ्ले सोम्मा का फेरि सिम्लेॽमाङ्गा माध ङ्ङुङ्वाङान्हा॥” 26न्हाङा एको छेम न्लुतुहोङ् उङ्चि जाइतुन कोङ्गुपोटि ङ्ख्या॥
येसुङा पात्तुरुस साम्झा चोगुना
(मात्ति २६:३१-३५; लुका २२:३१-३४; युहान्ना १३:३६-३८)
27ङ्खिङ्बेला येसुङा चेलाचि लुचि, “न्निङ्दा घाक का नाॽनामेकाहोङ् लुक्तिखेइवाघा, इजाङ्बाङ्निङ् धार्मासाप्लाबे खाॽला छेप्तामा–
‘का गोठाला सिस्वाङ्,
न्हाङ् सामुङ्चि यो-खे तो-मो घाकपोटि ङ्हिङ्खेमेहा॥’ #
जाकारिया १३:७
28 “ङ्खाॽनिङ्गो का स्याङ्नाभाङ् हिङ्गिलिक लेङ्मेङ्होङ् न्निङ्दा हाक्निङ् ओन्दाङ् गालिलबे खेमेङ्ना॥” #
मात्ति २८:१६
29पात्तुरुसङा येसु लु, “घाकङा न्नाॽयागाभोङ्चा का च्हेन हेॽनिङ्चा न्नाॽनामेनेन्ना॥”
30येसुङा पात्तुरुस लु, “जेप्पा का न्दा लुमेॽनेन, हेन सेॽनि हिप्मा तितिॽलिङ्वा कामा हाक्निङ् ओन्दाङ् ‘का उङ् चिनान्जोग्वाङान्ना’ कासाङ् का सुम्मा इन्कार चोङ्मेङ्गाना॥”
31ङ्खाॽनिङ्गो पात्तुरुसङा जिद्दि चोक्साङ् खाॽला लु, “मेन्ना, का न्दानुङ् सिमा पोराचोगाभोङ्चा ङ्खाॽला इन्कार न्जोङ्मेॽनेन्ना॥” न्हाङा हेकोहा चेलाचि घाकङा चा ङ्खाॽलामाङ् न्लु॥
गेतास्मानिबे येसुगा पार्थाना
(मात्ति २६:३६-४६; लुका २२:३९-४६)
32न्हाङा येसु उका चेलाचिनुङ् गेतास्मानि बाङ्ना ठोङ्बे ख्या॥ न्नाबे न्दासुहोङ् उङा चेलाचि खाॽला लुचि, “का पार्थाना चोक्ङानुङ् न्निङ्दा नाबे वायानि॥” 33ङ्खाॽनिङ्गो पात्तुरुस, याकुब नुङ् युहान्ना च्हेन उङ्नुङ् खेतुचि॥ न्नाबे उका उनिङ्वा तुखिङा ओक्खिपिक्खि लेक्सा॥ 34न्हाङा ङ्खाचि लुचि, “आका आनिङ्वाबे प्याक तुखि लेक्साहोङ् ओक्खिपिक्खि आसोक्मा हिप्सिसेहेक्सुना॥ न्निङ्दा नाबेॽमाङ् मेइम्ले चेन्चेन वायानि॥” 35न्हाङा येसु च्हेन मियोरोक ख्याहोङ् फोप फोप्ता, न्हाङ् “लेङ्मा यामेहाभोङ् खा तुखि का छोङ्बे ङ्ङानिन्नि” कासाङ् पार्थाना चोक्मा तारोक्तु॥ 36उङा खाॽला कासाङ् पार्थाना चोगा, “ओ आब्बा,#१४:३६ आरामेइक चेॽयाबे नागा तुम्बिला “आप्पा” ओम॥ ओ आप्पा, न्दा चोक्मा मेयामाहा इहाचा मान्हा॥ हाकु ना तुखिगा खोरेक काभाङ् लाॽनिम्बिॽमाना न्निङ्वा वेॽनाभोङ् लातिताङ्॥ ङ्खाॽनिङ्गो आनिङ्वा लोॽवा मेन्ना, न्निङ्वा लोॽवामाङ् लेङ्नि॥”
37न्हाङा येसु पोगाहोङ् सुम्भाङ् चेलाचि ङ्वायानाबे लासाख्या, ङ्खिङ्बेला ङ्खा चेलाचि ङ्ङिप्सामासाहा तुप्सुचि॥ न्हाङ् उङा पात्तुरुस लु, “सिमोन, न्दा इप्साख्यागानायि? न्दा ए घान्टा चा मेइम्ले वामा ङ्यासागान्ना? 38न्निङ्दा जाचपे ङ्ङाइङान्निभोङ् मेइम्ले पार्थाना चोगानि॥ न्निङ्दा आत्माबे को जेप्पा त्यारिसिगान, ङ्खाॽनिङ्गो न्निङ्दा सालुङ्बे च्हेन काम्जोरसिघा॥”#१४:३८ सालुङ्बे च्हेन साक्ति मान्हा॥
39येसु फेरि ख्याहोङ् ओन्दाङ्हा लोॽवा पार्थाना चोगा॥ 40न्हाङ् उका चेलाचि ङ्वायानाबे लासाआबा॥ ङ्खिङ्बेला चा उका चेलाचि ङ्ङिप्साख्याहा तुप्सुचि॥ ङ्खाचिगा उङ्चि मिक माङ् न्थागानिन, न्हाङ् उङ् इहा पोलोवा पिॽमाहा भोङ् मिॽमा चा ङ्यासुनिन॥
41येसु सुम्ना खेप चेलाचि ङ्वायानाबे लासारायाहोङ् लुचि, “इना न्निङ्दा हाकुचा इम्साङ् आराम चोक्मासिइवाघा? हाकु होइ, सोयानुम, याॽमिगा उच्या लाप्माहोङ् पापिचिगा मुकपे जिम्मा पिॽमाना बेला तायाना॥ 42पोगानि, हाकु खेइ! सोयानुम, का लाप्मेखुबा याॽमि तायाब्यामाना॥”
येसु न्लाबुना
(मात्ति २६:४७-५६; लुका २२:४७-५३; युहान्ना १८:३-१२)
43येसु चेक्मास्यानिङ् एहिच जाना चेलाचि माध्येबे एको याहुदा बाङ्ना च्हेन न्नाबे तायाब्या॥ उङ्नुङ् डाङ्गाक, साम्बेक काप्खुबा प्याक याॽमिचि ङ्वाया॥ ङ्खाचि खाङ्खाङ् हाङ्खुबाचि, धार्मासाप्ला चिन्खुबाचि नुङ् हेकोहा हाङ्गुम्बाचिङा म्बाक्सुक्साचि॥ 44उङ् लाप्मेखुबा याहुदाङा ङ्खा याॽमिचि खाॽला लुक्साचि, “इसा का उम्मा चोग्वाङ् न्नामाङ् येसु ओम, न्निङ्दा लाबुम्घोङ् उचुन पाहारा पियानुम्घोङ् खेतानुम॥” 45न्हाङ् याहुदा सोरोसोर येसुगाबे तायाहोङ् “ओ चिन्खुबा” लुहोङ् उम्मा चोगु॥ 46न्हाङा ङ्खिङ्बेलामाङ् ङ्खाचिङा येसु न्लाबु॥ 47ङ्खाॽनिङ्गो उका उयुम्बे येप्खुबा एकोङा साम्बेक फिगुहोङ् मा-हाङ्खुबागा नोकोरगा उनाभाक च्वाट्टाइ चेन्धाक्तुबि॥
48येसुङा ङ्खाचि लुचि, “इना न्निङ्दा एको खुसुबाङ् लोॽवा डाङ्गाक, साम्बेकनुङ् का लाप्से ताइघाइ? 49का लेन्लेन निङ्वाफुमापाङ्बे चिन्दुङ्चिङ्निङ् न्लाबागान॥ ङ्खाॽनिङ्गो धार्मासाप्लाबे छेप्ताहा चेॽया पुरा लेङ्नि॥”#लुका १९:४७; २१:३७ 50ङ्खिङ्बेलामाङ् घाक चेलाचिङा येसु न्नाओहोङ् न्लुक्ताख्या॥
51न्नाबे सुतिगा फोप्मा से हाम्खुबा एको वेन्चाबाङ् येसुगा हेक्साङ्-हेक्साङ् लाचोक्मास्या॥ उङ् याॽमिचिङा लाप्मागा न्जोगु, 52ङ्खाॽनिङ्गो उका फोप्मा नाओहोङ् नाङ्गायि लुक्ताख्या॥
येसु माछुम्माबे
(मात्ति २६:५७-६८; लुका २२:५४-५५,६३-७१; युहान्ना १८:१३-१४,१९-२४)
53न्हाङा ङ्खा याॽमिचिङा येसु मा-हाङ्खुबागा पाङ्बे ङ्खेतु॥ न्नाबे खाङ्खाङ् हाङ्खुबाचि, धार्मासाप्ला चिन्खुबाचि नुङ् हेकोहा हाङ्गुम्बाचि चा न्छुप्सामासा॥ 54पात्तुरुस च्हेन उङ्चि युम्बे मेङ्खेॽले योरोक-योरोक वासाङ् ङ्खाचि इक्ताप्तुचि॥ उङ् मा-हाङ्खुबागा पाङ्गा चारामबे तायाब्याहोङ् पालेचिनुङ् सोरि युङाहोङ् मि हुन्चामा तारोक्तु॥
55खाङ्खाङ् हाङ्खुबा नुङ् माछुम्माबेॽहा घाकङा येसु सिमागा लागि उका बिरुद्दाबे पार्मान ङ्योगु, ङ्खाॽनिङ्गो इहाचा न्दुप्सुनिन॥ 56प्याक याॽमिचिङा येसुगा बिरुद्दाबे मेन्हा-मेन्हा पार्मान म्बिचि, ङ्खाॽनिङ्गो ङ्खाचि इसागा चा चेॽया न्दोङान॥ 57न्हाङा इखिङ् याॽमिचि म्बोगाहोङ् येसुगा बिरुद्दाबे खाॽलाहा पार्मान म्बि, 58“ना याॽमिङा खाॽला कायाना कानिङ् खेप्सुक्सुम्ङाना, ‘याॽमिङा न्जोगुना ना निङ्वाफुमापाङ् होराहाक्स्वाङ्होङ् सुम लेनङा याॽमिचिगा मुकङा न्जोगान्ना निङ्वाफुमापाङ् चोग्वाङ्ना॥’”#युहान्ना २:१९ 59उङ्चिङा म्बिना ना पार्मान चा न्दोङान॥
60न्हाङा घाक याॽमिचिगा ओन्दाङ् मा-हाङ्खुबाङा येबाहोङ् उङा येसु छिम्दु, “न्दा इजाङ् न्जेङ्मेकान्ना? ङ्गा बिरुद्दाबे खाचिङा म्बिॽमासिम्मेहा पार्मानगा उतुम्बे ङ्गा कामाहा इहाचा मान्हा?” 61ङ्खाॽनिङ्गो येसु इच्चा मेङ्गाले स्वाक वायामासा॥ फेरि मा-हाङ्खुबाङा छिम्दु, “इना न्दा जेप्पा पाबित्तारा निङ्वाफुमागा उच्या खिरिस्टकान्यि?”
62येसुङा ङ्खाचि लुचि, “ओम्बा, का ओम्ङान! न्हाङ् इलेन न्निङ्दा याॽमिगा उच्या घाक हाक्निङ् साक्तिसालि निङ्वाफुमागा छुप्ताङ् उमुक पोटि युङाना नुङ् वालोकपाहाङ् खिम्फुरुम्माबे तायेॽना निस्वाम्गाना॥”#दानिएल ७:१३
63खा चेॽया खेप्सुहोङ् मा-हाङ्खुबाङा ओलोक खोॽमाङा ओतेक छिन्नाहाङ्साङ् खाॽला काया, “हाकु कानिङ् हेकोहा इहाचा पार्मान चाहा न्जोङ्मेन्हा! 64ना याॽमिङा निङ्वाफुमागा निन्दा चोगुना चेॽया गो न्निङ्दा खेप्सिम्गा बा! लु हाकु न्निङ्दा इ काइवाघा?” ङ्खाचि घाकङा ङ्गाया “ना याॽमि सिमाना॥”#लेबि २४:१६ 65न्हाङा न्नाबे ङ्वायाहा इखिङ्ङा उङ् थोक्मा न्दारोक्तु, न्हाङ् इखिङ्ङा च्हेन उमिक ङ्ङेप्तुबिहोङ् उनाम्छेङ्बे फेक्साङ् खाॽला न्लु, “लु काया, न्दा इसाङा मोक्तागाना?” उङ् कुखुबा पालेचिङा चा उङ् मोक्साङ् ङ्खेतु॥
पात्तुरुसङा येसु इन्कार चोगुना
(मात्ति २६:६९-७५; लुका २२:५६-६२; युहान्ना १८:१५-१८,२५-२७)
66पात्तुरुस मो चारामबे युङामासानिङ् मा-हाङ्खुबागा एको नोकोरनि न्नाबे ताया॥ 67न्ना नोकोरनिङा पात्तुरुस मि हुन्चामास्याना निसु, न्हाङ् उयुम्बे ख्याहोङ् उचुन सोसाङ् छिम्दु, “न्दा गो नासारातपेॽना येसुनुङ् वायागाना मेन्नायि?”
68पात्तुरुसङा पोलोवा पि, “मेन्ना, ना न्दा इ कामासिम्मेकाना? का उङ् चिनान्जोग्वाङान्ना॥” न्हाङा पात्तुरुस पाखा लोम्माना वालाम्बुङ् पोटि ख्या, ङ्खिङ्बेलामाङ् तितिॽलिङ्वा काया॥
69न्ना नोकोरनिङा न्नाबे ङ्वायाहा याॽमिचि फेरि लुचि, “मेन्ना ना याॽमि गो येसुगा चेलाचि माध्येबे एको ओम॥”
70ङ्खाॽनिङ्गो पात्तुरुसङा फेरि चा “का मेॽङान्ना” लुचि॥ मिहेक्साङ् न्नाबे योरोक-खेरेक ङ्वायाहा याॽमिचिङा पात्तुरुस न्निसुहोङ् न्लु, “जेप्पा न्दा ङ्खाचि माध्येबे एकोगान, इजाङ्बाङ्निङ् न्दा चा गालिलि माङ् ओम्गान॥”
71ङ्खाॽनिङ्गो फेरि चा पात्तुरुसङा कासाम चासाङ् लुचि, “का लेम्चाॽनेनिन्हा ओमभोङ् निङ्वाफुमागा दान्डा काबेॽमाङ् आनि, का जेप्पा लुमेॽनेनिन्हा उङ् का चिनायि न्जोग्वाङान्ना?”
72ङ्खाॽला कायाना सोलोक हेकोना खेप चा तितिॽलिङ्वा काया॥ न्हाङा येसुङा लुहा खा चेॽया पात्तुरुसङा मितुरोक्तु “हिप्मा तितिॽलिङ्वा कामा हाक्निङ् ओन्दाङ् ‘का उङ् चिनान्जोग्वाङान्ना’ कासाङ् का सुम्मा इन्कार चोङ्मेङ्गाना॥” न्हाङ् खा चेॽया मिसाङ् उङ् इब्बे-इब्बे हाप्मा तारोक्तु॥
Currently Selected:
मार्कुस 14: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
