Va'Atəŋ 19
19
Lot akõhuk səma wəray na Sodom
1Maslayɗe sula nek agapaŋgək a Sodom də moskoyo, Lot tay ɗewwe a memeŋgle na Sodom. Awleke, ndən le' ədda wələm siti, ndən guduk, kiyən tək afuŋgu. 2Amna: «Kamə, deyeɗe nawa, mide ana gawla nokumda, məvoŋ ananda, kəɗanəngən təlkum, kəlvəɗaŋgən əgəm tive nokum.» Yaŋ azlan sənən na: «Owwo! Aməvoŋ appaka aŋka.» 3Vasna Lot ampak tələn azeti, ndəɗaŋ mbəzlah tek ananda. Adə sitik peŋ, adə sit peŋ məza wuɗo ɓa, ndəɗaŋ namnamə.
4Dəɓəl əvoŋgoŋ tagayɗa ɓa, ɗiy na walaŋgəla-metiŋgin atərwəslənək kigəla, ɗiy na Sodom, təŋ səza wiyin slawraŋga hã gap mazza tukpu'tukpu', ɗiy dəwənnet məza dəwel welsa ɓa. 5#MƏT 19:22-24Ayanən Lot, apsənən na: «Ngahəŋ ɗiy dəzzoŋ anokda na dəfɗəŋ di? Agilgit simə vi misingəni.»
6Lot agilik azet ama maddamba nani, ndən kpuɓ əmsan dərɓagani 7amna: «Kamə, kədawlaŋ gəbay ɓa milmiŋgiɗwa. 8In tat dit gorɗeŋge sula dəsənaŋ ɗəf mizilin ɓa, nəgilgit sukum, kəɗɗaŋgən an kəŋglaŋ dənɗaŋ. Kədaɗɗaŋ zəga sit ɗiy dəzzoŋ anawdaŋ ɓa hara.» 9Azlan sənən na: «Azar səŋka!» Yaŋ apsənən na: «Ɗəfəŋ va molhõyõ yi ade aŋka, adaŋgla wəɗi zən ka məzaɓan wəna! An vaski na, anok mədawgəɗ suk mbərayən daykiyti.» Aslaŋgənənək Lot, azaraŋgək go'o kapɗoŋ mative. 10Ɗiy sula nek atəlnən vet agdəhnən Lot eŋgil a helɓeti. Ndəɗaŋ mative kpuɓu, 11#2MI 6:18yaŋ atipin heret ɗiy na maddamba neki, təŋ səza muzliya, gap aza an metiŋgini; dəɓap ərəhnən maddamba nawtoŋ ɓa.
12Ɗiy sula nek anahaŋ sənən Lot: «Naway nok aŋ əmpa di? Dəhuk sa? Kirtuk mezeŋglet dit muguluŋgit sa? An ɗəf nok tay a walaŋgəlaŋ maɓɓani, agilgit sə walaŋgəlaŋka. 13Arbək na waməzan walaŋgəlaŋka, vi wəɓuhma nakan diyɗa yi aba Yawe. Yawe aslənəm kawzani.» 14Lot agilik ənah sit dəhiŋgiɗin dədawkeynin kirtini, aɓsit na: «Misili! Migil sə walaŋgəlaŋka, vi Yawe wazani.» A maheret dəhiŋgiɗin nek na, va əsmay yi ɗarə.
15Aka təki agəɗ biŋbiŋgi, maslayɗe nek ampanən tilit aza Lot, də wənah na: «Asil! Agəmət ɗak noko, kirtuk muguluŋgit sula neŋkiŋki, vi kədawza ammba mambray na walaŋgəlaŋ ɓa.» 16#2PI 2:7Adan asan gərət gərətə, ɗiy sula nek armanən va Lot agdəhənək, ndən dət ɗak nani, gəm kirtin sula neki vi Yawe awələk sahã akani; agilgitinik sə walaŋgəla a mapoho.
17Pay adawketin a mapoho, anahaŋ sənənək Lot na: «Anzok kəkõhgəngən kiyko. Kədawla dərɓogok ɓa, kədawziw aka dələv maɓɓan aŋ dayday ɓa! Anzok kəlaka gərma vi kədawza ɓa.» 18Lot aɓsit na: «Vaski ɓa Yawe! 19Kamə, balam nok yaŋka kəɗɗak moggon nok viwa, kərban suwək bayna moggon də wəkõhgu səma wəmta. In sən kiyu na nəɓapna ənzaw aka gərəm ndak, məza wəray namta wərəhu ɓa ɓa. 20Kamə, walaŋgələk yakəŋ go'o nanzaw adaka, maw aka ədawɗam adaka. As əssõh zəga siɗikke yi nərahgən əkõh ɓa sa?» 21Apsən na: «Awle! In tat əgəɗ suk moggon əmpa, tay nədawgəɗ sən walaŋgəla məs kəssõhowəŋ ɓa. 22Dok aɗam adak gu'u, zəga tay nədaɗɗa məza kəgap ɓa ɓa.» Vini miya walaŋgəla van na So'ar.
23Pay birndisse, Lot agul a So'ar 24#MAT 10:15; 11:23,24; LUK 10:12; 17:29; 2PI 2:6; YUD 1:7gala Yawe aziy buwən na busuk aka Sodom də Gomorra. Sə disiŋ, səza Yawe ade. 25Aɓzliwik walaŋgəleɗes dit ɗiy net pakə, ɗiy na walaŋgəleɗe gugriɗ vet dit wəlaŋɗe naka dəlvafuŋ. 26#LUK 17:32Ga Lot təwələk dərɓe, ndət kpaŋ va totoŋloŋ.
27Abraham alvəɗək pum a təki aziw aba Yawe naka. 28Aziy haran aka Sodom, Gomorra, də kiva na dələv vanəs pakə; ndən haran sek awla enene səfuŋ ɗəkɗək va enene na movoro.
29Mbara gala Maŋgəlva azet walaŋgəleɗe na kiva na dələv vani, aɗɗumuk aka Abraham, agilginək Lot səddəv wəraya, gala azet walaŋgəleɗe məs Lot asan adaka.
Lot dit kirtin muguluŋgiti
30Lot asilik sə So'ar kadda əsso aka gərəm dit kirtin muguluŋgit sula dəddoŋ dəndən neki. Geslne adak dəssa a So'ar, alək əsan a bətəŋ, ndən dit kirtin sula neki. 31Akən daya tənah sət sawã na: «Afəm mazza yi, zel tahəŋ aka dələv aŋ dəzzoŋgən azam va wəssərək naka dələv gboŋ ɓa. 32Damə! Azlər səm sən mbazla sən afəmə, dəvoŋgəmgəni, məɗigən zeŋve də afəmə.»
33Yaŋ azlərsənən mbazla nak sən afit dəfəɗəska, akən daya təde təvoŋ də afəta, dəsən va təvoŋ ɓa, dəsən va təsil ɓa'e. 34Yaŋ vit pummo nani, akən daya nak tənah sət akən sawã na: «Awle! Na moskoy na: nəvoŋguk də əba. Apsən səm mbazla dəfɗəŋ əmpa, kəmbatgən əvoŋ azani. Mərahgən zeŋve sə kəlazani.» 35Yaŋ azlərsənən mbazla sən afit na dəfəɗ nan əmpa. Akən sawã nak təl əvoŋ də afət naka; dəsən akan va təvoŋ ɓa, may va təsil ɓa'e.
36Kirtin Lot muguluŋgit sulegit pak agəmaŋgək daway də afiti. 37Akən daya təwək wiyna, təlvan na Mo'ab; afit mə Mo'abɗe dəpaŋka. 38Akən sawã tam bok wiyna'e, təlvan na, Ben-Ammi; afit mə Ammonɗe dəpaŋka.
Currently Selected:
Va'Atəŋ 19: GBD
Highlight
Share
Copy
Want to have your highlights saved across all your devices? Sign up or sign in
All right reserved
