मार्कुस 15
15
येसु पिलातासका उयुम्बे
(मात्ति २७:१-२,११-२६; लुका २३:१-५,१३-२५; युहान्ना १८:२८–१९:१६)
1भेनिक लेक्साहोङ् सोलोक खाङ्खाङ् हाङ्खुबाचि, याहुदि हाङ्गुम्बाचि, धार्मासाप्ला चिन्खुबाचि नुङ् माछुम्माबेॽहा घाक याॽमिचि माछुम्माबे न्छुप्सा॥ न्हाङा येसु न्थुन्दुहोङ् ङ्खाचिङा रोमिचिगा माडा-खाङ्खाङ्बा पिलातासकाबे ङ्खेतु॥ 2पिलातासङा येसु छिम्दु, “इना न्दा याहुदिचिगा हाङ् ओम्गान्यि?”
येसुङा पोलोवा पि, “न्दामाङ् ङ्खाॽला कामासिम्मेका॥” 3न्नाबे खाङ्खाङ् हाङ्खुबाचिङा येसु प्याक चेॽयागा आप्दिक ङ्ङेन्दु॥ 4न्हाङा पिलातासङा उङ् फेरि छिम्दु, “सो, याॽमिचिङा खिङ्हा आप्दिक ङ्ङेम्मासिमेका, न्दा इजाङ् इच्चा ङ्गामेकान्ना?”
5ङ्खाॽनिङ्गो येसुङा इहाचा पोलोवा म्बिन॥ खा निसुहोङ् पिलातास आच्चाम्मा एता॥
6फोङ्होक्नामगा बेलाबे याॽमिचिङा “लेहाक्सु” न्लुना एको छेक्पा पिलातासङा लेन्नाहाङ्माना उङ्चिगा चालान साया॥ 7ङ्खिङ्बेला बाराब्बा बाङ्ना एको याॽमि छेक्पाङ्बे न्छेक्तुक्सा॥ न्नाङा हेकोहाचिनुङ् तोङाहोङ् आन्दोलानबे याॽमि सिसुक्साचि॥ 8न्हाङा प्याक याॽमिचि पिलातासकाबे ङ्ख्याहोङ् “ओन्दाङ्हा लोॽवा नापालिक चा एको छेक्पा लेताब्या” भोङ् उङ्चि मुक म्फाक्तुचि॥ 9पिलातासङा ङ्खाचि लुचि, “ङ्खाॽलाभोङ् न्निङ्गा लागि याहुदिचिगा हाङ् ल्वाम्गाना याॽमि लेम्बिॽनेनिन?” 10इजाङ्बाङ्निङ् खाङ्खाङ् हाङ्खुबाचिङा उङ्चि नाहेम्माङा येसु उकाबे न्दाना बाङ्ना चेॽया पिलातासङा था वाया॥
11ङ्खाॽनिङ्गो खाङ्खाङ् हाङ्खुबाचिङा याॽमिचि न्थेन्दुचिहोङ् “येसु मेन्ना, बाराब्बा माङ् लेताब्या” भोङ् ङ्गामेतुचि॥ 12पिलातासङा ङ्खाचि फेरि छिम्दुचि, “न्निङ्दा याहुदिचिगा हाङ् ल्वाम्गाना याॽमि च्हेन का इ चोगुङ्?”
13ङ्खाचिङा ओक्साङ् न्लु, “न्ना कुरुसपे छुएन्दु॥”
14पिलातासङा ङ्खाचि छिम्दुचि, “इजाङ्? नाङा इहा इसिॽहा काम चोगुक्सुहा?”
ङ्खाॽनिङ्गो झान तुक्नुङ् ओक्साङ् न्लु, “न्ना कुरुसपे छुएन्दु॥” 15न्हाङा पिलातासङा ङ्खा याॽमिचिगा निङ्वा तामेॽमागा बाराब्बा लेतुबिचि, न्हाङ् येसु च्हेन कोर्रा एम्माहोङ् कुरुसपे छुॽनेम्मागा रोमि काङ्बाचि जिम्मा पिचि॥
काङ्बाचिङा येसु खिजे न्जातुना
(मात्ति २७:२७-३१; युहान्ना १९:२-३)
16काङ्बाचिङा येसु पेरेटोरियान बाङ्ना पाङ्होङ्बे ङ्खेतु, न्हाङ् न्नाबेॽहा घाक काङ्बाचि उका ओरिपोरि न्छुप्सुचि॥ 17ङ्खाचिङा येसु बाइजानि राङ्गा तेक ङ्वाॽमेतु न्हाङ् तिङ्गिभाक्का मुकुट् न्जोगुहोङ् म्फोम्मेतु॥ 18न्हाङा ङ्खाचिङा उङ् “याहुदिचिगा हाङ्गा जायजायकार लेङ्नि!” लुसाङ् न्सेमेतु॥ 19ङ्खाचिङा मिक्लागा डाङ्गाकङा येसुगा उटुखुरुकपे मोक्साङ् न्थोक्तु, न्हाङ् उका ओन्दाङ् लाङ्छुकपे युङ्साङ् न्सेमेतु॥ 20ङ्खाचिङा येसु खाॽला खिजे न्जातिहोङ् उङ् ङ्वाॽमेतुना बाइजानि राङ्गा तेक म्फुक्सुबि न्हाङ् उका ओतेक ङ्वाॽमेतुहोङ् कुरुसपे छुॽनेम्मागा ङ्खेतु॥
येसु कुरुसपे न्छुएन्दुना
(मात्ति २७:३२-४४; लुका २३:२६-४३; युहान्ना १९:१७-२७)
21लाम्बुबे ङ्खेॽमास्यानिङ् उङ्चिङा कुरेनि बाङ्ना ठोङ्बे वाखुबा सिमोन तेनभाङ् आॽमास्याना न्दुप्सु॥ उङ् आलेक्जेन्डार नुङ् रुफास बाङ्हा याॽमिचिगा उङ्चि पा साया॥ काङ्बाचिङा उङ् जोबारजोस्ति येसुगा कुरुस ङ्खुॽमेतु॥#रोमि १६:१३ 22न्हाङा ङ्खाचिङा येसु गाल्गाथा बाङ्ना ठोङ्बे ङ्खेतु॥ गाल्गाथागा तुम्बिला ओम “खाप्पारे ठोङ्॥” 23न्नाबे न्दासुहोङ् ङ्खाचिङा येसु मुर्रा बाङ्हा सिधाक फासाहा सिम्लेॽमाङ्गा माध ङुङ्मेतु, ङ्खाॽनिङ्गो येसुङा ङ्ङुङुन॥ 24न्हाङा ङ्खाचिङा येसु कुरुसपे न्छुएन्दु॥ न्हाङ् उका तेक इसा-इसागा उनिङ्बे इहा-इहा आमेहा भोङ् ङ्खा काङ्बाचिङा चिठ्ठा ङ्ङेन्दुहोङ् ङ्हाप्सु॥#छेम २२:१८
25येसु कुरुसपे न्छुएन्दुनिङ् भेनिक्का पा मोक्तुक्सा॥ 26काङ्बाचिङा येसुगा उटुखुरुक छोङ्बे उङ् आप्दिक एन्दाना चेॽया “याहुदिचिगा हाङ्” छेप्ताना फालेक चा ङ्युक्सुबि॥ 27येसु कुरुसपे न्छुएन्दुनिङ् ङ्खाचिङा हिप्पाङ् खुसुबाङ्चि चा येसुगा छुप्ताङ् नुङ् फेक्साङ्पोटि न्छुएन्दुचि॥ 28[खाॽला धार्मासाप्लाबे छेप्ताहा खा चेॽया पुरा लेक्सा, “उङ् इसिॽहा काम चोक्खुबाचिनुङ् निराना॥”]#यासाइया ५३:१२
29ङ्खिङ्बेला न्ना लाम्बु लाम्खुबा याॽमिचिङा उङ्चि टुखुरुक योङ्साङ् येसु खाॽला खिजे न्जातु, “सोयानुम्घायि, निङ्वाफुमापाङ् होराहाक्स्वाङ्होङ् सुम लेनबे चोग्वाङ्ना काखुबा!#छेम २२:७; १०९:२५; मार्कुस १४:५८; युहान्ना २:१९ 30ओए, न्दा कुरुसपाहाङ् मो उक्सा, न्हाङ् आफाइ हिङा!”
31ङ्खाॽलामाङ् खाङ्खाङ् हाङ्खुबाचि नुङ् धार्मासाप्ला चिन्खुबाचिङा चा उङ्चि-उङ्चि खाॽला कासाङ् येसु खिजे न्जातु, “नाङा हेकोहा याॽमिचि गो हिङ्मेतुचि, ङ्खाॽनिङ्गो उङ् आफाइ च्हेन हिङ्मेॽमा ङ्यास्वान्ना॥ 32ओ इजिरेलिचिगा हाङ् खिरिस्ट, कुरुसभाङ् मो उक्सा, कानिङ् चा सोन्सोॽनेनिन! न्हाङा च्हेन बिस्वास चोङ्मेॽनेनिन्ना!” ङ्खाचिङा से मेन्ना, येसुनुङ् कुरुसपे न्छुएन्दुचिहा ङ्खा खुसुबाङ्चिङा चा उङ् खिजे चाताचु॥
येसु स्याना
(मात्ति २७:४५-५६; लुका २३:४४-४९; युहान्ना १९:२८-३०)
33न्हाङा लेॽनि लेन्लुम नाहाङ्तो सुम मोक्तुनिङ् सोम्मा न्ना खाम्युक भोरि कुइम लेक्सा॥ 34सुम मोक्तुनिङ् लोप्पि येसुङा माडा ओसेम्लाङा खाॽला काया, “इलोइ, इलोइ लामा साबाखाथानि?”#१५:३४ आरामेइक चेॽयाभाङ् नागा तुम्बिला ओम, “ओ आका निङ्वाफुमा, ओ आका निङ्वाफुमा, न्दा का इजाङ् नासिॽयाङ्गाना?”#छेम २२:१
35येसु खाॽला कायाना ङ्खेप्सुहोङ् न्नाबे योरोक-खेरेक येप्खुबा इखिङ् याॽमिचिङा खाॽला ङ्गाया, “खेप्सानुम्घायि! नाङा निङ्वाफुमाभाङ् चेक्खुबा एलिया काॽमासिमेॽना॥” 36न्हाङा ङ्खाचिबे एको लुक्साङ् ख्याहोङ् सुहा सिम्लेॽमाङ्गा उवाबे झुम्रो लुप्सु, न्हाङ् न्ना झुम्रो डाङ्गाकपे ङ्गितुहोङ् येसुगा उयाबे एम्बिसाङ् खाॽला लु, “स्वाक्सेनि यो, एलिया तामेहोङ् उङ् कुरुसपाहाङ् लोन्द्वाना येम?”#छेम ६९:२१ 37न्हाङा येसु माडा सेम्लाङा ओक्ताहोङ् ओसोक्मा लेहाक्सु॥
38ङ्खिङ्बेलामाङ् निङ्वाफुमापाङ् होङ्बे छुयाना पार्दा तोन्धाङ् मो सोम्मा हिच भाक लेङ्नुङ्गा छिनाख्या॥#पारास्थान २६:३१-३३ 39न्हाङा येसुगा खाॽला ओसोक्मा ख्याना निसुहोङ् कुरुसका उयुम्बे येबामासाना रोमि केप्टेनङा खाॽला काया, “जेप्पा ना याॽमि गो निङ्वाफुमागा उच्यामाङ् सायामाना॥” 40ङ्खा घाक चेॽया एकोहिप्पाङ् मामुचिङा चा माङ्दुन्धाङ् न्सोनेसुक्सा॥ ङ्खाचिबे मारियाम माग्दालिनि, मिना याकुब नुङ् योसेफका उमा मारियाम नुङ् सालोमि न्साया॥ 41येसु गालिल लिङ्खामबे वायानिङ् ङ्खाचिङा येसुगा हेक्साङ् लान्जोगाहोङ् उका सेवा न्जोगुक्सा॥ येसुनुङ् यारुसालेम सोम्मा ताखुमा हेकोहाचा प्याक मामुचि न्नाबे ङ्वाया॥#लुका ८:२-३
येसुगा लास सियापाङ्बे ङ्युक्सुना
(मात्ति २७:५७-६१; लुका २३:५०-५६; युहान्ना १९:३८-४२)
42न्ना लेन च्हेन आराम चोक्माना लेनगा लागि त्यार लेङ्माना लेन साया, न्हाङ् नाम आहेक्सासा॥ 43आरिमाथिया साहारबेॽना योसेफ बाङ्ना याॽमिङा न्ना लेनमाङ् मेङ्गिसिॽले पिलातासका उयुम्बे ख्याहोङ् येसुगा लास नाक्तु॥ योसेफ च्हेन घाक याॽमिङा आदार न्जोगुना माछुम्मागा एको सादास्या साया॥ उङा निङ्वाफुमागा राज्यागा लाम्बु सोनेसुक्सा॥
44येसु स्याना चेॽया खेप्सुहोङ् पिलातास आच्चाम्मा एता॥ न्हाङा उङा रोमि केप्टेन काहोङ् “येसु स्याना ओम्येम मेन्नायेम” भोङ् छिम्दु॥ 45केप्टेनङा येसु जेप्पा स्याना बाङ्ना चेॽया खेम्मेतुहोङ् पिलातासङा योसेफ येसुगा लास खेॽमापि॥ 46न्हाङा योसेफङा सुतिगा तेक इनुरा, न्हाङ् येसुगा लास मो आएन्दुहोङ् तेकङा कितु, न्हाङ् लुङ्खाकपे खोन्दाना सियापाङ्बे युक्सु॥ न्हाङा सियापाङ्गा उयाबे एको माडा लुङ्खाकङा एप्तोओ॥ 47मारियाम माग्दालिनि नुङ् योसेफका उमा मारियामङा येसु सियापाङ्बे ङ्युक्सुना सोयामासाचु॥
Currently Selected:
मार्कुस 15: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
