मार्कुस 16
16
येसु स्यानाभाङ् हिङ्गिलिक लेक्साना
(मात्ति २८:१-८; लुका २४:१-१२; युहान्ना २०:१-१०)
1आराम चोक्माना लेन मेन्दाहोङ् मारियाम माग्दालिनि, याकुबका उमा मारियाम नुङ् सालोमिङा येसुगा लासपे नेक्मागा खुम्दु नाम्खुबा किवा ङ्ङिनु॥ 2न्हाङ् हेक्साङ्ना लेन#१६:२ हाप्तागा इम्ना लेन॥ भेनिक नाम लोन्दाहोङ् ङ्खाचि येसु ङ्युक्सुना सियापाङ्बे ङ्ख्या॥ 3लाम्बुबे ङ्खेॽमास्यानिङ् उङ्चि-उङ्चि खाॽला कासाङ् ङ्ख्या, “सियापाङ् एप्ताना लुङ्खाक कानिङ् इसाङा लेङ्नाहाङ्बिमेहा?” 4ङ्खाॽनिङ्गो सियापाङ्बे न्दासुनिङ् ङ्खिङ्ना लुङ्खाक योरोक लेक्साहाक्सामासाना न्निसु॥ 5न्हाङ् ङ्खाचिङा सियापाङ्होङ्बे ङ्ङुयाहोङ् न्सोनिङ् न्नाबे एको फुहा तेक वाखुबा वेन्चाबाङ् सियापाङ्गा छुप्ताङ् पोटि युङामासाना न्निसु॥ न्ना न्निसुहोङ् ङ्खाचि आच्चाम्मा ङ्ङेता॥ 6ङ्खाॽनिङ्गो न्ना वेन्चाबाङ्ङा ङ्खाचि खाॽला लुचि, “ङ्गिसितानिन! का था वान्ने न्निङ्दा कुरुसपे न्छुसिना नासारात बेॽना येसु योक्मासिइवाघा॥ सोयानुम, उङ् नाबे मान्ना॥ उङ् गो हिङ्गिलिक लेक्साहोङ् खेब्याना, मानुङ् उङ् ङ्युक्सुना ठोङ् सोयासानुम॥ 7हाकु न्निङ्दा खेइघोङ् उका चेलाचि नुङ् पात्तुरुस खा सालेन खेम्मेतानुम्चिम ‘येसु न्निङ्गा ओन्दाङ्-ओन्दाङ् गालिलबे खेॽमासिमेॽना॥ उङा न्निङ्दा लुइघा लोॽवा उङ् न्नाबे निस्वाम्गाना॥’”#मात्ति २६:३२; मार्कुस १४:२८ 8न्हाङा ङ्खा मामुचि किसिॽमाङा योङ्साङ् सियापाङ्भाङ् न्लोन्दाहोङ् लुक्साङ् ङ्ख्या॥ ङ्खाचिङा खा चेॽया इसा चा न्लुन्चिनिन, इजाङ्बाङ्निङ् ङ्खाचि तुक्नुङ् ङ्गिसितामासा॥
येसु चेलाचिगाबे ओताना
(मात्ति २८:९-२०; लुका २४:१३-५३; युहान्ना २०:११-२३; सेगुम्पाक १:४-११)
9[हाप्तागा इम्ना लेन भेनिक येसु स्यानाभाङ् हिङ्गिलिक लेक्साहोङ् घाक हाक्निङ् ओन्दाङ् मारियाम माग्दालिनिगाबे ओता॥ न्ना मारियामभाङ् उङा ला ओटा इसिॽहा मुइचि लोन्धाक्सुक्साचि॥ 10मारियाम माग्दालिनि ख्याहोङ् खा चेॽया येसुगा चेलाचि योक्मेतुचि॥ ङ्खिङ्बेला ङ्खाचि बिलाप चोक्साङ् ङ्हाप्मास्या॥ 11उङा येसु हिङ्गिलिक लेक्साना नुङ् उङा आफाइङा निसुना चेॽया ङ्खाचि योक्मेतुचि, ङ्खाॽनिङ्गो ङ्खाचिङा उका चेॽया पात्ते न्जोगुनिन॥
12न्हाङा हेकोना तेन पोटि खेॽमास्याचिहा हिप्पाङ् चेलाचिगाबे येसु ओता, ङ्खाॽनिङ्गो उङ् घाक हेकोना लेक्सामासा॥ 13ङ्खाचि तायाचिहोङ् खा चेॽया हेकोहा चेलाचि खेम्मेताचुचि, ङ्खाॽनिङ्गो उङ्चिङा फेरि चा खा चेॽया पात्ते न्जोगुनिन॥
14मिहेक्साङ् एए जाना चेलाचिङा न्जोहेक्सुसानिङ् येसु ङ्खाचिगा उलुम्बे ओता॥ ङ्खाचिगा निङ्वा छाक्ना न्जोगुहोङ् उङ् स्यानाभाङ् हिङ्गिलिक लेक्साना निखुबाचिगा चेॽया बिस्वास न्जोगुनिन्हाङा उङा ङ्खाचि थिन्दुचि॥
15न्हाङा येसुङा ङ्खाचि खाॽला लुचि, “कायुङ्लेनगा घाकपे खेइघोङ् घाक याॽमिचि नुसाला खेम्मेतानुम्चिम॥#सेगुम्पाक १:८ 16बिस्वास न्जोग्वाहोङ् बाप्तिस्मा लियाचोक्खुबाचिङा मुक्ति न्दोक्त्वा, ङ्खाॽनिङ्गो बिस्वास मेन्जोक्खुबाचिङा च्हेन दान्डा न्दोक्त्वाना॥ 17बिस्वास चोक्खुबाचिगा हिङ्लुङ्भाङ् खाॽलाहा चिङ्गो न्लेङ्मे, उङ्चिङा आनिङ्बे इसिॽहा मुइचि न्लोन्धाक्स्वाचि न्हाङ् ओछोङाहा हेकोहा चेॽयाबे#१६:१७ भासाबे न्जेङ्मे॥ 18ङ्खाचिङा पुछाकचि न्लाब्वाचि, न्हाङ् बिस नुङ्हा उङ्माहा थोक ङ्ङुङुभोङ्चा ङ्खाचि इङा चा ङ्हावान्चिन्हा॥ ङ्खाचिङा तुखाबाङ्चि छोङ्बे उङ्चि मुक ङ्युक्स्वाचि न्हाङ् ङ्खा तुखाबाङ्चि न्नुमे॥”
येसु वालोकपे ख्याना
19येसुङा उका चेलाचि खिङ् लुइचिहोङ् उङ् वालोकपे चान्दाख्या, न्हाङ् उङ् निङ्वाफुमागा छुप्ताङ् पोटि युङा॥#सेगुम्पाक १:९-११ 20न्हाङा ङ्खा चेलाचिङा घाक ठोङ्बे ङ्ख्याहोङ् नुसाला ङ्खेम्मेतुचि॥ हाङ्बाङा उङ्चिनुङ् वायाहोङ् काम चोगु न्हाङ् उङ्चिङा ङ्खेम्मेतुचिहा नुसाला जेप्पाहा ओम बाङ्ना चेॽयागा पार्मान आच्चाम्माहा कामभाङ् पिचि॥]
Currently Selected:
मार्कुस 16: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
