Va'Atəŋ 18
18
Maŋgəlva anah Sara watərah wiyna
1Yawe arbanək zən aza Abraham ammbet wəleŋɗe adawyaŋ na, Elon na Mamre, tay ɗewwe ama gizlirke aka tataŋpaya. 2#IBR 13:2Haran le'egin na, awle ɗiy yeŋ hoku ziwziw a maŋgavani. Anzan sə ma gizlirke nak vi kawləm siti, ndən afuŋ guduku, 3amna: «Yawe, va wakətaf su na, kamə kətoŋ faraɗa səza gawla nok ɓa. 4Dəkiyaŋ sukumən iŋkile siɗikke nawɗa tulkum, kamə məffet ammba wəlaŋgaŋka. 5Nəkay sukumgən peŋ, zukum dəppet kəmbataŋgəni, adan kətoŋgoŋ go'o də na gawla nokum da.» Yaŋ aɓɗaŋ na: Ha'aw aɗɗa va kənahə. 6Abraham agəmək zən kəla gizlirke azat Sara, amna: «Agəm zuko! Andə gəpa kukuɗ tasa hoku, allaɓa, adə peŋ-məsleprekeɗe!» 7Yaŋ Abraham anzan azet wasliɗe, arəm wət wasliyək mbaŋmbaŋgə. Apsənət gawla, afotət də kakara.
8Agəm moŋvo məŋgboŋgən gəm məllayən, dət wasliyək mədət nak abet seki; azəmənən tay ziwe azet ammba wəlaŋga adaka. 9Apsənən na: «Aŋgattə, guluk nok Sara di?» Azlan siti: «Yakəŋ, a gizlirke.» 10#ROM 9:9Amna: «nədamndaw dukki anok da, wanərəhət guluk nok Sara tuwək wiyna.» Mbara, Sara tat əprəmən səma gizlirke dərɓagani.
11Abraham dət Sara agalaŋka, mazzeɗiŋgə, Sara təppanək ədəm koɗo. 12#1PI 3:6Sara tətəŋ əmas də makrata, təmna: «Va nəsaw kursuk kursukəŋ na, wəray na ɗəf mizilin wasan azaw ɓa, daya naw sən kiyən agalka!» 13Yawe anah sən Abraham na: «Vimi Sara tədawmas dawnəh na: “gəsiŋgi wanəwə, in mazzakəŋ sa di?” 14#LUK 1:37Zəga tay nawsan va sekene aza Yawe sa? Aka pay nədamndaw azok dukkiyo, Sara tuwək wiyna.» 15Sara təŋgəslək maɓɓelme təmna: «Naw nəmas ɓa», vi geslne armətəka. Apsət na: «Kəmas ɓa miy di.»
16Ɗiy agəmənək tive nawmbat a Sodom; Abraham tay əmbat dənɗaŋ əlhẽti. 17Yawe amna: «Wanəɗaman zəga an nədaɗɗa sən Abraham sa? 18Abraham wakkpaŋ vanday metiŋgin gboŋgboŋgu, vanday naka dələv pak warahaŋ əzaɓ ammbani, 19Vi nəsənka, waɗi wən nan sit kirtin də gəla nan dərɓagan dəzbanəngən tive na Yawe, də wədaw təstəs məza əmzlah ɓa; vasna Yawe waknahan an anah far sən Abraham.» 20Yawe amna: «Ɗiy tahəŋ əɓuhnən met aka Sodom də Gomorra day, mambray net təɓeltəɓeliyi, 21aslək nəmbatgən ulani, an va ɗiy adawɓuhnən met agap hã azawəŋkiy gesiŋ. An gesiŋgi, gesiŋgi ɓa, wanəsəna.»
22Ɗiy nek aziynənək heret a Sodom. Abraham, nan tay ziwwe aba Yawe tagay, 23Abraham zar azani, amna: «Gesiŋ wakəzan ɗəf təstəs də an dəraygən sa? 24Kuzuŋ kawrəhi ɗiy təstəs kaklaw sle' a walaŋgəla-metiŋ vani! Wakəzan walaŋgəla van, məza əbewgən ammbet ɗiy təstəs kaklaw sle' nadakəŋ ɓa sa? 25Dəslə kəgəɗgən vas kəta ɓa! Əzan ɗəf təstəs də an dəraygəni? Ɗəf təstəs də an dəraygən pak məstaka sa? Dəsle sle'sa ɓa! Mətawwən naka dələv gboŋ dayday aɗɗa na də tive təstəs ɓa sa?» 26Yawe azlan sən na: «An nərahək ɗiy təstəs gap kaklaw sle' a walaŋgəla na Sodom na, aka batamit kaka' wanəvvuyon mambray na walaŋgəla-metiŋ vani.»
27Abraham anah əmpa, amna: «Wanəkol maw əpel sən Yawe, in məs ologudum gəm moŋglo ɗarəŋka. 28Kuzuŋ sə weleŋgit ɗiy təstəs kaklaw sle'iŋ tahəŋ ɓa sle'i, wakəzan walaŋgəla van sa?» Amna: «Nəzan na, an nərahək ɗiy təstəs kaklaw poɗo kiyit sle' ɓa.»
29Abraham amsak əgəm əpel əmpa anah səni: «Mbərən ɓa adak van na kawrəh kaklaw poɗo!» Amna: «Viyit ɗiy kaklaw poɗeski, nəzan na ɓa.»
30Amsakək əpele: «Yawe gədəvuk adawda an in tat əpel ɓa; mbərən ɓa, adak van na kaklaw hokuŋ soko!» Amna: «Viyit ɗiy kaklaw hokiski, nəzan na ɓa.»
31Amsak əpel na, wanəsok zu əpel sən Yawe: «mbərən ɓa adak van na ɗiy kaklaw sulaŋ soko» Amna: «Viyit kaklaw suleski, nəzan na ɓa.»
32Yaŋ amsak ənaha: «Əpel naw gərak yaŋka Yawe guduvuk adawda ɓa: mbərən ɓa, adak van na kəlawəŋ kaka'ə!» Amna: «Viyit ɗiy kəlawiski, nəzan na ɓa.»
33Yawe ambatək adan agrak əzga meŋ də Abraham yas Abraham amil ananda.
Currently Selected:
Va'Atəŋ 18: GBD
Highlight
Share
Copy
Want to have your highlights saved across all your devices? Sign up or sign in
All right reserved
